Maafiù 9

Wo Jisɛ̀ naŋ sùngò wo felaa kpɔ̀ɔ̀kpɔɔ bà

(Mài 2.1-12; Luù 5.17-26)

1Wo Jisɛ̀ naŋ sɛ̀ɛ̀ wɔŋ gɔ sùa yèè wo naŋ nìè wɔŋ juwoɔ̀ wo kà ko jawauŋ noo. 2Anyùùŋ bà naŋ wa hìɛ̀ŋ wo felaa kpɔ̀ɔ̀kpɔɔ bà ko nɛ̀ɛ̀uŋ niìŋ wò hawa wɔŋ gbùmaŋ sùà. Nààŋ wo Jisɛ̀ naŋ yɛmɛ̀ kɛ̀ àŋ kuwa wa e hààweɛ̀ kɛ̀ wò ɓɛ̀nɛ̀ŋ jòèyè wo felaaà, wò nàŋ wòò wo felaa kpɔ̀ɔ̀kpɔɔɔ̀ wààŋ, “Felaa wɛɛ̀, kɛ̀ɛ̀nɛɛ̀ŋ ke jii nyingè, kà jùùyà maŋ jùumùum màŋ hakɛ̀.”

3Aŋ kààmɔ̀ɔ̀ŋ maŋ Sàwà Dayà nyaŋ bà naŋ wòò nyiŋ bi e fèemàŋ nyààŋ “Wo felaa wɛɛ̀ wààŋ wò juuyà maŋ jùumù hakɛ̀. Tii naŋ tɔɔ̀ kɛ̀ wò naŋ ɓèmè wuŋ bi wèè yaà wo Dayà aŋ seenè. Wò yaà pɔ̀ɔ̀ sùà wo Dayà ɓɛ̀ɛ!”

4Wo Jisɛ̀ nyìmàŋ kɛ̀ kiìŋ àŋ yaà wa goongo maŋ jii nyiŋ màŋ sùà. Kpeiŋ wò naŋ nyiŋ woò wààŋ, “Ɓɔ̀ nìŋ goongòim màŋ keì naanààŋ, nààŋ nìŋ yààìm gbùwa sùà maŋ keì ɗì, esaɓù kɛ̀ mìŋ naŋ woò mìàŋ miàŋ nàŋ yaà wo Dayà. 5E naàŋ nɔ̀ŋ è keì nyìnga wèè wo nyùùŋ bà wo wòò wo felaa wɛɛ̀ wààŋ, ‘Kà jùùyà maŋ jùumùum màŋ hakɛ̀. Esaɓù kɛ̀ wo nyùùŋ bà gbiŋ fè ɓɛ̀nɛ̀ŋ tɔ̀ɔ kɛ̀ tɔɔɓaa è bà wa kaaìŋ ɔ̀ɔ̀ kòò è kààìŋ. Kɛɛ wo nyùùŋ gbiŋ fòuŋ ɓɛ̀nɛ̀ŋ wòo wààŋ, yewà dìì muŋ ka, sɔɔ̀ wo nyùùŋ wii wo kɛ̀ɛ̀nɛ̀ŋ e gààaŋ wèè wouŋ sùngà.’ 6Mìŋ doiŋ nàŋ nyɛ̀nɛ̀ŋ naŋ nyìmàŋ kɛ̀ miàŋ, wo Jɔ̀àfèlàà Nyuùŋ Kpùnɔɔ̀ŋ kuwa e gààŋ e ɗuunyaŋ lɛɛ̀ diɛŋ wèè ka jùùyà maŋ jùumù hakɛ̀.” Kpeiŋ wò naŋ wòò wo felaa kpɔ̀ɔ̀kpɔɔɔ̀ wààŋ, “Yewà dìì, muŋ ɓemè wɔŋ gbùmaŋ mɔɔ̀ŋ, muŋ kà ko gboo moo!” 7Ko fɛɛ̀feìŋ wo felaaà naŋ yèwè dìì, wo ɓèmè wɔŋ gbùmauŋ nɔɔ̀ŋ wo kà ko gboouŋ noo. 8Nààŋ anyùùŋ nyaŋ naŋ wa tɛɛ̀ yɛmɛ̀, e jùù naŋ nyiŋ nyɛ̀nɛ̀ŋ yèè àŋ naŋ tɛ̀nɛ̀ŋ wo Dayà wèè wo kìɛ̀ŋ e gààŋ mààŋ tɛɛ̀ koɓɛ̀ anyuùŋ kpùuŋ.

Wo Jisɛ̀ naŋ nyààŋ wo Maafiù

(Mài 2.13-17; Luù 5.27-32)

9Nààŋ wo Jisɛ̀ naŋ wa yèwè koɓɛ̀ wii wò yaà kɔɔyɛ, wò naŋ yɛ̀mɛ̀ wo Maafiù, wo nyuùŋ kùwà nɛ̀ɛ̀nɛ̀ŋ fuɔɔ̀ŋ, wò jaa ko saaŋ kùwìà nɛ̀ɛ̀nɛ̀ŋ fuɔɔ̀ŋ. Wo Jisɛ̀ nauŋ woò wààŋ, “Dèim maŋjɛ̀wɛ.”

Wo Maafiù naŋ yèwè dìì yèè wò nauŋ dè maŋjɛ̀wɛ.

10Eɓìèmàŋjɛ̀wɛ̀ tii, wo Maafiù naŋ nyààŋ wo Jisɛ̀ yaà anyùùŋ màŋjɛ̀wɛ̀uŋ nyàŋ ko gboouŋ noo wèè aŋ jè nɛ̀ŋje. Nààŋ àŋ jaa wa ko jììyè nɛ̀ŋ, anyuùŋ kùwà nɛ̀ɛ̀nɛ̀ŋ fuɔŋ nyàŋ zimgbe nyiŋ, yaà anyuùŋ joo bà aŋ yè nyaŋ aŋ Fɛlosiì nyaŋ nyaaŋ anyùùŋ maŋ kpèè naanààŋ nyaŋ, nao kɔ̀ e fòòno nyiŋ sùà wèè nyiŋ gbiŋ aŋ jiiyà nɛ̀ŋje koɓɛ̀ guùŋ. 11Aŋ Fɛlosiì nyaŋ bà nyiŋ naŋ tɛɛ̀ yɛmɛ̀, yèè àŋ naŋ dàwè anyùùŋ màŋjɛ̀wɛ̀uŋ nyàŋ nyààŋ, “Wèè kiìŋ wo kààmɔɔiŋ nɔɔ̀ŋ yaà anyuùŋ kùwà nɛ̀ɛ̀nɛ̀ŋ fuɔɔ̀ŋ e kpùlìà anyùùŋ maŋ kpèè naanààŋ jiiyà nɛ̀ŋje koɓɛ̀ guùŋ?”

12Wo Jisɛ̀ naŋ kòmò e nɛ̀ɛŋ àŋ naŋ wa woò lɛ, kpeiŋ wò naŋ nyiŋ fasàì wààŋ, “Anyuùŋ ɓòù nyaŋ fè kàmè wò zòòlègòò, sɔɔ̀ nɔŋ anyuùŋ sàaŋ nyàŋ. 13Kɔ̀àaìŋ niŋ kpɛ̀nɛ̀ŋ e yèɛ wɔŋ fɛ̀ì Dayàa naŋ woò lɛ. Wɔ̀ŋ naŋ woò wààŋ, ‘Mìŋ manaŋ naŋ tɔ̀ɔ̀ ke nyowo koɓɛ̀ aŋ dàwiiŋ nyàŋ, kɛɛ e fè wèè naŋ nɔŋ gììyà màŋ ɗolònɛ̀ŋ saàà kò nɛ̀ɛ̀ŋ miìŋ.’ Miŋ gò hnàŋ wèè ka nyààŋ ànyùùŋ tɔ̀ɔ̀nyaàŋ nyaŋ wèè aŋ nɔ̀ŋ ànyùùŋ màŋjɛ̀wɛ̀im, sɔɔ̀ anyùùŋ maŋ kpèè naanààŋ nyaŋ.”

Ànyùùŋ bà naŋ dàwè wo Jisɛ̀ e nyaàiŋ dè ke tɔùŋ kùwa

(Mài 2.18-22; Luù 5.33-39)

14Anyùùŋ màŋjɛ̀wɛ̀ Jɔ̀ɔŋ Gùà Nyùnɔ̀ɔŋ naŋ hnè koɓɛ̀ Jisɛ̀i, yèè àŋ nauŋ dawè nyààŋ, “Wèè kiìŋ yàwi e kpùlìà aŋ Fɛlosiì nyaŋ kuwo ke tɔùŋ e teenga gbiŋ, kɛɛ aŋ jeum nyàŋ fè nyiŋ nɔŋ kùwà gbiŋ?”

15Wo Jisɛ̀ naŋ nyiŋ woò wààŋ, “Nìŋ yaà yɛ̀ɛ̀mɛ̀ dòmaŋ wèè aŋ nyùùnèènyɛiŋ nyàŋ wɔŋ ɗàà gè ke yɛɛ̀ gbìaàŋ sùà aŋ nɔ̀ŋ ke nyowo sùà e teengaà wo kɛ̀ɛ̀nɛ̀ŋ jɔnɔ̀ɔŋ yàa nyìŋ e tɛɛ ko sààŋ yɛɛ̀ gbìaìŋ lɛ? Tɛɛ̀ fè ɓɛ̀nɛ̀ŋ kàaiŋ! Kɛɛ e teenga do nàŋ hnè aŋ nyiŋ gè wo kɛ̀ɛ̀nɛ̀ŋ jɔnɔ̀ɔŋ e tɛɛ, ke ɗɔɔ bi diɛŋ àŋ do nàŋ kùwò ke tɔùŋ.

16“Wo nyùùŋ gbiŋ fè ɓèmè wɔ̀ŋ deè fàà jɛ̀ì wèè wo gbùwà è jèwì wɔ̀ŋ kotì gɔu wɔ̀ŋ lomò. Sèè wò nyɛnɛŋ tii, wɔŋ deè fàà jɛ̀ì wiiŋ do nàŋ sɛ̀ɛ̀ wɔŋ kotì gɔuɔ̀ wɔŋ tòòyà e jèwìɛ e nɔ̀ŋ gbee. 17E kìlà wo nyùùŋ fè sìà màŋ juumuaŋ jɛi wɔ̀ŋ ɓuù bàànè fɛ̀ì yilì gɔu sùà. Sèè wò nyɛnɛŋ tii, maŋ juumuaŋ màŋ do nàŋ sɛ̀kɛ̀ wɔŋ ɓuù bàànè wɔŋ fɛ̀ì yilì gɔuɔ̀, kɛ̀ maŋ juumuaŋ màŋ e kpùlìà wɔŋ ɓuù bàànè fɛ̀ì yilìɔ pɔɔpɔ̀ɔ̀. Kɛɛ sià maŋ juumuaŋ jɛi wɔŋ ɓuù bàànè fɛ̀ì yilì jɛ̀ì sùà, miiŋ tìyèe do nàŋ nɔ̀ŋ tɛ̀ɛ̀.”

Wo jɔ̀àjɔ̀ùŋ Jalɔ̀ɔ yèè wo nìeɔ̀ naŋ wa mɛ̀ŋlɛ̀ɛ̀ŋ wɔŋ kùmà Jisɛ̀ɔ wɔ̀

(Mài 5.21-43; Luù 8.40-56)

18Nààŋ wo Jisɛ̀ yaà wa tɛɛ̀ woo, wo nyuùŋ gbeeɔ̀ bà guùŋ wèè aŋ Juùù nyaŋ naŋ hnè ko nɛ̀ɛ̀uŋ niìŋ, wo dè maŋ gɛ̀ɛ̀nùuŋ màŋ dììnaŋ ko fɛɛ̀fenùuŋ yèè wò nauŋ woò wààŋ, “Wo jɔ̀àjɔùŋ miɔ̀ŋ naŋ nɔŋ fɔ̀ sààmɛ. Kɛɛ sèè mùŋ hnàŋ mùŋ gbùwoùŋ maŋ kùàŋ diɛŋ, wò do nàŋ kɛɛ̀ wɔŋ nyiiŋ gèeɔ̀ sùà.”

19Kpeiŋ wo Jisɛ̀ yaà anyùùŋ màŋjɛ̀wɛ̀uŋ nyàŋ nauŋ dè màŋjɛ̀wɛ àŋ naŋ kɔ̀.

20Wo nìe bà yào wa wo yèɔ e sààŋ jɔùŋ yaà wa wèè maŋ dòà zììyà jɛ̀wɛ̀ tìyèe, wò naŋ hnè wo Jisɛ̀ ko jɛ̀wɛ̀ e faaàŋ sùà yèè wò naŋ mɛ̀nlɛ̀ɛ̀ŋ wɔŋ kùmàuŋ nɔɔ̀ŋ gòlòò dìì. 21Wò naŋ wòò ke jiiuŋ nɛɛ̀ŋ sùà wààŋ, “Sèè mìŋ mɛnlɛ̀ɛ̀ŋ nɔŋ wɔŋ kùmàuŋ nɔɔ̀ŋ, mìŋ do nàŋ jòèyè.”

22Kpeiŋ, wo Jisɛ̀ naŋ kìlè yèè wò nauŋ woò wààŋ, “Nìe siaŋ wɛɛ̀, kɛ̀ɛ̀nɛɛ̀ŋ ke jii nyingè, e hààwe mɔ̀ɛ̀ èum joeyè.” Ko fɛɛ̀feìŋ wo nìeɔ̀ naŋ jòèyè.

23Kpeiŋ wo Jisɛ̀ yaà anyùùŋ màŋjɛ̀wɛ̀uŋ nyàŋ bà naŋ kɔ̀ aŋ hàì ko gbòò wo kenàaŋ Jalɔ̀, wo nyuùŋ gbeeɔ̀. Wò nao wa mɛ̀ɛ̀ŋ anyuùŋ fùàŋ pilɛ̀ŋ àŋ yaà fɔɔwɔ ko gbòò fàaì, e kìlà anyùùŋ nyaŋ bà nyiŋ yaà gulie, esaɓù kɛ̀ wo jɔùŋjɔaà wa naàŋ fà. 24Wo Jisɛ̀ naŋ wòò anyùùŋ nyaŋ wààŋ, “Fòlaìŋ niŋ hɔnè maŋ de màŋ yèè e gòlaà! Wo jɔùŋjɔaà gò fà, wò yaà nɔŋ maŋ jàwè!” Kpeiŋ anyùùŋ nyaŋ gbiŋ nauŋ kùùnò hììle, esaɓù kɛ̀ àŋ nyìmàŋ kɛ̀ wo jɔùŋjɔaà wa fà. 25Kɛɛ nààŋ wò naŋ wa nyɛ̀nɛ̀ŋ àŋ naŋ fòlò ko jɔɔlèi, wo Jisɛ̀ naŋ jɔ̀ ko saaìŋ wo jɔùŋjɔaà hawa lɛ̀, yèè wò nauŋ kùwò kùàŋ wouŋ kpuumàŋ wo yèwà dìì. 26Ebò keì lɛɛ̀ naŋ wa ɓààyè maŋ kpàlàùŋ kpàlàùŋ màŋ gbiŋ sùà wɔŋ fuɔŋ wiiŋ.

Wo Jisɛ̀ naŋ sùngò aŋ felaa zììlè fɛ̀ɛ̀ tìyèe

27Yèè nààŋ wo Jisɛ̀ naŋ wa yèwè koɓɛ̀ wii, aŋ fèlàà tìyèe kùwìè le fɛɛ̀ zììle naŋ wa dè wo Jisɛ̀ maŋjɛ̀wɛ nààŋ wò yaà wa kɔɔyɛ. Aŋ fèlàà tìyèe nyàŋ yaà wa kpàaŋ sùà àŋ yaà woo nyààŋ, “Tɔ̀ɔ̀ wi ke nyowo, Jɔ̀àfèlàà Dèèweɔ̀!”

28Yèè nààŋ wo Jisɛ̀ naŋ wa jɔ̀ ko saaŋ bà, aŋ fèlàà tìyèe zììlè le fɛ̀ɛ̀ nyaŋ naŋ hnè ko nɛ̀ɛ̀uŋ niìŋ. Kpeiŋ wò naŋ nyiŋ dawè wààŋ, “Nìŋ naŋ haawè kɛ̀ kàiŋ ɓɛ̀nɛ̀ŋ sùnga?”

Aŋ fèlàà tìyèe nyàŋ naŋ fasàì nyààŋ, “Hɛ̀ɛɛ̀ŋ, Kanaà.”

29Kpeiŋ wo Jisɛ̀ naŋ nyiŋ mɛ̀nlɛ̀ɛ̀ŋ le fɛ̀ɛ̀ yèè wò naŋ woò wààŋ, “Kɛ̀ tɔ̀ e hɛɛnɛ̀ŋ màànààŋ nɔŋ nìŋ naŋ haawè lɛ!” 30Yèè e fɛɛ̀ nyiŋ nɛ naŋ gbaì àŋ naŋ yɛ̀mɛ̀ dìì. Kɛɛ wo Jisɛ̀ naŋ nyiŋ kìɛ̀ŋ e go wààŋ, “Ɓɔ̀ nìŋ woò è keì lɛɛ̀ wò nyùùŋ gbiŋ.”

31Kɛɛ aŋ felaa nyàŋ naŋ kɔ̀ yèè àŋ naŋ ɓààyè ebò keì lɛɛ̀ maŋ kpàlàùŋ kpàlàùŋ màŋ gbiŋ sùà wɔŋ fuɔɔ̀ŋ fàà wiiŋ, e nyaàiŋ dè e yèɛ wo Jisɛ̀ naŋ nyɛ̀nɛ̀ŋ lɛ.

Wo Jisɛ̀ naŋ sùngò wo felaa gò ɓɛ̀nɛ̀ŋ gbòa bà

32Nààŋ wo Jisɛ̀ yaà anyùùŋ màŋjɛ̀wɛ̀uŋ nyàŋ naŋ ɓèmè ke dòmaŋ nyiŋ nɛɛ̀ŋ wèè aŋ ka, anyùùŋ bà naŋ hìɛ̀ŋ wò felaa bà koɓɛ̀ Jisɛ̀i esaɓù kɛ̀ wo fè wà ɓɛ̀nɛ̀ŋ gbòa, e kìlà wo jinàŋ naanààŋ yàaùŋ wa maŋjɛ̀wɛ̀. 33Kɛɛ nààŋ wo Jisɛ̀ naŋ wa gè wo jinàŋ naanààaŋ wo felaaà maŋjɛ̀wɛ, wo felaaà naŋ tɔ̀ɔ̀tù gbòa ko fɛɛ̀feìŋ. E keì lɛɛ̀ naŋ wa fòònò anyùùŋ zimgbe yèè àŋ naŋ tɔ̀ɔ̀tù wòo nyààŋ, “Kòò è yɛ̀mɛ̀ìŋ wa è keì mààŋ tɛɛ̀ bà gbiŋ wèè e kààìŋ wɔ̀ŋ fùɔ̀ŋ Ezɔ̀ɛ̀ɔ sùà!”

34Kɛɛ aŋ Fɛlosiì nyaŋ naŋ woò nyààŋ, “Wo kànà aŋ jinàŋ naanààŋ nyaŋ naŋ kìɛ̀ŋ wo Jisɛ̀ e gààaŋ wèè wo gè aŋ jinàŋ naanààŋ anyùùŋ maŋjɛ̀wɛ.”

Wo Jisɛ̀ kuwa ke nyowo wèè anyùùŋ nyaŋ

35Wo Jisɛ̀ naŋ kìlìè maŋ jawa yèè maŋ vàa màŋ gbiŋ wɔŋ fùɔ̀ŋ Galaliìɔ sùà. Wò yàa wa kàà sùà anyùùŋ nyaŋ maŋ sààŋ zòòlò aŋ Juùù nyaŋ dìì, yèè wò yaà wòò ke mìè gbìàŋ Ebò Siaàŋ e nyaàiŋ dè e Kànà Dayàa. Wò naŋ wa ɓɛìŋ sùngò anyùùŋ Galaliì nyaŋ kuwa maŋ sàaŋ gɛ̀wɛɛ̀ zimgbe nyàŋ. 36Nààŋ wo Jisɛ̀ naŋ wa yɛ̀mɛ̀ e faaàŋ, ke nyowo naŋ sɛ̀ɛ̀ ke jiiuŋ nɛɛ̀ŋ sùà weè nyiŋ, esaɓù kɛ̀ e jiikɛ̀ɛ nyiŋ nɛ̀ naŋ wa gɔ̀àgɔ̀à sùà, yèè e zɔ̀kpɔ̀ naŋ sɛ̀ɛ̀ e kɔɔ nyiŋ nɛ̀ sùa, mààŋ aŋ ɓaawaa gò kùwìè wò nyuùŋ yɛ̀mɛ̀ diɛŋ nyiŋ. 37Kpeiŋ wo Jisɛ̀ naŋ wòò anyùùŋ màŋjɛ̀wɛ̀uŋ nyàŋ wààŋ, “Maŋ nɛ̀ŋjè ɓù maŋ ko ɓùi naŋ gàŋ, kɛɛ anyuùŋ tòmo nyàŋ gò gàŋ wèè aŋ miŋ gbònògbònò koɓɛ̀ guùŋ. 38Dàweìŋ wo kɛ̀ɛ̀nɛ̀ŋ ɓùɔ wèè wo tùàŋ anyuùŋ tòmo wèè aŋ kpàà maŋ nɛ̀ŋjè ɓùuŋ màŋ aŋ hiàŋ miŋ.”

Currently Selected:

Maafiù 9: WFESD

Highlight

Copy