लुका 12
12
साम्दिङ् नु हाङ्हाङ् मे़प्मा
(मत्ति १०:२६-३३)
1खे़प्मो निःत्मे़न्दे़त्ते हे़न्छिङ्ङाङ्धो मनाहाॽ चिए़त् चिए़त् मे़ए़त्छिङ्ल मे़जुप्से़॥ हे़क्क्याङ् ये़सुरे़ कुहुॽसाम्बाहाॽ अक्खेलॽरिक् मे़त्तुसि, “फरिसिहाॽरे़ खुनिॽ खरे़ःङ् के़भङ्बा सिदाॽलाम् सिङ्सिङ् लॽरे़म्मे़ॽओ! खे़न् सिदाॽ फाॽइन् खुनिॽ निङ्वाॽ चिःप्मान्लो॥ 2मे़धाःप्ने़न्ल फाॽआङ् ते़प्ते़आङ् के़वाॽबा पान् इग्र कुसिङ् निःत्मे़दे़त्ने़न्ल फाॽआङ् माॽरे़आङ् के़वाॽबा पान् थेआङ् होप्लो॥ 3खे़ने़ॽ खागे़माक्पाओ के़बाःत्तुबा पाःन्निन् खागे़ओःप्पाओ इङ्भन् चोक्लो॥ हे़क्क्याङ् स्वाःत्ताङ् हिम्सिगाङ् के़बाःत्तुबा पाःन्हाॽ हिम् सम्दाङ्लाम् यम्बा इक्लाओ इङ्भन् चोक्लो॥”
निङ्वाॽफुमाङ्ङिन्नु किमा पोङ्
(मत्ति १०:२८-३१)
4“आन्जुम्से, हाःत्ले़ खिनिॽ नासिङ्गे़न् थक्किन्लक् से़प्माआङ्धो थेआङ् चोःक्मा मे़सुक्तुन्, खे़न्नु मे़गिसे़म्मिन्ने़ॽओ॥ 5कर हाःत्नु किमा पोङ् के़लॽबा पाःन्निन् इङ्गाॽ मे़त्निङ्लो—हाःत्ले़ नासिङ्गे़न् थक्किन् से़रुआङ् खे़मायङ्सङ्ङो लाप्फुमा सुक्तुॽ, खुने़ॽनुए किसे़म्मे़ॽओ!
6“ङासि चुजुक्सा पुहाॽरे़ याङ्ने़त्छि मे़ले़क्ने़न्बि? हे़क्केसाङ् निङ्वाॽफुमाङ्ङिल्ले़ खे़ङ्हाॽ आत्तिन्नाङ् निङ्वाॽ मे़भेःत्छुन्लो॥ 7खिनिॽ थे़गेःक्कोबा काक् थे़गेःक्इहाॽ खुने़ॽ निरुआङ् वाॽरो॥ हे़क्केःल्ले़ मे़गिसे़म्मिन्ने़ॽओ! खिनिॽग यरिक् चुजुक्सा पुहाॽनुःल्ले़आङ् इमे़ल्लुङ्बा के़जोगिरो॥”
ले़प्मि मे़म्बोङ्मना लायो
(मत्ति १०:३२-३३)
8“आल्ल खे़प्से़म्मे़ॽओ, हाःत्ले़ मना तगि ये़सुन् नसान् चोगुङ् लॽरिक् पाःत्तुॽ, इङ्गाॽ मे़न्छाम्साःल्ले़आङ् निङ्वाॽफुमाङ्ङिल्ले़ कुमाङ्लाइङ्बाहाॽरे़ खुनिॽ तगि खे़न् ताःक्तुङ्लो॥ 9कर हाःत्ले़ मनाहाॽरे़ खुनिॽ तगि इङ्गाॽ नाॽआ, इङ्गाॽआङ् खे़न् निङ्वाॽफुमाङ्ङिल्ले़ कुमाङ्लाइङ्बाहाॽरे़ खुनिॽ तगि नाॽरुङ्लो॥
10“हे़क्क्याङ् हाःत्ले़ मे़न्छाम्साःल्ले़ कुदक्ले़ङ्वाओ फे़न् पाःन्हाॽ पाःत्तुॽ, खे़ल्ले़ ले़प्मि खोमा सुक्तुॽ, कर सेसेमाङ्ङिल्ले़ कुदक्ले़ङ्वाओ माङ् चे़ॽयापान् पाःत्तुबा पाःन्निल्ले़न् ले़प्मि मे़घोसुन्लो॥
11“मनाहाॽरे़ खिनिॽ यहुदि चुम्लुङ्हिम्मो हे़क्क्याङ् सुहाङ्युक्पाहाॽ नु हाङ्हाॽरे़ खुनिॽ तगि खासे़न् लोःम्मारे़ लागि के़म्देॽरिल्ले़, से़ःप्सिङ्मारे़ लागि थे़मा पाःप्माबे फाॽआङ् निङ्साम्मो मे़ध्ये़म्मिन्ने़ॽओ॥ 12हाबा खे़न् ये़म्मो थे पाःप्मा पोङ् फाॽआङ् सेसेमाङ्ङिल्ले़ खिनिॽ के़हुॽरिॽरो॥”
अदङ् याङ्साकुन्धेसाबा मनान्
13हे़क्क्याङ् खे़न् मनालुम्मोलाम् थिक् मनाःल्ले़ ये़सुन् मे़त्तु, “सिक्साम्बे, आम्भुॽरे़ याङ्साकुन्धेओबा इङ्गाॽ आलक्किन् पिआर फाॽआङ् मे़त्ताङ् पिराङ्ङे़ॽओ॥”
14ये़सुरे़ खे़न् नोगप् पिरु, “लुङ्ङाए, हाःत्ले़ इङ्गाॽ खिन्छिॽ लुम्मो याङ्साकुन्धे के़हाबा के़बिबा चोगाङ् इग्र खासे़न्लोःम्बा चोगाङ्बे?” 15हे़क्क्याङ् ये़सुरे़ याम्मो खे़ङ्हाॽ मे़त्तुसि, “काक् खिःम्यक् चोःक्मोलाम् सिङ्सिङ् लॽरे़म्मे़ॽओ॥ थेआङ्भे़ल्ले़ मनाःल्ले़ कत्तुबा मुल्लुक् याङ्साकुन्धेओ खुने़ॽ से़क्खाबा कुहिङ्मन्निन् मे़वाॽने़न्लो॥”
16हे़क्क्याङ् ये़सुरे़ खे़ङ्हाॽ खे़दाॽओ मे़त्तुसि, “थिक् याङ्साकुन्धेसाबा मनाःल्ले़ यरिक् पोगुगे़न् कुजाहाॽ सुप्सुॽरो॥ 17हे़क्क्याङ् खे़ल्ले़ अक्खेलॽरिक् निङ्वाॽ इःत्तु, ‘आल्ल इङ्गाॽ थे चोगुङ्बे? कन् चाहाॽ युङ्मादे़न्ने होप्लो॥’ 18हे़क्क्याङ् अक्खेलॽरिक् इःत्तु, ‘आल्ल इङ्गाॽ अक्खे चोगुङ्—उन्छोःन्बा चा युङ्दे़न्हाॽ यसुङ्ङाङ् कुसङ् यम्बा चा युङ्दे़न्हाॽ चोगुङ्सिङ्॥ हे़क्क्याङ् काक् चाहाॽ नु आजिगक्वाहाॽ खे़प्मो युक्खुङ्सिङ्लो॥ 19हे़क्क्याङ् इङ्गाॽ आबाङे अक्खे मे़त्छिङ्ङा, तेःङ्बे, यरिक् तङ्बे थारिक् के़योबा चा नु चिगक्वाहाॽ सुप्सुङ्सिङ्ङाङ् वाॽआरो॥ आल्ल कुसानुःरिक् युङे़ॽ, चे़ॽ, थुङे़ॽआङ् सःत्ते़ॽओ!’ 20कर निङ्वाॽफुमाङ्ङिल्ले़ खे़न् मे़त्तु, ‘कुनिङ्वाॽ के़बाःक्पे, आइन् से़न्दिक्सा खे़ने़ॽ के़हिङ्मन्निन् नुप्पाङ् खे़ने़ॽ के़सिरो॥ हे़क्केःल्ले़ खे़ने़ॽ के़लुप्सुबा याङ्साकुन्धेहाॽ हाःत्ले़न् पोङ्बाबे?’” 21हे़क्क्याङ् ये़सुरे़ मे़त्तु, “आबाङे लागिरक् याङ्साकुन्धेहाॽ के़लुम्बाआङ् निङ्वाॽफुमाङ् ले़प्माङ् याङ्साकुन्धेसाबा मे़म्बोङ्मनाबे़न्नाङ् बा हे़क्केए पोङ्लो॥”
निङ्वाॽ सोःन्छिङ्मा मेःन्
(मत्ति ६:२५-३४)
22हे़क्क्याङ् ये़सुरे़ कुहुॽसाम्बाहाॽ मे़त्तुसि, “हे़क्केःल्ले़ खे़प्से़म्मे़ॽओ, खिनिॽ हिङ्मन्नो थे चामा नु नासिङ्गे़न् थक्को थे चाङ्मा वाःप्मा फाॽआङ् निङ्साम् मे़जोगे़म्मिन्ने़ॽओ॥ 23थेआङ्भे़ल्ले़ ने़त्तिगे़न् हिङ्मन्निन् चामा थुङ्मानुःल्ले़ यम्बारो॥ हे़क्क्याङ् नासिङ्गे़न् थक्किन् चाङ्मा वाःप्मानुःल्ले़आङ् यम्बारो॥ 24आःक्वाहाॽ ओमे़त्ते़म्सिम्मे़ॽओ—खे़ङ्हाॽरे़ चा मे़न्देसुन् मे़न्छुप्सुन्, चायुङ्दे़न्नोआङ् याङ्मे़ङ्घोःत्तुन्॥ हे़क्केसाङ् निङ्वाॽफुमाङ्ङिल्ले़ चाःत्तुसिॽ हिङ्घुसिॽरो॥ खिनिॽग पुहाॽनुःल्ले़आङ् आक्खे़न् इमे़ल्लुङ्साबा के़जोगिॽ के़लॽबा निङ्वाॽ इःत्ते़म्मे़ॽओ॥ 25निङ्साम्मो के़ध्ये़ॽइआङ् खिनिॽ हिङ्मन्नो कुमुक्थिक्काङ् फोमा के़न्छुक्तुम्मिन्॥ 26अक्तङ्बा चुक्सा याःम्बक्काङ् चोःक्मा के़न्छुक्तुम्मिन्निल्ले़ थेआङ् खिनिॽ निङ्वाॽबाल्ले़ के़ये़ःक्खिबाबे? 27आल्ल लि-लि फुङ्ङिन् पोबान् ओमे़त्ते़म्मे़ॽओ, खे़ङ्हाॽरे़ खि मे़न्देसुन् खिआङ् मे़न्लःन्ने़न्, हे़क्केसाङ् खे़ङ्हाॽ सोलोमन हाङ्ङिल्ले़ कुनुॽमा कुदामाओ कन् लि-लि फुङ्ङिन् यारिक्काङ् नुबा तेत् मे़जाक्सिङ्ङिन्लो! 28आइन् ताःन्दिक् मिओ लाप्के़भुसिङ्बा प्याङ्सिगे़न् इक्ताप्पोबा सुङ्फुङ्हाॽ निङ्वाॽफुमाङ्ङिल्ले़ हे़क्केलॽरिक् तेत् चाक्तुसिल्ले़ खिनिॽ तेत् के़न्जाक्तिन्बि? नसान् के़सुःम्बासे!
29“चामा थुङ्माओरक् खिनिॽ निङ्वाॽ मे़बिरे़म्मिन्ने़ॽओ! खे़ल्ले़ लागिग निङ्साम्मोआङ् मे़ध्ये़म्मिन्ने़ॽओ, 30थेआङ्भे़ल्ले़ इक्सादिङ् खाम्बेःक्मोबा काक् सुवाङ्हाॽरे़आङ् बाहे़क्के मे़इःत्तुॽरो, कर साङ्ग्राम्पेदाङ्बा खिनिॽ पाःल्ले़ कन् के़रे़क् पाःन्हाॽ खिनिॽ चाहाबा के़जोगिबान् निसुरो॥ 31कर खुने़ॽ कुहाङ्जुम्मिन्लक् कोःत्ते़म्मे़ॽ, हे़क्क्याङ् काक् कन् चिगक्वाहाॽ खिनिॽ के़म्बिरिॽरो॥”
साङ्ग्राम्पेदाङ्बा याङ्साकुन्धे
(मत्ति ६:१९-२१)
32“चुक्सा मे़ल्लुक् सुम्से़, मे़गिसे़म्मिन्ने़ॽओ, थेआङ्भे़ल्ले़ साङ्ग्राम्पेदाङ्बा खिनिॽ पाःल्ले़ कुहाङ्जुम्मिन् पिमा कुसिराॽ थाङे़आङ् वाॽरो॥ 33खिनिॽ के़गत्तुम्बा चिगक्वाहाॽ सङ्घे़म्मे़ॽआङ् याङ्गे़साॽबाहाॽ पिरे़म्देसे़म्सिम्मे़ॽओ॥ हे़क्केलॽरिक् आप्फाल्ले़आङ् मे़न्दे़ःङ्मना, मे़न्हङ्मनाबा सुःक्वाओ आप्फाल्ले़आङ् मे़म्मे़क्मनाबा साङ्ग्राम्पेदाङ्ङोबा याङ्साकुन्धेहाॽरे़ थिम्से़म्सिम्मे़ॽओ॥ खे़प्मो के़घुःम्बाहाॽरे़आङ् मे़न्घुःत्तुन्, हे़क्क्याङ् कुबुःल्ले़आङ् मे़जने़न्लो॥ 34थेआङ्भे़ल्ले़ आत्तो खे़ने़ॽ याङ्साकुन्धेहाॽ के़युक्खुॽ, खे़प्मोए खे़ने़ॽ के़निङ्वाॽबे़न् पेःक्लो॥”
निङ्वाॽइरे़ चसिबा से़वारोबाहाॽ
(मत्ति २४:४२-५१; मर्कु १३:३२-३७)
35“खिनिॽ फॽइःन् युप्से़म्मे़ॽआङ् यारिप् पोःक्खे़म्मे़ॽआङ् यङे़म्मे़ॽ, हे़क्क्याङ् खिनिॽ सेमिन् हाःन्दे़म्मे़ॽआङ् युक्खे़म्मे़ॽओ॥ 36हे़क्क्याङ् निङ्वाॽ इरे़ चसिबा से़वारोबाहाॽ हे़क्के खिनिॽ पोःक्खे़म्मे़ॽओ॥ खुनिॽ दाङ्बान् मेःक्खिम् साभाङ्जा चासे़ पेःक्काङ् नुःङ् ताःल्ले़ खिमो लाम्धेःप्पे़न् हम्मा फाॽआङ् खे़ङ्हाॽ मे़न्इम्मे बा मे़युङ्लो॥ 37हे़क्क्याङ् दाङ्बान् नुःङ् ताःल्ले़, मे़न्इम्मे खुने़ॽ के़हाङ्बार के़युङ्बा से़वारोबाहाॽरे़ मुॽइसाम् मे़घोसुॽ, थेआङ्भे़ल्ले़ खे़ल्ले़ आबाङे यारिप् चोःक्सिङ्ङाङ् से़वारोबाहाॽ चामादे़न्नो युक्खुसिॽ हे़क्क्याङ् चामा थुङ्माहाॽ थाबु पिरुसिॽरो॥ 38हे़क्क्याङ् खे़न् हिम्दाङ्बे़न् से़त्लुम्भक् खिरि तासाङ् खे़ङ्हाॽ मे़न्इम्मे मे़युङ्बा तुमुसिॽरो॥ हे़क्केःल्ले़ से़क्खाए मे़त्निङ्, खे़न् कुसेवारोबाहाॽग मुॽइसाबासिरो॥ 39हिम्दाङ्बाल्ले़ खुःन्द्रिक्पे़न् खुःन्छे़ ता के़लॽबा ये़म्मिन् निङ्वाॽ खोसुने़ फाॽग्र से़क्खासाङ् खुःप्मा मे़बाङ्घुन् के़लॽबा पाःन्निन् कुसिङ् निःत्ते़म्मे़ॽओ॥ 40खिनिॽआङ् आप्फाल्ले़साङ् यारिप् वये़म्मे़ॽओ, थेआङ्भे़ल्ले़ मे़न्छाम्सान् यु फाॽआङ् मे़न्इःत्ते के़वयिल्ले़ खुने़ॽ युरो॥”
इङ्जाङ्गे़म्बा से़वारोबा
(मत्ति २४:४५-५१)
41पत्रुसरे़ सेःन्दोसु, “आदाङ्बे, कन् खे़दाॽइन् आनिगे लागि के़बाःत्तुबाबि, इ वेॽ के़रे़क्ले़ लागिआङ् के़बाःत्तुबाबि?”
42दाङ्बाल्ले़ मे़त्तुसि, आत्तिन् से़वारोबान् नसाःन्साबा नु सिक्कुम्साबा चोक्, खे़न्निन् हिम्दाङ्बाल्ले़ कुहिम्धाःङ्हाॽ ओमे़प्मा युक् पिरुॽ हे़क्क्याङ् खे़ल्ले़ वेॽ से़वारोबाहाॽ ये़म्ये़म्मो चामा थुङ्मा पिरुसिॽरो॥ 43खे़न् हिम्दाङ्बान् नुःङ् ताःल्ले़ खे़न् से़वारोबाल्ले़ बा हे़क्केए चोगुर वाॽबा तुमुने़ फाॽग्र खे़न् थुम्घो पिरुॽरो॥ 44इङ्गाॽ से़क्खाए मे़त्निङ्, खे़न् हिम्दाङ्बाल्ले़ खे़न् से़वारोबान् के़रे़क् कुयाङ्साकुन्धे सम्दाङ् युक् पिरुॽरो॥ 45कर आत्तिन् से़वारोबाल्ले़ खुने़ॽ कुनिङ्वाॽबो इङ्गाॽ आन्दाङ्बान् हारा मे़दाने़न् लॽरिक् इतुर च थुङुॽ, हे़क्क्याङ् मसिङ्ङाङ् वेॽ से़वारोबा नु से़वारोमाहाॽ हिप्तुसिॽ लःप्सुसिॽर वाॽइल्ले़ 46मे़न्इःत्तेबा नु निङ्वाॽ मे़ङ्घोएबा ये़न्नो हिम्दाङ्बे़न् हिम्मो नुःङ् ताआङ् खे़न् साॽरिक् ते़ःम्भुक् याक्तुॽ॥ हे़क्क्याङ् नसान् मे़न्जोःक्मनाबाहाॽनु सोरिक् खुम्दिङ् पिरुॽरो॥
47“हे़क्क्याङ् आत्तिन् से़वारोबाल्ले़ खुने़ॽ कुन्दाङ्बाल्ले़ कुनिङ्वाॽइन् निसुसाङ् खे़न् कुइसिक् यारिप् मे़म्बोङ्ङे कुन्दाङ्बाल्ले़ कुनिङ्वाॽ हे़क्के मे़जोगुन्निल्ले़ खे़ल्ले़ साॽरिक् ते़ःम्भुक् खोसुॽरो॥ 48कर हाःत्ले़ कुन्दाङ्बाल्ले़ कुनिङ्वाॽइन् मे़निसुन्नाङ् ते़ःम्भुक् चामा याःम्बक् चोगुॽ, खे़ल्ले़ मिसाक्लक् ते़ःम्भुक् चरो॥ हाःत्ले़ यरिक् खोसुॽ, खे़ल्लोलाम् यरिक्के नाःक्लो, हे़क्क्याङ् हाःत्ले़ यरिक् लक्पे़न् खोसुॽ खे़ल्लोलाम्माङ् यरिक्के नाःक्लो॥”
ये़सुरे़ ये़मे़न्दङ् तारुॽ
(मत्ति १०:३४-३६)
49“इङ्गाॽ इक्सादिङ् खाम्बेःक्मो मि केःत्छे़ त्याङ्बारो, कर तगिसा मि लासे़ल्ले़ नुबा पोःक्खे़बारो॥ 50इङ्गाॽआङ् इनोगे़न् तुक्खेःल्ले़न् बप्तिस्मा पोङ्मा कत्तुङ्लो॥ खे़न् मे़न्जुःत्ते थारिक् आसक्मा हुॽसिङ्ङाङ् वाॽरो॥ 51इङ्गाॽ इक्सादिङ् खाम्बेःक्मो सनारुङ् ताःत्छे़ त्याङ्बा फाॽआङ् के़इःत्तुबि? मेःन्लो! इङ्गाॽग मनाहाॽ से़म्मासि फाॽआङ् त्याङ्बारो॥ 52आल्लआङ्धो ङासि मना के़वाॽबा हिम्सयङ्ङो सुम्भुरे़ तक्ले़ङ्वाओ ने़प्फु, हे़क्क्याङ् खे़न् ने़प्फुरे़ खुन्छिॽ तक्ले़ङ्वाओ सुम्भु मे़बोःक्काङ् खे़ङ्हाॽ मे़से़रो॥ 53कुम्बान् कुस्साःल्ले़ कुदक्ले़ङ्वाओ पोक्, हे़क्केलॽरिक्के कुस्सान् कुम्बारे़ कुदक्ले़ङ्वाओ, हे़क्क्याङ् कुम्मान् कुस्सा मे़न्छुमाॽइल्ले़ कुदक्ले़ङ्वाओ, हे़क्क्याङ् कुस्सा मे़न्छुमाॽइन् कुम्मारे़ कुदक्ले़ङ्वाओ पोःक्लो॥ हे़क्क्याङ् नोःप्मे़न् कुम्बाङ्लिःल्ले़ कुदक्ले़ङ्वाओ, हे़क्क्याङ् पाङ्लिमे़न् कुन्नोःप्माल्ले़ कुदक्ले़ङ्वाओ पोःक्लो॥”
ये़म्रे़न् मिक्सेःन्हाॽ
(मत्ति १६:२-३)
54हे़क्क्याङ् खुने़ॽ याम्मो यरिक् मनाहाॽ मे़त्तुसि, “नाम्धा पिसाङ् खाप्मिःप्पान् के़निसुम्मिल्ले़ आल्लोसा वाहित् थाःॽ फाॽआङ् के़बाःत्तुम्, हे़क्क्याङ् हे़क्केलॽरिक् वाहित् थाःॽ॥ 55लाङ्गे़न्बा सुरित् केजङ्ङिन् हुःल्ले़ आल्ल साॽरिक् हाङ्वा लॽरिक् के़बाःत्तुम्, हे़क्क्याङ् हे़क्केए पोङ्॥ 56खिनिॽ कुनिङ्वाॽ के़जिःप्पासे, अक्खेलॽरिक् इक्सादिङ् खाम्बेःक्मो नु तरःङ्दिङ् ताङ्साङ्ङोबा पाःन्निन् ओगे़मे़त्तुम्माङ् ताःन्दिक् के़बोङ्बा पाःन्निन् के़बाःत्तुम्, कर कन् ये़म्मो के़दाबा मिक्सेःन्हाॽ थेआङ् कुसिङ् के़न्निःत्तुम्मिन्बाबे?”
बिफ्युङ् नु नादङ् चोःक्मा
(मत्ति ५:२५-२६)
57“खिनिॽ इङ्गाॽ चोगुङ्बा याःम्बक्किन् नुबाबि मेःम्बि फाॽआङ् थेआङ् आबाङे के़न्छे़न्दुम्मिन्बाबे? 58खे़ने़ॽ आप्तिक् के़गुःप्पे़न्नु खासे़न्हिम्मो के़बेःक्किल्ले़, लाम्मोसा फोत्या के़गुःप्पे़न्नु नादङ् चोगे़ॽओ॥ मेःन्ने फाॽग्र खे़ल्ले़ खे़ने़ॽ खासे़न्लोःम्बाल्लो के़देॽआङ् खे़न् खासे़न्लोःम्बाल्ले़ तिलिङ्गाहाॽरो हुक्के़सुप् हे़क्क्याङ् खे़ङ्हाॽरे़ पुङ्लाहिम्मो के़म्धे़क्लो॥ 59हे़क्क्याङ् हुङ्मा के़बोङ्बा काक् साम्बाःन्याङ् मे़न्हुङ्ङे थारिक् खे़प्मोए के़याक्लो॥”
Currently Selected:
लुका 12: LIF
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
