TIRHKOHTE 15
15
Jerusalem inkhâwmpui
1Tin, mi tute emaw Judai ram ata an lo chhuk a, “Mosia dân anga serh in tantîr loh chuan chhandam in ni thei lo vang,” tiin unaute chu an zirtîr a. #Lev 12.3 2Chutichuan, Paula leh Barnaba chu anmahni nên inhnial namêna an inhnial lohva, an inkhin tlat avângin, Paula leh Barnaba chu an zînga tute emaw nên, chu thubuai chungah chuan, Jerusalem khuaa tirhkohte leh upate hnênah chho tûrin an ruat a. 3Chutichuan, kohhrante chuan an han thlah a, anni chuan Jentail-te hawi kîr lehzia thu chu hril zêlin, Phoiniki ram leh Samari ram an fang chhuak ta a; tichuan, unaute zawng zawng an tilâwm êm êm a.
4Tin, Jerusalem khua an han thlen chuan kohhranhote, tirhkohte, upate chuan an lo lâwm a; tin, Pathianin anmahni hmanga thil a tih zawng zawngte chu an hrilh a.
5Nimahsela, Pharisai pâwla mi, ring ve tute emaw an tho va, “Jentail-te chu an serhtan tûr a ni, Mosia dân âwih pawh an hnênah tiam kher tûr a ni,” an ti a.
6Tin, tirhkohte leh upate chu, chumi thu chu ngaihtuah tûrin an inkhâwm a. 7Tin, an inhnial chiam hnuin Petera a tho va, an hnênah, “Unaute u, Jentail-ten keima kâa Chanchin Ṭha thu hriaa âwih tûra, Pathianin hmâna in zîng ata mi ruatzia kha in hria e. #Tirh 10.1-43 8Tin, rilru hretu Pathianin keini min pêk ang bawk khân Thlarau Thianghlim an hnênah pe vein, an chungah a lâwm tih a hriattîr a; #Tirh 2.4; 10.44 9tin, keini leh anni thlei bîk lovin rinin an rilru a tithianghlim a. 10Chutichuan, min thlahtu leh keini zawh tawh loh nghâwngkawl kha, tûnah zirtîrhote chunga nghah tumin engati nge Pathian fin in hnial kalh le? 11Anmahni rin ang bawk hian keini pawhin Lalpa Isua khawngaihna avânga chhandam tûr niin kan inring si a,” a ti a.
12Tichuan, mipui zawng zawng chu an ngawi reng a, Barnaba leh Paulan Pathianin anmahni hmanga Jentail-te zînga chhinchhiahna leh thilmak a tih thu kha an hrilh chhûng zawng an ngaithla a.
13Tin, an sawi zawhin Jakoban a sawi ve thung a: “Unaute u, ka thu ngaithla rawh u, 14Pathianin ama hming pu atân an zîng ata mite la chhuak tûrin, Jentail-te a kan ṭan tirh dân chu Sumeona hian a sawi ta a. 15Tin, chûng thu leh zâwlneite thu hi a inhmeh a ni:
16‘Chûng zawhah chuan
ka kîr leh ang a,
Davida bâwkte chim
kha ka siam leh ang a,
A chhe lai apiang pawh
ka rem chho leh ang; #Amos 9.11-12
17Mi dang, Jentail zawng zawng
ka hming mi ṭâwmhote chuan,
Lalpa an zawn nân.
Chu bâwktê chu ka tungding
ang,’ tiin.
18Khawvêl siam tirh ata hêng thu
hriattîr ṭhîntu Lalpa chuan a ti e,
tih ziak hi.
19Chuvângin, heti hian ka ruat a ni, Jentail-te zînga Pathian lam hawite chu tihrehawm lo ila, 20milem biakna thil bawlhhlawh ei te, inngaih te, sa reh hlum leh thisen eite bânna tûrin an hnênah lehkha thawn zâwk ila ka ti ber a ni. #Ex 34.15-17; Lev 17.10-16; 18.6-23 21Mosian hmânlai ata tawh khaw tinah a thu tlângaupuitu a nei ṭhîn si a, inkhâwmna inahte Chawlhni apiangin a thu chu chhiar a nih ṭhin kha,” a ti a.
Jentail ringtute tâna lehkhathawn
22Tin, tirhkohte, upate, kohhran zawng zawngte nên chuan, an pâwla mi thlana, Paula leh Barnaba hnênah Antiokei khuaa kaltîr ṭha an ti a; an thlante hming chu Juda (Barsabba an tih) leh Sila an ni, chu mite chu unaute zînga hotu deuh an ni a. 23Tin, hetiang hian an ziak a, an kutah an thawn a:
“Tirhkohte leh unaute zînga upaten Antiokei khua te, Suria ram te leh Kilikia rama Jentail unau awmte chibai an bûk e.
24“Kan pâwl zînga mi tuten emaw thu sawiin an tibuai che u a, in rilru an timangang tih kan hria e, an hnênah thu eng mah kan pe si lo va. 25,26Chuvângin, thu khat vuaa kan inkhâwmin, kan duh tak Barnaba leh Paula, Lalpa Isua Krista hming avânga thih dâwn lote kal rual hian, mi thlante in hnêna rawn kaltîr ve ṭha kan ti a. 27Chutichuan, Juda leh Sila kan rawn tîr a nih hi, anni pawhin hêng thu bawk hi ṭawngkain an hrilh ang che u. 28Thlarau Thianghlim leh keinin, hêng thu pawimawh lo hi chu, phurrit zual in chungah nghat lo ila a ṭha kan ti; 29milem biakna sa ei te, sa thisen ei te, sa reh hlum ei te, inngaih te bâng ula kan ti; hêng hi in bân chuan in tân a ṭha ang. Dam takin awm rawh u,” tiin.
30Chutichuan, an tirhin an kal a, Antiokei khua chu an zuk thleng a; tin, mipui an ko khâwm a, lehkha chu an pe a. 31Tin, an chhiar zawhin thlamuanna thu avâng chuan an lo lâwm ta hle a. 32Tin, Juda leh Sila chu zâwlnei an ni bawk a, thu tam takin unaute chu an thlamuan a, an tinghet a. 33Tin, chutah chuan rei deuh an awm hnuin, anmahni tîrtute hnêna hâwng leh tûrin, unaute chuan thlamuang takin an chhuahtîr leh ta a. #15.33: Kutziak bu ṭhenkhatah chuan châng 34 thu, “Nimahsela, Sila chuan chuta la awm rih chu ṭhain a hria a,” hi a chuang. 35Paula leh Barnaba erawh chu Antiokei khuaah chuan Lalpa thu zirtîr leh hrilin an awm reng a, mi dang tam tak nên.
Paula leh Barnaba an inṭhen
36Tin, ni eng emaw zât hnuah chuan Paulan Barnaba hnênah, “Tûnah kal leh ila, khaw tina Lalpa thu kan hrilhna apianga unau awmte kha kan zêl ila, an awm dân i en ang,” a ti a.
37Tin, Barnaban Johana (Marka an tih chu) an hnênah hruai a tum a. 38Paula erawh chuan ani chu an hnêna hruai ṭha a ti lo, Pamphulia ramah anmahni a kîrsana, hnathawhnaa an hnêna a kal ve tâk loh avâng khân. #Tirh 13.13 39Tichuan, nasa takin an inhnial ta a; chutichuan, an inṭhen a, Barnaban Marka chu a hnênah a hruai a, Kupra thliarkâr lamah lawngin a kal ta a. 40Paula erawh chuan Sila a thlang a, unauten Lalpa khawngaihnaa an kawltîr hnuin a kal chhuak ta a. 41Tin, kohhrante chu tinghet zêlin Suria leh Kilikia ram a fang chhuak ta a.
Currently Selected:
TIRHKOHTE 15: MIZOVBSI
Highlight
Share
Copy
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.
