तोलिङ्सोमु 2
2
1अक्खेलॽरिक् साङ्ग्राम्पेदाङ् नु इक्सादिङ् खाम्बेक् हे़क्क्याङ् खे़ॽयो के़वाॽबा के़रे़क् चोःक्मा चुरे़॥
2निङ्वाॽफुमाङ्ङिल्ले़ चोःक्मा के़बोङ्बा के़रे़क् याःम्बक्हाॽ नुसिगेक्पा ये़न्नो चोगुसुरु, खे़ल्ले़चोगुल्ले़ नुसिगेक्पा ये़न्नो खुने़ॽ चोगुबा के़रे़क् कुयाःम्बक्हाॽलाम् नाःम्सिङ्॥ #हिब्रु ४:४,१० #ला २०:११ 3खे़ब्याङ् निङ्वाॽफुमाङ्ङिल्ले़ नुसिगेक्पा ये़न्निन् हाङ्वा मुॽइसाम् पिरु हे़क्क्याङ् खे़न् सेसेबा चोगु, थेआङ्भे़ल्ले़ हाबा खे़न् ये़न्नो नावागे़न् चइःत् चोगुबा के़रे़क् याःम्बक्हाॽओनु खुने़ॽ नाःम्सिङ्लो॥
अदन सिङ्सेॽइक्
4ताङ्साङ् नु खाम्बेःक्मान् नावागे़न् चइःत् पोःक्खे़बा पोधक्हाॽ हाबा कन्लो॥
यहवे दाङ्बा निङ्वाॽफुमाङ्ङिल्ले़ ताङ्साङ्बान् नु खाम्बेःक्मान् नावागे़न् चइःत् चोगुबा ये़न्नो 5इक्सादिङ् खाम्बेःक्मो सिङ्बुङ् लुङ्बुङ् होःप्ते़॥ हे़क्क्याङ् खाम्बेःक्मो लत्थिक्काङ् याःन्सुङ् मे़ल्लिङ्ङे वये़, थेआङ्भे़ल्ले़ यहवे दाङ्बा निङ्वाॽफुमाङ्ङिल्ले़ आल्ल थारिक् वहित् मे़न्धाए वये़ हे़क्क्याङ् खाम्बेःक्मान् के़धोःङ्बा के़अःक्पा मना हाःत्ताङ् होःप्ते़रो॥ 6कर इक्सादिङ् खाम्बेःक्मोलाम् वहःङ्हाॽ पुन्दे़ लःन्दे़आङ् खाम्बेःक्मान् के़रे़क् वरक्खु॥
7खे़ब्याङ् यहवे दाङ्बा निङ्वाॽफुमाङ्ङिल्ले़ खाम्बेःक्मोबा खाम्मोलाम्#२:७ खाम्बेःक्मोबा खाम्—खाम् इग्र मे़न्छाम् याप्मिन् हिब्रु पाःन्छेःक्वाओ “ये़म्बित्छा” नु “खाम्” पाःप्मे़ल्ले़ लत्छा हे़क्के खे़म्दे़त्॥ मे़न्छाम् याप्मि चोगु, हे़क्क्याङ् खे़ल्ले़ कुन्बोओ हिङ्मन्ले़न् साःङ्गुगे़न् सक्मा मुःत्तु पिरु॥ हे़क्क्याङ् मे़न्छाम् याप्मिन् कुहिङ्वे़त् मना पोःक्खे़रो॥ #१ कोर १५:४५
8यहवे दाङ्बा निङ्वाॽफुमाङ्ङिल्ले़ नाम्गे़त् पिसाङ् अदनओ लत्छा सिङ्सेॽइक् थिक् चोगु, हे़क्क्याङ् खुने़ॽ चोगुबा मे़न्छाम् याप्मिन् खे़ॽयो युक्खु॥ 9हे़क्क्याङ् ओमे़प्मे़ल्ले़ नुबा के़धाःप्पा नु चामाल्ले़ कुजागे़नुॽबा कुजाॽ के़धोःक्पा के़रे़क् परिक्पा सिङ्बुङ्हाॽ यहवे दाङ्बा निङ्वाॽफुमाङ्ङिल्ले़ खाम्बेःक्मोलाम् लिङे़र याःन्दु॥ खुने़ॽ सिङ्सेॽइक्के़ल्ले़ कुलुम्मो ने़त्तिगे़न् हिङ्मन्ले़ सिङ्बुङ् हे़क्क्याङ् नुबा नु ताप्फे़ःम्बा ने़हिनिङ्वाॽ आबिबिबा सिङ्बुङ्ङाङ् लेःत्तु॥ #सुफो २:७, २२:२,१४
10सिङ्सेॽइक्के़न् वरङ्मारे़ लागि अदनलाम् वहःङ्धिक् कुक्से़ लःन्दे़आङ् ने़स्से़, हे़क्क्याङ् खे़प्मोलाम्बा लिसि कुलक्को से़रे़आङ् ने़स्से़॥ 11थिक्सिगेक्पा वहःङ्ङिल्ले़ कुमिङ् पिसोन, कन् वहःङ्ङिन् हाबिला लाजेन् के़रे़क् कबुर वगु, खे़प्मो साम्म्याङ् खोदे़त्लो॥ 12खे़न् लाजेॽओबा साम्म्याङ्ङिन् नुबा चोक्॥ खे़प्मो कुनाम्गे़नुॽबा आङ्घिक्वा नु ओनिक्स् मे़प्मनाबा माङ्लुङ् खोदे़त्॥ 13निसिगेक्पा वहःङ्ङिल्ले़ कुमिङ् गिहोन, कुस#२:१३ (मे़सोपोतामियाबा) कुस, इग्र इथोपिया॥ लाजेॽ के़बोङ्बार के़गुङ्बा वहःङ्ङिन् हाबा कन्लो॥ 14सुम्सिगेक्पा वहःङ्ङिल्ले़ कुमिङ् ताइग्रिस, हाबा कन् वहःङ्ङिन् अस्सुररे़ नाङ्गे़न् पिसाङ् वगुरो॥ हे़क्क्याङ् लिसिगेक्पा वहःङ्ङिल्ले़ कुमिङ् युफ्रेतिसरो॥
15यहवे दाङ्बा निङ्वाॽफुमाङ्ङिल्ले़ मे़न्छाम् याप्मिन् अदन सिङ्सेॽइक्को तेॽरुआङ् खे़न् अःक्मा साःक्मा नु कोमारे़ लागि खे़ॽयो युक्खु॥ 16हे़क्क्याङ् यहवे दाङ्बा निङ्वाॽफुमाङ्ङिल्ले़ मे़न्छाम् याप्मिन् इङ्जाङ् पिरुआङ् मे़त्तु, “चप्चि मे़न्जोःक्के सिङ्सेॽइक्को के़युङ्बा के़रे़क् सिङ्बुङ्ङिल्ले़ कुजाॽहाॽ चामा के़सुक्तुॽ, 17कर नुबा नु ताप्फे़ःम्बा ने़हिनिङ्वाॽ आबिबिबा सिङ्बुङ्ङिल्ले़ कुजाॽइन् मे़न्जाए़ॽ, थेआङ्भे़ल्ले़ आत्तिन् ये़न्नो खे़न् के़जःॽ खे़ने़ॽ से़क्खाए के़सिरो॥”
18यहवे दाङ्बा निङ्वाॽफुमाङ्ङिल्ले़ पाःत्तु, “मे़न्छाम् याप्मिन् एःक् वाॽमा नुबा मेःन्॥ आङ्गाॽ खे़ल्ले़ कुलागि लाॽरुमा कुभाॽबाङ्धिक् चोगुङ् पिरुङ्ॽ॥”
19यहवे दाङ्बाल्ले़ के़रे़क् ताम्भुङ् थक्साहाॽ हे़क्क्याङ् ताङ्साङ्बो के़बे़बा के़रे़क् पुसाहाॽ खाम्मोलाम् चोगुसिआङ् मे़न्छाम् याप्मिःल्ले़ थेधे मिङ् खे़ङ्हाॽ वाःत्तुसिइ फाॽआङ् ओमे़त्छे़ खे़ङ्हाॽ मे़न्छाम् याप्मिःल्लो तारुसि॥ हे़क्क्याङ् मे़न्छाम् याप्मिःल्ले़ के़रे़क् कुहिङ्वे़त् थक्सापुसाहाॽ आक्तङ्बा मिङ् वाःत्तुसि हाबा हे़क्तङ्बाए खे़ङ्हाॽरे़ खुन्छिॽ मिङ् पोःक्खे़॥ 20अक्खेलॽरिक् मे़न्छाम् याप्मिःल्ले़ए के़रे़क् हिम्थक्साहाॽ, ताङ्साक्को के़बे़बा पुसाहाॽ हे़क्क्याङ् के़रे़क् ताम्भुङ् थक्साहाॽ मिङ् वाःत्तुसि॥
कर आदम्मिल्ले़ कुलागि खुने़ॽ खे़म्दु लाॽरुबा कुभाॽबाङ् हाःत्ताङ् खोमे़दे़त्ते़न्॥
21खे़ल्ले़चोगुल्ले़ यहवे दाङ्बा निङ्वाॽफुमाङ्ङिल्ले़ मे़न्छाम् याप्मिन् मुरुक्खुरुक् इप्से़र याःन्दु, हे़क्क्याङ् खे़न् इप्से़आङ् ने़स्से़ल्ले़ खे़ल्ले़ कुबिम्बाहाॽओनु लत्थिक् लःत्तुआङ् खे़न् लःत्तुबा ते़न्नो ने़क्साःल्ले़ थिम्सुबिरु॥ 22खे़ब्याङ् यहवे दाङ्बा निङ्वाॽफुमाङ्ङिल्ले़ खे़न् मे़न्छाम् याप्मिओलाम् लःत्तुबा कुबिम्बे़न् मे़न्छुमाधिक् चोगुआङ् मे़न्छाम् याप्मिओ खे़न् तारु॥
23मे़न्छाम् याप्मिःल्ले़ पाःत्तु,
“कङ्ग आङ्गाॽ आये़प्पाल्ले़ कुये़प्पा नु
आने़क्साःल्ले़ कुने़क्सारो॥
खुने़ॽ मे़न्छुमा#२:२३ खुने़ॽ मे़न्छुमा—मे़न्छुमा इग्र ये़म्बित्छान् हिब्रु पाःन्छेःक्वाओ “मे़न्छुमा” नु “ये़म्बित्छा” पाःप्मे़ल्ले़ लत्छा हे़क्के खे़म्दे़त्॥ मे़प्मा पोङ्लो॥
थेआङ्भे़ल्ले़ खे़ङ्ग ये़म्बित्छालाम् लःप्मनामा वये़रो॥”
24कल्ले़चोगुल्ले़ मे़न्छाम् याप्मिःल्ले़ कुम्बा कुम्मासि ले़रुसिआङ् कुमेःत्तिन्नु तङ्लो, हे़क्क्याङ् खे़ङ्हाॽ लत्छा थक् पोङ्सिरो॥ #मत्ति १९:५; मर्कु १०:७-८; १ कोर ६:१६; एफि ५:३१ 25मे़न्छाम् याप्मिन् नु कुमेःत्तिन् ने़प्माङ् ले़क्चाॽबुधुक् वये़छि, हे़क्क्याङ् मे़नुःन्दे़छिन्॥
Currently Selected:
तोलिङ्सोमु 2: LIF
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
