युहुन्ना 19
19
ये़सुन् सिमे़ल्ले़ खुम्दिङ् मे़बिरुॽ
(मत्ति २७:१५-३१; मर्कु १५:६-२०; लुका २३:१३-२५)
1हे़क्क्याङ् पिलातसरे़ ये़सुन् साॽरिक् ते़ःम्भुक् याक्पाङ्घुसिरो॥ 2थक्सुबाहाॽरे़ तिङ्ग्रेक्ले़न् तिचः मे़भयुआङ् ये़सुन् मे़घुःक्तु॥ हे़क्क्याङ् खे़ङ्हाॽरे़ खुने़ॽ परान्ला हाङ्तेत्तिन् मे़जाक्तुर 3कुदगि मे़बेआङ् ए़त्ले़ङ् यहुदि हाङ्ङे, तियाहा! लॽरिक् मे़मे़त्तुर कुने़दे़ङ्बान् मे़ले़क्खु मे़बिरुरो॥
4पिलातसे़न् याम्मो लाःक्कात् लःन्दे़आङ् यहुदिहाॽ मे़त्तुसि, “कन् मनाओ इङ्गाॽ थेआङ् आप्तिक् मे़ङ्घोःबान्बा पाःन्निन् खिनिॽ कुसिङ् के़निःत्तुम्ल फाॽआङ् इङ्गाॽ लाःक्कात् लःत्तुङ्ल पत्तारो॥” 5हे़क्क्याङ् तिङ्ग्रेक् तिचःन् मे़घुःक्तुबा नु परान्ला हाङ्तेत्तिन् मे़जाक्तुबा ये़सुन् लाःक्कात् मे़लःत्तुरो॥ हे़क्क्याङ् पिलातसरे़ मे़त्तुसि, “खा, कन् मनान् ओमे़त्ते़म्मे़ॽ!”
6तुम्निङ्वाॽफुसाम्बाहाॽ नु माङ्हिम् के़गोबा तिलिङ्गाहाॽरे़ खुने़ॽ मे़निसुनामे़ःन्ने “सिलाम्साक्मा सिङ्सम्दाङ् खे़न् फोःन्दे़ॽओ, सिलाम्साक्मा सिङ्सम्दाङ् खे़न् फोःन्दे़ॽओ” लॽरिक् अःक्मा मे़हेःक्ते़रो॥
हे़क्केःल्ले़ पिलातसरे़ खे़ङ्हाॽ मे़त्तुसि, “खिनिॽए कन् मनान् तेॽरे़म्मे़ॽआङ् सिलाम्साक्मा सिङ्सम्दाङ् फोःन्दे़म्मे़ॽओ, कर इङ्गाॽग खे़ल्ले़ कुदक्ले़ङ्वाओ थेआङ् आप्तिक् मे़ङ्घोबान्लो॥”
7कर खे़ङ्हाॽरे़ नोगप् मे़बिरु, “आनिगे कत्तुम्बे़बा साम्योथिम् कुइसिःक्ग खे़न् सिमाए पोङ्लो, थेआङ्भे़ल्ले़ खे़ल्ले़ आबाङे निङ्वाॽफुसाआ फाॽआङ् मे़त्छिङ्ङाङ् वाॽरो॥”
8पिलातसरे़ खे़न् पाःन्निन् खे़प्सुआङ् आल्लसाङ् साॽरिक् किसे़रो॥ 9खुने़ॽ याम्मो हाङ्हिम् सिगाङ् लासे़आङ् ये़सुन् सेःन्दोसु, “खे़ने़ॽ आत्तोलाम् के़द्ये़बाबे?” कर ये़सुरे़ थेआङ् नोगप् मे़बिरुन्लो॥ 10पिलातसरे़ ये़सुन् मे़त्तु, “इङ्गाॽनु थेआङ् के़म्बाःत्ने़म्बा? खे़ने़ॽ सिलाम्साक्मा सिङ्सम्दाङ् फोःम्मा नु ले़प्मादेमा युक् कत्तुङ्बान् कुसिङ् के़न्निःत्तुन्बि?”
11ये़सुरे़ नोगप् पिरु, “निङ्वाॽफुमाङ्ङिल्ले़ खे़ने़ॽ के़म्बिरे़न्निल्ले़ग इङ्गाॽ सम्दाङ् युक् के़ङ्गत्तुन्बारो॥ कर इङ्गाॽ खे़ने़ॽओ याप्मि हुक् के़सुप्पाल्ले़ कन्नुःल्ले़आङ् यम्बा लायोरे़न् आप्तिक् खोसुॽरो॥”
12हे़क्केःल्ले़ग पिलातसरे़ ये़सुन् ले़प्मादेमा निङ्वाॽ चोगु, कर यहुदिहाॽरे़ चक्मे़ल्लॽए अक्खे मे़बाःत्तुर मे़अःक्ते़रो, “कन् मनान् के़ले़रु के़देःसुने़ फाॽग्र खे़ने़ॽग सिजरले़#१९:१२ रोमि सुहाङ्युक्पाओ काक्नुःल्ले़ यम्बा मनान् सुहाङ् (पयम् हाङ्) वये़॥ खुने़ॽ सिजर मे़मे़त्तु॥ कुन्देःङ्बा के़म्बोङ्ने़न्लो॥ आत्तिल्ले़ आबाङे हाङ् पोङ्मा निङ्वाॽ चोगुॽ खे़न् सिजरले़ कुदक्ले़ङ्वाओ पोःक्लो॥”
13पिलातसरे़ खे़न् खे़प्सुआङ् ये़सुन् लाःक्कात् लःत्तु, हे़क्क्याङ् खुने़ॽ लुङ् फे़ःमनाबा खासे़न् युक्नाओ युङ्सिङ्लो॥ (खे़न् ते़न्निन् हिब्रु पाःन्नो गब्बथा मे़मे़त्तुरो॥) 14हे़क्क्याङ् कङ्ग यहुदि चोःक्युम्भो तङ्नाम्मिल्ले़ थिक्ये़न् तगि ले़न्दिक् पोःक्खे़र पत्छे़॥
पिलातसरे़ खे़ङ्हाॽ मे़त्तुसि, “खिनिॽ हाङ्ङिन् कप्मो वाॽरो॥”
15हे़क्केःल्ले़ यहुदिहाॽ साॽरिक् मे़अःक्ते़र मे़मे़त्तु, “खे़न् तेॽरे़ॽआङ् सिलाम्साक्मा सिङ्सम्दाङ् फोःन्दे़ॽ!”
हे़क्केःल्ले़ पिलातसरे़ सेःन्दोसुसि, “खिनिॽ हाङ्ङिन् सिलाम्साक्मा सिङ्सम्दाङ् फोःन्दुङ्बाबि?”
तुम् निङ्वाॽफुसाम्बाहाॽरे़ नोगप् मे़बिरु, “आनिगे हाङ्ङिङ्ग सिजरे़न्लक्लो॥” 16हे़क्केःल्ले़ पिलातसरे़ ये़सुन् सिलाम्साक्मा सिङ्सम्दाङ् मे़भोःन्दुर फाॽआङ् हुक्सुप्तुसिरो॥
ये़सुन् सिलाम्साक्मा सिङ्सम्दाङ् मे़भोःन्दुॽ
(मत्ति २७:३२-४४; मर्कु १५:२१-३२; लुका २३:२६-४३)
खे़ल्ले़चोगुल्ले़ थक्सुबाहाॽरे़ ये़सुन् खे़प्मोलाम् मे़देॽरुरो॥ 17खे़ङ्हाॽरे़ ये़सुन् कुसिलाम्साक्मा सिङ्ङिन् मे़गुःत्तुआङ् मिक्खोःक्पा कोःक्माओ मे़देॽरुरो॥ (खे़न् कोःक्मान् हिब्रु पाःन्नो गलगथा मे़मे़त्तुरो॥) 18खे़प्मो ये़सुन् सिलाम्साक्मा सिङ्ङो मे़भोन्दु॥ खुने़ॽ कुजुप्साङ् नु कुभे़न्छाङ्बा सिलाम्साक्मा सिङ्हाॽ सम्दाङ् ने़प्फु मनाहाॽआङ् मे़भोःन्दुसिरो॥
19पिलातसरे़ नासरतबा ये़सु यहुदि हाङ् लॽरिक् के़बप्पा आप्तिक् सक्किन् साप्तुआङ् सिलाम्साक्मा सिङ्सम्दाङ् फम्मा पाङ्घुसिरो॥ 20खे़न् यरिक् यहुदिहाॽरे़ मे़निरुरो, थेआङ्भे़ल्ले़ खे़न् ते़न्निन् ये़क्यक्किल्ले़ कुबेसाङ्ङे ने़स्से़ हे़क्क्याङ् खे़ङ्ग हिब्रु, ल्यातिन नु ग्रिक पाःन्दाङ्ङो साप्ते़आङ् पत्छे़॥ 21यहुदिहाॽरे़ खुनिॽ तुम् निङ्वाॽफुसाम्बाहाॽरे़ पिलातसे़न् अक्खे मे़मे़त्तुर मे़अत्तुरो, “खे़न् यहुदिहाॽरे़ खुनिॽ हाङ् लॽरिक् मे़साप्ते़न्ने़ॽओ, कर कन् मनाःल्ले़ यहुदिहाॽरे़ खुनिॽ हाङ्आ लॽरिक् पाःत्तुरो लॽरिक् साप्ते़ॽओ॥”
22कर पिलातसरे़ खे़ङ्हाॽ मे़त्तुसि, “इङ्गाॽ च्या साप्तुङ्, खे़न् साप्तुङ् साप्तुङ्॥”
23थक्सुबाहाॽरे़ ये़सुन् मे़भोन्दु मे़सुरुआङ् खुने़ॽ कुदेःत्हाॽ लिसि लक्को मे़हाःत्छिङ्लो॥ कर कुलगेःत्तिन् कुदुम्बे मेःन्नेबा सर्धक् फःमनाबा चोगे़, 24खे़ल्ले़चोगुल्ले़ खे़ङ्हाॽ अक्खे मे़मे़त्छिङ्, “कङ्ग आनिॽ थे़ःक्खुम् मेःन्लो, कर तॽयाःन्सोन् के़सुम्लो॥ आत्तिल्ले़ कुलक्को थाःॽ, हाराॽ खे़ल्ले़ए खे़न् तेॽरुनिरो॥” कन् पाःन्निङ्ग साम्योसाप्लाओ अक्खेलॽरिक् खे़ङ्हाॽरे़ इङ्गाॽ आजाङ्हाॽ मे़हाःत्छिङ्लो, हे़क्क्याङ् आदेःत्तिन् तॽयान्सोःन् मे़गे़सुॽरो लॽरिक् साप्ते़आङ् के़बप्पे़न् के़रे़बारो॥ हे़क्केलॽरिक् थक्सुबाहाॽरे़आङ् बा हे़क्केए मे़जोगुरो॥#निङ् सुम् २२:१८
25ये़सुन् सिलाम्साक्मा सिङ्ङो मे़भोःन्दुबाल्ले़ कुबेसाङ् कुम्मा, कुन्छुमाॽ, क्लोपासरे़ कुमेत् मरियम, हे़क्क्याङ् मरियम मग्दलिनिसि मे़ये़बे़रो॥ 26ये़सुरे़ कुम्मा हे़क्क्याङ् लुङ्माॽ तुक्तुबा कुहुॽसाम्बान्नाङ् खे़प्मो निःत्ताङ् ये़बे़त्छिबा निसुसिल्ले़ कुम्मा मे़त्तु, “खुने़ॽग के़स्सारो॥” 27हे़क्क्याङ् खे़न् हुॽसाम्बान् मे़त्तु, “खुने़ॽग थामे़न्दिङ् के़म्मारो॥” खे़न् ये़म्माङ्धोग खे़न् हुॽसाम्बाल्ले़ मरियम्मिन् कुहिम्मो तेॽरुरो॥
ये़सुरे़ कुसिमे़न्
(मत्ति २७:४५-५६; मर्कु १५:३३-४१; लुका २३:४४-४९)
28याङ्सि ये़सुरे़ काक् पाःन्हाॽ पोःक्खे़ चुरे़बा निसुआङ् साम्योसाप्लाओ साप्ते़बान् के़त्ल फाॽआङ् पाःत्तु, “इङ्गाॽ आवामिसे़रो॥”#निङ् सुम् २२:१५, ६९:२१ 29खे़प्मो के़सुःप्पा चे़ल्ले़क्सेॽ थि#१९:२९ के़सुःप्पा चे़ल्ले़क्सेॽ थिन् मे़न्जो वामिःमा के़जिःम्बा थिः वये़॥ कन् थिन् थक्सुबाहाॽ नु वेॽ याङ्गे़साॽबाहाॽरे़ मे़धुङु॥ के़याक्पा पर्यामाधिक् युङे़॥ हे़क्केःल्ले़ थक्सुबाहाॽरे़ खिगाक्माःन् चे़ल्ले़क्सेॽ थिओ मे़निःप्सुआङ् हिसप सिङ्ङिल्ले़ कुबोराक्को मे़भत्छु हे़क्क्याङ् ये़सुरे़ कुमुराओ खे़न् मे़धुप्तु मे़बिरुरो॥ 30ये़सुरे़ खे़न् पिःत्तुआङ् पाःत्तु, “आल्ल चुरे़रो॥” हे़क्के पाःत्तुर कुधेगेःक्पे़न् तर्घुॽ थाःसु हे़क्क्याङ् कुसक्मान् ले़रुदेसुआङ् स्ये़रो॥
31कङ्ग तङ्बेबा के़रे़क्नुःल्ले़ सेसेबा हे़क्क्याङ् यम्बा नाःम्सिङ् ये़न्निन्नुःल्ले़ थिक्ये़न् तगि वये़रो॥ यहुदिहाॽरे़ नाःम्सिङ् ये़न्नो सिलाम्साक्मा सिङ्सम्दाङ्#१९:३१ लाङ् ए़ङ्माल्ले़ सिलाम्साक्मा सिङ्सम्दाङ् फोःम्मनाबा मनाहाॽ हारा मे़सिः॥ चेहाॽ मे़बप्पा खुनिॽ सिराॽ मे़धाङ्ङिन्बाल्ले़ चोगुल्ले़ हारा मे़सिर फाॽआङ् खुनिॽ लाङ्हाॽ मे़ए़क्खुआङ् मे़धाःसुसिर फाॽआङ् पिलातसे़न् पेलि मे़भाक्तुरो॥ 32खे़ल्ले़चोगुल्ले़ थक्सुबाहाॽ मे़बेआङ् ये़सुन् नु मे़भोःन्दुसिबा मनाहाॽरे़ खुन्छिॽ लाङ्हाॽ मे़ए़क्खुरो॥ 33कर खे़ङ्हाॽ ये़सुरो मे़भे़रे़ल्ले़ ये़सुःन्ग तगिए स्ये़बा मे़निसुआङ् खुने़ॽ कुलाङ्हाॽ मे़न्ए़क्खुन्लो॥ 34हे़क्केसाङ् थिक् थक्सुबाल्ले़ ये़सुरे़ कुले़म्भेःप्मो लाःक्किल्ले़ थुबुल्ले़ खिमो खे़प्मोलाम् माक्खिॽ नु च्वाःत् लःन्दे़रो॥ 35खिनिॽआङ् नसान् के़जोगुम्ल फाॽआङ् खे़न् पोःक्खे़बा पान् के़निःबाल्ले़ कन् पाःन्हाॽ पाःत्तुबारो॥ हे़क्क्याङ् खुने़ॽ पाःत्तुबा पाःन्हाॽग से़क्खाएरो॥ 36“खुने़ॽ कुये़ःप्पाहाॽ लत्थिक्काङ् मे़ए़क्ने़न्लो”#ला १२:४६; निङ् सुम् ३४:२०; खानिःत् ९:१२ लॽरिक् साप्ते़आङ् पप्पा साम्योसाप्लान् के़त्ल फाॽआङ् अक्खे पोःक्खे़बारो, 37हे़क्क्याङ् वेॽ ते़न्नो साम्योसाप्लाओ अक्खेआङ् साप्ते़आङ् पत्लो, “के़धुप्पाहाॽरे़ आबाङे मे़धुबुबान् ओमे़मे़त्तुरो॥”#जक १२:१०
ये़सुन् इःप्पुङ्ङो मे़जिक्खुॽ
(मत्ति २७:५७-६१; मर्कु १५:४२-४७; लुका २३:५०-५६)
38खे़न् एगाङ् आरिमाथिया पाङ्जुम्बा युसुफे़न् पिलातसरो पेआङ् ये़सुरे़ कुधक्किन् नाःक्तु॥ खुने़ॽ यहुदिहाॽ किरुसिबाल्ले़ चोगुल्ले़ स्वाःत्ताङ् ये़सुरे़ कुहुॽसाम्बा पोःक्खे़आङ् वये़रो॥ पिलातसरे़ इङ्जाङ् पिरुआङ् खे़ल्ले़ ये़सुरे़ कुधक्किन् थाःसुआङ् तेॽरु॥ 39तगि से़न्दिक् ये़सुरे़ कुदुम्से़ के़दाबा निकोदेमसरे़ युसुफे़न् तेःङ् मे़त्तुआङ् वये़॥ निकोदेमसरे़ मुर्र नु खाम्दोलि फःम्मनाबा कुनाम्गे़नुॽबा सुम्सुम् (३३) किलो मारुक्किन् तारुआङ् वये़रो॥ 40खे़ङ्हाॽरे़ ये़सुरे़ कुधक्किन् तेॽरे़त्छुआङ् यहुदि चे लुप्मा थिम् कुइसिक् मारुक्किन् हुःत्ते़त्छुआङ् नुबा चेदेःत्तिल्ले़ कित्ते़त्छुरो॥ 41आल्ल ये़सुन् सिलाम्साक्मा सिङ्ङो मे़भोःन्दुबा ते़न्नो फुङ्इक् थिक् ने़स्से़॥ खे़न् फुङ्इक्को आल्लो थारिक् मना मे़न्ने़ए के़वाॽबा इःप्पुङ्धिक् ने़स्से़रो॥ 42कङ्ग नाःम्सिङ् ये़न्निल्ले़न् यारिप् चोःक्मा ये़न् वये़बाल्ले़ चोगुल्ले़ खे़ङ्हाॽरे़ खे़न् इःप्पुङ्ङिन् निःत्ताङ् ने़स्से़बाल्ले़ चोगुल्ले़ ये़सुरे़ कुधक्किन् तेॽरे़त्छुआङ् ने़स्से़त्छुरो॥
Currently Selected:
युहुन्ना 19: LIF
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
