Luù 7
7
Wo Jisɛ̀ naŋ sùngò wo ɓɔ̀ìjɔ̀à kààlòòɗùà Luùm nyuuŋ
(Maafiù 8.5-13)
1Nààŋ wo Jisɛ̀ naŋ wa kpɛ̀ɛ̀yɛ̀ maŋ keì mɛɛ̀ŋ wòo koɓɛ̀ anyùùŋ nyaŋ, wò naŋ kɔ̀ ko jawaì àŋ nyaaŋ Kepanàùm lɛ. 2Wo kààlòòɗùà anyùùŋ Luùm nyaŋ bà koɓɛ̀ bi kuwa wa wo ɓɔìjɔ̀à wo yèɔ wò manaŋ wa zimgbe wɔ̀. Kɛɛ wo felaaà yaà wa siinyɛŋ ebɛ̀ŋ fàa. 3Nààŋ wo kààlòòɗùàa naŋ wa kòmò ebò Jisɛ̀ɛ, wò naŋ tùɔ̀ŋ aŋ màmànkùmɛ̀ŋ aŋ Juùù nyaŋ bà ko nɛ̀ɛ̀uŋ niìŋ wèè aŋ dawèuŋ wo hnàŋ wo sùngà wo ɓɔìjɔ̀àuŋ nɔɔ̀ŋ. 4Aŋ màmàŋkùmɛŋ nyàŋ naŋ hnè koɓɛ̀ Jisɛ̀i yèè àŋ nauŋ pɔwɔ̀ sɛmɛ nyààŋ, “Wo kenàŋ wɛɛ̀ yaà wo nyuùŋ tɛ̀ɛ̀ ko nɛ̀ɛ̀ŋ wiì, weètii è do nɔ̀ŋ tɛ̀ɛ̀ wèè mauŋ kpuumàŋ. 5Wo kenàŋ wɛɛ̀ manaŋ anyuùŋ wi nyàŋ yèè ngèè wuŋ bi naŋ fè e nɛɛnɛŋ aŋ nyɛ̀lɛ̀ ke sààŋ zòòlò aŋ Juùù weè wi.”
6Kpeiŋ wo Jisɛ̀ naŋ nyiŋ dè maŋjɛ̀wɛ àŋ naŋ kɔ̀. Nààŋ wo Jisɛ̀ yaà wa gbɛ̀ɛ̀ sùà ko gbooì, wo kààlòòɗùàa naŋ tùɔ̀ŋ aŋ dàwi mɔ̀ɔ̀nɔuŋ nyàŋ bà wèè aŋ woò wo Jisɛ̀ nyààŋ, “Kanaà, ɓɔ̀ mùŋ mɔɔnɛ̀ŋ muàŋ bi. Miŋ fè tɛ̀ɛ̀ wèè maŋ hnàŋ maŋ jɔ̀à kè saaŋ miɛ̀ŋ dìì. 7Miŋ fè ngèè pɛɛ tɛ̀ɛ̀ wèè miàŋ bi ka hnàŋ kò nɛ̀ɛ̀ŋ muìŋ. Wòò nɔŋ mààŋ wo ɓɔìjɔ̀à miɔ̀ŋ jòèyà, wò do nàŋ jòèyè. 8Mìŋ naŋ tɛɛ̀ haawè esaɓù kɛ̀, miàŋ pɛɛ mìŋ kuwa anyuùŋ gbeegbèè aŋ yè nyaŋ mìŋ toomàŋ dìì. Sèè àŋ woàìm nyààŋ nyɛnɛ̀ŋ tɛɛ̀, ka niŋ nyɛ̀nɛ̀ŋ. Mìŋ kuwa ɓɛìŋ aŋ kààlòòɗùà aŋ yè nyaŋ toomàìm dìì. Sèè mìŋ woà wo bà guùŋ mìàŋ, ‘Kɔ̀à!’ wò do nàŋ kɔ̀. Sèè mìŋ woà ɓɛìŋ wo bà mìàŋ ‘Hnaàŋ!’ wò do nàŋ hnè. Mìŋ woà wo ɓɔìjɔ̀à miɔ̀ŋ mìàŋ, ‘Nyɛnɛ̀ŋ tɛɛ̀!’ wò do niŋ nàŋ nyɛ̀nɛ̀ŋ.”
9Nààŋ wo Jisɛ̀ naŋ wa kòmò e keì wòo lɛɛ̀, è nauŋ wa foonò zimgbe. Kpeiŋ wò naŋ kìlè yèè wò naŋ wòò anyùùŋ nyaŋ yàaùŋ wa maŋjɛ̀wɛ nyàŋ wààŋ, “Tɔ̀ miŋ woòiŋ e tɔɔɓaaà kɛ̀, nààŋ gbà wɔŋ fùɔ̀ŋ Ezɔ̀ɛ̀ɔ gbiŋ sùà, kòò mìŋ yɛ̀mɛ̀ wò nyùùŋ gbiŋ wò yèɔ kuwa è hààwe gbee mààŋ tɛɛ̀.”
10Nààŋ anyùùŋ nyaŋ wo kenàaŋ naŋ wa tùɔ̀ŋ nyaŋ naŋ kɛ̀ɛ̀ maŋjɛ̀wɛ ko gbooì, àŋ naŋ mɛ̀ɛ̀ŋ wo ɓɔìjɔ̀àa jòèyà.
Wo Jisɛ̀ naŋ gè wo jɔ̀àfèlàà jɔ̀ùnèè dàa e fàa dìì
11E gò wa kòlà sùà wo Jisɛ̀ yaà anyùùŋ màŋjɛ̀wɛ̀uŋ nyàŋ naŋ ɓèmè ke dòmaàŋ wèè aŋ ka ko jawaì àŋ nyaaŋ nyààŋ Naìŋ. Yèè ke gbòò anyuùŋ zimgbe naŋ nyiŋ dè maŋjɛ̀wɛ. 12Nààŋ àŋ yaà wa gbɛ̀ɛ̀ sùà wɔŋ gbàngè jawaà, àŋ naŋ yɛ̀mɛ̀ anyùùŋ àŋ yaà kòà sùà e dìè wo jɔ̀àfèlàà jɔ̀ùnèèdàà bà. Wo jɔ̀àfèlàà guùŋ wɛɛ̀ nɔŋ wo nìe wɛɛ̀ naŋ wa kòmò. Anyùùŋ jawa nyàŋ zimgbe nyiŋ yàaùŋ wa kɔɔ. 13Nààŋ wo Kanaà Jisɛ̀ nauŋ wa yɛmɛ̀, ke nyowo nauŋ nyɛ̀nɛ̀ŋ yèè wò naŋ wòò wo nìeɔ̀ wààŋ, “Ɓɔ̀ mùŋ gòlà.” 14Kpeiŋ wo Jisɛ̀ naŋ kɔ̀ yèè wò naŋ mɛ̀nlɛ̀ɛ̀ŋ wɔŋ kààŋ fàaà, yèè anyùùŋ nyaŋ yaà kòà sùà wɔŋ kàaàŋ nyaŋ naŋ sie. Yèè wo Jisɛ̀ naŋ woò wààŋ, “Dakenàŋ, yewà dìì.” 15Wo felaaà naŋ fɔ̀ wɔ naŋ yèwè dìì wo jɛi, yèè wò naŋ tɔ̀ɔ̀tù gbòa. Kpeiŋ wo Jisɛ̀ nauŋ kɛ̀lɛ̀ɛ̀ koɓɛ̀ wo nààŋ kòmauŋ nɔɔ̀ŋ.
16E jùù naŋ wa nyɛ̀nɛ̀ŋ anyùùŋ nyaŋ gbiŋ, yèè àŋ naŋ tɛ̀nɛ̀ŋ wo Dayà. Àŋ naŋ wa woò nyààŋ, “Wo wɛ̀ijì gbee wò wi hnàŋ e tɛɛ, wo Dayà hnàŋ koɓɛ̀ anyunùuŋ nyàŋ wèè wo nyiŋ joeyè.”
17Ebò Jisɛ̀ lɛɛ̀ naŋ ɓààyè wɔŋ fùɔ̀ŋ Jùdiàa yèè maŋ kpàlàùŋ kpàlàùŋ miiŋ maŋ gbiŋ sùà.
Aŋ keela nyàŋ wo Jɔ̀ɔŋ Gùà Nyùnɔ̀ɔŋ naŋ tùɔ̀ŋ nyaŋ
(Maafiù 11.2-19)
18Anyùùŋ màŋjɛ̀wɛ̀ Jɔ̀ɔŋ Gùà Nyùnɔ̀ɔŋ nauŋ wòò maŋ keì mɛɛ̀ŋ, yèè wò naŋ nyààŋ àŋ tìyèe, 19wò naŋ nyiŋ tùɔ̀ŋ koɓɛ̀ wo Kanaà wèè aŋ dawèuŋ nyààŋ, “Muàŋ nàŋ yaà wo nyùnɔ̀ɔŋ wo Jɔ̀ɔŋ naŋ woò wààŋ wò do nàŋ hnè wɔ, ɔ̀ɔ̀ e fòlàiŋ wo nyuùŋ joo bà?”
20Nààŋ àŋ naŋ hnè koɓɛ̀ Jisɛ̀i, àŋ nauŋ woò nyààŋ, “Wo Jɔ̀ɔŋ Gùà Nyùnɔ̀ɔŋ naŋ wi tùɔ̀ŋ wèè eum dawè sèè mààŋ Muàŋ nàŋ yaà wo nyùnɔ̀ɔŋ wò naŋ woò wààŋ wò do nàŋ hnè wɔ, ɔ̀ɔ̀ e yɛmɛ̀iŋ wo nyuùŋ joo bà dòmaŋ?”
21E teenga lii sùà wo Jisɛ̀ naŋ wa sùngò anyuùŋ zimgbe kɛ̀ɛ̀nɛ̀ŋ maŋ sàaŋ gɛ̀wɛɛ̀, wo gè aŋ jinàŋ naanààŋ anyùùŋ maŋjɛ̀wɛ, yèè wò naŋ kpuumò wo gbàì maŋ fɛ̀ɛ̀ anyuùŋ zììlè le fɛ̀ɛ̀ zimgbe. 22Wo Jisɛ̀ naŋ nyiŋ fasàì wààŋ, “Kɛ̀ɛìŋ maŋjɛ̀wɛ niŋ woò wo Jɔ̀ɔŋ e yèɛ nìŋ naŋ kòmò yèè nìŋ naŋ yɛmɛ̀ lɛ. Anyuùŋ zììlè le fɛ̀ɛ̀ nyaŋ àŋ yɛ̀mɛ̀ dìì, anyuùŋ gò ɓɛ̀nɛ̀ŋ kàaiŋ tɛ̀ɛ̀ nyaŋ àŋ kaaìŋ naàŋ tɛ̀ɛ̀. Anyuùŋ kɛ̀ɛ̀nɛ̀ŋ e sààŋ maŋkùnù nyaŋ àŋ nɔ̀ŋ zɛ̀nɛŋ nyiŋ, anyuùŋ kpùɔ̀ŋ maŋ nùŋ nyaŋ komo naàŋ maŋ kàìŋ. Kà nyɛ̀nɛ̀ŋ anyuùŋ fàa nyàŋ yèwà e fàa dìì wɔŋ nyiiŋ gèe sùà, yèè kà wòò ke mìè gbìàŋ Ebò Siaàŋ koɓɛ̀ anyuùŋ pɔ̀ɔ nyàŋ. 23Wo Dayà do nàŋ kpùùmò anyùùŋ nyaŋ gbiŋ gòim gììyà màŋhɛɛ, èsàɓù màŋ keì maŋ mìŋ nyɛnɛŋ màŋ.”
24Nààŋ anyùùŋ màŋjɛ̀wɛ̀ Jɔ̀ɔŋ nyàŋ yaà wa kɛ̀ɛ̀ sùà maŋjɛ̀wɛ, wo Jisɛ̀ naŋ gbòò koɓɛ̀ anyùùŋ nyaŋ e nyaàiŋ dè wo Jɔ̀ɔŋ wààŋ, “Nààŋ nìŋ naŋ wa kɔ̀ ke fòùngà e diì wòaà sùà koɓɛ̀ Jɔ̀ɔìŋ, kiìŋ wò nyùùŋ nìŋ yaà wa yɛ̀ɛ̀mɛ̀ dòmaŋ wèè naŋ yɛmɛ̀? Wo nyuùŋ mùŋlaŋ mààŋ maŋ seìŋ mùnlòmunlo, maŋ yè maŋ wɔŋ fòìɔ mɛɛmɛ̀ɛ̀ŋ maŋ fàà maŋ gbiŋ lɛ̀? 25Kiìŋ nìŋ naŋ wa kɔ̀ wèè naŋ yɛmɛ̀? Wo nyùùŋ wo yèɔ naŋ kpàà maŋ deè nyìngà ɓaà wɔ? Kpele! Nàŋ nyìmàŋ kɛ̀ anyùùŋ nyaŋ kpaa maŋ deè nyìngà ɓaà nyaŋ, àŋ yaà anyuùŋ kɛ̀ɛ̀nɛ̀ŋ e ɓɛ̀ɛ̀jàa e kìlà àŋ joà maŋ sààŋ kana dìì. 26Wòo nìim, kiìŋ nìŋ naŋ wa kaikpɔ kɔ̀ wèè naŋ yɛmɛ? Wo Wɛ̀ijì? Tɔɔɓaa wo wɛ̀ijì wo wa. Kɛɛ tɔ̀ miŋ woòiŋ kɛ̀ wò naŋ wa nìè wo wɛ̀ijì. 27E kèè Jɔ̀ɔŋ wɔŋ fɛ̀ì Dayàa naŋ woò kɛ̀, ‘Wo Dayà naŋ woò wààŋ, mìŋ do nàŋ tùàŋ wo keela miɔ̀ŋ ko feìŋ wèè wo banebànè ke dòmaàŋ weèiŋ.’ ” 28Yèè wo Jisɛ̀ naŋ woò wààŋ, “Tɔ̀ miŋ woòiŋ e tɔɔɓaaà, wo nyùùŋ gbiŋ fè wò yèɔ àŋ naŋ kùmìè è ɗuunyaàŋ wɔ wo kùwìè è sɛmɛmaŋ e nìàŋ wò Jɔ̀ɔŋ Gùà Nyùnɔ̀ɔŋ. Kɛɛ wo nyùnɔ̀ɔŋ àŋ naŋ nììngè fɛ̀ɛ̀ e Kànà àìjɛnɛ̀ɛŋ sùà wɔ, wò kuwa e sɛmɛmaŋ e nìàŋ wo Jɔ̀ɔŋ.”
29Nààŋ anyùùŋ nyaŋ gbiŋ naŋ wa kùmìè e yèɛ wo Jisɛ̀ naŋ woò lɛ, e kpùlìà anyuùŋ kùwà nɛ̀ɛ̀nɛ̀ŋ fuɔɔ̀ŋ pɛɛ aŋ yè nyaŋ anyuùŋ zimgbe naŋ wa nììngè fɛ̀ɛ̀ nyaŋ, naŋ nyimèè wèè aŋ jɔ̀ɔ̀lɔ̀ ke dòmàŋ tɔ̀ɔ̀nyààŋ Dayàa dìì, nààŋ àŋ naŋ wa nyimèè wèè wo Jɔ̀ɔŋ wo nyiŋ gùà. 30Kɛɛ aŋ Fɛlosiì nyaŋ yèè aŋ kààmɔ̀ɔ̀ŋ maŋ Sàwà Dayà nyaŋ naŋ wa ge maŋhɛɛ wèè aŋ jɔ̀ɔ̀lɔ̀ wo Dayà dìì yèè aŋ gò wa nyimèè wèè wò Jɔ̀ɔŋ wo nyiŋ gùà.
31Wo Jisɛ̀ naŋ ɓɛìŋ woò wààŋ, “Kɛɛ kiìŋ mìŋ naŋ ɓɛ̀nɛ̀ŋ tèènè anyuùŋ kpùuŋ nyàŋ nàaŋ ɗɔɔ yɛɛ̀ wèè aŋ nɔ̀ŋ? Kiìŋ àŋ nyuùŋkpùuŋ ziì àŋ yaà? 32Àŋ yaà mààŋ aŋ jɔ̀àkàiŋ àŋ jaa ko mììnyɛ̀ŋ bòliì, ke gbòò guùŋ kè kpiinyàŋ aŋ dàwi. ‘È naiŋ dàà maŋ nùŋ kpai weèiŋ, kɛɛ niŋ gò yèwà, eiŋ dàà maŋ nùŋ ke nyowo, kɛɛ niŋ gò gòlà.’ 33Wo Jɔ̀ɔŋ Gùà Nyùnɔ̀ɔŋ naŋ wa hnè yèè wò naŋ kùwò ke tɔùŋ, kɛɛ wo gò tìà màŋ tala muaŋ, yèè nìŋ naŋ woò nààŋ, ‘Wo jinàŋ naanààŋ yàaùŋ sùà!’ 34Kɛɛ nààŋ miàim wo Jɔ̀àfèlàà Nyuùŋ kpùnɔɔ̀ŋ naŋ hnè, mìŋ naŋ jènɛ̀ŋ yèè mìŋ naŋ tìè, nìŋ naŋ ɓɛìŋ woò nààŋ, ‘Wo felaa wɛɛ̀ jènɛ̀ŋ yèè wò tie zimgbe! Aŋ dàwiuŋ nyàŋ nàŋ yaà anyuùŋ kùwà nɛ̀ɛ̀nɛ̀ŋ fuɔɔ̀ŋ yaà anyùùŋ maŋ jùumù.’ 35Kɛɛ aŋ yè nyaŋ tɔɔɓaa àŋ yaà aŋ jɔ̀à Dayà nyaŋ, naŋ nyìmè e nɛ̀ɛŋ miàŋ yèè wo Jɔ̀ɔŋ nyɛnɛŋ lɛ̀, tɔɔɓaa è tɔɔ̀ kɛ̀ è kuwa jiikɛ̀ɛ.”
Wo Fɛlosiìɔ Saimɔ̀ŋ, naŋ wa nyààŋ wo Jisɛ̀ ko gboouŋ noo
36Wo Fɛlosiì nyuuŋ bà naŋ wa nyààŋ wo Jisɛ̀ ko gboouŋ noo wèè aŋ jiiyà e nɛ̀ŋje koɓɛ̀ guùŋ. Wo Jisɛ̀ naŋ kɔ̀ ko gbòò Fɛlosiìɔ yèè wò naŋ jɛi wèè wo jènɛ̀ŋ. 37Wo nìe bà yaà wa ko jawa wii, kɛɛ wò yaà wa wo nyùùŋ maŋ jùumù. Wò naŋ wa kòmò kɛ̀ wo Jisɛ̀ yaà wa jììyè nɛ̀ŋ ko gbòò Fɛlosiìɔ. Wo nìeɔ̀ naŋ hìɛ̀ŋ e sàiŋ bàànè e dùò bà àŋ nyaaŋ àlàbasità è naŋ dìè maŋ kuùmàì, 38yèè wò naŋ sìè wo Jisɛ̀ jɛ̀wɛ̀ maŋ golòuŋ màŋ kɔɔ wò yaà gulie, maŋ fɛɛ̀màìuŋ màŋ dè maŋ gòlò Jisɛ̀ maŋ. Kpeiŋ wò naŋ miŋ hààngè e ɗì dumuuŋ nɛ̀, wo miŋ kisì, yèè wò naŋ miŋ kpàlèè maŋ kuùmàì. 39Wo Fɛlosiìɔ naŋ nyààŋ wo Jisɛ̀ wɔ naŋ wòò ke jiiuŋ nɛɛ̀ŋ sùà wààŋ, “Sèè wo kenàŋ wɛɛ̀ tɔɔɓaa wo weè nɔ̀ŋ wo wɛ̀ijì, wò he weè nàŋ nyìmè kɛ̀ ɓòò nàŋ yaà wo nìeɔ̀ yàaùŋ mɛ̀nlɛɛŋ sùà wɔ. Wò henàŋ nyìmè kɛ̀ wò yaà wo nyùùŋ maŋ jùumù.”
40Wo Jisɛ̀ naŋ gbòò wò nauŋ woò wààŋ, “Saimɔ̀ŋ, mìŋ kuwa e keì bà wèè kaum woò.”
Wo Saimɔ̀ŋ naŋ fasàì wààŋ, “Hɛ̀ɛɛ̀ŋ Kanaà, wòò miŋ.”
41Wo Jisɛ̀ nauŋ woò wààŋ, “Aŋ fèlàà tìyèe bà kuwa wa wo kenàŋ bà e kpàŋ nɛɛnɛŋ, wo yèɔ hewa gbìàŋ anyùùŋ e kpàŋ. Wò guùŋ kùwaùŋ wa e kpàŋ e kaiŋ fua nɛɛnɛŋ hɔ̀nɔ̀ɔ̀ nɔɔnɔŋ, yèè wo bàa kuwa e kpàŋ kaiŋ fua nɛɛnɛŋ kpɛ̀ɛ̀ùŋ tìyèe jɛ̀wɛ̀ zììyà. 42Aŋ fèlàà tìyèe nyàŋ kuwà wa è nɛɛnɛɛ̀ŋ wèè aŋ gè è kpàŋ kenàaŋ. Yèè wo kenàaŋ naŋ nyiŋ jùùyè hakɛ̀. Aŋ fèlàà tìyèe nyɛɛ̀ŋ e fèemàŋ, kòuŋ nàŋ dò nàŋ mɔ̀nɔ̀ŋ wo kenàaŋ zimgbe?”
43Wo Saimɔ̀ŋ naŋ fasàì wààŋ, “Kà ɓɛ̀nɛ̀ŋ gòngo kɛ̀ wo yèɔ wò naŋ jùùyè e hàkɛ̀ wèè e kpàŋ nɛɛnɛŋ gbeeɛ̀ wɔ wo.”
Wo Jisɛ̀ naŋ woò wààŋ, “Mùŋ naŋ gbàì tɔ̀ɔ̀nyaàŋ.” 44Kpeiŋ wo Jisɛ̀ naŋ kìlè koɓɛ̀ wo nìeɔ̀ yèè wò naŋ wòò Saimɔ̀ŋ wààŋ, “Màŋ yɛ̀mɛ̀ wo nìe wɛɛ̀? Mìŋ naŋ hnè ko gboo muìŋ, muŋ gòim kìɛ̀ŋ è wùìyè wèè ka gùà màŋ gòlò, kɛɛ wò naŋ gùùyè maŋ golòim màŋ maŋ fɛɛ̀màìuŋ màŋ yèè wò naŋ miŋ hààngè e ɗì dumuuŋ nɛ̀. 45Mìŋ naŋ hnè muŋ gòim kisì, kɛɛ nààŋ mìŋ naŋ kià jɔ̀ kòò wò hɔ̀ànè màŋ golòim màŋ kìsi. 46Muŋ gòim kpàlèè è bù ɔlè, kɛɛ wòim kpààì maŋ kuùmàì maŋ gòlò. 47Kpeiŋ tɔ̀ miŋ woòum, esàɓù e mànaŋ gbeeɛ̀ wò naim tɔɔ̀ lɛ, è naŋ tɔɔ̀ kɛ̀ maŋ jùumù zimgbeum màŋ nɔ̀ŋ hakɛ̀ jùùyà miŋ. Kɛɛ wo nyùnɔ̀ɔŋ àŋ naŋ jùùyè hakɛ̀ wèè e nɛ̀ŋ jɔa wɔ̀, wò do nɔŋ nàŋ tɔ̀ɔ̀ e mànaŋ jɔa.”
48Kpeiŋ wo Jisɛ̀ naŋ wòò wo nìeɔ̀ wààŋ, “Kà jùùyà maŋ jùumùum màŋ hakɛ̀.”
49Anyuùŋ gbànaŋ nyàŋ jaao wa nyàŋ naŋ tɔ̀ɔ̀tù wòò koɓɛ̀ nyiŋ biì nyààŋ, “Ɓòò nàŋ yaà wo felaa wɛɛ̀, wo yèɔ juuyà maŋ jùumù hakɛ̀ wɔ?”
50Kɛɛ wo Jisɛ̀ naŋ wòò wo nìeɔ̀ wààŋ, “E hààwe mɔ̀ɛ̀ èum joeyè. Tɔ̀ wo Dayà kiɛ̀um ke jii fàa.”
Currently Selected:
Luù 7: WFESD
Highlight
Share
Copy
Want to have your highlights saved across all your devices? Sign up or sign in
Gola New Testament Translation and Literacy Project © Bible Society in Liberia, 2019.
Luù 7
7
Wo Jisɛ̀ naŋ sùngò wo ɓɔ̀ìjɔ̀à kààlòòɗùà Luùm nyuuŋ
(Maafiù 8.5-13)
1Nààŋ wo Jisɛ̀ naŋ wa kpɛ̀ɛ̀yɛ̀ maŋ keì mɛɛ̀ŋ wòo koɓɛ̀ anyùùŋ nyaŋ, wò naŋ kɔ̀ ko jawaì àŋ nyaaŋ Kepanàùm lɛ. 2Wo kààlòòɗùà anyùùŋ Luùm nyaŋ bà koɓɛ̀ bi kuwa wa wo ɓɔìjɔ̀à wo yèɔ wò manaŋ wa zimgbe wɔ̀. Kɛɛ wo felaaà yaà wa siinyɛŋ ebɛ̀ŋ fàa. 3Nààŋ wo kààlòòɗùàa naŋ wa kòmò ebò Jisɛ̀ɛ, wò naŋ tùɔ̀ŋ aŋ màmànkùmɛ̀ŋ aŋ Juùù nyaŋ bà ko nɛ̀ɛ̀uŋ niìŋ wèè aŋ dawèuŋ wo hnàŋ wo sùngà wo ɓɔìjɔ̀àuŋ nɔɔ̀ŋ. 4Aŋ màmàŋkùmɛŋ nyàŋ naŋ hnè koɓɛ̀ Jisɛ̀i yèè àŋ nauŋ pɔwɔ̀ sɛmɛ nyààŋ, “Wo kenàŋ wɛɛ̀ yaà wo nyuùŋ tɛ̀ɛ̀ ko nɛ̀ɛ̀ŋ wiì, weètii è do nɔ̀ŋ tɛ̀ɛ̀ wèè mauŋ kpuumàŋ. 5Wo kenàŋ wɛɛ̀ manaŋ anyuùŋ wi nyàŋ yèè ngèè wuŋ bi naŋ fè e nɛɛnɛŋ aŋ nyɛ̀lɛ̀ ke sààŋ zòòlò aŋ Juùù weè wi.”
6Kpeiŋ wo Jisɛ̀ naŋ nyiŋ dè maŋjɛ̀wɛ àŋ naŋ kɔ̀. Nààŋ wo Jisɛ̀ yaà wa gbɛ̀ɛ̀ sùà ko gbooì, wo kààlòòɗùàa naŋ tùɔ̀ŋ aŋ dàwi mɔ̀ɔ̀nɔuŋ nyàŋ bà wèè aŋ woò wo Jisɛ̀ nyààŋ, “Kanaà, ɓɔ̀ mùŋ mɔɔnɛ̀ŋ muàŋ bi. Miŋ fè tɛ̀ɛ̀ wèè maŋ hnàŋ maŋ jɔ̀à kè saaŋ miɛ̀ŋ dìì. 7Miŋ fè ngèè pɛɛ tɛ̀ɛ̀ wèè miàŋ bi ka hnàŋ kò nɛ̀ɛ̀ŋ muìŋ. Wòò nɔŋ mààŋ wo ɓɔìjɔ̀à miɔ̀ŋ jòèyà, wò do nàŋ jòèyè. 8Mìŋ naŋ tɛɛ̀ haawè esaɓù kɛ̀, miàŋ pɛɛ mìŋ kuwa anyuùŋ gbeegbèè aŋ yè nyaŋ mìŋ toomàŋ dìì. Sèè àŋ woàìm nyààŋ nyɛnɛ̀ŋ tɛɛ̀, ka niŋ nyɛ̀nɛ̀ŋ. Mìŋ kuwa ɓɛìŋ aŋ kààlòòɗùà aŋ yè nyaŋ toomàìm dìì. Sèè mìŋ woà wo bà guùŋ mìàŋ, ‘Kɔ̀à!’ wò do nàŋ kɔ̀. Sèè mìŋ woà ɓɛìŋ wo bà mìàŋ ‘Hnaàŋ!’ wò do nàŋ hnè. Mìŋ woà wo ɓɔìjɔ̀à miɔ̀ŋ mìàŋ, ‘Nyɛnɛ̀ŋ tɛɛ̀!’ wò do niŋ nàŋ nyɛ̀nɛ̀ŋ.”
9Nààŋ wo Jisɛ̀ naŋ wa kòmò e keì wòo lɛɛ̀, è nauŋ wa foonò zimgbe. Kpeiŋ wò naŋ kìlè yèè wò naŋ wòò anyùùŋ nyaŋ yàaùŋ wa maŋjɛ̀wɛ nyàŋ wààŋ, “Tɔ̀ miŋ woòiŋ e tɔɔɓaaà kɛ̀, nààŋ gbà wɔŋ fùɔ̀ŋ Ezɔ̀ɛ̀ɔ gbiŋ sùà, kòò mìŋ yɛ̀mɛ̀ wò nyùùŋ gbiŋ wò yèɔ kuwa è hààwe gbee mààŋ tɛɛ̀.”
10Nààŋ anyùùŋ nyaŋ wo kenàaŋ naŋ wa tùɔ̀ŋ nyaŋ naŋ kɛ̀ɛ̀ maŋjɛ̀wɛ ko gbooì, àŋ naŋ mɛ̀ɛ̀ŋ wo ɓɔìjɔ̀àa jòèyà.
Wo Jisɛ̀ naŋ gè wo jɔ̀àfèlàà jɔ̀ùnèè dàa e fàa dìì
11E gò wa kòlà sùà wo Jisɛ̀ yaà anyùùŋ màŋjɛ̀wɛ̀uŋ nyàŋ naŋ ɓèmè ke dòmaàŋ wèè aŋ ka ko jawaì àŋ nyaaŋ nyààŋ Naìŋ. Yèè ke gbòò anyuùŋ zimgbe naŋ nyiŋ dè maŋjɛ̀wɛ. 12Nààŋ àŋ yaà wa gbɛ̀ɛ̀ sùà wɔŋ gbàngè jawaà, àŋ naŋ yɛ̀mɛ̀ anyùùŋ àŋ yaà kòà sùà e dìè wo jɔ̀àfèlàà jɔ̀ùnèèdàà bà. Wo jɔ̀àfèlàà guùŋ wɛɛ̀ nɔŋ wo nìe wɛɛ̀ naŋ wa kòmò. Anyùùŋ jawa nyàŋ zimgbe nyiŋ yàaùŋ wa kɔɔ. 13Nààŋ wo Kanaà Jisɛ̀ nauŋ wa yɛmɛ̀, ke nyowo nauŋ nyɛ̀nɛ̀ŋ yèè wò naŋ wòò wo nìeɔ̀ wààŋ, “Ɓɔ̀ mùŋ gòlà.” 14Kpeiŋ wo Jisɛ̀ naŋ kɔ̀ yèè wò naŋ mɛ̀nlɛ̀ɛ̀ŋ wɔŋ kààŋ fàaà, yèè anyùùŋ nyaŋ yaà kòà sùà wɔŋ kàaàŋ nyaŋ naŋ sie. Yèè wo Jisɛ̀ naŋ woò wààŋ, “Dakenàŋ, yewà dìì.” 15Wo felaaà naŋ fɔ̀ wɔ naŋ yèwè dìì wo jɛi, yèè wò naŋ tɔ̀ɔ̀tù gbòa. Kpeiŋ wo Jisɛ̀ nauŋ kɛ̀lɛ̀ɛ̀ koɓɛ̀ wo nààŋ kòmauŋ nɔɔ̀ŋ.
16E jùù naŋ wa nyɛ̀nɛ̀ŋ anyùùŋ nyaŋ gbiŋ, yèè àŋ naŋ tɛ̀nɛ̀ŋ wo Dayà. Àŋ naŋ wa woò nyààŋ, “Wo wɛ̀ijì gbee wò wi hnàŋ e tɛɛ, wo Dayà hnàŋ koɓɛ̀ anyunùuŋ nyàŋ wèè wo nyiŋ joeyè.”
17Ebò Jisɛ̀ lɛɛ̀ naŋ ɓààyè wɔŋ fùɔ̀ŋ Jùdiàa yèè maŋ kpàlàùŋ kpàlàùŋ miiŋ maŋ gbiŋ sùà.
Aŋ keela nyàŋ wo Jɔ̀ɔŋ Gùà Nyùnɔ̀ɔŋ naŋ tùɔ̀ŋ nyaŋ
(Maafiù 11.2-19)
18Anyùùŋ màŋjɛ̀wɛ̀ Jɔ̀ɔŋ Gùà Nyùnɔ̀ɔŋ nauŋ wòò maŋ keì mɛɛ̀ŋ, yèè wò naŋ nyààŋ àŋ tìyèe, 19wò naŋ nyiŋ tùɔ̀ŋ koɓɛ̀ wo Kanaà wèè aŋ dawèuŋ nyààŋ, “Muàŋ nàŋ yaà wo nyùnɔ̀ɔŋ wo Jɔ̀ɔŋ naŋ woò wààŋ wò do nàŋ hnè wɔ, ɔ̀ɔ̀ e fòlàiŋ wo nyuùŋ joo bà?”
20Nààŋ àŋ naŋ hnè koɓɛ̀ Jisɛ̀i, àŋ nauŋ woò nyààŋ, “Wo Jɔ̀ɔŋ Gùà Nyùnɔ̀ɔŋ naŋ wi tùɔ̀ŋ wèè eum dawè sèè mààŋ Muàŋ nàŋ yaà wo nyùnɔ̀ɔŋ wò naŋ woò wààŋ wò do nàŋ hnè wɔ, ɔ̀ɔ̀ e yɛmɛ̀iŋ wo nyuùŋ joo bà dòmaŋ?”
21E teenga lii sùà wo Jisɛ̀ naŋ wa sùngò anyuùŋ zimgbe kɛ̀ɛ̀nɛ̀ŋ maŋ sàaŋ gɛ̀wɛɛ̀, wo gè aŋ jinàŋ naanààŋ anyùùŋ maŋjɛ̀wɛ, yèè wò naŋ kpuumò wo gbàì maŋ fɛ̀ɛ̀ anyuùŋ zììlè le fɛ̀ɛ̀ zimgbe. 22Wo Jisɛ̀ naŋ nyiŋ fasàì wààŋ, “Kɛ̀ɛìŋ maŋjɛ̀wɛ niŋ woò wo Jɔ̀ɔŋ e yèɛ nìŋ naŋ kòmò yèè nìŋ naŋ yɛmɛ̀ lɛ. Anyuùŋ zììlè le fɛ̀ɛ̀ nyaŋ àŋ yɛ̀mɛ̀ dìì, anyuùŋ gò ɓɛ̀nɛ̀ŋ kàaiŋ tɛ̀ɛ̀ nyaŋ àŋ kaaìŋ naàŋ tɛ̀ɛ̀. Anyuùŋ kɛ̀ɛ̀nɛ̀ŋ e sààŋ maŋkùnù nyaŋ àŋ nɔ̀ŋ zɛ̀nɛŋ nyiŋ, anyuùŋ kpùɔ̀ŋ maŋ nùŋ nyaŋ komo naàŋ maŋ kàìŋ. Kà nyɛ̀nɛ̀ŋ anyuùŋ fàa nyàŋ yèwà e fàa dìì wɔŋ nyiiŋ gèe sùà, yèè kà wòò ke mìè gbìàŋ Ebò Siaàŋ koɓɛ̀ anyuùŋ pɔ̀ɔ nyàŋ. 23Wo Dayà do nàŋ kpùùmò anyùùŋ nyaŋ gbiŋ gòim gììyà màŋhɛɛ, èsàɓù màŋ keì maŋ mìŋ nyɛnɛŋ màŋ.”
24Nààŋ anyùùŋ màŋjɛ̀wɛ̀ Jɔ̀ɔŋ nyàŋ yaà wa kɛ̀ɛ̀ sùà maŋjɛ̀wɛ, wo Jisɛ̀ naŋ gbòò koɓɛ̀ anyùùŋ nyaŋ e nyaàiŋ dè wo Jɔ̀ɔŋ wààŋ, “Nààŋ nìŋ naŋ wa kɔ̀ ke fòùngà e diì wòaà sùà koɓɛ̀ Jɔ̀ɔìŋ, kiìŋ wò nyùùŋ nìŋ yaà wa yɛ̀ɛ̀mɛ̀ dòmaŋ wèè naŋ yɛmɛ̀? Wo nyuùŋ mùŋlaŋ mààŋ maŋ seìŋ mùnlòmunlo, maŋ yè maŋ wɔŋ fòìɔ mɛɛmɛ̀ɛ̀ŋ maŋ fàà maŋ gbiŋ lɛ̀? 25Kiìŋ nìŋ naŋ wa kɔ̀ wèè naŋ yɛmɛ̀? Wo nyùùŋ wo yèɔ naŋ kpàà maŋ deè nyìngà ɓaà wɔ? Kpele! Nàŋ nyìmàŋ kɛ̀ anyùùŋ nyaŋ kpaa maŋ deè nyìngà ɓaà nyaŋ, àŋ yaà anyuùŋ kɛ̀ɛ̀nɛ̀ŋ e ɓɛ̀ɛ̀jàa e kìlà àŋ joà maŋ sààŋ kana dìì. 26Wòo nìim, kiìŋ nìŋ naŋ wa kaikpɔ kɔ̀ wèè naŋ yɛmɛ? Wo Wɛ̀ijì? Tɔɔɓaa wo wɛ̀ijì wo wa. Kɛɛ tɔ̀ miŋ woòiŋ kɛ̀ wò naŋ wa nìè wo wɛ̀ijì. 27E kèè Jɔ̀ɔŋ wɔŋ fɛ̀ì Dayàa naŋ woò kɛ̀, ‘Wo Dayà naŋ woò wààŋ, mìŋ do nàŋ tùàŋ wo keela miɔ̀ŋ ko feìŋ wèè wo banebànè ke dòmaàŋ weèiŋ.’ ” 28Yèè wo Jisɛ̀ naŋ woò wààŋ, “Tɔ̀ miŋ woòiŋ e tɔɔɓaaà, wo nyùùŋ gbiŋ fè wò yèɔ àŋ naŋ kùmìè è ɗuunyaàŋ wɔ wo kùwìè è sɛmɛmaŋ e nìàŋ wò Jɔ̀ɔŋ Gùà Nyùnɔ̀ɔŋ. Kɛɛ wo nyùnɔ̀ɔŋ àŋ naŋ nììngè fɛ̀ɛ̀ e Kànà àìjɛnɛ̀ɛŋ sùà wɔ, wò kuwa e sɛmɛmaŋ e nìàŋ wo Jɔ̀ɔŋ.”
29Nààŋ anyùùŋ nyaŋ gbiŋ naŋ wa kùmìè e yèɛ wo Jisɛ̀ naŋ woò lɛ, e kpùlìà anyuùŋ kùwà nɛ̀ɛ̀nɛ̀ŋ fuɔɔ̀ŋ pɛɛ aŋ yè nyaŋ anyuùŋ zimgbe naŋ wa nììngè fɛ̀ɛ̀ nyaŋ, naŋ nyimèè wèè aŋ jɔ̀ɔ̀lɔ̀ ke dòmàŋ tɔ̀ɔ̀nyààŋ Dayàa dìì, nààŋ àŋ naŋ wa nyimèè wèè wo Jɔ̀ɔŋ wo nyiŋ gùà. 30Kɛɛ aŋ Fɛlosiì nyaŋ yèè aŋ kààmɔ̀ɔ̀ŋ maŋ Sàwà Dayà nyaŋ naŋ wa ge maŋhɛɛ wèè aŋ jɔ̀ɔ̀lɔ̀ wo Dayà dìì yèè aŋ gò wa nyimèè wèè wò Jɔ̀ɔŋ wo nyiŋ gùà.
31Wo Jisɛ̀ naŋ ɓɛìŋ woò wààŋ, “Kɛɛ kiìŋ mìŋ naŋ ɓɛ̀nɛ̀ŋ tèènè anyuùŋ kpùuŋ nyàŋ nàaŋ ɗɔɔ yɛɛ̀ wèè aŋ nɔ̀ŋ? Kiìŋ àŋ nyuùŋkpùuŋ ziì àŋ yaà? 32Àŋ yaà mààŋ aŋ jɔ̀àkàiŋ àŋ jaa ko mììnyɛ̀ŋ bòliì, ke gbòò guùŋ kè kpiinyàŋ aŋ dàwi. ‘È naiŋ dàà maŋ nùŋ kpai weèiŋ, kɛɛ niŋ gò yèwà, eiŋ dàà maŋ nùŋ ke nyowo, kɛɛ niŋ gò gòlà.’ 33Wo Jɔ̀ɔŋ Gùà Nyùnɔ̀ɔŋ naŋ wa hnè yèè wò naŋ kùwò ke tɔùŋ, kɛɛ wo gò tìà màŋ tala muaŋ, yèè nìŋ naŋ woò nààŋ, ‘Wo jinàŋ naanààŋ yàaùŋ sùà!’ 34Kɛɛ nààŋ miàim wo Jɔ̀àfèlàà Nyuùŋ kpùnɔɔ̀ŋ naŋ hnè, mìŋ naŋ jènɛ̀ŋ yèè mìŋ naŋ tìè, nìŋ naŋ ɓɛìŋ woò nààŋ, ‘Wo felaa wɛɛ̀ jènɛ̀ŋ yèè wò tie zimgbe! Aŋ dàwiuŋ nyàŋ nàŋ yaà anyuùŋ kùwà nɛ̀ɛ̀nɛ̀ŋ fuɔɔ̀ŋ yaà anyùùŋ maŋ jùumù.’ 35Kɛɛ aŋ yè nyaŋ tɔɔɓaa àŋ yaà aŋ jɔ̀à Dayà nyaŋ, naŋ nyìmè e nɛ̀ɛŋ miàŋ yèè wo Jɔ̀ɔŋ nyɛnɛŋ lɛ̀, tɔɔɓaa è tɔɔ̀ kɛ̀ è kuwa jiikɛ̀ɛ.”
Wo Fɛlosiìɔ Saimɔ̀ŋ, naŋ wa nyààŋ wo Jisɛ̀ ko gboouŋ noo
36Wo Fɛlosiì nyuuŋ bà naŋ wa nyààŋ wo Jisɛ̀ ko gboouŋ noo wèè aŋ jiiyà e nɛ̀ŋje koɓɛ̀ guùŋ. Wo Jisɛ̀ naŋ kɔ̀ ko gbòò Fɛlosiìɔ yèè wò naŋ jɛi wèè wo jènɛ̀ŋ. 37Wo nìe bà yaà wa ko jawa wii, kɛɛ wò yaà wa wo nyùùŋ maŋ jùumù. Wò naŋ wa kòmò kɛ̀ wo Jisɛ̀ yaà wa jììyè nɛ̀ŋ ko gbòò Fɛlosiìɔ. Wo nìeɔ̀ naŋ hìɛ̀ŋ e sàiŋ bàànè e dùò bà àŋ nyaaŋ àlàbasità è naŋ dìè maŋ kuùmàì, 38yèè wò naŋ sìè wo Jisɛ̀ jɛ̀wɛ̀ maŋ golòuŋ màŋ kɔɔ wò yaà gulie, maŋ fɛɛ̀màìuŋ màŋ dè maŋ gòlò Jisɛ̀ maŋ. Kpeiŋ wò naŋ miŋ hààngè e ɗì dumuuŋ nɛ̀, wo miŋ kisì, yèè wò naŋ miŋ kpàlèè maŋ kuùmàì. 39Wo Fɛlosiìɔ naŋ nyààŋ wo Jisɛ̀ wɔ naŋ wòò ke jiiuŋ nɛɛ̀ŋ sùà wààŋ, “Sèè wo kenàŋ wɛɛ̀ tɔɔɓaa wo weè nɔ̀ŋ wo wɛ̀ijì, wò he weè nàŋ nyìmè kɛ̀ ɓòò nàŋ yaà wo nìeɔ̀ yàaùŋ mɛ̀nlɛɛŋ sùà wɔ. Wò henàŋ nyìmè kɛ̀ wò yaà wo nyùùŋ maŋ jùumù.”
40Wo Jisɛ̀ naŋ gbòò wò nauŋ woò wààŋ, “Saimɔ̀ŋ, mìŋ kuwa e keì bà wèè kaum woò.”
Wo Saimɔ̀ŋ naŋ fasàì wààŋ, “Hɛ̀ɛɛ̀ŋ Kanaà, wòò miŋ.”
41Wo Jisɛ̀ nauŋ woò wààŋ, “Aŋ fèlàà tìyèe bà kuwa wa wo kenàŋ bà e kpàŋ nɛɛnɛŋ, wo yèɔ hewa gbìàŋ anyùùŋ e kpàŋ. Wò guùŋ kùwaùŋ wa e kpàŋ e kaiŋ fua nɛɛnɛŋ hɔ̀nɔ̀ɔ̀ nɔɔnɔŋ, yèè wo bàa kuwa e kpàŋ kaiŋ fua nɛɛnɛŋ kpɛ̀ɛ̀ùŋ tìyèe jɛ̀wɛ̀ zììyà. 42Aŋ fèlàà tìyèe nyàŋ kuwà wa è nɛɛnɛɛ̀ŋ wèè aŋ gè è kpàŋ kenàaŋ. Yèè wo kenàaŋ naŋ nyiŋ jùùyè hakɛ̀. Aŋ fèlàà tìyèe nyɛɛ̀ŋ e fèemàŋ, kòuŋ nàŋ dò nàŋ mɔ̀nɔ̀ŋ wo kenàaŋ zimgbe?”
43Wo Saimɔ̀ŋ naŋ fasàì wààŋ, “Kà ɓɛ̀nɛ̀ŋ gòngo kɛ̀ wo yèɔ wò naŋ jùùyè e hàkɛ̀ wèè e kpàŋ nɛɛnɛŋ gbeeɛ̀ wɔ wo.”
Wo Jisɛ̀ naŋ woò wààŋ, “Mùŋ naŋ gbàì tɔ̀ɔ̀nyaàŋ.” 44Kpeiŋ wo Jisɛ̀ naŋ kìlè koɓɛ̀ wo nìeɔ̀ yèè wò naŋ wòò Saimɔ̀ŋ wààŋ, “Màŋ yɛ̀mɛ̀ wo nìe wɛɛ̀? Mìŋ naŋ hnè ko gboo muìŋ, muŋ gòim kìɛ̀ŋ è wùìyè wèè ka gùà màŋ gòlò, kɛɛ wò naŋ gùùyè maŋ golòim màŋ maŋ fɛɛ̀màìuŋ màŋ yèè wò naŋ miŋ hààngè e ɗì dumuuŋ nɛ̀. 45Mìŋ naŋ hnè muŋ gòim kisì, kɛɛ nààŋ mìŋ naŋ kià jɔ̀ kòò wò hɔ̀ànè màŋ golòim màŋ kìsi. 46Muŋ gòim kpàlèè è bù ɔlè, kɛɛ wòim kpààì maŋ kuùmàì maŋ gòlò. 47Kpeiŋ tɔ̀ miŋ woòum, esàɓù e mànaŋ gbeeɛ̀ wò naim tɔɔ̀ lɛ, è naŋ tɔɔ̀ kɛ̀ maŋ jùumù zimgbeum màŋ nɔ̀ŋ hakɛ̀ jùùyà miŋ. Kɛɛ wo nyùnɔ̀ɔŋ àŋ naŋ jùùyè hakɛ̀ wèè e nɛ̀ŋ jɔa wɔ̀, wò do nɔŋ nàŋ tɔ̀ɔ̀ e mànaŋ jɔa.”
48Kpeiŋ wo Jisɛ̀ naŋ wòò wo nìeɔ̀ wààŋ, “Kà jùùyà maŋ jùumùum màŋ hakɛ̀.”
49Anyuùŋ gbànaŋ nyàŋ jaao wa nyàŋ naŋ tɔ̀ɔ̀tù wòò koɓɛ̀ nyiŋ biì nyààŋ, “Ɓòò nàŋ yaà wo felaa wɛɛ̀, wo yèɔ juuyà maŋ jùumù hakɛ̀ wɔ?”
50Kɛɛ wo Jisɛ̀ naŋ wòò wo nìeɔ̀ wààŋ, “E hààwe mɔ̀ɛ̀ èum joeyè. Tɔ̀ wo Dayà kiɛ̀um ke jii fàa.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
Gola New Testament Translation and Literacy Project © Bible Society in Liberia, 2019.