Luù 6
6
Wɔŋ mààŋdàwè e nyaàiŋ dè ke Ɗɔ̀ɔ̀ Zòòlò aŋ Juùù nyaŋ
(Maafiù 12.23-28)
1Wo Jisɛ̀ yaà wa kɔ̀ɛɛ sùà wɔŋ kpàli ɓu bà sùà ke Ɗɔ̀ɔ̀ Zòòlò aŋ Juùù nyaŋ bà guùŋ diɛŋ. Yèè anyùùŋ màŋjɛ̀wɛ̀uŋ nyàŋ naŋ tɔ̀ɔ̀tù kpàà e kpàli lɛ̀ bà àŋ gunìàŋ niìŋ le sìwè àŋ gbile. 2Kɛɛ nààŋ aŋ Fɛlosiì nyaŋ bà nyiŋ naŋ wa tɛɛ̀ yɛmɛ̀, àŋ naŋ wòò wo Jisɛ̀ nyààŋ, “Wèè kiìŋ nìŋ yaà nyìnìè e nɛ̀ɛŋ maŋ Sàwà wi màŋ gò wi gè nyààŋ diɛŋ wèè eiŋ nyɛ̀nɛ̀ŋ kè Ɗɔ̀ɔ̀ Zòòlò àŋ Juùù nyaŋ diɛŋ lɛ̀?”
3Wo Jisɛ̀ naŋ nyiŋ fasàì wààŋ, “Kòò nìŋ kpɛ̀nɛ̀ŋ wa è nɛ̀ɛŋ wò Dèèwe naŋ wa nyɛ̀nɛ̀ŋ e teengaà e jìèɛ yàaùŋ wa yaà anyùùŋ màŋjɛ̀wɛ̀uŋ nyàŋ lɛ? 4Wò naŋ wa jɔ̀ ko sààŋ Dayài, yèè wò naŋ gbìlè e gbɔ̀uɛ̀ àŋ naŋ wa gììyè saàà koɓɛ̀ Dayài lɛ̀, yèè wò naŋ kìɛ̀ŋ e bà koɓɛ̀ anyùùŋ màŋjɛ̀wɛ̀uŋ nyàŋ? Tiŋ zà ke sàwà wiɛ̀ gò wi gè nyààŋ diɛŋ wèè wo nyùùŋ wo nyiŋ gbìlà sɔɔ̀ nɔŋ aŋ sìèfèìŋ zòòlo nyàŋ.”
5Wo Jisɛ̀ naŋ kpɛ̀ɛ̀yɛ̀ gbòa yèè wò naŋ woò wààŋ, “Miàim wo Jɔ̀àfèlàà Nyuùŋ Kpùnɔɔ̀ŋ nàŋ yaà wo Kanaà wèè ke Ɗɔ̀ɔ̀ Zòòlò aŋ Juùù nyaŋ.”
Wo felaa kùwìè wɔŋ kuàŋ fàaà
(Maafiù 12.9-14; Mài 3.1-6)
6Ke Ɗɔ̀ɔ̀ Zòòlò aŋ Juùù nyaŋ bà guùŋ diɛŋ, wo Jisɛ̀ yaà wa kàa sùà anyùùŋ nyaŋ ko sààŋ zòòlò aŋ Juùù nyaŋ. Wò nao wa mɛ̀ɛ̀ŋ wo felaa bà wo yèɔ wɔŋ kùàŋ jìkauŋ nɔɔ̀ŋ naŋ wa fɔ̀. 7Aŋ kààmɔ̀ɔ̀ŋ maŋ Sàwà Dayà nyaŋ bà yèè aŋ Fɛlosiì nyaŋ bà yào wa àŋ manaŋ wa auŋ kùwìà ke sàwà e keì naanààŋ nyɛ̀nɛŋ. Yèè àŋ nauŋ jàà fɛ̀ɛ̀ diɛŋ wèè aŋ yɛmɛ̀ sèè mààŋ wò do wa nàŋ sùngò wo felaaà ke Ɗɔ̀ɔ̀ Zòòlò aŋ Juùù nyaŋ diɛŋ. 8Kɛɛ wo Jisɛ̀ wa nyìmàŋ maŋ gòngo nyiŋ màŋ, yèè wò naŋ wòò wo felaa kùwìè wɔŋ kuàŋ fàaà wààŋ, “Yewà dìì muŋ hnàŋ kià ko fɛ̀ɛ̀fèìŋ anyùùŋ nyaŋ.” Yèè wo fèlaaà naŋ yèwè dìì naŋ sie. 9Kpeiŋ wo Jisɛ̀ naŋ nyiŋ woò wààŋ, “Ke Sàwà wiɛ̀ naŋ wi gè nyààŋ diɛŋ wèè eiŋ nyɛ̀nɛ̀ŋ e keì sìàŋ ɔ̀ɔ̀ eiŋ nyɛ̀nɛ̀ŋ e keì naanààŋ ke Ɗɔ̀ɔ̀ Zòòlò aŋ Juùù nyaŋ diɛŋ? Wèè eiŋ jòèyè wɔŋ nyììŋ nyùùŋ ɔ̀ɔ̀ wèè eiŋ wuŋ pɔɔ̀?” 10Wò naŋ kìlìè aŋ gbiŋ le fɛ̀ɛ̀ diɛŋ, yèè wò naŋ wòò wo felaaà wààŋ, “Vùlɔ̀ŋ kuàŋ fàa mɔɔ̀ŋ.” Wo felaaà naŋ vùlɔ̀ŋ wɔŋ kuàuŋ nɔɔ̀ŋ, yèè wɔ̀ŋ naŋ jòèyè janjai.
11Kɛɛ aŋ kààmɔ̀ɔ̀ŋ maŋ Sàwà Dayà nyaŋ yaà aŋ Fɛlosiì nyaŋ naŋ wa tuù, yèè àŋ naŋ wòò nyiŋ bi e fèemàŋ nyààŋ, “Kiìŋ è naiŋ ɓɛ̀nɛ̀ŋ nyìnìàŋ wo Jisɛ̀?”
Wo Jisɛ̀ tà aŋ kèèlà zììyà jɛ̀wɛ̀ tìyèe ɗùù
(Maafiù 10.1-4; Mài 3.13-19)
12E teenga bi sùà wo Jisɛ̀ naŋ wa kɔ̀ wɔŋ toò bà dìmɛ̀ wèè wo zoolò. Wò nao nɔ̀ŋ wɔŋ dùùm wiiŋ gbiŋ ko zòòlò Dayà. 13Wɔŋ niìsìaà bàa wò naŋ nyààŋ anyùùŋ màŋjɛ̀wɛ̀uŋ nyàŋ gbiŋ wèè aŋ gbɛ̀ɛ̀uŋ kɔɔ fɔ̀ɔ̀. E yìwìà anyùùŋ bi e tɛɛ, wò naŋ tà aŋ kpàkòò zììyà jɛ̀wɛ̀ tìyèe ɗùù aŋ yè nyaŋ wò naŋ nyààŋ aŋ keela tàeɗùù nyaŋ. 14Anyùùŋ bi nàŋ yaà wa wo Saimɔ̀ŋ, wo yèɔ wò naŋ wa jàà e deè jɛ̀ìɛ Pììlɛ, yèè wo nanàuŋ nɔɔ̀ŋ Anɗù, wo Jìiiŋ yaà wo nanàuŋ nɔɔ̀ŋ Jɔ̀ɔŋ, wo Felè, yaà wo Bàtolomiò, 15wo Maafiù, wo yèɔ àŋ nyaaŋ wa ɓɛìŋ wo Liivaà wɔ, wo Tàmaŋ, wo Jìiiŋ joo bà, wo jɔ̀àfèlàà Afiɔ̀ɔ, wo Saimɔ̀ŋ wo yèɔ yaà wa wo bàuŋbà wèè ke gbòò woyaà, ke yèɛ hewa nyììnè anyùùŋ jii wèè aŋ giiyà e kànà anyùùŋ ko Luùm nyaŋ maŋhɛɛ, 16wo Juɗà, wo jɔ̀àfèlàà Jìiiŋ joo bà, yaà wo Juɗà Àkaaliɔ̀, wo yèɔ naŋ wa mààŋ wo Jisɛ̀ wɔ.
Wo Jisɛ̀ naŋ kaà yèè wò naŋ sùngò anyùùŋ
(Maafiù 4.23-25)
17Wo Jisɛ̀ naŋ wa dèyè e yìwìà wɔŋ toò gbeeɔ̀ dìmɛ̀ yaà anyùùŋ màŋjɛ̀wɛ̀uŋ nyàŋ, yèè àŋ naŋ sìè e diì jɛ̀iɛ̀ diɛŋ. Kuŋ wò naŋ mɛ̀ɛ̀ŋ ke gbòò anyùùŋ màŋjɛ̀wɛ̀uŋ nyàŋ zimgbe nyiŋ. Ke gbòò anyuùŋ zimgbe yào wa kiŋ pɛɛ e yìwìà ko Jùlusɛ̀làm yèè maŋ kpàlàùŋ kpàlàùŋ zimgbe sùà wɔŋ fùɔ̀ŋ Jùdiàa, yèè e yìwìà maŋ jawa gbeegbèè maŋ sùà e gbɛ̀ɛ̀ wɔŋ fùɔ̀ŋ Taàa yaà ko Sidɔ̀ùŋ. 18Anyùùŋ nyɛɛ̀ŋ naŋ wa hnè wèè aŋ kumiàŋ wo Jisɛ̀, e kìlà wèè wo wa sùngà maŋ sàaŋ nyiŋ màŋ. Wò naŋ wa pɛɛ sùngò anyùùŋ nyaŋ aŋ jinàŋ naanààŋ yaà wa maŋjɛ̀wɛ nyàŋ. 19Anyùùŋ nyaŋ gbiŋ naŋ wa kàmè ɗewe wèè auŋ kpùlà, esaɓù kɛ̀ e gààŋ yàaùŋ wa fòla sùà e kɔɔ è sungo aŋ gbiŋ e gààŋ Dayàa sùà.
E zɔlɔ̀ yèè ke nyowo
(Maafiù 5.1-12)
20Wo Jisɛ̀ naŋ yɛ̀mɛ̀ anyùùŋ màŋjɛ̀wɛ̀uŋ nyàŋ yèè wò naŋ nyiŋ woò wààŋ,
“E zɔlɔ̀ yaà anyùùŋ nyaŋ naŋ pɔɔ̀ nyaŋ.
Nyiŋ nàŋ kanaŋ e Kànà Dayàa!”
21“E zɔlɔ̀ yaà nyɛ̀iŋ nyàŋ e jìè yaà naàŋ sààmɛ nyàŋ.
Wo Dayà doiŋ nàŋ kìɛ̀ŋ e yèɛ nìŋ manaŋ lɛ̀, e jèèsùà maŋ jii maiŋ fà.”
“E zɔlɔ̀ è yaà nyɛ̀iŋ nyàŋ nìŋ yaà naàŋ gulie sààmɛ nyàŋ.
Nìŋ do nàŋ hile.”
22“E zɔlɔ̀ e nɔ̀iŋ sèè anyùùŋ aiŋ wùàŋ, aiŋ gbàŋ, aiŋ diɛ̀ŋ, e kìlà aŋ woò nyààŋ nìŋ yaà anyuùŋ nyɛ̀nɛ̀ŋ maŋ keì naanààŋ, esaɓù kɛ̀ nìŋ yaà anyùùŋ màŋjɛ̀wɛ̀ miàim wo Jɔ̀àfèlàà Nyuùŋ Kpùnɔɔ̀ŋ. 23Sèè tii kaaìŋ, gèeìŋ zɔlɔ̀, niŋ vaì niŋ dè esaɓù kɛ̀ nìŋ yaà e zɔlɔ̀ gbee sùà. Wo Dayà doiŋ nàŋ kìɛ̀ŋ e jìwààjɛ̀wɛ̀ gbee ko àìjɛnɛ̀ŋ. E kèì guùŋ lɛɛ̀ nɔŋ aŋ nèwàènèwe nyiŋ nyàŋ naŋ wa nyìnìè aŋ wɛ̀ijì nyaŋ wo Dayà naŋ wa tùɔ̀ŋ nyaŋ.”
24“Kɛɛ e kei nyìnga do nàŋ nɔ̀ŋ wèè nyɛ̀iŋ nyàŋ naŋ banè nyaŋ.
Nàŋ nyìnìàŋ wɔŋ nyiiŋ gèeiŋ nɔɔ̀ŋ ke jii nyingè yaà ke nyɛɛnkɛŋ siaŋ sùà.”
25“E keì nyìnga do nàŋ nɔ̀ŋ nyɛ̀iŋ nyàŋ naŋ diè nyaŋ.
Nìŋ do nàŋ kɔ̀ɔ̀ e jìè.”
“E keì nyìnga do nàŋ nɔ̀ŋ nyɛ̀iŋ nyàŋ nìŋ yaà hiile sààmɛ nyàŋ.
Nìŋ do nàŋ nɔ̀ŋ ke nyowo sùà e kìlà naŋ gòlà.
26“E keì nyìnga doiŋ nàŋ nɔ̀ŋ sèè anyùùŋ nyaŋ gbiŋ aŋ gbòà tɛ̀ɛ̀ weèiŋ. Aŋ nèwàènèwe nyiŋ nyàŋ naŋ wa wòò e kèì guùŋ bi wèè aŋ wɛ̀ijì tòa nyàŋ.”
E mànaŋ wèè aŋ jooum nyàŋ
(Maafiù 5.38-48; 7.12a)
27Wo Jisɛ̀ naŋ ɓɛìŋ woò wààŋ, “Tɔ̀ miŋ woò tɛɛ̀ koɓɛ̀ anyùùŋ nyaŋ gbiŋ kumiàìm nyaŋ, mànaìŋ aŋ jooiŋ nyàŋ, e kìlà niŋ tuwò tɛ̀ɛ̀ koɓɛ̀ anyùùŋ nyaŋ naiŋ wùɔ̀ŋ nyaŋ, 28Zòòloìŋ wo Dayà wèè wo kpuumàŋ anyùùŋ nyaŋ gboàìŋ nyaŋ, e kìlà niŋ zoolò wèè anyùùŋ nyaŋ nimilàìŋ nyaŋ. 29Sèè wo nyùùŋ gbiŋ woum hàà fɛ̀ɛ̀ nyààŋ, kilà wɔŋ fàa bàa wo haà wuŋ fɛ̀ɛ̀. Sèè wo nyùùŋ bà ɓemàŋ wɔŋ kotì mɔɔ̀ŋ, dàngèuŋ wo ɓemè wɔŋ kùmà mɔɔ̀ŋ wuŋ pɛɛ. 30Kìɛ̀ŋ wo nyùnɔ̀ɔŋ gbiŋ dawàùm wèè muŋ kiɛ̀uŋ e nɛ̀ŋ bà wɔ, e kìlà sèè wo nyùùŋ gbiŋ woum gè e nɛ̀ŋ sìwè, ɓɔ̀ mùŋ dawè wèè wo muiŋ ɓɛìŋ kɛlɛ̀ɛ̀. 31Tùwoìŋ tɛ̀ɛ̀ koɓɛ̀ anyuùŋ kpùuŋ dàwiiŋ nyàŋ màànààŋ nìŋ manaŋ wèè aiŋ tuwò lɛ.”
32Sèè nìŋ mɔnɔŋ nɔŋ anyùùŋ nyaŋ mànàìŋ nyaŋ, nìŋ gongà kɛ̀ wo Dayà doiŋ nàŋ tɛnɛ̀ŋ wèètii nìŋ naŋ yɛi nyɛ̀nɛ̀ŋ le? Anyùùŋ maŋ jùumù nyaŋ pɛɛ manaŋ anyùùŋ nyaŋ mànàŋ nyiìŋ nyaŋ. 33Sèè nìŋ nyinìàŋ nɔŋ e keì sìàŋ koɓɛ̀ anyùùŋ nyaŋ nyinìàìŋ e keì sìàŋ nyaŋ, nìŋ gongà kɛ̀ wò Dayà doiŋ nàŋ kìɛ̀ŋ e jìwààjɛ̀wɛ̀ ke sɛ̀ gèe siaŋ wèètii nìŋ naŋ yɛi nyɛ̀nɛ̀ŋ le. Anyùùŋ maŋ jùumù nyaŋ pɛɛ nyɛnɛŋ e keì sìàŋ koɓɛ̀ anyùùŋ nyaŋ nyiniàŋ nyìŋ e keì sìàŋ nyaŋ. 34Sèè mùŋ gbiɛŋ anyùùŋ e kpàŋ esaɓù kɛ̀ mùŋ do nàŋ mɔ̀nɔ̀ŋ wèè aum muiŋ kɛlɛ̀ɛ̀, màŋ gongò kɛ̀ wò Dayà doum nàŋ tɛnɛ̀ŋ wèètii? Anyùùŋ maŋ jùumù nyaŋ pɛɛ gbiɛŋ e kpàŋ koɓɛ̀ aŋ dàwi esaɓù kɛ̀ àŋ kuwa ke jii tùlia kɛ̀ àŋ do nyiŋ niŋ nàŋ kɛlɛ̀ɛ̀. 35Kɛɛ mànaìŋ aŋ jooiŋ nyàŋ e kìlà niŋ nyinìàŋ nyiŋ keì sìàŋ. Ɓɔ̀ nìŋ kiɛ̀ŋ nyiŋ fòfoo nìŋ manaŋ wèè aiŋ niŋ ɓɛìŋ kɛlɛ̀ɛ̀. Sèè nìŋ nyɛnɛŋ tii, wo Dayà doiŋ nàŋ kìɛ̀ŋ e jìwààjɛ̀wɛ̀ gbee. E kìlà nìŋ do nàŋ nɔ̀ŋ aŋ jɔ̀à wèè wo Dayà Gaàŋ Gbeeɔ̀. Esaɓù kɛ̀ wo Dayà tuwà tɛ̀ɛ̀ koɓɛ̀ wo nyuùŋ gò nyìmàŋ saɓùɔ yaà wo nyuùŋ nyɛ̀nɛ̀ŋ tùwo naanààaŋ. 36Kɛ̀ɛ̀nɛìŋ ke nyowo wèè aŋ dàwium nyàŋ, màànààŋ nɔŋ wo Dèdaiŋ nɔɔ̀ŋ kuwa ke nyowo lɛ̀.
Ɓɔ̀ nìŋ gbaaì àŋ dàwiiŋ nyàŋ è keì
(Maafiù 7.1-5)
37“Ɓɔ̀ nìŋ kilià è kiti ànyùùŋ diɛŋ wèè màŋ jùumù nyiŋ màŋ, kpeiŋ kɛ̀ wo Dayà naìŋ kìlìè kiti diɛŋ wèè màŋ jùumùiŋ màŋ nyɛ̀iŋ pɛɛ. Jùùyaìŋ aŋ dàwiiŋ nyàŋ hakɛ̀ wèè e keì naanààaŋ àŋ naiŋ jàà lɛ, kpeiŋ kɛ̀ wo Dayà wòiŋ jùùyà hakɛ̀ nyɛ̀iŋ pɛɛ. 38Sèè nìŋ kiɛ̀ŋ aŋ dàwiiŋ nyàŋ, yɛi wo Dayà doiŋ nàŋ kiɛ̀ŋ e dìa niŋ kpaŋ. È do nàŋ nɔ̀ŋ sɔ̀la niŋ wɔŋ pòum sùà e dià pi woiŋ niŋ kiɛ̀ŋ, e kìlà e kìɛŋ bi doiŋ nàŋ kpɛ̀lɛ̀ e mààŋ nyààŋ. E ɗèwè guùŋ nɛ nɔŋ nìŋ tuwà koɓɛ̀ aŋ dàwiiŋ nyàŋ lɛ, e ɗèwè guùŋ bi sùà nɔŋ wo Dayà do nàŋ tùwò ko nɛ̀ɛ̀iŋ niìŋ.”
39Wo Jisɛ̀ naŋ nyiŋ wòò ke kàɓanè yɛɛ̀ wààŋ, “Sèè wo nyuùŋ zììlè le fɛ̀ɛ̀ wo sìè wo dàwiuŋ nɔɔ̀ŋ feìŋ wèè wouŋ koà, nyiŋ tìyèe àŋ do nàŋ sɛ̀ɛ̀ ko golo. 40Aŋ kààjɔa gbiŋ kuwà è gààŋ àŋ do nìàŋ wò kààmɔɔŋ nyiŋ nɔɔ̀ŋ. Kɛɛ sèè aŋ kààjɔa aŋ gbeè e kìlà aŋ kpɛ̀ɛ̀yɛ̀ e gɔ̀ɔ̀yɛ nyiŋ nɛ̀, àŋ do nàŋ nɔ̀ŋ mààŋ wo kààmɔɔŋ nyiŋ nɔɔ̀ŋ.
41“Wèè kiìŋ mùŋ yɛmɛ̀ e kuùfìèɛ ko sòòfɛ̀ɛ̀ wùìya mɔɔ̀ŋ, kɛɛ muŋ fè jàà jii kɛ̀ wɔ̀ŋ kuùfòò gbee kòò wɔ̀ŋ yaà kò sòòfɛ̀ɛ̀ muàŋ biì? 42Dièsɔa mùŋ naŋ ɓɛ̀nɛ̀ŋ wòò wo wùìya mɔɔ̀ŋ maàŋ, ‘Tɔ̀ miŋ gòum e kuùfìèɛ ko sòòfɛ̀ɛ̀,’ kɛɛ muŋ fè yɛ̀mɛ̀ wɔ̀ŋ kuùfòòɔ kò sòòfɛ̀ɛ̀ muàŋ biì? Mùŋ yaà wo nyùùŋ fɛ̀ɛ̀ ɗòònààkeì. Gè wɔŋ kuùfòòɔ ko sòòfɛ̀ɛ̀ muìŋ jiɛ̀, kpeiŋ kɛ̀ màŋ ɓɛ̀nɛ̀ŋ yɛ̀mɛ̀ dìì tɛ̀ɛ̀ wèè maŋ gè e kuùfìèɛ ko sòòfɛ̀ɛ̀ wùìya mɔɔ̀ŋ.
Ke kùlɛ̀ɛ yèè ke komàŋ nyiŋ nɛɛ̀ŋ
(Maafiù 7.16-20; 12.33-35)
43“Ke kuù bɔ̀u fè kòmàŋ kè kuù kòmàŋ naanààŋ, e kìlà ke kuù naanààŋ fè kòmàŋ kè kuù kòmàŋ sìàŋ. 44Nìŋ do nàŋ nyìmè e nɔ̀ŋ kìì ke kùlɛ̀ɛ e yìwìà ke komàŋ nyiŋ nɛɛ̀ŋ. Niŋ fè ɓɛ̀nɛ̀ŋ kpàà màŋ feè kòmàŋ ɔ̀ɔ̀ màŋ gbɛ̀mɛ̀ɛ̀ŋ komaŋ è yìwìà è ɓìè màŋ dɛiŋ sùà. 45Wo nyuùŋ sìàŋ hiàŋ maŋ nɛ̀ŋ kɛnɛ e yìwìà ko sùlò maŋ nɛ̀ŋ kɛnɛ ke jiiuŋ nɛɛ̀ŋ sùà. Wo nyuùŋ naanààŋ hiàŋ maŋ nɛ̀ŋ naanààŋ e yìwìà ko sùlò maŋ nɛ̀ŋ naanààŋ ke jiiuŋ nɛɛ̀ŋ sùà. Wɔŋ nyààŋ nàŋ woà e nɛ̀ɛŋ naum dìè ke jiio sùà lɛ.
Anyùùŋ nyaŋ naŋ nyɛ̀lɛ̀ maŋ sààŋ tìyèe màŋ nyaŋ
(Maafiù 7.24-27)
46“Wèè kiìŋ nìŋ nyààìm ‘Kanaà, Kanaà,’ kɛɛ niŋ fè nyɛ̀nɛ̀ŋ è yèɛ mìŋ woàìŋ lɛ? 47Wo nyùnɔ̀ɔŋ gbiŋ hnàŋ ko nɛ̀ɛ̀ŋ miìŋ yèè wo kòmàŋ maŋ miè gbìaim màŋ e kìlà wo miŋ jɔ̀ɔ̀lɔ̀ dìì wɔ, mìŋ doiŋ nàŋ tɔɔ̀ kɛ̀ diè wò yaà. 48Wò yaà mààŋ wo felaaà wo yèɔ naŋ tòmò e dììɛ tɛ̀ɛ̀ wèè wo ɓɛnɛ̀ŋ tɔ̀ɔ̀tù nyɛ̀lɛ̀ e kpèè ke saauŋ nɛɛ̀ŋ wɔŋ duò tàà diɛŋ. Maŋ gɔ̀àà maŋ naŋ sɔ̀ɔ̀, e wùìyèɛ jòwà e kìlìà ke saaàŋ, kɛɛ ke gò wa mɛɛmɛ̀ɛ̀ŋ, esaɓù kɛ̀ wò naŋ nyiŋ wa nyɛ̀lɛ̀ tɛ̀ɛ̀ wɔŋ duò tàà diɛŋ. 49Kɛɛ wo nyùnɔ̀ɔŋ gbiŋ naŋ kòmò maŋ miè gbìaim mɛɛ̀ŋ yèè wò naŋ gè maŋhɛɛ wèè wo miŋ jɔ̀ɔ̀lɔ̀ dìì wɔ, wò yaà mààŋ wo nyùnɔ̀ɔŋ gò tòmàŋ e dììɛ wèè wo tɔ̀ɔ̀tù nyɛ̀lɛ̀ e kpèè ke saauŋ nɛɛ̀ŋ. Maŋ gɔ̀àà maŋ naŋ sɔ̀ɔ̀, e wùìyèɛ jòwà e kìlìà ke saaàŋ, eɓìèmàŋjɛ̀wɛ̀, ke saaàŋ naŋ gɔɛɛ ke sɔ̀àà dìì fukpù.”
Currently Selected:
Luù 6: WFESD
Highlight
Share
Copy
Want to have your highlights saved across all your devices? Sign up or sign in
Gola New Testament Translation and Literacy Project © Bible Society in Liberia, 2019.
Luù 6
6
Wɔŋ mààŋdàwè e nyaàiŋ dè ke Ɗɔ̀ɔ̀ Zòòlò aŋ Juùù nyaŋ
(Maafiù 12.23-28)
1Wo Jisɛ̀ yaà wa kɔ̀ɛɛ sùà wɔŋ kpàli ɓu bà sùà ke Ɗɔ̀ɔ̀ Zòòlò aŋ Juùù nyaŋ bà guùŋ diɛŋ. Yèè anyùùŋ màŋjɛ̀wɛ̀uŋ nyàŋ naŋ tɔ̀ɔ̀tù kpàà e kpàli lɛ̀ bà àŋ gunìàŋ niìŋ le sìwè àŋ gbile. 2Kɛɛ nààŋ aŋ Fɛlosiì nyaŋ bà nyiŋ naŋ wa tɛɛ̀ yɛmɛ̀, àŋ naŋ wòò wo Jisɛ̀ nyààŋ, “Wèè kiìŋ nìŋ yaà nyìnìè e nɛ̀ɛŋ maŋ Sàwà wi màŋ gò wi gè nyààŋ diɛŋ wèè eiŋ nyɛ̀nɛ̀ŋ kè Ɗɔ̀ɔ̀ Zòòlò àŋ Juùù nyaŋ diɛŋ lɛ̀?”
3Wo Jisɛ̀ naŋ nyiŋ fasàì wààŋ, “Kòò nìŋ kpɛ̀nɛ̀ŋ wa è nɛ̀ɛŋ wò Dèèwe naŋ wa nyɛ̀nɛ̀ŋ e teengaà e jìèɛ yàaùŋ wa yaà anyùùŋ màŋjɛ̀wɛ̀uŋ nyàŋ lɛ? 4Wò naŋ wa jɔ̀ ko sààŋ Dayài, yèè wò naŋ gbìlè e gbɔ̀uɛ̀ àŋ naŋ wa gììyè saàà koɓɛ̀ Dayài lɛ̀, yèè wò naŋ kìɛ̀ŋ e bà koɓɛ̀ anyùùŋ màŋjɛ̀wɛ̀uŋ nyàŋ? Tiŋ zà ke sàwà wiɛ̀ gò wi gè nyààŋ diɛŋ wèè wo nyùùŋ wo nyiŋ gbìlà sɔɔ̀ nɔŋ aŋ sìèfèìŋ zòòlo nyàŋ.”
5Wo Jisɛ̀ naŋ kpɛ̀ɛ̀yɛ̀ gbòa yèè wò naŋ woò wààŋ, “Miàim wo Jɔ̀àfèlàà Nyuùŋ Kpùnɔɔ̀ŋ nàŋ yaà wo Kanaà wèè ke Ɗɔ̀ɔ̀ Zòòlò aŋ Juùù nyaŋ.”
Wo felaa kùwìè wɔŋ kuàŋ fàaà
(Maafiù 12.9-14; Mài 3.1-6)
6Ke Ɗɔ̀ɔ̀ Zòòlò aŋ Juùù nyaŋ bà guùŋ diɛŋ, wo Jisɛ̀ yaà wa kàa sùà anyùùŋ nyaŋ ko sààŋ zòòlò aŋ Juùù nyaŋ. Wò nao wa mɛ̀ɛ̀ŋ wo felaa bà wo yèɔ wɔŋ kùàŋ jìkauŋ nɔɔ̀ŋ naŋ wa fɔ̀. 7Aŋ kààmɔ̀ɔ̀ŋ maŋ Sàwà Dayà nyaŋ bà yèè aŋ Fɛlosiì nyaŋ bà yào wa àŋ manaŋ wa auŋ kùwìà ke sàwà e keì naanààŋ nyɛ̀nɛŋ. Yèè àŋ nauŋ jàà fɛ̀ɛ̀ diɛŋ wèè aŋ yɛmɛ̀ sèè mààŋ wò do wa nàŋ sùngò wo felaaà ke Ɗɔ̀ɔ̀ Zòòlò aŋ Juùù nyaŋ diɛŋ. 8Kɛɛ wo Jisɛ̀ wa nyìmàŋ maŋ gòngo nyiŋ màŋ, yèè wò naŋ wòò wo felaa kùwìè wɔŋ kuàŋ fàaà wààŋ, “Yewà dìì muŋ hnàŋ kià ko fɛ̀ɛ̀fèìŋ anyùùŋ nyaŋ.” Yèè wo fèlaaà naŋ yèwè dìì naŋ sie. 9Kpeiŋ wo Jisɛ̀ naŋ nyiŋ woò wààŋ, “Ke Sàwà wiɛ̀ naŋ wi gè nyààŋ diɛŋ wèè eiŋ nyɛ̀nɛ̀ŋ e keì sìàŋ ɔ̀ɔ̀ eiŋ nyɛ̀nɛ̀ŋ e keì naanààŋ ke Ɗɔ̀ɔ̀ Zòòlò aŋ Juùù nyaŋ diɛŋ? Wèè eiŋ jòèyè wɔŋ nyììŋ nyùùŋ ɔ̀ɔ̀ wèè eiŋ wuŋ pɔɔ̀?” 10Wò naŋ kìlìè aŋ gbiŋ le fɛ̀ɛ̀ diɛŋ, yèè wò naŋ wòò wo felaaà wààŋ, “Vùlɔ̀ŋ kuàŋ fàa mɔɔ̀ŋ.” Wo felaaà naŋ vùlɔ̀ŋ wɔŋ kuàuŋ nɔɔ̀ŋ, yèè wɔ̀ŋ naŋ jòèyè janjai.
11Kɛɛ aŋ kààmɔ̀ɔ̀ŋ maŋ Sàwà Dayà nyaŋ yaà aŋ Fɛlosiì nyaŋ naŋ wa tuù, yèè àŋ naŋ wòò nyiŋ bi e fèemàŋ nyààŋ, “Kiìŋ è naiŋ ɓɛ̀nɛ̀ŋ nyìnìàŋ wo Jisɛ̀?”
Wo Jisɛ̀ tà aŋ kèèlà zììyà jɛ̀wɛ̀ tìyèe ɗùù
(Maafiù 10.1-4; Mài 3.13-19)
12E teenga bi sùà wo Jisɛ̀ naŋ wa kɔ̀ wɔŋ toò bà dìmɛ̀ wèè wo zoolò. Wò nao nɔ̀ŋ wɔŋ dùùm wiiŋ gbiŋ ko zòòlò Dayà. 13Wɔŋ niìsìaà bàa wò naŋ nyààŋ anyùùŋ màŋjɛ̀wɛ̀uŋ nyàŋ gbiŋ wèè aŋ gbɛ̀ɛ̀uŋ kɔɔ fɔ̀ɔ̀. E yìwìà anyùùŋ bi e tɛɛ, wò naŋ tà aŋ kpàkòò zììyà jɛ̀wɛ̀ tìyèe ɗùù aŋ yè nyaŋ wò naŋ nyààŋ aŋ keela tàeɗùù nyaŋ. 14Anyùùŋ bi nàŋ yaà wa wo Saimɔ̀ŋ, wo yèɔ wò naŋ wa jàà e deè jɛ̀ìɛ Pììlɛ, yèè wo nanàuŋ nɔɔ̀ŋ Anɗù, wo Jìiiŋ yaà wo nanàuŋ nɔɔ̀ŋ Jɔ̀ɔŋ, wo Felè, yaà wo Bàtolomiò, 15wo Maafiù, wo yèɔ àŋ nyaaŋ wa ɓɛìŋ wo Liivaà wɔ, wo Tàmaŋ, wo Jìiiŋ joo bà, wo jɔ̀àfèlàà Afiɔ̀ɔ, wo Saimɔ̀ŋ wo yèɔ yaà wa wo bàuŋbà wèè ke gbòò woyaà, ke yèɛ hewa nyììnè anyùùŋ jii wèè aŋ giiyà e kànà anyùùŋ ko Luùm nyaŋ maŋhɛɛ, 16wo Juɗà, wo jɔ̀àfèlàà Jìiiŋ joo bà, yaà wo Juɗà Àkaaliɔ̀, wo yèɔ naŋ wa mààŋ wo Jisɛ̀ wɔ.
Wo Jisɛ̀ naŋ kaà yèè wò naŋ sùngò anyùùŋ
(Maafiù 4.23-25)
17Wo Jisɛ̀ naŋ wa dèyè e yìwìà wɔŋ toò gbeeɔ̀ dìmɛ̀ yaà anyùùŋ màŋjɛ̀wɛ̀uŋ nyàŋ, yèè àŋ naŋ sìè e diì jɛ̀iɛ̀ diɛŋ. Kuŋ wò naŋ mɛ̀ɛ̀ŋ ke gbòò anyùùŋ màŋjɛ̀wɛ̀uŋ nyàŋ zimgbe nyiŋ. Ke gbòò anyuùŋ zimgbe yào wa kiŋ pɛɛ e yìwìà ko Jùlusɛ̀làm yèè maŋ kpàlàùŋ kpàlàùŋ zimgbe sùà wɔŋ fùɔ̀ŋ Jùdiàa, yèè e yìwìà maŋ jawa gbeegbèè maŋ sùà e gbɛ̀ɛ̀ wɔŋ fùɔ̀ŋ Taàa yaà ko Sidɔ̀ùŋ. 18Anyùùŋ nyɛɛ̀ŋ naŋ wa hnè wèè aŋ kumiàŋ wo Jisɛ̀, e kìlà wèè wo wa sùngà maŋ sàaŋ nyiŋ màŋ. Wò naŋ wa pɛɛ sùngò anyùùŋ nyaŋ aŋ jinàŋ naanààŋ yaà wa maŋjɛ̀wɛ nyàŋ. 19Anyùùŋ nyaŋ gbiŋ naŋ wa kàmè ɗewe wèè auŋ kpùlà, esaɓù kɛ̀ e gààŋ yàaùŋ wa fòla sùà e kɔɔ è sungo aŋ gbiŋ e gààŋ Dayàa sùà.
E zɔlɔ̀ yèè ke nyowo
(Maafiù 5.1-12)
20Wo Jisɛ̀ naŋ yɛ̀mɛ̀ anyùùŋ màŋjɛ̀wɛ̀uŋ nyàŋ yèè wò naŋ nyiŋ woò wààŋ,
“E zɔlɔ̀ yaà anyùùŋ nyaŋ naŋ pɔɔ̀ nyaŋ.
Nyiŋ nàŋ kanaŋ e Kànà Dayàa!”
21“E zɔlɔ̀ yaà nyɛ̀iŋ nyàŋ e jìè yaà naàŋ sààmɛ nyàŋ.
Wo Dayà doiŋ nàŋ kìɛ̀ŋ e yèɛ nìŋ manaŋ lɛ̀, e jèèsùà maŋ jii maiŋ fà.”
“E zɔlɔ̀ è yaà nyɛ̀iŋ nyàŋ nìŋ yaà naàŋ gulie sààmɛ nyàŋ.
Nìŋ do nàŋ hile.”
22“E zɔlɔ̀ e nɔ̀iŋ sèè anyùùŋ aiŋ wùàŋ, aiŋ gbàŋ, aiŋ diɛ̀ŋ, e kìlà aŋ woò nyààŋ nìŋ yaà anyuùŋ nyɛ̀nɛ̀ŋ maŋ keì naanààŋ, esaɓù kɛ̀ nìŋ yaà anyùùŋ màŋjɛ̀wɛ̀ miàim wo Jɔ̀àfèlàà Nyuùŋ Kpùnɔɔ̀ŋ. 23Sèè tii kaaìŋ, gèeìŋ zɔlɔ̀, niŋ vaì niŋ dè esaɓù kɛ̀ nìŋ yaà e zɔlɔ̀ gbee sùà. Wo Dayà doiŋ nàŋ kìɛ̀ŋ e jìwààjɛ̀wɛ̀ gbee ko àìjɛnɛ̀ŋ. E kèì guùŋ lɛɛ̀ nɔŋ aŋ nèwàènèwe nyiŋ nyàŋ naŋ wa nyìnìè aŋ wɛ̀ijì nyaŋ wo Dayà naŋ wa tùɔ̀ŋ nyaŋ.”
24“Kɛɛ e kei nyìnga do nàŋ nɔ̀ŋ wèè nyɛ̀iŋ nyàŋ naŋ banè nyaŋ.
Nàŋ nyìnìàŋ wɔŋ nyiiŋ gèeiŋ nɔɔ̀ŋ ke jii nyingè yaà ke nyɛɛnkɛŋ siaŋ sùà.”
25“E keì nyìnga do nàŋ nɔ̀ŋ nyɛ̀iŋ nyàŋ naŋ diè nyaŋ.
Nìŋ do nàŋ kɔ̀ɔ̀ e jìè.”
“E keì nyìnga do nàŋ nɔ̀ŋ nyɛ̀iŋ nyàŋ nìŋ yaà hiile sààmɛ nyàŋ.
Nìŋ do nàŋ nɔ̀ŋ ke nyowo sùà e kìlà naŋ gòlà.
26“E keì nyìnga doiŋ nàŋ nɔ̀ŋ sèè anyùùŋ nyaŋ gbiŋ aŋ gbòà tɛ̀ɛ̀ weèiŋ. Aŋ nèwàènèwe nyiŋ nyàŋ naŋ wa wòò e kèì guùŋ bi wèè aŋ wɛ̀ijì tòa nyàŋ.”
E mànaŋ wèè aŋ jooum nyàŋ
(Maafiù 5.38-48; 7.12a)
27Wo Jisɛ̀ naŋ ɓɛìŋ woò wààŋ, “Tɔ̀ miŋ woò tɛɛ̀ koɓɛ̀ anyùùŋ nyaŋ gbiŋ kumiàìm nyaŋ, mànaìŋ aŋ jooiŋ nyàŋ, e kìlà niŋ tuwò tɛ̀ɛ̀ koɓɛ̀ anyùùŋ nyaŋ naiŋ wùɔ̀ŋ nyaŋ, 28Zòòloìŋ wo Dayà wèè wo kpuumàŋ anyùùŋ nyaŋ gboàìŋ nyaŋ, e kìlà niŋ zoolò wèè anyùùŋ nyaŋ nimilàìŋ nyaŋ. 29Sèè wo nyùùŋ gbiŋ woum hàà fɛ̀ɛ̀ nyààŋ, kilà wɔŋ fàa bàa wo haà wuŋ fɛ̀ɛ̀. Sèè wo nyùùŋ bà ɓemàŋ wɔŋ kotì mɔɔ̀ŋ, dàngèuŋ wo ɓemè wɔŋ kùmà mɔɔ̀ŋ wuŋ pɛɛ. 30Kìɛ̀ŋ wo nyùnɔ̀ɔŋ gbiŋ dawàùm wèè muŋ kiɛ̀uŋ e nɛ̀ŋ bà wɔ, e kìlà sèè wo nyùùŋ gbiŋ woum gè e nɛ̀ŋ sìwè, ɓɔ̀ mùŋ dawè wèè wo muiŋ ɓɛìŋ kɛlɛ̀ɛ̀. 31Tùwoìŋ tɛ̀ɛ̀ koɓɛ̀ anyuùŋ kpùuŋ dàwiiŋ nyàŋ màànààŋ nìŋ manaŋ wèè aiŋ tuwò lɛ.”
32Sèè nìŋ mɔnɔŋ nɔŋ anyùùŋ nyaŋ mànàìŋ nyaŋ, nìŋ gongà kɛ̀ wo Dayà doiŋ nàŋ tɛnɛ̀ŋ wèètii nìŋ naŋ yɛi nyɛ̀nɛ̀ŋ le? Anyùùŋ maŋ jùumù nyaŋ pɛɛ manaŋ anyùùŋ nyaŋ mànàŋ nyiìŋ nyaŋ. 33Sèè nìŋ nyinìàŋ nɔŋ e keì sìàŋ koɓɛ̀ anyùùŋ nyaŋ nyinìàìŋ e keì sìàŋ nyaŋ, nìŋ gongà kɛ̀ wò Dayà doiŋ nàŋ kìɛ̀ŋ e jìwààjɛ̀wɛ̀ ke sɛ̀ gèe siaŋ wèètii nìŋ naŋ yɛi nyɛ̀nɛ̀ŋ le. Anyùùŋ maŋ jùumù nyaŋ pɛɛ nyɛnɛŋ e keì sìàŋ koɓɛ̀ anyùùŋ nyaŋ nyiniàŋ nyìŋ e keì sìàŋ nyaŋ. 34Sèè mùŋ gbiɛŋ anyùùŋ e kpàŋ esaɓù kɛ̀ mùŋ do nàŋ mɔ̀nɔ̀ŋ wèè aum muiŋ kɛlɛ̀ɛ̀, màŋ gongò kɛ̀ wò Dayà doum nàŋ tɛnɛ̀ŋ wèètii? Anyùùŋ maŋ jùumù nyaŋ pɛɛ gbiɛŋ e kpàŋ koɓɛ̀ aŋ dàwi esaɓù kɛ̀ àŋ kuwa ke jii tùlia kɛ̀ àŋ do nyiŋ niŋ nàŋ kɛlɛ̀ɛ̀. 35Kɛɛ mànaìŋ aŋ jooiŋ nyàŋ e kìlà niŋ nyinìàŋ nyiŋ keì sìàŋ. Ɓɔ̀ nìŋ kiɛ̀ŋ nyiŋ fòfoo nìŋ manaŋ wèè aiŋ niŋ ɓɛìŋ kɛlɛ̀ɛ̀. Sèè nìŋ nyɛnɛŋ tii, wo Dayà doiŋ nàŋ kìɛ̀ŋ e jìwààjɛ̀wɛ̀ gbee. E kìlà nìŋ do nàŋ nɔ̀ŋ aŋ jɔ̀à wèè wo Dayà Gaàŋ Gbeeɔ̀. Esaɓù kɛ̀ wo Dayà tuwà tɛ̀ɛ̀ koɓɛ̀ wo nyuùŋ gò nyìmàŋ saɓùɔ yaà wo nyuùŋ nyɛ̀nɛ̀ŋ tùwo naanààaŋ. 36Kɛ̀ɛ̀nɛìŋ ke nyowo wèè aŋ dàwium nyàŋ, màànààŋ nɔŋ wo Dèdaiŋ nɔɔ̀ŋ kuwa ke nyowo lɛ̀.
Ɓɔ̀ nìŋ gbaaì àŋ dàwiiŋ nyàŋ è keì
(Maafiù 7.1-5)
37“Ɓɔ̀ nìŋ kilià è kiti ànyùùŋ diɛŋ wèè màŋ jùumù nyiŋ màŋ, kpeiŋ kɛ̀ wo Dayà naìŋ kìlìè kiti diɛŋ wèè màŋ jùumùiŋ màŋ nyɛ̀iŋ pɛɛ. Jùùyaìŋ aŋ dàwiiŋ nyàŋ hakɛ̀ wèè e keì naanààaŋ àŋ naiŋ jàà lɛ, kpeiŋ kɛ̀ wo Dayà wòiŋ jùùyà hakɛ̀ nyɛ̀iŋ pɛɛ. 38Sèè nìŋ kiɛ̀ŋ aŋ dàwiiŋ nyàŋ, yɛi wo Dayà doiŋ nàŋ kiɛ̀ŋ e dìa niŋ kpaŋ. È do nàŋ nɔ̀ŋ sɔ̀la niŋ wɔŋ pòum sùà e dià pi woiŋ niŋ kiɛ̀ŋ, e kìlà e kìɛŋ bi doiŋ nàŋ kpɛ̀lɛ̀ e mààŋ nyààŋ. E ɗèwè guùŋ nɛ nɔŋ nìŋ tuwà koɓɛ̀ aŋ dàwiiŋ nyàŋ lɛ, e ɗèwè guùŋ bi sùà nɔŋ wo Dayà do nàŋ tùwò ko nɛ̀ɛ̀iŋ niìŋ.”
39Wo Jisɛ̀ naŋ nyiŋ wòò ke kàɓanè yɛɛ̀ wààŋ, “Sèè wo nyuùŋ zììlè le fɛ̀ɛ̀ wo sìè wo dàwiuŋ nɔɔ̀ŋ feìŋ wèè wouŋ koà, nyiŋ tìyèe àŋ do nàŋ sɛ̀ɛ̀ ko golo. 40Aŋ kààjɔa gbiŋ kuwà è gààŋ àŋ do nìàŋ wò kààmɔɔŋ nyiŋ nɔɔ̀ŋ. Kɛɛ sèè aŋ kààjɔa aŋ gbeè e kìlà aŋ kpɛ̀ɛ̀yɛ̀ e gɔ̀ɔ̀yɛ nyiŋ nɛ̀, àŋ do nàŋ nɔ̀ŋ mààŋ wo kààmɔɔŋ nyiŋ nɔɔ̀ŋ.
41“Wèè kiìŋ mùŋ yɛmɛ̀ e kuùfìèɛ ko sòòfɛ̀ɛ̀ wùìya mɔɔ̀ŋ, kɛɛ muŋ fè jàà jii kɛ̀ wɔ̀ŋ kuùfòò gbee kòò wɔ̀ŋ yaà kò sòòfɛ̀ɛ̀ muàŋ biì? 42Dièsɔa mùŋ naŋ ɓɛ̀nɛ̀ŋ wòò wo wùìya mɔɔ̀ŋ maàŋ, ‘Tɔ̀ miŋ gòum e kuùfìèɛ ko sòòfɛ̀ɛ̀,’ kɛɛ muŋ fè yɛ̀mɛ̀ wɔ̀ŋ kuùfòòɔ kò sòòfɛ̀ɛ̀ muàŋ biì? Mùŋ yaà wo nyùùŋ fɛ̀ɛ̀ ɗòònààkeì. Gè wɔŋ kuùfòòɔ ko sòòfɛ̀ɛ̀ muìŋ jiɛ̀, kpeiŋ kɛ̀ màŋ ɓɛ̀nɛ̀ŋ yɛ̀mɛ̀ dìì tɛ̀ɛ̀ wèè maŋ gè e kuùfìèɛ ko sòòfɛ̀ɛ̀ wùìya mɔɔ̀ŋ.
Ke kùlɛ̀ɛ yèè ke komàŋ nyiŋ nɛɛ̀ŋ
(Maafiù 7.16-20; 12.33-35)
43“Ke kuù bɔ̀u fè kòmàŋ kè kuù kòmàŋ naanààŋ, e kìlà ke kuù naanààŋ fè kòmàŋ kè kuù kòmàŋ sìàŋ. 44Nìŋ do nàŋ nyìmè e nɔ̀ŋ kìì ke kùlɛ̀ɛ e yìwìà ke komàŋ nyiŋ nɛɛ̀ŋ. Niŋ fè ɓɛ̀nɛ̀ŋ kpàà màŋ feè kòmàŋ ɔ̀ɔ̀ màŋ gbɛ̀mɛ̀ɛ̀ŋ komaŋ è yìwìà è ɓìè màŋ dɛiŋ sùà. 45Wo nyuùŋ sìàŋ hiàŋ maŋ nɛ̀ŋ kɛnɛ e yìwìà ko sùlò maŋ nɛ̀ŋ kɛnɛ ke jiiuŋ nɛɛ̀ŋ sùà. Wo nyuùŋ naanààŋ hiàŋ maŋ nɛ̀ŋ naanààŋ e yìwìà ko sùlò maŋ nɛ̀ŋ naanààŋ ke jiiuŋ nɛɛ̀ŋ sùà. Wɔŋ nyààŋ nàŋ woà e nɛ̀ɛŋ naum dìè ke jiio sùà lɛ.
Anyùùŋ nyaŋ naŋ nyɛ̀lɛ̀ maŋ sààŋ tìyèe màŋ nyaŋ
(Maafiù 7.24-27)
46“Wèè kiìŋ nìŋ nyààìm ‘Kanaà, Kanaà,’ kɛɛ niŋ fè nyɛ̀nɛ̀ŋ è yèɛ mìŋ woàìŋ lɛ? 47Wo nyùnɔ̀ɔŋ gbiŋ hnàŋ ko nɛ̀ɛ̀ŋ miìŋ yèè wo kòmàŋ maŋ miè gbìaim màŋ e kìlà wo miŋ jɔ̀ɔ̀lɔ̀ dìì wɔ, mìŋ doiŋ nàŋ tɔɔ̀ kɛ̀ diè wò yaà. 48Wò yaà mààŋ wo felaaà wo yèɔ naŋ tòmò e dììɛ tɛ̀ɛ̀ wèè wo ɓɛnɛ̀ŋ tɔ̀ɔ̀tù nyɛ̀lɛ̀ e kpèè ke saauŋ nɛɛ̀ŋ wɔŋ duò tàà diɛŋ. Maŋ gɔ̀àà maŋ naŋ sɔ̀ɔ̀, e wùìyèɛ jòwà e kìlìà ke saaàŋ, kɛɛ ke gò wa mɛɛmɛ̀ɛ̀ŋ, esaɓù kɛ̀ wò naŋ nyiŋ wa nyɛ̀lɛ̀ tɛ̀ɛ̀ wɔŋ duò tàà diɛŋ. 49Kɛɛ wo nyùnɔ̀ɔŋ gbiŋ naŋ kòmò maŋ miè gbìaim mɛɛ̀ŋ yèè wò naŋ gè maŋhɛɛ wèè wo miŋ jɔ̀ɔ̀lɔ̀ dìì wɔ, wò yaà mààŋ wo nyùnɔ̀ɔŋ gò tòmàŋ e dììɛ wèè wo tɔ̀ɔ̀tù nyɛ̀lɛ̀ e kpèè ke saauŋ nɛɛ̀ŋ. Maŋ gɔ̀àà maŋ naŋ sɔ̀ɔ̀, e wùìyèɛ jòwà e kìlìà ke saaàŋ, eɓìèmàŋjɛ̀wɛ̀, ke saaàŋ naŋ gɔɛɛ ke sɔ̀àà dìì fukpù.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
Gola New Testament Translation and Literacy Project © Bible Society in Liberia, 2019.