Luù 15

Ke kàɓanèɛ e nyaàiŋ dè wo ɓaawaaà naŋ go wɔ̀

(Maafiù 18.12-14)

1Ke ɗɔ̀ɔ̀ guùŋ anyuùŋ kùwà nɛ̀ɛ̀nɛ̀ŋ fuɔŋ nyàŋ yaà anyùùŋ maŋ tùwò naanààŋ zimgbe naŋ gbònò wo Jisɛ̀ kɔɔ wèè aŋ kumiàŋ e mìè nyaàuŋ nɛ̀. 2Aŋ Fɛlosiì nyaŋ yaà aŋ kààmɔ̀ɔ̀ŋ maŋ Sàwà Dayà nyaŋ naŋ tɔ̀ɔ̀tù gbùùyà ɗìòsùà e nyaàiŋ dè wo Jisɛ̀. Aŋ naŋ woò nyààŋ, “Wo felaa wɛɛ̀ jaa anyùùŋ maŋ jùumù nyaŋ kùàŋ dìì aŋ jɛ̀ì koɓɛ̀ guùŋ ko jììyè nɛ̀ŋ.” 3Weètii wo Jisɛ̀ naŋ nyiŋ wòò ke kàɓanè yɛɛ̀ wààŋ, 4“Sèè nyɛ̀iŋ nyɛɛ̀ŋ bà guùŋ wo woì kɛ̀ɛ̀nɛ̀ŋ aŋ ɓaawaa hɔ̀nɔ̀ɔ̀ guùŋ (100), kpeiŋ wò bà guùŋ wo go, kiìŋ mùŋ nyɛnɛŋ? Mùŋ joo aŋ kpɛ̀ɛ̀ùŋ tiinàŋ jɛ̀wɛ̀ zììyà jɛ̀wɛ̀ nɔɔnɔŋ le tiinàŋ (99) gbànaŋ nyàŋ ko gbilie yèè maŋ kà ko kààmè wo jè gunɔ̀ɔŋ naŋ go wɔ̀ e jèèsùà mauŋ mɛɛ̀ŋ. 5Sèè mùŋ mɛɛ̀ŋ wo ɓaawaaà naŋ go wɔ̀, mùŋ do nàŋ nɔ̀ŋ e zɔlɔ̀ gbee sùà e weèuŋ, kɛ̀ màuŋ ɓemè màuŋ hàà gbaŋ 6màuŋ kɛ̀lɛ̀ɛ̀ ko gboo moo. Kpeiŋ mùŋ do nàŋ nyààŋ aŋ dàwium nyàŋ yaà anyuùŋ gboo kuaum nyàŋ koɓɛ̀ guùŋ maŋ nyiŋ woò mààŋ, ‘Ke jii naim fɔ̀ esaɓù kɛ̀ kà mɛ̀ɛ̀ŋ wo ɓaawaa miɔ̀ŋ naŋ dai go wɔ̀. Gììyà wiìŋ zɔlɔ̀ koɓɛ̀ guùŋ.’ ” 7Wo Jisɛ̀ naŋ nyiŋ ɓɛìŋ woò wààŋ, “Yɛi nɔŋ e zɔlɔ̀ do nàŋ nɔ̀ŋ ko àìjɛnɛ̀ŋ sèè wo nyùùŋ maŋ tùwo naanààaŋ bà guùŋ fè maŋ tùwo naanààuŋ màŋ jɛwɛ, e nìàŋ anyùùŋ tɔ̀ɔ̀nyaàŋ gbànaŋ kpɛ̀ɛ̀ùŋ tiinàŋ jɛ̀wɛ̀ zììyà jɛ̀wɛ̀ nɔɔnɔŋ le tiinàŋ nyaŋ diɛŋ aŋ yè nyaŋ kuwà màŋ tùwò naanààŋ wèè aŋ miŋ fè jɛwɛ nyàŋ.”

Ke kàɓanèɛ e nyaàiŋ dè ke nɛɛnɛɛ̀ŋ naŋ go yɛ̀

8Wo Jisɛ̀ naŋ ɓɛìŋ woò wààŋ, “Sèè wo jɔùŋ wo weè kùwìè e kaiŋ fua nɛɛnɛŋ è zììyà yèè kè guùŋ kouŋ gò sìwè, kiìŋ wò nyɛnɛŋ? Wò sie e laumpò, wo hàmàŋ ko saauŋ niìŋ gbiŋ ko kaame nyiŋ e jèèsùà wo nyiŋ mɛɛ̀ŋ. 9Sèè wò mɛɛ̀ŋ nyiìŋ, wò do nàŋ nyààŋ aŋ dàwiuŋ nyàŋ yaà anyùùŋ gboo kuauŋ nyàŋ koɓɛ̀ guùŋ wo nyiŋ woò wààŋ, ‘Ke jii naim fɔ̀ esaɓù kà mɛ̀ɛ̀ŋ ke kaiŋ fua nɛɛnɛɛ̀ŋ naim gò sìwè yɛ. Gììyà wiìŋ zɔlɔ̀ koɓɛ̀ guùŋ!’ 10Tɔ̀ miŋ woòiŋ, yɛi nɔŋ aŋ màìkà Dayà nyaŋ do nàŋ gè zɔlɔ̀ wèè wo nyùùŋ maŋ jùumù wò bà guùŋ wo yèɔ fè maŋ tùwo naanààuŋ màŋ jɛwɛ wɔ̀.”

Kè kàɓanèɛ e nyaàiŋ dè wo jɔ̀àfelaaà naŋ go wɔ̀

11Wo Jisɛ̀ naŋ ɓɛìŋ woò wààŋ, “Wo kenàŋ bà yaào wa wò kuwa aŋ jɔ̀àfèlàà tìyèe. 12Wo jɔ̀àfelaa jɔauŋ nɔɔ̀ŋ naŋ hnè ko nɛ̀ɛ̀uŋ niìŋ yèè wò naŋ woò wààŋ, ‘Dèda, kìɛ̀im maŋ jeim manɛ̀ŋ è dàà maŋ!’ Yèè wo Dèdaà naŋ gòònò manɛ̀ɛ̀ŋ è dàà maŋ aŋ jɔ̀àfèlàà tìyèeuŋ nyàŋ e fèemàŋ. 13Maŋ ɗɔɔ kpàa naŋ mààŋ yèè wo jɔ̀àfelaa jɔaà naŋ mààŋ maŋ jeuŋ manɛ̀ŋ maŋ gbiŋ, wo ɓèmè e nɛɛnɛɛ̀ŋ wo yèwà ko gbooì. Wò naŋ kɔ̀ wɔŋ fuɔŋ diidìì bà sùà, kuŋ wò naŋ nyìnìè wɔŋ nyiiŋ gèeuŋ nɔɔ̀ŋ, wo pɔ̀ɔ̀pɔ̀ɔ̀ e nɛɛnɛɛ̀ŋ e gbana sùà. 14Nààŋ wò naŋ wa pɔ̀ɔ̀pɔ̀ɔ̀ e nɛɛnɛɛ̀ŋ gbiŋ wò kuwa lɛ̀, e jiè gbee naŋ sɔ̀ɔ̀ wɔŋ fuɔŋ wiiŋ gbiŋ sùà, yèè wò naŋ jòò siwè foo. 15Weètii wò naŋ kɔ̀ wèè wo tomo koɓɛ̀ wo jɔ̀à kùmìàŋ fuɔɔ̀ŋ bà guùŋ, yèè wo kenàaŋ nauŋ kìɛ̀ŋ e tòmò aŋ nyuàŋ gɔ̀ɔ̀yɛ ko ɓùuŋ noo. 16Kɛɛ nààŋ jìèɛ nauŋ wa nyɛ̀nɛ̀ŋ sɛmɛ, ke jii heuŋ wa nàŋ fɔ̀ wèè wo jè e nɛ̀ŋjè gbànàŋ aŋ nyùàŋ nyaŋ, kɛɛ wo nyùùŋ gbiŋ gòuŋ wa kìɛ̀ŋ è nɛ̀ŋ gbiŋ. 17Ko diemeì, e jiikɛ̀ɛ nauŋ dè yèè wò naŋ wòò koɓɛ̀ wuŋ biì wààŋ, ‘Wo dèda miɔ̀ŋ kuwa aŋ ɓɔìjɔ̀à tòmo yèè àŋ kuwa e nɛ̀ŋje zimgbe wèè aŋ jè, kpeiŋ mìŋ jaa kià e jìè wààŋ e jìwàim! 18Mìŋ yaà kɛ̀ɛ̀ sùà maŋjɛ̀wɛ koɓɛ̀ dèda mio yèè kauŋ woò mìàŋ, “Dèda, kà nyɛ̀nɛ̀ŋ e tùwò naanààŋ koɓɛ̀ Dayài ko àìjɛnɛ̀ŋ yèè ko nɛ̀ɛ̀ŋ muìŋ. 19Miŋ fè ɓɛìŋ tɛ̀ɛ̀ wèè maim nyààŋ wò jɔ̀àfelaaum. Ɓèmèim miŋ nɔ̀ŋ wo ɓɔìjɔ̀à tòmo mɔɔ̀ŋ bà guùŋ.” ’ 20Wò naŋ yèwè dìì wò tɔ̀ɔ̀tù kà koɓɛ̀ wo dèdauŋ nɔɔ̀ŋ.

“Kɛɛ wò yaà wa koɓɛ̀ dii nààŋ wo dèdauŋ nɔɔ̀ŋ nauŋ yɛmɛ̀. Ke nyowo nauŋ nyɛ̀nɛ̀ŋ wo dùàŋ wo ka wouŋ ɓeeè, yèè wò nauŋ kpuuwò. 21Kpeiŋ wo jɔ̀àfelaaà naŋ woò wààŋ, ‘Dèda, kà nyɛ̀nɛ̀ŋ e tùwò naanààŋ koɓɛ̀ Dayài ko àìjɛnɛ̀ŋ yèè ko nɛ̀ɛ̀ŋ muìŋ. Miŋ fè ɓɛìŋ tɛ̀ɛ̀ wèè maim nyààŋ wò jɔ̀àfelaaum.’ 22Kɛɛ wo dèdauŋ nɔɔ̀ŋ naŋ nyààŋ aŋ ɓɔìjɔ̀à tòmouŋ nyàŋ yèè wò naŋ nyiŋ woò wààŋ, ‘Bìaìŋ sùà yèè niŋ hiàŋ wɔŋ ɓuuɓane kɛnɛɔ̀ niŋ gɔààuŋ. Sìa nùuŋ ke ɗiìŋ kiiò yèè niŋ seelèuŋ maŋ ba. 23Yèè niŋ ka niŋ hiàŋ wo dìi jawe gbeeɔ̀ niŋ jìwàuŋ e gbìlàiŋ wuŋ e kìlà e giiyàiŋ e zɔlɔ̀ koɓɛ̀ guùŋ wɔŋ ɗaa gèe sùà. 24Esaɓù kɛ̀ wo jɔ̀àfelaaim wɛɛ̀ naŋ wa fɔ̀, kɛɛ wò yaà naàŋ wɔŋ nyiiŋ gèeɔ̀ sùà. Wò naŋ wa go, kɛɛ kàuŋ naàŋ mɛɛ̀ŋ.’ Yèè wɔŋ ɗaaà naŋ tɔɔtù.

25“E tèèngà guùŋ bi sùà, wo jɔ̀àfelaa gbeeɔ̀ yaà wa ko ɓùi. Nààŋ wò yaà wa kɛ̀ɛ̀ sùà maŋjɛ̀wɛ wò naŋ gbɛ̀ɛ̀ ko gbooì, wò naŋ kòmò ebò maŋdi màŋ yèè anyùùŋ nyaŋ yaà yiwie. 26Wò naŋ nyààŋ wo ɓɔìjɔ̀à tòmoɔ̀ bà guùŋ yèè wò nauŋ dawè wààŋ, ‘Kiìŋ nàŋ yaà kià kaaiŋ?’ 27Wo ɓɔìjɔ̀à tòmoɔ̀ nauŋ woò wààŋ, ‘Wo nanàŋ mɔɔ̀ŋ wò kɛ̀ɛ̀ maŋjɛ̀wɛ, yèè wo dèda mɔɔ̀ŋ wò jìwà wo dìi jawe gbeeɔ̀ weèuŋ, esaɓù kɛ̀ wò naŋ kɛ̀ɛ̀ maŋjɛ̀wɛ wɔŋ nyiiŋ gèeo sùà.’ 28Wo jɔ̀àfelaa gbeeɔ̀ naŋ wa tuù yèè wò naŋ gè maŋhɛɛ wèè wo jɔ̀à ko saaìŋ. Kpeiŋ wo kɛ̀ɛ̀ naŋ fòlò ko nɛ̀ɛ̀uŋ niìŋ yèè wò nauŋ pɔwɔ̀ wèè wo jɔ̀à ko saaìŋ. 29Kɛɛ wò naŋ wòò wo kɛ̀ɛ̀ wààŋ, ‘Yɛ̀mɛ̀, kà tomo e weèum mààŋ wo ɗo maŋ doa mɛɛ̀ŋ gbiŋ, yèè miŋ gò gììyà kè mìè gbòa mɔɛ̀ŋ màŋhɛɛ kè ɗɔ̀ɔ̀ guùŋ. Kiìŋ mùŋ naim wa kiɛ̀ŋ? Kòò mùŋ kìɛ̀ìm pɛɛ wò diì jɔ̀à wèè yàwi nààŋ dàwiim nyàŋ eiŋ gììyà è zɔlɔ̀ kòɓɛ̀ guùŋ! 30Kɛɛ wo jɔ̀àfelaaum wɛɛ̀ naŋ kɔ̀ wo pɔ̀ɔ̀pɔ̀ɔ̀ e nɛ̀ɛŋ mùŋ he weè nàŋ nyìnìè wɔŋ nyiiŋ gèe mɔɔ̀ŋ sùà lɛ aŋ jɔùŋ maŋjɛ̀wɛ, yèè nààŋ wò naŋ kɛ̀ɛ̀ maŋjɛ̀wɛ ko gbooì, mùŋ naŋ jìwè wo dìi jawe gbeeɔ̀ e weèuŋ!’ 31Wo dèdauŋ nɔɔ̀ŋ nauŋ woò wààŋ, ‘Jɔ̀àfelaa miɔ̀ŋ, e teenga gbiŋ mùŋ yaà ko nɛ̀ɛ̀ŋ miìŋ, yèè muàŋ nàŋ kanaŋ e nɛ̀ɛ̀ŋ gbiŋ mìŋ kuwa lɛ̀. 32Kɛɛ è kuwa eiŋ gè zɔlɔ̀ esaɓù kɛ̀ wo wùìyà mɔɔ̀ŋ naŋ mɛ̀iŋ fɔ̀, kɛɛ kòò wò yaà naàŋ wɔŋ nyiiŋ gèeɔ̀ sùà, wò naŋ wa go, èuŋ mɛɛ̀ŋ.’ ”

Currently Selected:

Luù 15: WFESD

Highlight

Copy