Jowãw 7

Pê Jeju kjêjê intuwre atajê ame cumã xwỳ

1Ita jirô pê mã ri ma Jeju ame ito mõ, Hĩpôjajo jõ pjê kam, ne pê nee Juta jõ pjê kam ajco apu ipa nare. Ampo na? Pê curi me hõ pahhi catêjê apu mehcuran prãm na pê. 2Mã ramã caxuaw Juta catêjê jõ amji kĩn nõ japrỳ te Ikrere jõ amji kĩn ata to me cator xàa kam. Pê ajco me hõ amji kĩn ton xàa na, ihtỳj ikrere atajê kam amehkrĩ, ne nee me hũrkwa pej kam amehkrĩ nare. 3-5Mã cormã hapu na Jeju kôt mehkjêjê atajê te ihtõ kà pê Pahpãm kra na amji mã me to hajỹr nare, na ri cute me hapactua kam cumã harkwa to:

— Juta jõ pjê wỳr atẽm pyrentu, ne curi acato, ne acarôat to me cumã ampo pihho catihti itajê cunea to, quê me hàhtôti atajê me hõmpu! Quê ha jũm mã amji to cati prãm na, quê ha nee apu ipimxur to ihcuhkwỳr nare. Ne mẽr ampo na quê ate ampo jahkre pej xà itajê na me apupun nare? Me cumã to, quê ahna mehcunea me apupu! — hajỹr.

6Mã Jeju me cumã:

— He cormã nee ite mehcunea mã amji to ipipẽ xà jõ amcro kam hàhhuc nare! Ne me amã amji kĩn wỳr me aprar xà caxuw amcro cunea impej. 7Mã pjê kam catêjê itajê nee quêt ame acurê nare. Ne pa nare, me ikam incryc kam ame ipa. Cwỳrjapê ri ma ame icurê, ne ma ame icaca! Ampo na? Wa itỳj me cumã, cute me ampo to kên atajê jarẽn to ipa na ri, ma ame icurê. 8Ne me ca nare, gapacta ne amji kĩn ita wỳr me mõ. Waha ita ri apu mõ. Ampo na? He cormã amji kĩn wỳr imõr xà caxuw nee ijõ amcro kam hàhhuc nare — hane. 9Hõ, Jeju te me cumã amji jarẽn to hajỹr, ne curia Hĩpôjajo jõ pjê kam hàhhuc, ne apu mõ, me hakàn pê. 10Wa me hakàn pê ame ipa, mã me ina jũ mã amcro te, wa ma me ipimxuar pê Jeju me, me mõ. Mã nee jũm te me imõr xà na me ipupun, ne me ijahkre pej nare.

Me hàhtôti atajê mã Jeju to cute amji kam me hapac xà pijakrut

11Mã tee Juta catêjê jõ pahhi kwỳ amji kĩn ata na, me hàhtôti atajê catàtkre na ame Jeju japê. Ne ame hapên to me ahna hàhcukjêr to hajỹr to me ipa he:

— Jõ ri mõrmõ Jeju apu mõ? — hajỹr.

12Mã me hàhtôti atajê kwỳ kàjpej pê, ajpẽn mã me Jeju jarẽn to:

— Ampeaj kam jũm ita pej — hane. Ne mehkwỳ ajpẽn mã me harẽn to:

— Quê, he jũm ita ihtỳj mehkwỳ mã ihhêj xi to ipa — hane.

13Mã Juta catêjê jõ pahhi kwỳ mã Jeju kĩn nare na, cute me hahkre peaj xà na, nee jũm me kam mare mã ajpẽn mã Jeju kôt harẽn nare, me hõ pahhi kwỳ te ame kam incryc, ne ame to kên cupate.

Pê Jeju me cuprõn xà kam me cumã ampo to hahkre

14Ne ramã cute me to amji kĩn ata krã curan xà wỳr, ihcahti na cute me to hajỹr. Mã ma Jeju Pahpãm to me amji kam hapac xà jũrkwa wỳr mõ ne hàr, ne curia hỹr ne ame cumã ampo to hahkre. 15Mã Juta catêjê kwỳ te mehcakôc xà atajê na mempar, ne me amji mã harẽn to:

— Pỳhàpà! Pê nee ihkàhhôc to hahkre cati nare cakrô, ampeaj kam cute amji jahkre pej — hajỹr.

16Mã Jeju me cumã amji jarẽn to:

— Pom wa me amã ampo to hahkre itajê, wa nee amjia kôt hahkre pej, ne me amã to hahkre nare, ne nee cupê itekjê nare. Ne cupê Pahpãm te ikujahêc ata tekjê. Ne curũam ri ajpên ampo itajê pra, wa cama me amã to hahkre. 17Ne quê ha jũm mã Pahpãm te amji kam hapac xà jahkre pej, ne ihkôt amji ton to prãm na, quê ha ite ampo to hahkre xà itajê na ikampa, ne hahkre pej pyrentu, Pahpãm pĩn hapôj na, ne nee ikrã pĩn hapôj nare.

18— Ne quê ha mehcunea te amji mã me jũm cupa to prãm to, quê ha ihtỳj amjia kôt, ihkrãa kam me cumã ampo jarẽn to ipa. Ne pa nare, wa nee ite hajỹr nare. Ampo na? Imã ate amji mã me icupa ita na me ato prãm nare, quêt ate me amji mã me Pahpãm te ikujahêc ata cupahti na ri, imã me ato prãm. Na wa itỳj catyt kam me amã ijũjarẽn xà, hêj xi nare ita to ijũjarẽn to ipa, ne nee wa ame amã ihêj xi jarẽn to ipa nare. 19Ne pê ramã Mojxe xwỳ me panquêtjê mã Pahpãm jarkwa gõ cakrô, ca ajte nee amji mã me kam gapac nare, ne mẽr ampo cwỳrjapê mã ca tee ame icuran to hahkre? — hane.

20Mã mehcunea te Jeju mã me harkwa to:

— Mõrmõ ca apu akrã kam waj, na mã ca apu amji na me ikraj! Jõ ri mã jũm apu acuran prãm ita? — hajỹr.

21Mã Jeju me cumã:

— Por wa ite me pahkôt xà jõ amcro na icarôat to ampo pihho pyxit peaj ton, ne ite jũm xà ata caprãr, ne to me amã ipikrar ata to, wa ite amji na me amẽn, ca ajte ame ikam acryc. 22Ne ca hanea ne atỳj me pahkôt xà jõ amcro na me apê. Ampo na? Quê ha me pahkôt xà jõ amcro na jũm cahãj mã ihkrare ihpỳm, ca ha atỳj ajte me pahkôt xà jõ amcro itajê nõ na me cumã impy kà kwỳ jakep, pê Mojxe xwỳ me amã to hahkre xàa na. Ne nee mã pê Mojxea ita to ipipẽ nare, ne mam Mojxe quêtti pê Aprãw xwỳ ata mã pê ita to me amã ajpẽ. 23Ne Mojxe xwỳ te me hapackre xà ita kôt, mã ca atỳj me pahkôt xà ita na me ahkrare mã mempy kà jakep. Ne nee ipê me apyràc, wa ite jũm ita pê ihkà kwỳ jakep nare, ne quêt cumã ihkà cunea na to impejti, ca ajte ita na ame ikam acryc? 24Ne ca hãn ne ajte ampo na me hõmpun pyxit peaj kam, ramã ihkêanre na me harẽ. Ahna cute hajỹr nare, ca ha xa ate hõmpun xà ata kôt to amji kampa, ne ihkôt hakop, ne impejti na hahkre pej, nare, ihkêanre na hahkre pej jirô pê, ca ha cormã atỳj harẽ — hane.

Jeju pê ri Mexij pê me to awjahkre ata

25Mã Krĩpinkrên catêjê kwỳ Jeju na me ajpẽn cukij to:

— Xà Jeju ita mã me pajõ pahhi catêjê amehcuran prãm? Ne mẽr ampo na mã cute mehpro nare? 26Pom me pahcunea jipôc ri xa ne ame pamã ihcakôc ita? Mã nee ajte jũm te cumã ampo jarẽn nare? Nare, mõrmõ me pajõ pahhi catêjê, por pê Crixtô toPahpãm me pamã awjahkre ata na, mõrmõ amji mã me to hane? 27He me imãa, nee cupê Crixtô nare! Quê ha jũ caxuw me pahwỳr Crixtô ata cato, cu ha nee jũ rũm cator xà na me hahkre pej nare. Ne pom jũm xũmre ita ri ihtỳj jũ rũm cator xà ata na me pamã hahkre pej, he cupê Naxare jõ krĩ catêjê nõ — hane.

28Mã cormã Jeju Pahpãm to me amji kam hapac xà jũrkwa kam xa, ne cute me cumã ampo to hahkre xà ata kam, ihkrãhhia kam me cumã:

— Xà ajkĩ ampeaj kam me amã jũ rũm icator xà ita na ijahkre pej? Hãpà! Wa nee amjia kôt icator nare, ne me apê, por ajpên cute ikujahêc ata jahkre kêatre. Ne por jũm te ikujahêc catê ata pê ri amji jarkwa par catê, ne catyt kam ipa! 29Ne imãa ri quêt hahkre pej. Ampo na? He ihpĩan wa icator, ne cutea ri ajpên ikujahêc — hane.

30Mã cute mempar, ne tee amehpro to hahkre, ne nee jũm te ihcupên nare. Ampo na? He nee cormã cute mehpro, ne ihkên mã me mẽn xà kam hàhhuc nare na ri. 31Mã me hàhtôti atajê jipôc ri me hàhtôa te ihtỳj Pahpãm te Jeju to me cumã hũjahkre na amji mã meto ihhimpej. Na ri me ajpẽn mã harẽn to:

— He ihhêj ne me imãa, cupê, por pê Crixtô to Pahpãm me pamã awjahkre ata! Ne quê ha jũ caxuw ajkĩ Crixtô cato, ne ajkĩ, pom Jeju te ampo ton xà itajê jirôa pê ajkĩ to? Hãpà. Taa mã ri ramã cator — hane.

Pê krãhtare amji caprỳ to Jeju pro to, hỹrmã pra

32Mã Parixêw catêjê kwỳ te kàjpej pê cute amji mã me harẽn to hajỹr na mempar, cwỳrjapê ri cute Pahpãm mã mehcajrẽn catêjê jõ pahhi kwỳ me, cute Jeju pro na me ajpẽn par. Ne cute hỹrmã me hõ krãhtare kwỳ kujahêc, cute mehpro ne me haxàr prãmte. Mã hỹrmã me cator ne cama mehcuhhê ne me kampa.

33Mã cormã Jeju me hàhtôti atajê jipôc ri xa ne me cumã:

— Wa ha itỳj cormã ijõtpê ame acahê na imõr crire ne, ne quê ha ina ahtũm nare, wa ha ma hacpỹ mã cute ajpên ikujahêc ata wỳr amji jaxà ne tẽ. 34Ca ha me ipupun prãmte, tee ame ijapê ne nee me ipupun nare. Ampo na? Jũ wỳr ca me anõ, por wa curi apu mõ ata ri ikôt acato! Na ca ha nee me imã acator nare! — hane.

35Mã Juta catêjê te ajpẽn mã me harẽn kam mehtẽm, ne me ajpẽn mã harẽn to:

— Jũ kam mã quê ha ajte tẽ, cu ha ajte nee cumã me pahcator nare? Xà quê ha ajkĩ ma me cupê Crec catêjê jõ pjê wỳr tẽ, ne curia me cupê Juta catêjê kwỳ mã apu ampo to hahkre to ipa? 36Ne mẽr ampo mã hãn ne harẽn kam pra ne harẽn to: “Wa ha ma tẽ, ca ha tee ame ijapê, ne nee hipêr me imã acator nare”, ne “Jũ wỳr ca me anõ curi itẽm xà ata wỳr ikôt tẽ” hane? — hajỹr. Hõhõ, pahhi catêjê te ajpẽn mã harẽn to hajỹr.

Pahpãm Carõ Pejti ata pê cô te me pahto ihtĩr xà rohnỳtti mã ata pyràac

37Ne pê me hõ amji kĩn cahhur ata, cute kam me to ihtẽm xà jirôa pê impej, na pê Jeju me hipôc ri xa, ne ihkrãhhia kam me cumã hũjarẽn to:

— Quê ha me anõ mã, Pahpãm jahkre pej xà pê amã kôr pyràcti ata na prãm na, ca ha iwỳr tẽ, wa ha amã Pahpãm to ajpẽ, ca ha hahkre pej pyrên gakry. 38He pê ramã Pahpãm jarkwa ita jarẽn to hane he:

“Quê ha jũm te amji mã ito ihhimpej na, quê ha cute amji kam hapac xà tuw pejti atakôt me hàhtôa ne Pahpãm wỳr me apkjê,

quê ha taa mehtĩr rohnỳtti mã na me to.

Quê ha cute amji kam hapac xà tuw pejti ata pê cô catia pijapjêr ata pyràac, ne ipijapjêr ita na” — hane.

39Ne por cô to mehkõm xà to Jeju te me cumã ihcakôc ata pê Pahpãm Carõ Pejti incwỳr xà. Ampo na? Por quê ha jũmjê amji mã me Jeju to mehhimpej atajê, quê ha ihtỳj me Pahpãm Carõ Pejti ata cwa. Ne ampo na pê cormã ne nee ame Pahpãm Carõ Pejti ita cwỳr nare? Pê cormã Jeju nee hacpỹ mã ihtĩr ne Hũm wỳr amji jaxàr, ne hacpỹa mã amji to cati nare na pê.

Pê me hàhtôti atajê ahpỹanre na Jeju na cute me amji to hajỹr xà

40Ne pê me hàhtôa ne cute cô to mehkõm to me cumã ihcakôc na me kampa, atajê ajco ajpẽn mã me harẽn to:

— Ampeaj kam ri hũmre ita pê me pamã Pahpãm jarkwa to ihcakôc catê catia, cu me hikaj ata, ne taa mã ri cator — hane.

41Ne pê mehkwỳ ajpẽn mã me harẽn to:

— Me imã cupê Crixtô to Crixtô, ne toa pê Pahpãm me pamã awjahkre — hane. Ne mehkwỳ ajco ajpẽn mã me harẽn to:

— Pom Jeju pê Hĩpôjajo catêjê nõ ita? Xà quê ha ajkĩ ihtỳj Crixtô jũ caxuw Hĩpôjajo jõ pjê pĩn cato? Jũ wỳr quê ha curũm cato! 42Ampo na? Pê ramã Pahpãm jõ kàhhôc kam to hũjarẽn to hane he:

“Quê ha ihtỳj jũ caxuw pahhi pê Tawi xwỳ tàmxwỳ nõ kam Crixtô cato,

ne por pê curi Juta jõ pjê kam, Pãw jõ krĩ kam Tawi xwỳ ihkrĩ ata kam, quê ha ihpỳm” — hane.

43Mã pea me hàhtôti atajê te Jeju to me amji kam hapac xà to me ipicapôn. 44Ne pê mehkwỳ ihtỳj me pro ne ihkên mã me mẽn prãm, ne me hacjên xà mã me haxàr prãm. Ne pê nee jũm ajte ihcupên nare.

Pê krãhtare nee me Jeju pro nare

45Na ri ma hacpỹ mã krãhtare atajê te me amji jaxàr, ne me hũ kam me pra, Pahpãm mã cute mehcajrẽn catêjê jõ pahhi kwỳ me, Parixêw catêjê atajê wỳr. Mã cute me Jeju japên ne ahna mehcukij to:

— Ampo na mã ca nee ate mehpro ne ajpên iwỳr me to amõr nare, ne ajpên gũ kam me pra? — hajỹr.

46Mã krãhtare atajê me cumã harẽn to:

— Wa rỳ jũ caxuw ite me jũm te ihcakôc xà nõ to ihcakôc to hajỹr na mempar nare, ne ihcakôc xà itajê ajteare mã — hane.

47Mã Parixêw catêjê atajê krãhtare atajê mã:

— Pỳhàpà? Xà hanea ne ajte cute me amã ihhêj? 48Xà ajkĩ me ipê pahhi catêjê kwỳ me Parixêw catêjê kwỳ nõ te mã amji mã Jeju to ihimpej? Hãpà! 49He por Jeju to amji mã mehhimpej to me ipa atajê pê me pahte amji kam me pajapac xà jõ kàhhôc jahkre kêatre! Cwỳrjapê quê ha Pahpãm ame to kêanre ne, ne mehkên mã me cumẽ — hane.

Pê Nicotem Jeju tehcajpar prãm to prohti kam ihcakôc

50Pê Nicotem ramã jũ caxuw caxwa ri Jeju mã ihcakôc ata pê mehkwỳa nõ, ne cute mehkwỳ mã harkwa to:

51— He cu nee me pajõ kàhhôc kam pahte amji kam me pajapac xà ata rer, ne me jũm ata cukij ne mempar nare kam ihkên mã me mẽn nare. Cu ha xa mehcukij, ne me kampa, ne ihkên na me hahkre pej, ne cormã ihkên mã me cumẽ — hajỹr.

52Mã mehkwỳ me cumã harkwa to:

— Pỳhàpà, xà ajkĩ apê Hĩpôjajo jõ pjê catêjê nõa, mã ca atỳj apu Hĩpôjajo jõ pjê pĩn Crixtô ata cator na amji mã to hane? Apu hajỹr nare, ne cama Pahpãm jõ kàhhôc to ca hahkre ne hahkre pej, he nee rỳ jũ caxuw Pahpãm jarkwa to mehcakôc catêjê nõ te Hĩpôjajo jõ pjê pĩn cator nare — hane.

Currently Selected:

Jowãw 7: ram

Highlight

Copy