Maafiù 23

Wo Jisɛ̀ naŋ kìɛ̀ŋ anyùùŋ nyaŋ e go e nyaàiŋ dè aŋ kààmɔ̀ɔ̀ŋ maŋ Sàwà Dayà nyaŋ yèè aŋ Fɛlosiì nyaŋ

(Mài 12.38, 39; Luù 11.43, 46; 20.45, 46)

1Kpeiŋ wo Jisɛ̀ naŋ gbòò koɓɛ̀ anyùùŋ nyaŋ yaà anyùùŋ màŋjɛ̀wɛ̀uŋ nyàŋ wààŋ, 2“Aŋ kààmɔ̀ɔ̀ŋ maŋ Sàwà Dayà nyaŋ yaà aŋ Fɛlosiì nyaŋ nàŋ jaà ke kpùà Mòòzeɛ̀ diɛŋ wèè aŋ fasàì maŋ Sàwà maŋ tɛ̀ɛ̀. 3Weètii nyɛnɛ̀ŋ e yèɛ gbiŋ àŋ woàùm wèè maŋ nyɛ̀nɛ̀ŋ lɛ. Kɛɛ ɓɔ̀ mùŋ dè màŋ kpèè nyiŋ màŋ màŋjɛ̀wɛ, esaɓù kɛ̀ àŋ woà e kèì ɗì guùŋ, yèè aŋ nyɛ̀nɛ̀ŋ e joo niŋ. 4Àŋ gbuwo manɛ̀ŋ foo mùnga anyùùŋ jɛwɛ wèè aŋ miŋ koà, kɛɛ aŋ fè pɛɛ gè kè kiiyò dìì wèè aŋ nyiŋ kìɛ̀ŋ è kpùùmaŋ wèè aŋ kòà manɛ̀ŋ foo miiŋ. 5Manɛ̀ŋ nyɛ̀nɛŋ nyiŋ màŋ gbiŋ màŋ yaà nɔŋ wèè anyùùŋ aŋ nyiŋ yɛmɛ̀ ko ɓài. Àŋ singe maŋ mìè nyààŋ fɛ̀ì Dayà maŋ aŋ miŋ bàànè maŋ ɗàsìmɔɔŋ gbeegbèè, yèè aŋ miŋ sɛ̀ɛ̀sɛ̀ɛ̀ maŋ ɗìfeìŋ, aŋ miŋ sɛ̀ɛ̀sɛ̀ɛ̀ maŋ kùàŋ, yèè àŋ dikià maŋ jeèì mùnlòmuŋlo e tɛɛ maŋ ɓuuɓane nyiŋ màŋ diɛŋ, wèè anyùùŋ aŋ nyiŋ gɔ̀à le fɛ̀ɛ̀. 6Àŋ jaà maŋ jɛ̀i kɛnɛ màŋ diɛŋ maŋ ɗaa gèe màŋ diɛŋ, yaà maŋ jɛ̀i màŋ àŋ naŋ jàà e ɓula titi màŋ, maŋ sààŋ zòòlò aŋ Juùù nyaŋ dìì, esaɓù kɛ̀ àŋ manaŋ anyùùŋ aŋ nyiŋ kìɛ̀ŋ ɓɛ̀ɛ̀jàa. 7Aŋ manaŋ wèè aŋ nyiŋ zuumò e kìlà wèè aŋ nyiŋ kìɛ̀ŋ e ɓɛ̀ɛ̀jàa koɓɛ̀i àŋ nyiniàŋ maŋ bòli màŋ lɛ, yèè aŋ nyiŋ nyààŋ aŋ ‘Kààmɔɔŋ.’ 8Kɛɛ nyɛ̀iŋ nààŋ bà gbiŋ ɓɔ̀ mùŋ nyimèè wèè aum nyààŋ wò ‘Kààmɔɔŋ,’ esaɓù kɛ̀ nyɛ̀iŋ gbiŋ nìŋ yaà aŋ wùìyà guùŋ, yèè nìŋ kuwa nɔŋ wo kààmɔ̀ɔ̀ŋ guùŋ. 9Ɓɔ̀ mùŋ nyààŋ wò nyùùŋ è ɗuunyaŋ lɛɛ̀ wò dèda mɔɔ̀ŋ. Nyɛ̀iŋ nààŋ gbiŋ nìŋ kuwa wo Dèdà guùŋ ko àìjɛnɛ̀ŋ. 10Nyɛ̀iŋ nààŋ bà gbiŋ ɓɔ̀ mùŋ nyimèè wèè aum nyààŋ wò kana. Wo Kulaì wuŋ guùŋ nɔŋ nàŋ yaà wo kanaiŋ nɔɔ̀ŋ. 11Wo nyùnɔ̀ɔŋ gbiŋ wò nɔ̀ŋ wo gbeeɔ̀ e tɛɛiŋ wɔ̀, wo nɔ̀ŋ wo ɓɔìjɔ̀àa wèè nyɛ̀iŋ gbiŋ. 12Anyùùŋ nyaŋ joowà nyiŋ bi nyàŋ, wo Dayà do nyiŋ nàŋ deeyè. Anyùùŋ nyaŋ deeyà nyiŋ bi nyàŋ, wo Dayà do nyiŋ nàŋ joowò.

Wo Jisɛ̀ naŋ jèè aŋ kààmɔɔŋ nyàŋ yèè aŋ Fɛlosiì nyaŋ keì wèè e keì jàà fɛ̀ɛ̀ nyiŋ nɛ̀

(Mài 12.40; Luù 11.39-42, 44, 52; 20.47)

13“E keì nyìnga do nàŋ nɔ̀ŋ ko nɛ̀ɛ̀iŋ niìŋ nyɛ̀iŋ nààŋ kààmɔ̀ɔ̀ŋ maŋ Sàwà Dayà nyaŋ, yèè nyɛ̀iŋ nààŋ Fɛlosiì nyaŋ. Nìŋ yaà anyùùŋ fɛ̀ɛ̀ ɗòònààkeì. Nìŋ naŋ sìè wɔŋ gbèmgbèè e Kànà àìjɛnɛ̀ɛŋ e kpòò anyùùŋ ko feìŋ, kɛɛ nyɛ̀iŋ bi niŋ fè jɔ̀à, e kìlà nìŋ keewà anyùùŋ kùàŋ feìŋ wèè aŋ goonàŋ jɔ̀ nyiŋ pɛɛ.

[ 14“E keì nyìnga do nàŋ nɔ̀ŋ ko nɛ̀ɛ̀iŋ niìŋ nyɛ̀iŋ nààŋ kààmɔ̀ɔ̀ŋ maŋ Sàwà Dayà nyaŋ, yèè nyɛ̀iŋ nààŋ Fɛlosiì nyaŋ. Nìŋ nyinìàŋ aŋ jɔ̀ùŋnèèdàà nyaŋ kàaɓì yèè nìŋ gè nyiìŋ maŋ tùlìè jii nyiŋ màŋ sìwè maŋ gboo nyiŋ màŋ sùà. Nìŋ manaŋ kèè nyɛ̀iŋ bi tɔ̀ɔ yèè maŋ zòòloiŋ màŋ mùŋloe jèì. Nyɛ̀iŋ nààŋ nyùùŋ mààŋ nyɛɛ̀ŋ do wa nàwèè nàŋ kùwò e nimilà nyìnga e mààŋ nyààŋ!]

15“E keì nyìnga do nàŋ nɔ̀ŋ ko nɛ̀ɛ̀iŋ niìŋ nyɛ̀iŋ nààŋ kààmɔ̀ɔ̀ŋ maŋ Sàwà Dayà nyaŋ yèè nyɛ̀iŋ nààŋ Fɛlosiì nyaŋ. Nìŋ yaà nyùùŋ fɛ̀ɛ̀ ɗòònààkeì. Nìŋ kaaìŋ dìì naŋ nìàŋ wɔŋ juwoɔ̀ wèè naŋ kàmè anyùùŋ nyaŋ fè àŋ Juùù nyaŋ wò guùŋ wèè wo hààwè e yèɛ nìŋ kaà lɛ. Sèè nìŋ mɛɛ̀ŋ yèè nìŋ kile wo nyùùŋ bi koɓɛ̀ e hààweiŋ nɛ̀, nìŋ nyɛnɛŋ wo nyùùŋ wii wo nɔ̀ŋ e bànèbaneuŋ e sùà tìyèe wèè ko jàhamaŋ, màànààŋ nɔŋ nyɛ̀iŋ bi nìŋ doo nàŋ kɔ̀ lɛ.

16“E keì nyìnga do nàŋ nɔ̀ŋ ko nɛ̀ɛ̀iŋ niìŋ, nyɛ̀iŋ naŋ weè tɛɛwɛ̀ wèè naŋ sìè anyùùŋ ko feìŋ naŋ nyiŋ koà, kɛɛ nìŋ naŋ zììlè le fɛ̀ɛ̀. Nìŋ naŋ woò nààŋ, ‘Sèè wo nyùùŋ wo gboonò e dèè ke Saaŋ Zòòlò Dayàa diɛŋ, e fè è keì gbiŋ. Kɛɛ nààŋ sèè wo nyùùŋ wo gboonò e dèè e gòoòɛ diɛŋ ko Saaŋ Zòòlò Dayài, kɛ̀ wò pɔ̀ɔ̀ ke sàwà, kɛ̀ wò kuwa wo nyɛ̀nɛ̀ŋ e yèɛ wò naŋ woò lɛ.’ 17Nyɛ̀iŋ nààŋ nyuùŋ zììlè fɛ̀ɛ̀ zùwo nyɛɛ̀ŋ! Kòò niŋ nàŋ yaà e kɛnɛ niŋ, e gòoòɛ, ɔ̀ɔ̀ ke Saaŋ Zòòlò Dayàa ke yèɛ nyɛnɛŋ e gòoòɛ e nɔ̀ŋ nɛɛmaŋ sùà lɛ? 18Nìŋ naŋ ɓɛìŋ woò nààŋ, ‘E fè è keì sèè wo nyùùŋ wo gboonò e dèè wɔŋ gbɛ̀gbɛ̀ zòòloɔ̀ diɛŋ. Kɛɛ sèè wo nyùùŋ wo gboonò e dèè manɛ̀ŋ kìɛŋ màŋ diɛŋ wɔŋ gbɛ̀gbɛ̀ zòòloɔ̀ diɛŋ kɛ̀ wò pɔ̀ɔ̀ ke sàwà, wò kuwa wo nyɛ̀nɛ̀ŋ e yèɛ wò naŋ woò lɛ.’ 19Nìŋ naŋ zììlè le fɛ̀ɛ̀! Kòò niŋ nàŋ yaà e kɛnɛ niŋ, manɛ̀ŋ kìɛŋ màŋ ɔ̀ɔ̀ wɔŋ gbɛ̀gbɛ̀ zòòloɔ̀ wɔŋ yèɛ nyɛnɛŋ manɛ̀ŋ kìɛŋ màŋ maŋ nɔ̀ŋ nɛɛmaŋ sùà wɔŋ? 20Weètii sèè è nɔ̀ŋ yɛi, wo nyùnɔ̀ɔŋ gbiŋ naŋ gboonò e dèè wɔŋ gbɛ̀gbɛ̀ zòòloɔ̀ diɛŋ wɔ̀, wò gbòònò e dèè manɛ̀ŋ kìɛŋ màŋ gbiŋ jàà wuùŋ diɛŋ màŋ. 21Yèè wo nyùnɔ̀ɔŋ gbiŋ naŋ gboonò e dèè ke Saaŋ Zòòlò Dayàa diɛŋ wɔ̀, wò gbòònò e dèè Dayàa diɛŋ wuŋ pɛɛ, wo yèɔ joà ke sààŋ zòòlo bi dìì wɔ. 22Yèè sèè wo nyùùŋ gbiŋ wo gbòònò e dèè àìjɛnɛ̀ɛŋ diɛŋ, wò gbòònò e dèè ke kpùà Kànà Dayàa diɛŋ yèè e dèè wo nyùnɔ̀ɔŋ jàà nyìŋ diɛŋ wɔ̀.

23“E keì nyìnga do nàŋ nɔ̀ŋ ko nɛ̀ɛ̀iŋ niìŋ, nyɛ̀iŋ nààŋ kààmɔ̀ɔ̀ŋ maŋ Sàwà Dayà nyaŋ yèè nyɛ̀iŋ nààŋ Fɛlosiì nyaŋ! Nìŋ yaà anyùùŋ fɛ̀ɛ̀ ɗòònààkeì. Nìŋ kiɛ̀ŋ wo Dayà manɛ̀ŋ jeiŋ bà àŋ nyaaŋ nyààŋ mɛìŋ, diì, yèè kumìŋ e ɗì guùŋ e yìwìà e ɗì zììyà sùà, maŋ yè maŋ nìŋ gè maŋ kpòkpòiŋ màŋ sùà lɛ. Kɛɛ niŋ fè jɔ̀ɔ̀lɔ̀ màŋ Sàwà Dayà maŋ dìì, tèènè mààŋ e tɔ̀ɔ̀nyaàaŋ, ke nyowo yèè e hààwe. Mɛɛ̀ŋ nìŋ kuwa naŋ gbeè, e yèɛ niŋ fè nììngè màŋ gbànaŋ màŋ fɛ̀ɛ̀ lɛ. 24Nyɛ̀iŋ nààŋ nyuùŋ zììlè le fɛ̀ɛ̀ nyɛɛ̀ŋ! Nìŋ gè wo salì e nɛ̀ŋ tìyaiŋ nɛ̀ sùà, kɛɛ nìŋ mie wo ɗòsòo!

25“E keì nyìnga do nàŋ nɔ̀ŋ ko nɛ̀ɛ̀iŋ niìŋ, nyɛ̀iŋ nààŋ kààmɔ̀ɔ̀ŋ maŋ Sàwà Dayà nyaŋ yèè nyɛ̀iŋ nààŋ Fɛlosiì nyaŋ! Nìŋ yaà nyùùŋ fɛ̀ɛ̀ ɗòònààkeì. Nìŋ guo maŋ kpòò tììyaiŋ màŋ yèè maŋ tɛnyɛ̀iŋ màŋ jɛwɛ. Manɛ̀ŋ foo bi ko sùà nìŋ sie manɛ̀ŋ maŋ nìŋ gè anyùùŋ ko sìwè maŋ gàangàaŋ e mànàŋ nyɛ̀iŋ biɛ̀ sùà. 26Nyɛ̀iŋ nààŋ Fɛlosiì zììlè le fɛ̀ɛ̀ nyɛɛ̀ŋ, nyɛ̀nɛìŋ e nɛ̀ɛŋ nìŋ sie wɔŋ kpòò tììyaà sùà lɛ tiiŋ jiɛ̀ e nɔ̀ŋ zɛ̀nɛŋ niŋ, kpeiŋ kɛ̀ wɔŋ jɛwɛɔ̀ wɔ̀ŋ nɔ̀ŋ zɛ̀nɛŋ wuŋ!

27“E keì nyìnga do nàŋ nɔ̀ŋ ko nɛ̀ɛ̀iŋ niìŋ, nyɛ̀iŋ nààŋ kààmɔ̀ɔ̀ŋ maŋ Sàwà Dayà nyaŋ yèè nyɛ̀iŋ nààŋ Fɛlosiì nyaŋ! Nìŋ yaà nyùùŋ fɛ̀ɛ̀ ɗòònààkeì. Nìŋ yaà mààŋ maŋ hùaŋ àŋ naŋ jìyè e wolofua. Màŋ siaŋ yɛ̀mɛ ko jɔɔlèei, kɛɛ ko sùài naŋ dìè maŋ gòà yèè manɛ̀ŋ hèwa. 28Yɛi nɔŋ nìŋ yaà anyùùŋ ko fɛɛ̀feìŋ mààŋ anyùùŋ tɔ̀ɔ̀nyaàŋ, kɛɛ nìŋ yaà nyùùŋ fɛ̀ɛ̀ ɗòònààkeì, yèè nìŋ naŋ dìè maŋ kpèè naanààŋ.

Wo Jisɛ̀ naŋ wòò e kèè e kèì nyìngà aŋ kààmɔ̀ɔ̀ŋ maŋ Sàwà nyaŋ yèè aŋ Fɛlosiì nyaŋ

(Luù 11.47-51)

29“E keì nyìnga do nàŋ nɔ̀ŋ ko nɛ̀ɛ̀iŋ niìŋ, nyɛ̀iŋ nààŋ kààmɔ̀ɔ̀ŋ maŋ Sàwà Dayà nyaŋ yèè nyɛ̀iŋ nààŋ Fɛlosiì nyaŋ! Nìŋ yaà anyùùŋ fɛ̀ɛ̀ ɗòònààkeì. Nìŋ banàŋ maŋ hùàaŋ siaŋ wèè aŋ wɛ̀ijì nyaŋ anyùùŋ naŋ wa jìwè e teenga gɔu nyàŋ, e kìlà naŋ kpàà maŋ hùàŋ anyùùŋ tɔ̀ɔ̀nyaàŋ nyaŋ tɛ̀ɛ̀. 30Yèè nìŋ naŋ woò nààŋ sèè naŋ wa weè nɔ̀ŋ kòmaiŋ e teengaà aŋ nèwàènèweiŋ nyàŋ yaà wa fuɔŋ lɛ̀, niŋ naàŋ wa weè nɔ̀ŋ àŋ bà nyiŋ bà wèè è nɛ̀ɛŋ àŋ naŋ wa nyɛ̀nɛ̀ŋ lɛ, yèè àŋ naŋ wa jìwè aŋ wɛ̀ijì nyaŋ. 31Kɛɛ nìŋ kiɛ̀ŋ ke mìè seì kɛ̀ tɔɔɓaa nìŋ yaà aŋ jɔ̀à kòmàŋ anyùùŋ nyaŋ naŋ wa jìwè aŋ wɛ̀ijì nyaŋ lɛ̀. 32Weètii, kɔ̀aìŋ fùùŋ niŋ kpɛɛyɛ̀ e nɛ̀ɛŋ aŋ nèwàènèweiŋ nyàŋ naŋ wa nyɛ̀nɛ̀ŋ lɛ. 33Niŋ fè è nɛ̀ŋ gbiŋ eɓìèmàŋjɛ̀wɛ̀ aŋ kàì yèè aŋ jɔ̀à kòmàŋ aŋ kàì. Diè nìŋ naŋ ɓɛ̀nɛ̀ŋ dùaŋ wèè niŋ go nàŋ kɔ̀ ko jàhamaŋ ke ɗɔɔɛ̀ wo Dayà do wa nàwèè nàŋ gbàì e ɗuunyaàŋ lɛ? 34Tɔ̀ miŋ woòiŋ kɛ̀ esaɓùɛ lɛɛ̀ mìŋ doiŋ nàŋ tùɔ̀ŋ aŋ wɛ̀ijì, anyuùŋ kɛ̀ɛ̀nɛ̀ŋ jiikɛ̀ɛ yaà aŋ kààmɔɔŋ aŋ yè nyaŋ doiŋ nàŋ kàà ke miè gbìaŋ miɛ̀ŋ. Nìŋ do nàŋ jìwìè aŋ bà nyiŋ wɔŋ vànèkpaaà diɛŋ ɔ̀ɔ̀ naŋ naŋ nyiŋ jìwà e ɗewe kii joo bà sùà. Nìŋ do nàŋ ɓùlò aŋ bà nyiŋ maŋ sààŋ zòòlò aŋ Juùù nyaŋ dìì, e kìlà nìŋ do nyiŋ nàŋ nyìmè naŋ nyiŋ gè maŋ jawa gbeegbèè maŋ gbiŋ sùà. 35Maŋ sɛ̀ìŋ anyùùŋ tɔ̀ɔ̀nyaàŋ nyaŋ nìŋ naŋ wa wùɔ̀ŋ ko dììnaŋ màŋ doiŋ nàŋ gɔ̀àì ɗì, e yìwìà maŋ sɛ̀ìŋ Eɓɛ̀ɛ̀ maŋ e kà koɓɛ̀ maŋ sɛ̀ìŋ Zakalayà maŋ, wo jɔ̀àfèlàà Balakìàa, wo yèɔ nìŋ naŋ wa jìwìè e fèèmàŋ ke Saaŋ Zòòlò Dayàa yèè wɔŋ gbɛ̀gbɛ̀ zòòloɔ̀ wɔ. 36Tɔɔɓaa tɔ̀ miŋ woòiŋ kɛ̀, maŋ keì mɛɛ̀ŋ gbiŋ do nàŋ kààìŋ anyùùŋ nyaŋ gbiŋ yaà nàaŋ wɔŋ nyiiŋ gèeɔ̀ sùà nyaŋ.”

E mànaàŋ wo Jisɛ̀ kuwa wèè ko Jùlusɛ̀làm lɛ

(Luù 13.34, 35)

37Wo Jisɛ̀ wààŋ, “Kuoo nyɛ̀iŋ nààŋ nyùnòò Jùlusɛ̀làm nyaŋ! Anyunùiŋ nyàŋ naŋ wa jìwè aŋ wɛ̀ijì nyaŋ yèè àŋ naŋ hɔ̀wɔ̀ aŋ keela nyàŋ wo Dayà naŋ wa tùɔ̀ŋ ko nɛ̀ɛ̀iŋ niìŋ nyaŋ. E teenga zimgbe mìŋ naŋ nyɛ̀nɛ̀ŋ wànàŋ wèè kaiŋ gbònògbònò koɓɛ̀ guùŋ, màànààŋ wo tɔɔ boolìɔ gbonàŋ aŋ tɔɔ jɔauŋ nyàŋ maŋ gbauŋ màŋ dìì lɛ. Kɛɛ niŋ gò wa nyimèè wèè mìŋ doiŋ gbònò kòɓɛ̀ guùŋ. 38Weètii kùmiaìŋ tɛɛ̀, wo Dayà do nàŋ fè ke Saaŋ Zòòlò Dayàiŋ nɛɛ̀ŋ jɛwɛ yèè kè do nàŋ jòò foo nyiŋ. 39Miŋ woòiŋ e tɔɔɓaaà kɛ̀, niŋ naàim wa nàwèè ɓɛìŋ yɛmɛ̀ e jèèsùà naŋ wa nàwèè woò nààŋ, ‘Wo Dayà kpuumàŋ wo nyùnɔ̀ɔŋ hnàŋ e dèè Kanaà diɛŋ wɔ̀.’ ”

Currently Selected:

Maafiù 23: WFESD

Highlight

Copy