GENESIS 33

Jakoban Esauva a tâwk ta

1Tin, Jakoba chu a han dâk a; tin, ngai teh, Esauva chu a hnêna mi zalite nên an lo kal a. Tichuan, a fate chu Leaii hnênah te, Rakili hnênah te, bâwihnu pahnih hnênah te a sem thliah a. 2Tin, bâwihnute leh an fate chu a hmatâwng berah a dah a, Leaii leh a fate chu a dawtah a dah a, Rakili leh Josefa chu a hnung berah a dah a. 3Tin, amah chu an hmaah chuan a kal a, a u bul a thlen hma chuan vawi sarih lei siin chibai a bûk a. 4Tin, Esauva chu amah lâwm tûrin a tlân a, a pawm a, a ir a chuktuah a, a fâwp a; tin, an ṭap dûn ta a. 5Tin, Esauva chu a han dâk a, hmeichhiate leh naupangte chu a hmu a; tichuan, “I rawn hruaite saw tute nge ni?” a ti a. Tin, ani chuan, “Pathianin khawngaih taka i chhiahhlawh a pêk naupangte an nih saw,” a ti a. 6Chutichuan, bâwihnute chu anmahni leh an fate nên chuan an lo kal hnai a, an kûn a, chibai an bûk a. 7Tin, Leaii pawh a fate nên chuan an lo kal hnai a, an kûn a, chibai an bûk ve a; tin, chumi hnuah chuan Josefa leh Rakili chu an lo kal hnai a, an kûn a, chibai an rawn bûk bawk a.

8Tin, Esauva chuan, “Ran rual ka tawh zozaite kha eng tizia nge ni?” a ti a. Tin, ani chuan, “Ka lalpa, i mit ka tlun theih nân ka ti a ni,” a ti a. 9Tin, Esauva chuan, “Kei pawhin ka ngah e, ka nau; i neih zawng zawng chu i ta ni rawh se,” a ti a. 10Tin, Jakoba chuan, “Ni lo ve, i mit ka tlun chuan, khawngaih takin ka lâwmman pêk che kha mi pawmsak rawh; Pathian hmêl hmu angin i hmêl ka hmu a, ka chungah i lâwm si a. 11Pathianin mi khawngaih avâng leh, ka ngah avâng hian khawngaih takin ka thil rawn pêk che kha pawm rawh,” a ti a. Tichuan, a thlêm a thlêm a, a pawm ta a.

12Tin, Esauva chuan, “Hawh, i kal ang, hma ka hruaisak ang che,” a ti a. 13Tin, ani chuan a hnênah, “Naupangte hi an la têt leh, berâm rual leh bâwng rual ka hnêna awmte hi no hruai an nih, ka lalpa, i hria e; ni khat chauh pawh an khalh chak lutuk chuan ran rual zawng zawng hi an thi mai ang. 14Ka lalpa, khawngaih takin i chhiahhlawh hmaah hian kal la; kei chuan Seir tlângah, ka lalpa, i hnên ka thlen hma loh chuan, ka hmaa ran kal hi an kal theih tâwk ang zêl leh, naupangte kal theih tâwk ang zêlin, zawimuangin ka rawn chhawm zêl ang e,” a ti a. 15Tin, Esauva chuan, “Ka hnêna awm mi ṭhenkhatte hi ka hnutchhiah tal ang che chu,” a ti a. Tin, ani chuan, “Engah kher maw? Ka lalpa mit mi tluntîr mai rawh,” a ti a. 16Chutichuan, Esauva chu chumi ni vêk chuan Seir tlâng lam panin a kîr leh ta a. 17Tin, Jakoba chu Sukkoth hmunah chuan a kal a, ama tân in a sa a, a rante tân bûkte a sa bawk a; chuvângin, chumi hmun hming chu Sukkoth an ti ta a.

18Tin, Jakoba chu Paddan-aram ram ata a lo kal chu thlamuang takin Sekem khua, Kanaan rama awm chu a thleng a, dai kiangah chuan a puan in chu a zâr ta a. 19Tin, a puan in zârna hmun chu, Sekema pa Hamora fate hnên aṭangin tangka zain a lei a.#Jos 24.32; Joh 4.5 20Chutah chuan maichâm a siam a, a hmingah chuan El-Elohe-Israel a vuah a.

Currently Selected:

GENESIS 33: MIZOVBSI

Highlight

Copy