Lukas 1

1Foi moi, Teofilus. Ro miyae helen mae nda rambun aei nolone bewatere homone uwa nihaeinyehike hauwate. 2Huba ijokore eraiboke yo yae huwaime wanen, naei wanen mbai na homone hauwate. Nebei yo yae nda a heraeyaiboke. 3Nemene, reyae na hubara meungehaleukokale, ra ura hubawanale naei foi sele benen ware homone na foi moi yae na hubara hufeumendere. 4Na bena ware kelewayete naeinya hele niyae.

Yohanes Bure Koumile Kiyae Hononatere A Yobowounge

5Ro mbai na ro Zakharia. Neyae imam Abiale riyana. Nda Zakharia imamde hebewole hee yae Herodes Yudea kanire Ondofolore hebewole. Nda Zakharia na miyae na ro Elisabet, Harunbe orona mena. 6Hokolo bee ro bele miyae bele Allahle ro be ro yoinye wali himaleinyeboke yo. Allah yae Musare ukeunge wali heere foloukoke are hubara haeisa yaneinyeke. 7Elisabet kihone, hokolo bee na fa ban mo nekeimeke, rorele miyaenale meijeukoke.

8-9Ya mbai mo, Abiale homona yaunga orowate yo naei mon kayee ruke hee mo, Zakharia yae imam kaliare mokowole. Allahre ei mom-mom imae na kaban sele kiyae einye o ha ongkou fololo bele ongkou felembonde naeise oye yae nihaeiboke, Zakharialena ruke. 10O ha ongkou fololo bele ongkou felewole hee, ro miyae moinye woke yo naeise naeise Allahre ebeli bowainye. 11Zakharia hili era akau era ongkounge felewole hee, euweke ongkou felei-felei itukai meube reufira Allahle malaikat uwa yakaungeboke. 12Nebei malaikat erekeungene, kulu-kulu yeuboke, fe yae waku yae roukeunge. 13Nebeibe malaikat yae weunge, “Fe efaeijae, Zakharia, webeli kali boyanae Allah be hineubokete. Wa miyae Elisabet kelu mbai hononetere, Yohanes yae hele ro roubonde. 14Nda fa honondene, weyae rei mai aneibote kole, ro miyae woke yo nebei sului mbai konate hukelenate. 15Allahle ro be ro yoinye Nare ro bele enneronde. Bu elae aneyei sele nekenende. Nenakele kou ei yahi eisa menduwende heera, Allahle Roh yae ei annebonde. 16Nda fa hononde Israel yoni-yoni helen sele mokommile bukenate naei Tuhan Allah a wemmile hului nekenate. 17Allahle burelen boi-boi rore yembonde. Allahle yendo kayaalo Elia Allahle Roh bele elae wake bele Allahle kaliare mokowole wanen Yohanes mokonde. Ako naei mokommile bukenaibonde na kelu omi bele rei mai yae nekenate nane merau be elae u elae ro miyaere mokommile wali himalainyeboke yo isaei hebaen bele huwate are boronate. Tuhan huwemmile a hului nekenate ro miyae holo mbai neyae mokommihande.”

18Zakharia yae weunge, “Reyae rorelebe yeubokale. Ra miyae nebei sului mbai miyaenalebe yeuboke. Naendae mekai yae nda a waraere reyae a hele yae elerekonde?”

19Nebei malaikat yae weunge, “Reyae malaikat Gabriel yae ware wawale. Reyae Allahle bene hebeyale. Neyae ukeufe nda rei mai bele a ware mekawawale. 20Nda wawale a mbai sambai weyae na helere eleikoinye, mana yara weyae a mun faeu mun yeubonde nekeumende, nda a wawale na hului menaibende erele.”

21Ro miyae moinye woke yo nare ereiko rakeiko yae kainye, a hin-sin mae hinate: “Rahene Zakharia nda heki nen eke wabeyole.” 22Rakainye mo, Zakharia meukuke, a mun yeuboke. Ro miyae erainyere Zakharia me weije-weije yae koumi, a eleikoi sului. Nebeinye ro miyae isaeyaeiboke Zakharia era buhibe kaneungeboke.

23Nebeisa imam kalia mokowole hee baeufoke mo, Zakharia kulun uke imaere ewole. 24Nekaikoke na heki ban mo Elisabet emale yeuboke. Oko maehae mbai na imae einye mo meungekeukoke. 25Nda a bae elewole, “Ro yae miyae yae kiho nekewekalene a wewe kaisekere Allah nou heufekoke. Mana yara onomi foka Allah meufeyeke.”

Yesus Hononate A Yobowounge

26Elisabet emale oko mehine mbai nendo yeuboke mo, Allah Na malaikat Gabrielre ukeunge Galilea kanina Nasaret yore eke. 27Gabriel ukeunge eke miyae yele maengke yele mbai na ro Mariale bokore eke. Nda maengke Yusuf rowendere a hokaikoke. Nda Yusuf Ondofolo Kaban Daudle orona mena. 28Nebei malaikat Mariale bokore eke mo weunge, “Allah ware onomi foka yae ei hawenewende, wangkele mbainye nekefobe.”

29Malaikat nda a mekai ukeungene Maria kulu-kulu hele yeuboke. Na kena eisa elele, “Rahe a mabe nda malaikat meke haraungeboke eleukoke.”

30Nebeibe malaikat benende weunge, “Fe efaeijae, Maria. Allah ware onomi foka yae ei hawete. 31Weyae emale yeubondera, kelu mbai honole, Yesus yae hele ro roubonde. 32Neyae kaban yembonde, Allah Hubalo Mando Na Kelu yae kaenenainyele. Na yobe Ondofolo Kaban Daudle yo waku Allah Nare kinyennele. 33Mende Yakuble orona mena yo naei Ondofolore yembonde, nekenende huba ban haei ban.”

34Nebeibe Maria yae weunge, “Reyae miyae yele maengke yele ya. Naendae wanen mae nda a rare warae benate?”

35Nebeibe malaikat yae weunge, “Allahlena Roh waei rande onde, Allahle elae wake mende ei aneubondene, Allah yae nda nene waewae Fare Naei Fa yae elende. 36Boroibo, waka baeke Elisabet, kiho kaeneimeyainye miyaebe, emale oko mehine mbaibe yeuboke. 37Rabuhine ban Allahlena rambun nemene na hului yembonde.”

38Nebeibe Maria yae weunge, “Reyae Allah Naei yebaei bubaei ya. Ninae lonbe nemene waei are eleyae huluinye raei u ranne yembonde.”

Maria Elisabetle Ereiboise Eke

39Na heki ban mo, Maria erambun mokoungehake kulun uke, yo mbai Yudea kanina moko nolone honolere eke. 40Nebei ijenne Zakhariale imae hebelene. Maria eweufike Elisabetre ro bere melaeyeungeboke. 41Mariale are mo Elisabet boroke bae, na kou yahi einya fa nenaeijae eiso meiso howole nane merau Allahle Roh Elisabetre ei aungeboke. 42Nebeisa kaenele, “Ewole mewole miyae maengke nolora wembai onomi foka yae ei aubokete. Foi sele moi sele waei koufa yahira honole fa. 43Raei Tuhan nenake weyae mekaene raei kena roweufehike. 44Rone mo melaeyaerae bae, kou yahi na fa reinye oro kena me kena rorole. 45Reyae Allahre ebeli banale weyae onomi foka hubaungele, rabuhine ban Allah ware uwote a nemene benate naeise hila rabo haleyaene.”

Maria Na Helen Foi Allahre Uwounge

46Maria yae weunge,

“Ra kena u eisa Tuhande buma kaenale.

47Reyae roweisi-roweisi kale,

Allah wali holere moloufeboke Kiyaele eisa.

48-49Me baei ban nekewekalera,

Allah me baeufeboke.

Raei eisa Allah Elaelo Wakelo rambun mbai kaban sele mokoubokene,

mana yara huba raweuboke,

ro miyae yae rare onomi foka yae ei aungeboke kiyae yae ungaisendere.

Na Ro Niyae yolo-yolo hele.

50Ro miyae Nare hubara haeisa yanainyeke yo norona mena bele

yanekoi yase yae ei haweumiyeke.

51Allah Hubalo Mando rambun emere-emere mokowole,

embei aiko bele yore na mehininde kolowainye bele heraeiwoumi.

52Ondofolo-ondofolo hiwa Na yo malo bele yae herewoumi,

me baei ban yore yarowole anuwau foinye hawoumi,

53Monine kowate yo raman foise narewoumi wande bewate,

nda kanina kelana keren nalene arilayeke yo uwoumi na me bangka u bangka yae ewate.

54Allah Naei are raufike huluinye,

eyae Israel Naei yebaei bubaei nekande yore yanekoi yase yae ei haweyeume.

55Maebu naei maeko natere ukeumi hului

Allah Abrahamde buhae hewounge mahi eyeiboi,

nebeibe huba ban haei ban ma mbai

maere na orona mena bele yae hemmeyende.”

56Maria oko name hului Elisabetle bokone nekeukoke mo, nebeisa kulun uke naei imaere ewole.

Yohanes Bure Konemile Kiyae Hongkate

57Meke ya na hului yeuboke mo, Elisabet kelu fabe hongke. 58Elisabetre yaneikoi yase yae Tuhan ei hawewoungere imae ribo mbainye yo nane merau naei aka baeke borowatene, nangkele rei mai kowate.

59Nebei kelu fa hongkate ya mehine name mo, na ro uwa elan nenaisande naeise Allahre ei mom-mom imaere mekate. Naei yohona ro miyae naeko Zakhariale ro bu yae ronaibondere kena kowate. 60Nebeibe nda fa nenake yae weumi, “Nebei ro kena ban, Yohanes yae ro romabonde.”

61Nebei ro miyae yae wainye, “Waei akana baekena nda ro wanen ewei mo.”

62Nebeinye Zakhariare a hinenainyehindere me yae mo kowainye, “Nde yae nda fa ro romambondere?”

63Zakharia homore molongkondere homofae riyeumihike, ikainyele, nebeinye moloukoke, “Na ro Yohanes.” Ro miyae na fangkengke bele bowate. 64Nebei heera Zakharia na he mabon raweuboke na a bele Allahre benen buma kolowounge. 65Naei imae ribona nekewate yo euwa kaeu-kaeu mo kaeuwate. Nebeisa nda a Yudea kani mokona ro miyae bele eufureukoke borowate. 66Allah nare na hele ei aungebokene, ro miyae helen nda are borowate yo a hin-sin mae hinewate, nenaeijae na kenara mo elewate, “Kabanne nda fa rahere enjembonde?”

Zakharia Allahlena A Heraeiwole

67Nebei fa Yohanes naeko Zakharia, Allahle Roh yae maemae koungekoke mo Allahlena a elewole,

68“Men, Allahre buma koloman

aei yo Israel naei Allah,

rabuhine ban Neyae meke

Naei holona ro miyae na beko bakore aheukoke baeufoke.

69Allah Walilo mbai raneujeke,

Naei yebaei bubaei Ondofolo Kaban Daudle orona menabe.

70Nendahina Allah Naei yenjo kayaayo walora eleukoke hului mokoukoke.

71-72Aei yobe naei kamahe naeise yanekoi yase yae ei emmihawende naeise

nane merau Naei a heteungekoke a hului mokonde naeise,

yokeijo aere ikele u han u hebate yo nolora

Allah aere hole molommebonde.

73-75Nebei are heteungekoke mbai

nendahina Allah aei yobe Abrahamde a holo koukoke

aere yokeijo nolora hole emmemolonde.

Nebei nibi yae eyae na hului fe efaei yae,

u mekai yolo-yolo bele

wali himalanneboke bele

Naei kaliare mokomayende nda no hayaende emmebaensonde.”

76Zakharia yae benende elele,

“Kelu, ware Allah Hubalo Mando Naei yendo kayaalo yae enaikaenete,

Tuhan Naei nibi hiyei raneubonde naeise

weyae bere holo ele.

77Weyae Allahle holona ro miyaere weumile

naei beko bako faeinyemmibonde walora wali hena bona enaiyaronde.

78Nda nemene Allah yanekoi yase bele Kiyae randa mo.

Wali Ondofolo Allah ungende mende

surgara onde hehe wanen mennaengkonde.

79Onde ro miyae ouben nolone nekate yo

herere buhae hokoyeumi yore

hehe naemmikonde.

Neyae aere rei mai yeume

wali nibine oromale naeise kelemmele.”

80Nebei Zakharia na fa kaban bewole, na u bene wa bene maemae kowounge. Neyae a kala-kala anuwaunge ennekengkondera Israel ro miyaere uwa memmikelembonde hee.

Currently Selected:

Lukas 1: setDBL

Highlight

Copy