Nyɛ̀nɛ̀ŋ 2

E ɗeweɛ̀ wo Jìnàŋ Nɛɛmaàŋ naŋ wa hnè lɛ

1Nààŋ ke ɗɔ̀ɔ̀ zòòlò aŋ Juùù nyaŋ àŋ nyaaŋ Pɛnɛŋkɔ̀ɛ naŋ wa haì, anyuùŋ hààwe nyàŋ gbiŋ naŋ wa dèènè koɓɛ̀ guùŋ. 2Ko fɛɛ̀feìŋ e giimè naŋ fòlò ko fùùiŋ mààŋ wɔŋ dùfòì gbee, e kpɛ̀lɛ̀ ke saaàŋ gbiŋ dìì koɓɛ̀i àŋ jaa wa lɛ̀. 3Kpeiŋ àŋ naŋ yɛ̀mɛ̀ e nɛ̀ŋ bà naŋ tèènè maŋ milè, kɛɛ màŋ yaà mààŋ e hmɔɔ̀ŋ mɛ̀ɛŋ nyɛɛnyɛ̀ɛ̀. Maŋ mìlè e hmɔ̀ɔ̀ŋ bi naŋ ɓààyè ke saaàŋ gbiŋ dìì yèè màŋ naŋ jɛ̀ì aŋ gbiŋ guùŋ guùŋ. 4Kpeiŋ wo Jìnàŋ Nɛɛmaàŋ naŋ wa dìè aŋ gbiŋ maŋ jiio sùà, yèè àŋ naŋ tɔ̀ɔ̀tù maŋ kaìŋ joo gbùùyà sùà nààŋ wo Jìnàŋ Nɛɛmaàŋ naŋ nyiŋ wa nyɛ̀nɛ̀ŋ wèè aŋ miŋ gbòà lɛ.

5Aŋ Juùù zòòlò Dayà nyaŋ bà nyiŋ hewa jòò ko Jùlusɛ̀làm nyaŋ e yìwìà maŋ fuɔŋ màŋ gbiŋ sùà e ɗuunyaàŋ ko àìjɛnɛ̀ŋ dìì yaào wa. 6Nààŋ àŋ naŋ wa kòmò ebò gbɔ̀ɔɔ lɛɛ̀, anyùùŋ nyaŋ gbiŋ naŋ wa gbònò koɓɛ̀ guùŋ. È naŋ wa fòònò anyùùŋ nyaŋ gbiŋ, esaɓù kɛ̀ aŋ gbiŋ naŋ wa kòmò e nɛ̀ɛŋ anyuùŋ hààwe nyàŋ yaà wa woo lɛ̀ maŋ kaìŋ nyiŋ màŋ sùà guùŋ guùŋ. 7E keì bi naŋ nyiŋ wa dììyè maŋ jii, yèè àŋ naŋ kùùnò wòo nyààŋ, “Anyùùŋ nyɛɛ̀ŋ yaà yɛi gbùùyè maŋ kàìŋ mɛɛ̀ŋ nyaŋ, nyiŋ nààŋ fè ànyùùŋ fùɔ̀ŋ Galaliìɔ? 8Dièsɔa naàŋ àŋ naŋ nyɛ̀nɛ̀ŋ è yààìŋ kòmàŋ sùà àŋ yaà gbùùyè maŋ kaìŋ wi màŋ? 9Tiŋ zà yàwi nààŋ bà nyiŋ è yààìŋ anyùùŋ wɔŋ fùɔ̀ŋ Paatìàa, wɔŋ fùɔ̀ŋ Miɗiàa, wɔŋ fùɔ̀ŋ Ilamɔ̀ɔŋ, wɔŋ fùɔ̀ŋ Mɛsèpòtamiɔ̀ɔ, wɔŋ fùɔ̀ŋ Jùdiàa, wɔŋ fùɔ̀ŋ Kàpàdosìàa, wɔŋ fùɔ̀ŋ Pɔuŋtɔ̀ɔ yèè wɔŋ fùɔ̀ŋ Eesìàa, 10wɔŋ fùɔ̀ŋ Fɛgìàa yaà wɔŋ fùɔ̀ŋ Pàŋfelìàa, wɔŋ fùɔ̀ŋ Ijèɔ yaà wɔŋ fùɔ̀ŋ Leɓìàa e gbɛ̀ɛ̀ ko Sàlinìŋ. Yàwi nààŋ bà nyiŋ è yààìŋ anyùùŋ ko Luùm, 11yàwi nààŋ bà nyiŋ è yààìŋ aŋ Juùù nyuuŋ, e kìlà yàwi nààŋ bà nyiŋ fèìŋ àŋ Juùù nyuuŋ kɛɛ è naiŋ nyimèè yèè è naiŋ kìlè koɓɛ̀ e zòòlò aŋ Juùù nyaŋ. E kìlà yàwi nààŋ bà nyiŋ è yààìŋ anyùùŋ nòò Kiliì, e kìlà yàwi nààŋ bà nyiŋ è yààìŋ aŋ Alà nyuuŋ, kɛɛ yàwi nààŋ gbiŋ yààìŋ kòmaŋ sùà anyùùŋ nyɛɛ̀ŋ àŋ yaà gbuuye maŋ kaìŋ wi maŋ sùà, aŋ yaà wòò e keì nyaàiŋ dè maŋ kèè mèè gbeegbèè maŋ wo Dayà naŋ nyɛ̀nɛ̀ŋ maŋ!” 12E keì bi naŋ nyiŋ wa foonò yèè aŋ gbiŋ naŋ zùwò dìò sùà, e kìlà àŋ naŋ kùùnò dàwè nyiŋ bi e fèemàŋ nyààŋ, “Kiìŋ nàŋ yaà e fàsàì tɛɛ̀?”

13Kɛɛ aŋ bà nyiŋ yaà wa hììlè anyuùŋ hààwe nyàŋ e kìlà àŋ yaà woo nyààŋ, “Maŋ mùàŋ naŋ kùwò anyùùŋ nyɛɛ̀ŋ!”

Ke mìè gbìàŋ Pììlɛɛ̀ koɓɛ̀ anyùùŋ nyaŋ

14Kpeiŋ wo Pììlɛ wuŋ guùŋ, aŋ keela tàeɗùù zììyà jɛ̀wɛ̀ tìyèe nyàŋ sùà naŋ sie yèè wò naŋ tɔ̀ɔ̀tù gbòà ke mìè Kanaà ke miè gbeeo sùà koɓɛ̀ anyùùŋ nyaŋ wààŋ, “Nyɛ̀iŋ nààŋ Juùù nyuuŋ dàwim nyàŋ yèè nyɛ̀iŋ nyàŋ nìŋ joà ko Jùlusɛ̀làm nyaŋ, jàaiŋ maŋ nùŋ dìì wèè miŋ woòiŋ kɛ̀ kiìŋ tɛɛ̀ naŋ fasàì. 15Anyùùŋ nyɛɛ̀ŋ, nìŋ naŋ gongò kɛ̀ maŋ mùàŋ naŋ nyiŋ kùwò, kɛɛ e fè yɛi. E gɔɛɛ̀ naŋ nɔŋ gbòò è nɔɔnɔŋ le tiinàŋ kinɛiŋ maŋ nyiìŋ mɛɛ̀ŋ. 16Kɛɛ tɛɛ̀ wo Dayà naŋ wa wòò wo wɛ̀ijìɔ Joɛ̀ wèè wo woò,

17Wo Dayà naŋ woò wààŋ, ‘Tɛɛ̀ mìŋ do nàŋ nyɛ̀nɛ̀ŋ maŋ ɗɔɔ dìàmaŋ màŋ sùà;

mìŋ do nàŋ tùɔ̀ŋ wo Jinàŋ miɔ̀ŋ anyuùŋ kpùuŋ nyàŋ gbiŋ maŋjɛ̀wɛ.

Aŋ jɔ̀àfelaaiŋ nyàŋ yaà aŋ jɔ̀à jɔùnùiŋ nyàŋ do nàŋ wòò anyùùŋ maŋ miè gbìaim màŋ.

Aŋ kɔmɔŋjɔa bɔwɔiŋ nyàŋ do nàŋ gò gɔ̀à e jɛ̀ì,

e kìlà anyuùŋ kàìŋ nyaŋ e tɛɛiŋ do nàŋ gò maŋ gɔa.

18Hɛ̀ɛɛ̀ŋ, aŋ ɗo felaa yaà aŋ ɗo jɔùŋ nyaŋ kàìŋ nyaŋ pɛɛ diɛŋ,

maŋ ɗɔɔ miiŋ sùà mìŋ do nyiŋ nàŋ kìɛ̀ŋ wo Jinàŋ miɔ̀ŋ,

wèè aŋ woò maŋ miè gbìaŋ màŋ koɓɛ̀ anyùùŋ.

19Mìŋ do nàŋ tɔ̀ɔ̀ maŋ kèè mèè gbeegbèè ke nyiliɛ̀

e kìlà ka tɔ̀ɔ̀ maŋ tɔ̀ɔ̀màŋsèì maŋ keì e dììɛ diɛŋ e ɗuunyaàŋ.

Nìŋ do nàŋ yɛ̀mɛ̀ maŋ sɛ̀ìŋ, e hmɔ̀ɔ̀ŋ, yèè ke komò gènaŋ.

20E gɔɛɛ̀ do wa nàwèè nàŋ kùwò nyìwì,

e kìlà wɔŋ wààa do wa nàwèè nàŋ wɛ̀nɛ̀ŋ gbɔ̀ùŋ mààŋ maŋ sɛ̀ìŋ,

paŋgàà ke ɗɔ̀ɔ̀ tɛ̀mɛ̀ɛ̀ gbèè Kanaà Dayà wò naŋ jàà e ɓula yɛ̀ ke hnàŋ.

21Paŋgàà e teenga lii e hnàŋ, wo nyùnɔ̀ɔŋ gbiŋ nyaaŋ wa nàwèè e dèè wo Kanaà Dayà wèè e kpùùmaŋ wɔ̀ wò do nàŋ jòèyè.’ ”

22Wo Pììlɛ naŋ ɓɛìŋ woò wààŋ, “Nyɛ̀iŋ nààŋ nyùùŋ Ezɔ̀ɛ̀ nyaŋ, kùmiaìŋ e yèɛ mìŋ yaà hinie kaiŋ woò lɛ! Wo Jisɛ̀ e yìwìà ko Naazɔ̀ɛ̀ yaà wa wo felaa wo yèɔ wo Dayà naiŋ wa tɔɔ̀ kɛ̀ wuŋ nauŋ tùɔ̀ŋ, e yìwìà maŋ kèè mèè gbeegbèè yaà maŋ tɔ̀ɔ̀màŋsìè maŋ keì maŋ wo Dayà wuŋ bi naŋ wa nyɛ̀nɛ̀ŋ màŋ naŋ kaaìŋ maŋ esàɓù wo Kanaà Jisɛ̀ sùà. Nyɛ̀iŋ bi nàŋ tɛɛ̀ nyìmàŋ, esaɓù kɛ̀ è naiŋ wa kià kàìŋ ko fɛɛ̀fenìiŋ. 23Wo Dayà wuŋ bi naŋ wa jàà esaɓù titi ɓula e kìlà wò naŋ kìlè wo Kanaà Jisɛ̀ ko nɛ̀ɛ̀iŋ niìŋ. Kpeiŋ nìŋ nauŋ kùwò yèè nìŋ nauŋ kìɛ̀ŋ koɓɛ̀ anyùùŋ maŋ tùwo naanààŋ wèè aŋ jiwìàuŋ wɔŋ vànèkpaaà diɛŋ. 24Kɛɛ wo Dayà nauŋ wa gè e jèlà fàa dìì wɔŋ nyiiŋ gèeo sùà, wouŋ gè e gààŋ fàa diɛŋ, esaɓù kɛ̀ e fàa kuwà wa è gààŋ diɛɔŋ wèè euŋ kùwà ke hùaàŋ sùà. 25Wo Dèèwe naŋ wa wòò e kiiuŋ wààŋ,

‘Mìŋ yɛmɛ̀ wo Kanaà Dayà ko fɛɛ̀fenìim e teenga gbiŋ.

Wò naim gbɛ̀ɛ̀ fɔ̀ɔ̀, e kìlà anyùùŋ naàim mɔɔnɛ̀ŋ.

26Wèè esaɓù lii, ke jii miɛ̀ŋ naŋ fɔ̀,

e kìlà e zɔlɔ̀ naim diè nààŋ pɛɛ mìŋ gboo yaà lɛ.

Jòòpɛɛ mìŋ yaà wo nyuùŋkpùuŋ mààŋ aŋ gbànaŋ nyàŋ gbiŋ,

mìŋ do nàŋ kùwìè ke jii tùlia wèè e yèɛ wo Dayà do nàŋ nyɛ̀nɛ̀ŋ weèim lɛ̀, màànààŋ wo woì jaà e jie sùà wò kuwa ke jii tùlia lɛ̀.

27Muàum Dayà muŋ naàŋ dàngè wɔ̀ŋ nyììŋ jinàŋ miɔ̀ŋ wɔŋ jèè kò nyùùm koɓɛ̀ e ɗùùnyàŋ anyuùŋ fàa nyàŋ,

miàŋ nàŋ yaà wo ɓɔ̀ìjɔ̀à nɛɛmaŋ mɔɔ̀ŋ, muŋ naàŋ nyimèè wèè kè kpùnaŋ miɛ̀ŋ ke hèwà kè hùaàŋ sùà.

28Màim woò kɛ̀ mùŋ do nàŋ nyɛ̀nɛ̀ŋ ka nyìmàŋ ke dòmaàŋ kɔ̀à koɓɛ̀ wɔŋ nyiiŋ gèe lɛ̀,

e kìlà mùŋ do nàŋ nyɛ̀nɛ̀ŋ e zɔlɔ̀ eim dià esaɓù kɛ̀ mùŋ doim nàŋ nɔ̀ŋ maŋjɛ̀wɛ wèè julɔfɔ.’ ”

29Wo Pììlɛ naŋ ɓɛìŋ woò wààŋ, “Nyɛ̀iŋ nààŋ nyuùŋ hààwe dàwim nyàŋ, è yaà e tɔ̀ɔ̀nyaàŋ wèè kaiŋ wòò e kèè wo nèwàènèwe wiɔ̀ Dèèwe. Wò naŋ wa fɔ̀ e kìlà anyùùŋ nyaŋ naŋ niŋ wa nyɛ̀nɛ̀ŋ e kpàŋ kɔɔ nyiŋ auŋ sìà, yèè ke hùàuŋ nɛɛ̀ŋ kòò kè yaà kià ko nɛ̀ɛ̀ŋ wiì. 30Wo Dèèwe yaà wa wo wɛ̀ijì, e kìlà wò nyìmàŋ kɛ̀ wo Dayà naŋ wa jɔ̀ɔ̀ ɗààhiì kɛ̀, wò do wa nàŋ jàà wo jɔ̀ɛ̀ jɔ̀ɛuŋ nɔɔ̀ŋ bà guùŋ ke kpùà kana diɛŋ e yìwìà ke kpoouŋ nɛɛ̀ŋ sùà e kìlà wo nɔ̀ŋ wo kana, màànààŋ wo Dèèwe wuŋ bi yaà wa lɛ̀. 31Wo Dèèwe naŋ wa yɛ̀mɛ̀ e nɛ̀ɛŋ wo Dayà do wa nàŋ nyɛ̀nɛ̀ŋ ko dòmàŋfeìŋ lɛ, e kìlà wò naŋ woò wààŋ kɛ̀ wo yèɔ wo Dayà naŋ tàeɗùù wèè wo joeyè e ɗuunyaàŋ wɔ, wo Kulaìɔ, do naŋ yèwè e fàaà dìì wɔŋ nyiiŋ gèeo sùà. Wò naŋ wa woò wààŋ,

‘wo Dayà gòuŋ wa dangè wò do jèè kò nyùùm, e ɗùùnyàŋ anyuùŋ fàa nyàŋ sùà,

wo gò wa dangè wèè kè kpùnauŋ nɛɛ̀ŋ ke hìwìà kè hùaàŋ sùà.’

32Wo Dayà naŋ wa gè wo Kanaà Jisɛ̀ wɛɛ̀ e fàa dìì, yèè yàwi nààŋ gbiŋ è yààìŋ aŋ sèì koɓɛ̀ e tɔ̀ɔ̀nyaàŋ lɛɛ̀. 33Wò naŋ wa nɔ̀ŋ jòòwouŋ wèè wo jɛi wɔŋ kùàŋ jìkà Dayàa, wo Dèdauŋ nɔɔ̀ŋ, e kìlà wò nauŋ kìɛ̀ŋ wo Jìnàŋ Nɛɛmaàŋ, màànààŋ wò naŋ wa jɔ̀ɔ̀ ɗààhiì lɛ. Wo Kanaà Jisɛ̀ nàŋ yaà ɓɛìŋ wo nyùnɔ̀ɔŋ naŋ wi kìɛ̀ŋ wo Jinàaŋ, tiiŋ nàŋ yaà e yèɛ nìŋ yaà yɛɛmɛ yèè nìŋ yaà kumie è yààìŋ woo lɛ̀. 34Esaɓù kɛ̀ wo Dèèwe nààŋ gò wa jòwà kò àìjɛnɛ̀ŋ; kɛɛ wuŋ bi naŋ wa woò wààŋ,

‘Wo Kànà È Gunɔ̀ɔŋ naŋ wòò wo Kana miɔ̀ŋ wààŋ,

“Jɛ̀ì kià wɔŋ kùàŋ jìka miɔ̀ŋ,

35e jèèsùà ka nyɛ̀nɛ̀ŋ aŋ jooum nyàŋ aŋ nɔ̀ŋ e nɛ̀ŋ dè maŋ gòlò diɛum.” ’

36“Weètii tɔ̀ anyùùŋ Ezɔ̀ɛ̀ nyaŋ gbiŋ nyìmàŋ tɛɛ̀ kɛ̀, wo Kanaà Jisɛ̀ wɛɛ̀ nìŋ naŋ yaà wa jìwìè wɔŋ vànèkpaaà diɛŋ wɔ̀, nàŋ yaà wo yèɔ wo Dayà naŋ nyɛ̀nɛ̀ŋ wo Kana titi yèè wo yèɔ wò naŋ tàeɗùù wɔ, wo Kulaìɔ, wèè wo joeyè e ɗuunyaàŋ!”

37Nààŋ anyùùŋ nyaŋ naŋ wa tɛɛ̀ kòmò, maŋ jii nyiŋ màŋ naŋ wa kpòlòkpòlò sùà yèè àŋ naŋ dàwè wo Pììlɛ yaà aŋ keela tàeɗùù nyaŋ nyààŋ, “Wùìya wi nyàŋ, kiìŋ è naiŋ naàŋ ɓɛ̀nɛ̀ŋ nyɛ̀nɛŋ?”

38Wo Pììlɛ naŋ nyiŋ fasàì wààŋ, “Kìlaìŋ koɓɛ̀ Dayài, e kìlà nyɛ̀iŋ nààŋ gbiŋ niŋ nɔ̀ŋ gùaiŋ e dèè Jisɛ̀ Kulaìɛ diɛŋ, wèè maŋ jùumùiŋ màŋ nɔ̀ŋ hakɛ̀ jùùya miŋ, yèè kɛ̀ nìŋ do nàŋ yɛ̀mɛ̀ e kìɛ̀ŋ wo Jìnàŋ Nɛɛmaàŋ. 39Esaɓù kɛ̀ wo Dayà naŋ wa jɔ̀ɔ̀ ɗààhiì ko nɛ̀ɛ̀iŋ niìŋ yèè aŋ jɔ̀àiŋ nyàŋ, yèè koɓɛ̀ anyùùŋ nyaŋ yaà koɓɛ̀ dii nyàŋ, aŋ yè nyaŋ gbiŋ wo Kanaà wo Dayà wiɔ̀ do nàŋ nyààŋ koɓɛ̀ wuŋ biì nyaŋ.”

40Wo Pììlɛ naŋ nyiŋ kìɛ̀ŋ maŋ mìè gòo zimgbe e kìlà wò naŋ nyiŋ dawè yèè wò naŋ nyiŋ kiɛ̀ŋ maŋ jii nyingè wààŋ, “Jòèyeìŋ nyɛ̀iŋ bi e yìwìà e keì nyìnga gbeeɛ̀ yaà hìnìè anyùùŋ maŋ tùwo naanààŋ nyaŋ diɛŋ lɛ̀.” 41Kpeiŋ anyùùŋ nyaŋ naŋ hààwè ke mìè gbìàŋ Pììlɛɛ̀ maŋ jii nyiŋ màŋ sùà nyaŋ, naŋ wa nɔ̀ŋ gùa nyiŋ. E sɔ̀ngɔ̀ anyuùŋ tààsùùŋ tàài (3,000) naŋ wa sɛ̀ɛ̀ ke gboò nyiŋ nɛɛ̀ŋ sùà ke ɗɔɔ yii. 42Àŋ naŋ wa jɔ̀ɔ̀lɔ̀ e yèɛ gbiŋ aŋ keela tàeɗùù nyaŋ naŋ nyiŋ kaà lɛ, e kìlà aŋ gbiŋ deenàŋ wa wèè aŋ zoolò koɓɛ̀ guùŋ e kìlà aŋ jììyà e nɛ̀ŋje koɓɛ̀ guùŋ.

E ɗewe kiiɛ̀ anyuùŋ hààwe nyàŋ naŋ wa tòòmò koɓɛ̀ guùŋ e ɓɛ̀ɛ̀jàa sùà lɛ

43Anyùùŋ nyaŋ gbiŋ yaà wa ko Jùlusɛ̀làm nyaŋ, e jùù naŋ wa sɛ̀ɛ̀ maŋ jii nyiŋ màŋ sùà, yèè àŋ naŋ kìɛ̀ŋ e ɓɛ̀ɛ̀jàa gbee koɓɛ̀ Dayài e nyaàiŋ dè maŋ kèè mèè gbeegbèè maŋ aŋ keela tàeɗùù nyaŋ yaà wa nyinie màŋ. 44Anyuùŋ hààwe nyàŋ gbiŋ naŋ wa tòòmò koɓɛ̀ guùŋ yèè àŋ hewa gòònò manɛ̀ŋ kɛ̀ɛ̀nɛŋ nyiŋ màŋ aŋ dàwi e fèemàŋ. 45Àŋ hewa mààŋ manɛ̀ŋ siwè nyiŋ màŋ e kìlà aŋ gòònò e nɛ̀ɛ̀nɛ̀ŋ nyiŋ biɛ̀ e fèemàŋ e ɗeweɛ̀ wo nyùùŋ gbiŋ manaŋ wa lɛ̀. 46Ke ɗɔɔ gbiŋ anyuùŋ hààwe nyàŋ hewa dèènè koɓɛ̀ guùŋ ke gbòò sùà ko Saaŋ Zòòlò Dayài. Aŋ gbiŋ hewa jììyà e nɛ̀ŋje koɓɛ̀ guùŋ maŋ gboò nyiŋ màŋ sùà ke jii fàa yèè e ɓɛ̀ɛ̀jàa sùà, 47àŋ yaà tɛ̀nɛ̀ŋ sùà wo Dayà wèè e keì sìàuŋ nɛ̀, e kìlà àŋ yaà jìka sùà ke nyɛ̀nɛ̀ŋ sìàŋ anyùùŋ nyaŋ gbiŋ. Ke ɗɔɔ gbiŋ wo Kanaà Jisɛ̀ hewa gbìàŋ anyùùŋ nyaŋ naŋ wa yɛ̀mɛ̀ e jòèye nyàŋ ke gboò nyiŋ nɛɛ̀ŋ sùà.

Currently Selected:

Nyɛ̀nɛ̀ŋ 2: WFESD

Highlight

Copy