Nyɛ̀nɛ̀ŋ 1
1
1Dàa Tìɔ̀felɔ̀, wɔŋ fɛi jiɛ̀jiɛ̀ miɔ̀ŋ sùà mìŋ naŋ sìngè e kèè maŋ keì maŋ gbiŋ wo Kanaà Jisɛ̀ naŋ nyɛ̀nɛ̀ŋ e kìlà wò naŋ kaà maŋ e yìwìà e teengaà wò naŋ wa tɔ̀ɔ̀tù e tòmouŋ nɛ̀ lɛ, 2e jèèsùà e hàì ke ɗɔɔɛ̀ wo Dayà nauŋ wa jùwìè ko àìjɛnɛ̀ŋ lɛ. Wèè paŋ wo nɔ̀ŋ wa jòòwouŋ, wo kanaà Jisɛ̀ naŋ wa wòò maŋ mìè gbòa e yìwìà e gààŋ wo Jìnàŋ Nɛɛmaàŋ sùà koɓɛ̀ aŋ keela tàeɗùùuŋ nyàŋ wò naŋ jàà e ɓula titi nyàŋ wèè e nɛ̀ɛŋ àŋ kuwa wa aŋ nyɛ̀nɛ̀ŋ lɛ. 3Wèè maŋ ɗɔɔ kpɛ̀ùŋ tìyèe sùà e yìwìà e teengaà wo Kanaà Jisɛ̀ naŋ wa fɔ̀ lɛ, wò naŋ nyiŋ fòlò feìŋ e teenga zimgbe maŋ dòmanyaaŋ titi bà sùà, maŋ yè maŋ naŋ nyiŋ tɔɔ̀ jaŋyai e hààwe sùà kɛ̀ kòò wò yaà wɔŋ nyiiŋ gèeɔ̀ sùà. Àŋ nauŋ yɛmɛ̀, yèè wò naŋ nyiŋ gbòò kɔɔ e nyaàiŋ dè e kèè e Kànà Dayàa. 4E teengaà wo Kanaà Jisɛ̀ yaà anyùùŋ màŋjɛ̀wɛ̀uŋ nyàŋ naŋ wa dèènè koɓɛ̀ guùŋ nɛ, wò naŋ nyiŋ wa kìɛ̀ŋ e go nyìnga wààŋ, “Ɓɔ̀ nìŋ yèwà kò Jùlusɛ̀làm, kɛɛ fòlaìŋ e nɛ̀ŋ kìɛɛ̀ŋ wo Dèda miɔ̀ŋ naiŋ wa wòò kii niŋ lɛ̀, e nɛ̀ŋ kìɛɛ̀ŋ wo Dèda miɔ̀ŋ naŋ wa jɔ̀ɔ̀ e ɗààhiì kɛ̀ wò doiŋ nàŋ kiɛ̀ŋ lɛ. 5Wo Jɔ̀ɔŋ naŋ wa nɔŋ gùùyè anyùùŋ e wùìyè, kɛɛ maŋ ɗɔɔ kpàa bà sùà, wo Dayà doiŋ nàŋ gùùyè wo Jìnàŋ Nɛɛmaàŋ.”
Wo Dayà jùwìà wo Kanaà Jisɛ̀ ko Àìjɛnɛ̀ŋ
6Nààŋ aŋ keela tàeɗùù nyaŋ naŋ wa dèènè koɓɛ̀ guùŋ wo Kanaà Jisɛ̀ kɔɔ, àŋ nauŋ dawè nyààŋ, “Kanaà, e teenga lɛɛ̀ sùà mùŋ do nàŋ gè anyùùŋ Ezɔ̀ɛ̀ nyaŋ nyààŋ diɛŋ wèè aŋ ɓɛìŋ kɛ̀ɛ̀ e Kànà nyiŋ biɛ̀?”
7Wo Kanaà Jisɛ̀ naŋ nyiŋ fasàì wààŋ, “Wo Dèda miɔ̀ŋ wuŋ guùŋ nàŋ ɗewà kɛ̀ kiìŋ è teenga maŋ keì mɛɛ̀ŋ do nàŋ kaaìŋ. Wo Dayà goiŋ gè nyààŋ diɛŋ wèè naŋ nyìmàŋ è teengaà màŋ do nàŋ kaaìŋ lɛ. 8Kɛɛ e teengaà wo Jìnàŋ Nɛɛmaàŋ doiŋ nàŋ kìɛ̀ŋ gààŋ lɛ̀, e gààŋ doiŋ nàŋ sɛ̀ɛ̀ sùà, nìŋ do nàŋ nɔ̀ŋ aŋ sèì e kìlà naŋ wòò anyùùŋ kɛ̀ kiìŋ nìŋ naŋ nyìmè e nyaàiŋ eim dè ko Jùlusɛ̀làm, wɔŋ fùɔ̀ŋ Jùdiàa, wɔŋ fùɔ̀ŋ Sàmiliàa yaà maŋ fuɔŋ joo màŋ gbiŋ sùà e ɗuunyaàŋ.” 9Nààŋ wò naŋ wa tɛɛ̀ kpɛ̀ɛ̀yɛ̀ wòo, wo Dayà nauŋ jòòwò ko àìjɛnɛ̀ŋ nààŋ àŋ yàuŋ wa yɛɛmɛ, yèè ke nyiliɛ̀ nauŋ nyɛɛnɛ̀ŋ aŋ gòuŋ wa ɓɛìŋ yɛmɛ̀.
10Nààŋ anyùùŋ màŋjɛ̀wɛ̀ nyaŋ yaà wa nɔŋ yɛ̀ɛ̀mɛ̀ ke nyiliɛ̀ nààŋ wo Kanaà Jisɛ̀ yaà wa jòwà sùà, e teenga kpuu sùà aŋ fèlàà nyùùŋ tìyèe gɔaa maŋ deè fùà naŋ nyiŋ sìè kɔɔ. 11Aŋ felaa nyàŋ naŋ nyiŋ dawè nyààŋ, “Nyùnòò fùɔ̀ŋ Galaliì nyɛɛ̀ŋ, wèè kiìŋ nìŋ sia kià nìŋ yaà yɛ̀ɛ̀mɛ̀ ke nyiliɛ̀? Wo Kanaà Jisɛ̀ wɛɛ̀ wo Dayà naiŋ yaà gè sìwè wò naŋ kɔ̀ ko àìjɛnɛ̀ŋ wɔ, do ɓɛìŋ nàŋ kɛɛ̀ e ɗèwè guùŋ nɛ sùà màànààŋ nɔŋ nìŋ nauŋ yɛmɛ̀ wò naŋ jòwò ko àìjɛnɛ̀ŋ lɛ.”
Wo nyùnɔ̀ɔŋ naŋ dè ebɛ̀ŋ Juɗà wɔ
12Kpeiŋ aŋ keela tàeɗùù nyaŋ naŋ kɛ̀ɛ̀ maŋjɛ̀wɛ ko Jùlusɛ̀làm e yìwìà wɔŋ tòò maŋ Ɔlè Kùùɔ, ko yèi yaà wa e sɔ̀ngɔ̀ e kààìŋ haawà gbu e yìwìà ko Jùlusɛ̀làm, ko jawa gbeeì. 13Nààŋ àŋ naŋ hàì ko jawa gbeeì, àŋ naŋ jòwò ko sààŋ fùùiŋ ko yèi àŋ hewa joo lɛ̀. Aŋ yè nyaŋ yao wa ko fɛɛ̀feìŋ nyaŋ nàŋ yaà, wo Pììlɛ, wo Jɔ̀ɔŋ, wo Jìiiŋ yèè wo Anɗù, wo Felè yèè wo Tàmaŋ, wo Bàtolomiò yèè wo Maafiù, wo Jìiiŋ wo jɔ̀àfèlàà Afiɔ̀ɔ yèè wo Saimɔ̀ŋ wo yèɔ manaŋ e kìlà wò toomàŋ e tɔ̀ɔ̀nyaàŋ sùà wèè wɔŋ fuɔuŋ nɔɔ̀ŋ, yaà wo Juɗà wo jɔ̀àfèlàà Jìiɔ̀ŋ. 14Anyuùŋ hààwe nyàŋ e kpùlìà aŋ jɔùŋ nyaŋ yaà wo Mèèle wo nààŋ Jisɛ̀ɔ yèè aŋ wùìyà Kanaà Jisɛ̀ nyaŋ hewa dèènè koɓɛ̀ guùŋ e teenga gbiŋ wèè aŋ zòòlò koɓɛ̀ guùŋ.
15Maŋ ɗɔɔ kpàa naŋ mààŋ yèè anyuùŋ hààwe nyàŋ naŋ dèènè koɓɛ̀ guùŋ. Àŋ yaà wa e sɔ̀ngɔ̀ anyuùŋ hɔ̀nɔ̀ɔ̀ guùŋ kpɛ̀ɛ̀ùŋ guùŋ (120), kpeiŋ wo Pììlɛ naŋ sie wèè wo gbòà koɓɛ̀ anyùùŋ nyaŋ. 16Wò naŋ woò wààŋ, “Nyɛ̀iŋ nààŋ nyuùŋ hààwe dàwim nyàŋ, e yèɛ wɔŋ fɛ̀ì Dayàa naŋ woò lɛ kuwa e hɛɛnɛ̀ŋ, e yìwìà ko yèi wo Jìnàŋ Nɛɛmaàŋ naŋ wa gbùùyè wo Dèèwe sùà lɛ. Wɔ̀ŋ naŋ wòò e keìɛ wo Juɗà do wa nàŋ nyɛ̀nɛ̀ŋ ko dòmànfeìŋ lɛ, wo yèɔ naŋ wa nɔ̀ŋ wo sìèfèìŋ anyùùŋ nyaŋ naŋ wa kùwò wo Kanaà Jisɛ̀ nyaŋ. 17Wo Juɗà yaà wa wo nyuùŋ mɔ̀ɔ̀nɔŋ wi, yèè yàwi nààŋ gbiŋ naiŋ wa tòòmò koɓɛ̀ guùŋ nààŋ wo Jisɛ̀ nauŋ wa tàeɗùù lɛ.”
( 18E nɛɛnɛɛ̀ŋ wo Juɗà naŋ wa kùwò wèè ke kpèè naanààuŋ nɛɛ̀ŋ lɛ, tiiŋ wò naŋ wa dìnìè e dìì. Kuii wò naŋ wa fɔɔyɛ̀. Ke kpùnauŋ nɛɛ̀ŋ naŋ wa mingè, ke suàuŋ nɛɛ̀ŋ ke sɛkɛ̀ yèè e tùuŋ nɛ̀ naŋ fòlò e ɓaayè. 19Anyùùŋ nyaŋ gbiŋ ko Jùlusɛ̀làm naŋ wa kòmò e keìɛ naŋ wa kààìŋ wo Juɗà lɛ. Kpeiŋ wɔŋ kàìŋ nyiŋ biɔ̀ sùà, àŋ naŋ nyààŋ e dìì bì nyààŋ Àkeɗamàŋ, e fàsàì tii nàŋ yaà, “E dìì koɓɛ̀i maŋ sɛ̀ìŋ naŋ wuunyɛ̀ŋ lɛ.”)
20Wo Pììlɛ naŋ ɓɛìŋ woò wààŋ, “Esaɓù kɛ̀ è yaà sìnga niŋ wɔŋ fɛ̀ì maŋ nùŋ Dayàa sùà àŋ nyaaŋ Saààm wɔŋ kɛ̀,
‘Tɔ̀ ke sààŋ Juɗàa joo foo nyiŋ,
e kìlà wo nyùùŋ gbiŋ ɓɔ̀ wò nɔ̀ŋ nyiŋ dìì.’
È yaà ɓɛìŋ sìnga niŋ kɛ̀,
‘Tɔ̀ wo nyùùŋ bà dè bɛ̀uŋ ko toomouŋ niìŋ ke gboò wiɛ̀ sùà.’
21-22“Weètii, è mànàìŋ wo nyùùŋ bà ke gboò wiɛ̀ sùà wèè wo wì kpuumàŋ wo kìɛ̀ŋ ke mìè seì e kìlà wo wòò anyuùŋ joo kɛ̀ wo Kanaà Jisɛ̀ yèwà e fàa dìì wɔŋ nyiiŋ gèeo sùà. Wò kuwa wo nɔ̀ŋ wo nyùnɔ̀ɔŋ bà guùŋ wo yèɔ yaà wa ke gboò wiɛ̀ sùà e yìwìà ko tɔɔtuì. Wo nɔ̀ŋ wo yèɔ yàà wì wa e tɛɛ e yìwìà e teengaà wo Jɔ̀ɔŋ Gùà Nyùnɔ̀ɔŋ naŋ wa gùò wo Kanaà Jisɛ̀ lɛ e jèèsùà e hàì ke ɗɔɔɛ̀ wo Dayà nauŋ wa jùwìè ko àìjɛnɛ̀ŋ lɛ.”
23Kpeiŋ anyuùŋ hààwe nyàŋ naŋ tà anyùùŋ tìyèe ɗùù, wo Jòòsɛ, wo yèɔ àŋ nyaaŋ wa nyààŋ Bàsaɓà, wo yèɔ àŋ hewa ɓɛìŋ nyààŋ wo Jɔsitɔ̀ wɔ, yaà wo Màtayà. 24Kpeiŋ aŋ gbiŋ naŋ zoolò nyààŋ, “Kanaà Jisɛ̀, màŋ nyìmàŋ maŋ gòngò maŋ jìì kòmàŋ nyuùnkpùuŋ gbiŋ, weètii tɔ̀ɔ̀ wi kɛ̀ kòuŋ aŋ fèlàà tìyèe nyɛɛ̀ŋ e fèemàŋ mùŋ naŋ tàeɗùù 25wèè wo nyɛ̀nɛ̀ŋ e tòmò keela tàèɗùùɛ ebɛ̀ŋ wo Juɗà, wo yèɔ naŋ dàngè e tòmoɛ̀ yèè wò naŋ kɔ̀ koɓɛ̀i wò kanaŋ wa lɛ̀.” 26Kpeiŋ àŋ naŋ dàà ke kpɔlɔ maŋ dèè aŋ fèlàà tìyèe nyɛɛ̀ŋ diɛŋ, yèè kekpɔlɔɛ̀ naŋ kùwò e dèè Màtayàa, yèè àŋ naŋ gbìɛ̀ŋ e deèuŋ nɛ̀ ke gbòò aŋ keela tàeɗùù zììyà jɛ̀wɛ̀ guùŋ nyaŋ e tɛɛ.
Currently Selected:
Nyɛ̀nɛ̀ŋ 1: WFESD
Highlight
Share
Copy
Want to have your highlights saved across all your devices? Sign up or sign in
Gola New Testament Translation and Literacy Project © Bible Society in Liberia, 2019.
Nyɛ̀nɛ̀ŋ 1
1
1Dàa Tìɔ̀felɔ̀, wɔŋ fɛi jiɛ̀jiɛ̀ miɔ̀ŋ sùà mìŋ naŋ sìngè e kèè maŋ keì maŋ gbiŋ wo Kanaà Jisɛ̀ naŋ nyɛ̀nɛ̀ŋ e kìlà wò naŋ kaà maŋ e yìwìà e teengaà wò naŋ wa tɔ̀ɔ̀tù e tòmouŋ nɛ̀ lɛ, 2e jèèsùà e hàì ke ɗɔɔɛ̀ wo Dayà nauŋ wa jùwìè ko àìjɛnɛ̀ŋ lɛ. Wèè paŋ wo nɔ̀ŋ wa jòòwouŋ, wo kanaà Jisɛ̀ naŋ wa wòò maŋ mìè gbòa e yìwìà e gààŋ wo Jìnàŋ Nɛɛmaàŋ sùà koɓɛ̀ aŋ keela tàeɗùùuŋ nyàŋ wò naŋ jàà e ɓula titi nyàŋ wèè e nɛ̀ɛŋ àŋ kuwa wa aŋ nyɛ̀nɛ̀ŋ lɛ. 3Wèè maŋ ɗɔɔ kpɛ̀ùŋ tìyèe sùà e yìwìà e teengaà wo Kanaà Jisɛ̀ naŋ wa fɔ̀ lɛ, wò naŋ nyiŋ fòlò feìŋ e teenga zimgbe maŋ dòmanyaaŋ titi bà sùà, maŋ yè maŋ naŋ nyiŋ tɔɔ̀ jaŋyai e hààwe sùà kɛ̀ kòò wò yaà wɔŋ nyiiŋ gèeɔ̀ sùà. Àŋ nauŋ yɛmɛ̀, yèè wò naŋ nyiŋ gbòò kɔɔ e nyaàiŋ dè e kèè e Kànà Dayàa. 4E teengaà wo Kanaà Jisɛ̀ yaà anyùùŋ màŋjɛ̀wɛ̀uŋ nyàŋ naŋ wa dèènè koɓɛ̀ guùŋ nɛ, wò naŋ nyiŋ wa kìɛ̀ŋ e go nyìnga wààŋ, “Ɓɔ̀ nìŋ yèwà kò Jùlusɛ̀làm, kɛɛ fòlaìŋ e nɛ̀ŋ kìɛɛ̀ŋ wo Dèda miɔ̀ŋ naiŋ wa wòò kii niŋ lɛ̀, e nɛ̀ŋ kìɛɛ̀ŋ wo Dèda miɔ̀ŋ naŋ wa jɔ̀ɔ̀ e ɗààhiì kɛ̀ wò doiŋ nàŋ kiɛ̀ŋ lɛ. 5Wo Jɔ̀ɔŋ naŋ wa nɔŋ gùùyè anyùùŋ e wùìyè, kɛɛ maŋ ɗɔɔ kpàa bà sùà, wo Dayà doiŋ nàŋ gùùyè wo Jìnàŋ Nɛɛmaàŋ.”
Wo Dayà jùwìà wo Kanaà Jisɛ̀ ko Àìjɛnɛ̀ŋ
6Nààŋ aŋ keela tàeɗùù nyaŋ naŋ wa dèènè koɓɛ̀ guùŋ wo Kanaà Jisɛ̀ kɔɔ, àŋ nauŋ dawè nyààŋ, “Kanaà, e teenga lɛɛ̀ sùà mùŋ do nàŋ gè anyùùŋ Ezɔ̀ɛ̀ nyaŋ nyààŋ diɛŋ wèè aŋ ɓɛìŋ kɛ̀ɛ̀ e Kànà nyiŋ biɛ̀?”
7Wo Kanaà Jisɛ̀ naŋ nyiŋ fasàì wààŋ, “Wo Dèda miɔ̀ŋ wuŋ guùŋ nàŋ ɗewà kɛ̀ kiìŋ è teenga maŋ keì mɛɛ̀ŋ do nàŋ kaaìŋ. Wo Dayà goiŋ gè nyààŋ diɛŋ wèè naŋ nyìmàŋ è teengaà màŋ do nàŋ kaaìŋ lɛ. 8Kɛɛ e teengaà wo Jìnàŋ Nɛɛmaàŋ doiŋ nàŋ kìɛ̀ŋ gààŋ lɛ̀, e gààŋ doiŋ nàŋ sɛ̀ɛ̀ sùà, nìŋ do nàŋ nɔ̀ŋ aŋ sèì e kìlà naŋ wòò anyùùŋ kɛ̀ kiìŋ nìŋ naŋ nyìmè e nyaàiŋ eim dè ko Jùlusɛ̀làm, wɔŋ fùɔ̀ŋ Jùdiàa, wɔŋ fùɔ̀ŋ Sàmiliàa yaà maŋ fuɔŋ joo màŋ gbiŋ sùà e ɗuunyaàŋ.” 9Nààŋ wò naŋ wa tɛɛ̀ kpɛ̀ɛ̀yɛ̀ wòo, wo Dayà nauŋ jòòwò ko àìjɛnɛ̀ŋ nààŋ àŋ yàuŋ wa yɛɛmɛ, yèè ke nyiliɛ̀ nauŋ nyɛɛnɛ̀ŋ aŋ gòuŋ wa ɓɛìŋ yɛmɛ̀.
10Nààŋ anyùùŋ màŋjɛ̀wɛ̀ nyaŋ yaà wa nɔŋ yɛ̀ɛ̀mɛ̀ ke nyiliɛ̀ nààŋ wo Kanaà Jisɛ̀ yaà wa jòwà sùà, e teenga kpuu sùà aŋ fèlàà nyùùŋ tìyèe gɔaa maŋ deè fùà naŋ nyiŋ sìè kɔɔ. 11Aŋ felaa nyàŋ naŋ nyiŋ dawè nyààŋ, “Nyùnòò fùɔ̀ŋ Galaliì nyɛɛ̀ŋ, wèè kiìŋ nìŋ sia kià nìŋ yaà yɛ̀ɛ̀mɛ̀ ke nyiliɛ̀? Wo Kanaà Jisɛ̀ wɛɛ̀ wo Dayà naiŋ yaà gè sìwè wò naŋ kɔ̀ ko àìjɛnɛ̀ŋ wɔ, do ɓɛìŋ nàŋ kɛɛ̀ e ɗèwè guùŋ nɛ sùà màànààŋ nɔŋ nìŋ nauŋ yɛmɛ̀ wò naŋ jòwò ko àìjɛnɛ̀ŋ lɛ.”
Wo nyùnɔ̀ɔŋ naŋ dè ebɛ̀ŋ Juɗà wɔ
12Kpeiŋ aŋ keela tàeɗùù nyaŋ naŋ kɛ̀ɛ̀ maŋjɛ̀wɛ ko Jùlusɛ̀làm e yìwìà wɔŋ tòò maŋ Ɔlè Kùùɔ, ko yèi yaà wa e sɔ̀ngɔ̀ e kààìŋ haawà gbu e yìwìà ko Jùlusɛ̀làm, ko jawa gbeeì. 13Nààŋ àŋ naŋ hàì ko jawa gbeeì, àŋ naŋ jòwò ko sààŋ fùùiŋ ko yèi àŋ hewa joo lɛ̀. Aŋ yè nyaŋ yao wa ko fɛɛ̀feìŋ nyaŋ nàŋ yaà, wo Pììlɛ, wo Jɔ̀ɔŋ, wo Jìiiŋ yèè wo Anɗù, wo Felè yèè wo Tàmaŋ, wo Bàtolomiò yèè wo Maafiù, wo Jìiiŋ wo jɔ̀àfèlàà Afiɔ̀ɔ yèè wo Saimɔ̀ŋ wo yèɔ manaŋ e kìlà wò toomàŋ e tɔ̀ɔ̀nyaàŋ sùà wèè wɔŋ fuɔuŋ nɔɔ̀ŋ, yaà wo Juɗà wo jɔ̀àfèlàà Jìiɔ̀ŋ. 14Anyuùŋ hààwe nyàŋ e kpùlìà aŋ jɔùŋ nyaŋ yaà wo Mèèle wo nààŋ Jisɛ̀ɔ yèè aŋ wùìyà Kanaà Jisɛ̀ nyaŋ hewa dèènè koɓɛ̀ guùŋ e teenga gbiŋ wèè aŋ zòòlò koɓɛ̀ guùŋ.
15Maŋ ɗɔɔ kpàa naŋ mààŋ yèè anyuùŋ hààwe nyàŋ naŋ dèènè koɓɛ̀ guùŋ. Àŋ yaà wa e sɔ̀ngɔ̀ anyuùŋ hɔ̀nɔ̀ɔ̀ guùŋ kpɛ̀ɛ̀ùŋ guùŋ (120), kpeiŋ wo Pììlɛ naŋ sie wèè wo gbòà koɓɛ̀ anyùùŋ nyaŋ. 16Wò naŋ woò wààŋ, “Nyɛ̀iŋ nààŋ nyuùŋ hààwe dàwim nyàŋ, e yèɛ wɔŋ fɛ̀ì Dayàa naŋ woò lɛ kuwa e hɛɛnɛ̀ŋ, e yìwìà ko yèi wo Jìnàŋ Nɛɛmaàŋ naŋ wa gbùùyè wo Dèèwe sùà lɛ. Wɔ̀ŋ naŋ wòò e keìɛ wo Juɗà do wa nàŋ nyɛ̀nɛ̀ŋ ko dòmànfeìŋ lɛ, wo yèɔ naŋ wa nɔ̀ŋ wo sìèfèìŋ anyùùŋ nyaŋ naŋ wa kùwò wo Kanaà Jisɛ̀ nyaŋ. 17Wo Juɗà yaà wa wo nyuùŋ mɔ̀ɔ̀nɔŋ wi, yèè yàwi nààŋ gbiŋ naiŋ wa tòòmò koɓɛ̀ guùŋ nààŋ wo Jisɛ̀ nauŋ wa tàeɗùù lɛ.”
( 18E nɛɛnɛɛ̀ŋ wo Juɗà naŋ wa kùwò wèè ke kpèè naanààuŋ nɛɛ̀ŋ lɛ, tiiŋ wò naŋ wa dìnìè e dìì. Kuii wò naŋ wa fɔɔyɛ̀. Ke kpùnauŋ nɛɛ̀ŋ naŋ wa mingè, ke suàuŋ nɛɛ̀ŋ ke sɛkɛ̀ yèè e tùuŋ nɛ̀ naŋ fòlò e ɓaayè. 19Anyùùŋ nyaŋ gbiŋ ko Jùlusɛ̀làm naŋ wa kòmò e keìɛ naŋ wa kààìŋ wo Juɗà lɛ. Kpeiŋ wɔŋ kàìŋ nyiŋ biɔ̀ sùà, àŋ naŋ nyààŋ e dìì bì nyààŋ Àkeɗamàŋ, e fàsàì tii nàŋ yaà, “E dìì koɓɛ̀i maŋ sɛ̀ìŋ naŋ wuunyɛ̀ŋ lɛ.”)
20Wo Pììlɛ naŋ ɓɛìŋ woò wààŋ, “Esaɓù kɛ̀ è yaà sìnga niŋ wɔŋ fɛ̀ì maŋ nùŋ Dayàa sùà àŋ nyaaŋ Saààm wɔŋ kɛ̀,
‘Tɔ̀ ke sààŋ Juɗàa joo foo nyiŋ,
e kìlà wo nyùùŋ gbiŋ ɓɔ̀ wò nɔ̀ŋ nyiŋ dìì.’
È yaà ɓɛìŋ sìnga niŋ kɛ̀,
‘Tɔ̀ wo nyùùŋ bà dè bɛ̀uŋ ko toomouŋ niìŋ ke gboò wiɛ̀ sùà.’
21-22“Weètii, è mànàìŋ wo nyùùŋ bà ke gboò wiɛ̀ sùà wèè wo wì kpuumàŋ wo kìɛ̀ŋ ke mìè seì e kìlà wo wòò anyuùŋ joo kɛ̀ wo Kanaà Jisɛ̀ yèwà e fàa dìì wɔŋ nyiiŋ gèeo sùà. Wò kuwa wo nɔ̀ŋ wo nyùnɔ̀ɔŋ bà guùŋ wo yèɔ yaà wa ke gboò wiɛ̀ sùà e yìwìà ko tɔɔtuì. Wo nɔ̀ŋ wo yèɔ yàà wì wa e tɛɛ e yìwìà e teengaà wo Jɔ̀ɔŋ Gùà Nyùnɔ̀ɔŋ naŋ wa gùò wo Kanaà Jisɛ̀ lɛ e jèèsùà e hàì ke ɗɔɔɛ̀ wo Dayà nauŋ wa jùwìè ko àìjɛnɛ̀ŋ lɛ.”
23Kpeiŋ anyuùŋ hààwe nyàŋ naŋ tà anyùùŋ tìyèe ɗùù, wo Jòòsɛ, wo yèɔ àŋ nyaaŋ wa nyààŋ Bàsaɓà, wo yèɔ àŋ hewa ɓɛìŋ nyààŋ wo Jɔsitɔ̀ wɔ, yaà wo Màtayà. 24Kpeiŋ aŋ gbiŋ naŋ zoolò nyààŋ, “Kanaà Jisɛ̀, màŋ nyìmàŋ maŋ gòngò maŋ jìì kòmàŋ nyuùnkpùuŋ gbiŋ, weètii tɔ̀ɔ̀ wi kɛ̀ kòuŋ aŋ fèlàà tìyèe nyɛɛ̀ŋ e fèemàŋ mùŋ naŋ tàeɗùù 25wèè wo nyɛ̀nɛ̀ŋ e tòmò keela tàèɗùùɛ ebɛ̀ŋ wo Juɗà, wo yèɔ naŋ dàngè e tòmoɛ̀ yèè wò naŋ kɔ̀ koɓɛ̀i wò kanaŋ wa lɛ̀.” 26Kpeiŋ àŋ naŋ dàà ke kpɔlɔ maŋ dèè aŋ fèlàà tìyèe nyɛɛ̀ŋ diɛŋ, yèè kekpɔlɔɛ̀ naŋ kùwò e dèè Màtayàa, yèè àŋ naŋ gbìɛ̀ŋ e deèuŋ nɛ̀ ke gbòò aŋ keela tàeɗùù zììyà jɛ̀wɛ̀ guùŋ nyaŋ e tɛɛ.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Gola New Testament Translation and Literacy Project © Bible Society in Liberia, 2019.