TIRHKOHTE 7
7
Stephana thusawi
1Tin, puithiam lalber chuan, “Hêng thu hi a dik em?” a ti a. 2Tin, Stephana chuan, “Unaute u, pate u, ngai teh u, min thlahtu Abrahama, Haran khuaa a awm hmaa Mesopotamia rama a awm lai khân, Ropuina Pathian chu a hnênah a rawn inlâr a, #Gen 12.1 3a hnênah, ‘I khaw lam leh i chiteho zîng ata chhuak la, ram ka la entîr tûr che lamah kal rawh,’ a ti a. 4Tin, ani chu Kaldai-ho ram ata a kal chhuak a, Haran khuaah a va awm ta a; tin, a pa a thih hnuin, chuta ṭangin hei, tûna in awmna khaw lamah hian Pathianin a pêm luhtîr a. #Gen 11.31; 12.4 5Tin, hetah hi chuan eng mah hmun luah tûr, a ke nghahna tham pawh a pe lo va; nimahsela, amah leh a hnua a thlahte thlenga ro tûrin pêk a tiam a, fa a la neih hma pawhin. #Gen 12.7; 13.15; 15.8; 17.8
6Tin, Pathianin hetiang hian a sawi: ‘A thlahte mi ram lamah kum zali an thang ang a, miin bâwihah an siam ang a, an tiduhdah bawk ang,’ tiin. #Gen 15.13-14 7Tin, Pathianin, ‘A bâwihtu tûrte hnam chu keimahin ka la ngaihtuah ang a; tin, chumi zawhah chuan an lo chhuak ang a, hemi hmunah hian ka rawng an la bâwl ang,’ a ti bawk a. #Ex 3.12 8Tin, Pathianin a hnênah serhtan thu kha a thlung a; chutichuan, Abrahama chuan Isaaka a hring a, a ni riat nîah a serh a tan a; tin, Isaaka chuan Jakoba a hring a; tin, Jakoba chuan chi thlahtu sâwm leh pahnihte kha a hring a. #Gen 17.10-14; 21.2-4; 25.26; 29.31—35.18
9Tin, chi thlahtute khân Josefa an îtsîk a, Aigupta ram lamah an hralh a; nimahsela, Pathian a hnênah a awm a, #Gen 37.11,28; 39.2,21 10a hrehawm tuar zawng zawngah a chhan chhuak zêl a, Aigupta ram lal Pharaoa pawh a khawngaihtîr a, mi fing tak a ni tih a hriattîr bawk a; tichuan, ani chuan Aigupta ram leh a ina mi zawng zawng chungah hotuah a siam ta a. #Gen 41.39-41
11Tin, Aigupta leh Kanaan ram zawng zawngah chuan ṭâm a lo tla a, hrehawm nasa tak a lo thleng ta a; min thlahtute chuan ei tûr rêng rêng an hmu ta lo va. #Gen 42.1-2 12Nimahsela, Jakoba chuan Aigupta ramah buh a awm tih a hriat veleh, min thlahtute chu a tîr chhuak a; chu chu an kal ṭan tirhna ber a ni. 13Tin, an kal vawi hnihnaah chuan Josefa chu a unaute hnênah chuan a inhriattîr a; tin, Josefa unaute chu Pharaoa an hriattîr ta a. #Gen 45.1,16 14Tin, Josefa chuan a pa Jakoba leh a unau zawng zawng a kohtîr a; anmahni chu sawmsarih leh panga an ni a. #Gen 45.9-10,17-18; 46.27 15Tichuan, Jakoba chu Aigupta ramah a zuk kal a; tin, ani leh min thlahtute chu an thi ta a, #Gen 46.1-7; 49.33 16Sekem khua an zâwn thleng a, Abrahaman Sekem khuaa Hamora fapate laka thlân, tangkaruaa a leiah khân an zalh ta a.#Gen 23.3-16; 33.19; 50.7-13; Jos 24.32
17Tin, Pathianin Abrahama hnêna thu a tiam kha a hun chu a lo thlen dâwnin, mite chu Aigupta ramah chuan an lo pung a, an lo tam ta deuh deuh va, #Ex 1.7-8 18Josefa hre lo lal dang a lo awm thleng khân. 19Chu mi chuan kan chite a ngamthlêm a, min thlahtute chu a tiduhdah a, an nausênte nung lo tûrin a paih chhuahtîr ṭhîn a. #Ex 1.10-11,22 20Chumi lai chuan Mosia a lo piang a, a hmêl a ṭha êm êm mai a; a pa inah thla thum an châwm a; #Ex 2.2 21tin, an paih chhuahin Pharaoa fanuin a la a, ama fa atân a châwm ta a. #Ex 2.3-10
22Tin, Mosia chu Aigupta rama mite finna zawng zawng an zirtîr a, a thûah leh a thiltihah a ropui êm êm a. 23Tin, ani chuan kum sawmli a lo tlin chuan a unau, Israela thlahte chu kan a tum a. #Ex 21.11-15 24Tin, an zînga mi pakhat tihretheih tuar lai a hmu a, a chhan a, tihduhdah tuartu phuba chu a la a, Aigupta mi chu a tihlum ta a. 25Mosia chuan ama kutin Pathianin anmahni a chhanhim tih a unauten an hria emaw a ti a; nimahsela, an hre si lo. 26Tin, a tûkah an zînga mi pahnih an insual laiin an hnênah a lo thleng a, ‘Pute u, unau in ni alâwm; engati nge dik lo taka in intih?’ tiin rem a tum a. 27Nimahsela, a ṭhenawm chunga kawhmawh bâwltu zâwk chuan Mosia chu a nam kiang a, ‘Kan chungah hotuah leh rorêltuah tuin nge siam che? 28Nimina Aigupta mi i tihhlum ang khân mi tihhlum i tum a ni maw?’ a ti a. 29Tin, chumi thu avâng chuan Mosia chu a tlân bo va. Midian ramah a thang reng a, chutah chuan fapa pahnih a nei a. #Ex 18.3-4
30Tin, kum sawmli a vei hnuin Sinai tlâng thlalêrah, hnim bukah, mei alh zîngah vântirhkoh pakhat a hnênah a lo inlâr a. #Ex 3.1-10 31Tin, Mosian a hmuh chuan a thil hmuh chu mak a ti êm a; tin, en tûra a va hnaih laiin Lalpa awin, 32‘Kei, i thlahtute Pathian ka nih hi, Abrahama Pathian, Isaaka Pathian, Jakoba Pathian chu,’ a lo ti a. Tichuan, Mosia chu a khûr a, a en ngam ta lo va. 33Tin, Lalpa chuan a hnênah, ‘I kephah ata i pheikhawk kha phelh rawh; i dinna hmun kha lei thianghlim a ni e. 34Aigupta rama ka mi awmte chu an hrehawmzia ka hmu reng asin, an rûm pawh ka hre reng a, anmahni chhanhim tûrin ka lo chhuk ta a ni. Hawh teh, Aigupta ramah ka tîr ang che,’ a ti a.
35Chu Mosia, ‘Hotu leh rorêltuah tuin nge siam che?’ tia an hnar chu, hnim buka vântirhkoh a hnêna inlâr khân a pui a, Pathianin amah ngei chu hotu leh chhanhimtu ni fâwm tûrin a tîr a ni. #Ex 2.14 36Ani chuan Aigupta ramah te, Tuifinriat Senah te, thlalêrah te chuan kum sawmli chhûngin thilmak leh chhinchhiahnate a hmuhtîr zêl a, anmahni a hruai chhuak ta a. #Ex 7.3; 14.21; Num 14.33
37Israela thlahte hnêna, ‘Pathianin keimah mi siam ang hian, in unaute zînga mi zâwlnei pakhat a siamsak ang che u,’ titu kha a ni, chu Mosia chu. #Deut 18.15,18 38Chu mi chu thlalêra mipui pung khâwm zînga Sinai tlânga a betu vântirhkoh hnênah leh min thlahtute hnêna awm kha a ni; chu mi chu min pêk chhâwn tûra thu nungte latu kha a ni; #Ex 19.1—20.17; Deut 5.1-33 39,40min thlahtute chuan a thu an zâwm duh lo va, an hnar a, Arona hnênah, ‘Kan hma hruai tûrin pathiante min siamsak rawh; he Mosia, Aigupta ram ata min hruai chhuaktu lah hi a chanchin kan hre ta si lo va,’ tiin an rilrute chu Aigupta ram lamah a lêt leh ta a. #Ex 32.1 41Tin, chûng lai chuan sebâwngno lem an siam a, a lem chu ran talhin an bia a, anmahni kutchhuak chungah chuan an hlim ta a. #Ex 32.2-6 42Chutichuan, Pathianin a hawisan a, vâna arsiho chibai an bûk theihna tûrin anmahni a ensan ta a; zâwlnei lehkhabua,
‘Israel chite u, thlalêrah khân
kum sawmli chhûngin,
Sa talh leh ran talhin
kei mi bia em ni? #Amos 5.25-27
43Moloka puan in leh pathian
Rephana arsi pawh chu,
Chibai bûk tûrin a lem
in siamte kha,
In zâwn zâwk ṭhîn a;
Chuvângin,
Babulon khaw piah lamah
Ka hruai bo vang che u,’
tih ziak ang khân.
44A lem a hmuh anga siam tûra Mosia hrilhtuin a ruat ang khân, min thlahtuten thlalêrah khân hriattîrna puan in chu an nei a. #Ex 25.9,40 45Chu bawk chu min thlahtute thlah leh pawhin an nei chhâwng zêl a, Pathianin min thlahtute hmaa Jentail a hnawh chhuahteho ram an luah lai khân, Josua luh rualin an luhpui a; Davida lo awm thleng khân chutah chuan a awm ta reng a. #Jos 3.14-17 46Chu Davida chu Pathian mit hmuhin duhsak tlâkin a awm a, Jakoba Pathian tân awmna siamsak a dîl a. #2 Sam 7.1-16; 1 Chr 17.1-14 47Nimahsela, Solomonan in chu a saksak ta zâwk a ni. #1 Lal 6.1-38; 2 Chr 3.1-17 48Nimahsela, Chungnungbera chu kuta sak inahte a awm ngai lo; zâwlnei chuan:
49‘Lalpan,
Vân ka ṭhutphah a ni a,
Lei ka kephah nghahchhan a ni:
In eng angin nge mi saksak ang?
Ka chawlhna hmun pawh
eng nge ni? #Is 66.1-2
50Keima kutin hêng thil engkim hi
ka siam lo vem ni? a ti e,’
tia a sawi ang khân.
51Mi tihmawh, thinlung leh beng tan lohte u, kumkhuain Thlarau Thianghlim in dodâl fo ve; in thlahtute tih ang zêl khân in ti ṭhîn. #Is 63.10 52In thlahtuten zâwlneite zîngah tu nge an tihduhdah loh ni? Mi Fel tak lo kal tûr thu hril lâwktute kha an tihlum a; chu Mi Takzet chu mantîrtu leh thattute nangmahni hi tûnah in ni asin. 53Dân, vântirhkohte pêk chhâwn kha, hmu zeta zâwm si lote u!” a ti a.
Stephana lungin an dêng hlum
54Tin, chûng thu chu an hriatin an thin a khei ta a, Stephana chungah chuan an ha an ṭhial a. 55Nimahsela, ani chu Thlarau Thianghlima khat a ni a, vân lam a en tlat a, Pathian ropuizia leh Pathian ding lama Isua ding a hmu a; 56“Ngai teh u, vân inhawng ka hmu a, Pathian ding lama Mihring Fapa ding pawh ka hmu,” a ti a.
57Chutichuan, anni chu aw ring takin an au va, an beng an hup a, rual takin an bei chiam a, 58khua ata chu an hnawt chhuak a, lungin an dêng a, a hretute chuan tlangvâl pakhat, a hming Saula ke bulah chuan an puante an dah hlawm a. 59Chutichuan, Stephanan, “Lal Isu, ka thlarau la ang che,” tia Lalpa a koh laiin lungin an dêng ruih ruih a.
60Tin, a ṭhingṭhi a, aw ring takin a au va, “Lalpa, hei an thil tihsual hi an chungah mawh phurhtîr suh ang che,” a ti a. Tin, chu thu chu a sawi zawh veleh a muhîl ta a. Saula pawh chuan a thih chu a remti a.
Currently Selected:
TIRHKOHTE 7: MIZOVBSI
Highlight
Share
Copy
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.
