John 9
9
1O̱ki. Ka̱kohtaʼpawaawahkaawa oma̱a Jesus. Sota̱minoyiiwa omsstsi̱i ni̱naayi. Na̱a̱psstsiiyinayi. A̱nniai niitsipo̱kaayinai.
2Jesus oso̱tamanikka oma̱nikapiimiksi, “Oma̱a a̱i̱ssksinimaatstohki. O̱o̱ma na̱a̱psstsiiwa, tsika̱a osao̱mmitsipaitapiʼssini iihtani̱stsipokaayi̱waatsi. Ka̱taʼohtanistsipokaayiwaatsi o̱nni ki oksi̱sstsi osao̱mmitsipaitapiiʼssoaawa kia̱ya oosto̱i ota̱wattsaommitsipaitapiʼssini?”
3Jesus sota̱manistsiiwaiksi, “Ki ma̱tohtanistsipokaayi̱waatsi osao̱mmitsipaitapiiʼssini ki o̱nni ki oksi̱sstsi osao̱mmitsipaitapiiʼssoaawa. Noohki̱i̱tsiwa o̱mohtsaapsstsiihpi. Iihtsa̱a̱psstsiiyiwa anniiska A̱ʼpistotookiyi ma̱a̱hkohtsitaistamatstohkssi̱nai mani̱stsskonataʼpsspiayi, manista̱ksokini̱yihpiayi. 4A̱nnohk kiisto̱nnoona a̱ksstsinaaʼnisttotsiihpiaawa amo̱stsia o̱tsstsimaahkakkihpistsi annaahka A̱ʼpistotookiwahka nito̱ʼtsskookahka, annoohk ita̱kohkottanisttotsiihpiaawa. Ma̱taksisamowa a̱kitsawattohkottanisttotsiihpiaawa. Niʼto̱i̱ mi̱i̱ksistanistsiwa koʼko̱si itsa̱watta̱kaohkottaʼpaoʼtakioʼpa. 5Niisto̱wa a̱nnohka tsi̱tsaakiipaitapiiʼyihpihka anno̱o ksa̱a̱hkommi niisto̱wa nita̱o̱hkotayi o̱tapiʼssini ma̱a̱hkitaʼpawaawahkaahsaawa ksistsiko̱i̱nattsi.” 6A̱nniayi a̱a̱niiwa Jesus. Ki a̱i̱ʼtsokottaawa ksa̱a̱hkoi kii iihtsita̱ʼpistotakiwa okspahko̱i. Ki iihtsitsi̱tsstakiwa omsstsi̱i na̱a̱psstsiiyi oa̱psspiksi. 7Sota̱manistsiiwa̱yi “Mato̱iso̱yississkiohsit omiim aohki̱i̱yi. A̱a̱nistoohpa Siloam.” (O̱ki. A̱a̱mohka Siloam anista̱panioʼsina oʼtsska̱kssini.) O̱ki. Amsta̱a ni̱naawa o̱o̱maoʼka a̱i̱ʼtapoowa. Ki a̱i̱ʼssisskiohsiwa. Sota̱msskaistoowa ki a̱ohko̱ttsaapiwa.
8O̱ki. Ki otsi̱i̱hkawaiksi ki omi̱i̱ksi ota̱i̱sookainookiksi ota̱o̱ʼmootaʼpaokamanissi oso̱taminookaiksi. Ki a̱o̱ʼmatamaniiyaiksi “A̱nnaoʼk annaahka a̱i̱sokitaopiiwahka a̱o̱kamaaniwahka.” 9Ki anni̱i̱ksi mattsstsi̱kiiksi a̱a̱niiyaawa, “A̱a. A̱nnaoʼka.” Kii anni̱i̱ksi a̱a̱niiyaawa, “Saa, ma̱tamiiwa. Iiki̱totoisapinamma.” Kii oma̱a ni̱naawa sota̱mikakawaaniiwa, “Ki nisto̱akaoʼka.”
10Itani̱stsiiyaawayi, “Ki ikkama̱a̱miiniki, tsa̱ kani̱stohkottsaapihpa?” 11Ki itani̱i̱wa, “Ki oma̱a̱hk a̱a̱nistawahka Jesus a̱ʼpistotakiwa okspahko̱yi ki itsi̱tsstakiwa noa̱psspiiksi ki nitsi̱tanikka, ‘Istapo̱o̱t Siloam. Istoto̱i̱ssisskiohsit.’ Ki niso̱tamitotoississkioohsi. Nisotamohko̱ttsaapi.” 12Oma̱a iikaya̱apsstsiiwa oso̱tamanikkaiksi, “Annaatsiksi?” Itani̱i̱wa, “Nima̱a̱tssksiniʼpa.”
13O̱ki. Ki a̱nnika oma̱a ni̱naawa a̱nnaoʼka sota̱mitapipiawa omi̱i̱ksayi anista̱pssiiyaawa Pharisees ma̱a̱hki̱tsopoahtsiiʼsa̱yissaaiksi ki itsi̱ssipoyattsaawa oma̱a i̱i̱kayaapsstsiiwa.
14O̱ki. Ki a̱nnihka ksiistsiko̱yihka issiko̱piiksistsikowa. Ki Jesus isskohta̱ʼpistotaki okspahko̱yi ki̱i̱wa o̱tssikopiiksistsikohpi, ki itohko̱ttotoyiiwayi ma̱a̱hksaapssayi.
15O̱ki. Ki oma̱a i̱i̱kayaapsstsiiwa oma̱tta̱i̱sopahtsiʼsakka omi̱i̱kska Pharisees tsa̱a̱htaa a̱a̱hkanistohko̱ttsaapiiwahtaoʼtsiksi. Ki itani̱stsiiwaiksi, “I̱tstakiwa okspahko̱yi noa̱psspiksi. Niso̱tamssisskiohsi. Niso̱tamohko̱ttsaapii.”
16O̱ki. Ki a̱nnihkayii ami̱i̱ksi noohka̱ttanistapssiiksi Pharisees sota̱maniiyaawa, “Anna̱a̱hka Jesusahka ma̱taʼpaoʼtomoyiiwaatsiksi anniiska A̱ʼpistotookiiyi. Osto̱yi ma̱tanistaiʼtsi̱maatsi issiko̱piiksistsikookakihtsimaanistsi.” Kii anni̱i̱ksi istsi̱kiiksi a̱a̱niiyaawa, “Kii maka̱ʼpiipaitapiiksi ma̱taakohkottsipisataistamatstohki̱waiksi annoohka a̱nni.” Ki a̱nniai niitaya̱a̱kiitsiksimstaayaawa omi̱i̱ksi Pharisees. 17Ki a̱nniai sota̱mattanistsiiyaawa omi̱i i̱i̱kayaapsstsiiyi, “Ki kiisto̱wa, tsa̱ kanistsimma̱waatsi ki̱i̱wa kitohko̱yihpi kitsa̱a̱pssini.” Itani̱i̱wa oma̱a ni̱naawa, “Ki osto̱yi a̱nnaoʼka omi̱i̱ksiska a̱waatoyiʼpoyiikska. A̱nniai anista̱pssiwa.” 18Ki a̱nniayii otsi̱tsayiʼtooka omi̱i̱ksi isto̱ʼtotamaʼpssiksi Jews otsi̱kayapsstsissi. Ki a̱i̱ʼnihkatsiiyaawa o̱nni ki oksi̱sstsi. 19Ki a̱i̱ʼsopowahtsiiʼsatsiiyaawaiksi. “O̱ki. Anna̱a kika̱taʼohko̱aawaatsi annaahka kita̱a̱niihpoaawahka otsi̱tsikayaapsstsiiʼssi anniihka otsi̱tsipokaayihpihka? Ikkama̱a̱misi tsa̱ niitohko̱ttsaapiwaatsiksi?” 20Ota̱nikkoaawaiksi, “Nita̱o̱naonnaana, nohko̱nnaana. Ki ni̱tssksinoannaana otsa̱a̱psstsiiʼssi ota̱i̱ʼpokaiʼssi. 21Ki a̱nnohka mani̱stohko̱ttsaapihpi, tsi̱naoʼksaissksiniihpinnaan. Ki nima̱tssksinoannaaninayi o̱tohkokki otsa̱a̱pssini. Sta̱msopowahtsiʼsatsisa oosto̱yi. A̱kaomahkssimma. A̱kawattsiʼpoyiiwa.” 22Ki a̱nniai a̱a̱niiyaiksi o̱nni ki o̱ksisstsi. A̱a̱mohka iihtani̱i̱yaawa otsto̱nnoahsaawa omi̱i̱ksi isto̱ʼtotamaʼpssiiksi Jews. Omi̱i̱ksi istoʼtotamaʼpssiiksi Jews a̱kaisapaʼkootsiiyaawa a̱kohkottsayitsstsiihpa a̱a̱hkanii Jesus a̱nniskaoʼkinai A̱ʼpistotookiwa anniiska o̱mohtakohkoikiihpiska. Itoka̱kihtsimaayaawa ikkami̱tsstsiihki a̱a̱hkanii, osto̱yi a̱kohtsitsiksiwa̱attsaawa otsi̱tawaatsimoihkaahpoaawa ma̱a̱hksisamsawattsitatsi̱moihkaani. 23Ki a̱nnihkayi iihtani̱i̱yaiksi o̱nni ki o̱ksisstsi, “Sta̱msopoahtsiiʼsatsisa oosto̱yi. A̱kaomahkssimma.”
24O̱ki. Ki omi̱i̱ksi Pharisees a̱a̱ttsistainihkatsiiyaawa omi̱i ni̱nnayi na̱yaapsstsii ota̱i̱ʼpokayissi. A̱a̱nistsiiyaawayi, “O̱ki. A̱nnoohka kita̱yoohtooka A̱ʼpistotookiwa. Sota̱mokamoʼtaniit! Niisto̱nnaan nino̱o̱hkssksiniihpinnaana otoka̱ʼpipaitapiiʼssi annaahka Jesusahka.” 25Itani̱i̱wa oma̱a ni̱naawa, “Ki niisto̱wa nima̱tssksiniʼpa ikkamo̱kaʼpipaitapiisi, ki ikka̱msaokaʼpipaitapiisi. Kaki̱ʼtokskaawa ni̱tssksiniihpi: nitsi̱kayapsstsii, ki a̱nnohka ni̱tohko̱ttsaapi.”
26Otsi̱tanikkaiksi, “Tsa̱ kita̱nisttotooka? Tsa̱ kani̱stohkokka kitsa̱a̱pssini?” 27Itanistsiiwaiksi, “Ki kika̱waanistohpoaawa ki kiisto̱aawa kima̱taaksisstsiwakakkihpoaawa. Kima̱ʼkattaisstaahsoaayi ka̱a̱hkattsiita̱a̱koohtsissoaayi. Kiisto̱awa ka̱a̱hkaya̱a̱komaiʼtoawaawa Jesus.”
28Ki a̱nniayii otsi̱ta̱okanikkaiksi. Ki otsi̱tanikkaiksi, “Kiisto̱wa ka̱a̱koohkomaiʼtoawa Jesus. Niisto̱nnaan nitsi̱taomaiʼtakihpinnaan Moses. 29Ni̱tssksiniihpinnaan A̱ʼpistotookiwa na̱i̱sitsipssatsiiwa Mosesi. Ki oma̱a ki̱tohkottotooka nima̱tsikakssksiniihpinnaan o̱mohtoʼtoohpi.”
30O̱ki. Ki oma̱a ni̱naawa sota̱manistsiiwaiksi, “Tsi̱kohtsipisatsiʼtaki a̱a̱mohka kita̱a̱niihpoaawayihka. Ni̱tohkokka nitsa̱a̱pssini. Ki kiisto̱aawa kita̱waaniihpoaawa kima̱tsikakssksinoawaawaatsi o̱mohtoʼtoohpi. 31Issksini̱ʼpa A̱ʼpistotookiwa o̱tsawanista̱i̱ʼtoahsi maka̱ʼpipaitapiiksi. Ki a̱ksisstsiiwakatsiiwa omi̱i̱ksi o̱tsspimmokiksi, omi̱i̱ksi a̱nisttotsimiksi otsitsi̱i̱htaanistsi. 32Anni̱i̱ka ota̱o̱ʼmatapitsstsissi anno̱o ksa̱a̱hkommi, ki a̱nnika ma̱taonoaitaisstsiihpa mata̱pii a̱a̱hkohkotsiiwa ami̱i na̱a̱psstsii aapssi̱ni iihpipo̱kaayi. 33Oma̱a ni̱tohkottotooka, oka̱taoʼtsskookopi anniska A̱pistotookiiyi ma̱takohkottanisttotsi̱maatsi a̱a̱mohka.”
34O̱ki a̱nniayi oma̱a ni̱naawa oso̱tamanikkaiksi, “Kiisto̱wa kitsi̱i̱kaisopokokaʼpitapiiyi kitsi̱tsipokayihpi. Ki a̱nnohka kita̱i̱ssaakssksinimaatsookihpinnaan. Sta̱msaksit!”
35O̱ki. Ki a̱nnika ki oma̱a Jesus sota̱mohtsimatsiiwa omi̱i ni̱naayi o̱tsaisskooka omi̱i̱ksi isto̱ʼtotamaʼpssiiksi Jews. Ki a̱oʼtoinoyiiwayi. A̱aʼnistsiiwayi, “O̱ki. Kiisto̱wa kika̱taoʼmaiʼtoawa annaahka Mata̱piiwahka a̱yakoʼtoowahka.” 36Oma̱a ni̱naawa itani̱i̱wa, “A̱nnikkit ta̱kohtssksinoawa taka̱atsiksi. Nita̱kohtomaiʼtoawa.” 37Otsi̱tanikka omi̱i Jesus. “Kika̱i̱noawa, ki a̱nnohka kita̱i̱ʼpoakka. Niisto̱wakaoʼka.” 38Itani̱i̱wa oma̱a ni̱naawa, “O̱ki nitsi̱naaimi. Annohka nita̱o̱maiʼtaki.” Ki a̱nniayii itsi̱ssopisttoksisaanopiiwa a̱tsimmimmiiwa Jesusi.
39Ki Jesus sota̱maniiwa, “Anno̱o ksa̱a̱hkommi no̱mohtsitoʼtoo na̱a̱hkitaistamatstohkatoohsi o̱tapiʼssini otsisto̱ʼkiaʼnistaʼpaissi. Anni̱i̱ksi niita̱i̱tsiihtayaawa ota̱otsitapiʼtakssaawa a̱komiiksi̱stsaapsstsiiyaawa. Ki anni̱i̱ksi a̱kaomiiksi̱stsaapsstsiyaawa. A̱komiiksistomata̱piaapiiyaawa.”
40O̱ki. A̱nniksayii to̱kskammiksi Pharisees ito̱ʼtsipoyiiyaiksi Jesus. Otsi̱tanikkaiksi, “Kika̱taaʼnistapawaaniihpa niisto̱nnaan nino̱o̱hkattomiiksi̱stsaapsstsiiyihpinnaan?”
41Jesus itani̱stsiiwaiksi, “Kii ki̱niitaʼpsaohkootsistapiʼtakihpoaawohtopi a̱nni na̱a̱psstsi, kita̱akitsaohpotoiʼmotspoaawa kipahtsa̱ʼpsoaawayi. Ki kiisto̱aawa kita̱waaniihpoaawa, ‘nita̱o̱tsistapiʼtakihpinnaan’. Ki a̱nniayii kima̱tssiinomotspoaawa kipahtsa̱ʼpssoaawayi.”
Currently Selected:
John 9: BLA1979
Highlight
Share
Copy
Want to have your highlights saved across all your devices? Sign up or sign in
Translated by Wycliffe Bible Translators. Published by the Canadian Bible Society 1979.
