LUKA 12

Vervêkte laka fîmkhur tûr

(Mt 16.6; Mk 12.38)

1Chutih chhûnga mipui sâng tam tak, inrap nûlh nûlh khawp hial an rawn inkhâwm chuan, Isuan a hmasa berin a zirtîrte hnênah, “Pharisaite dawidim, vervêkna lakah chuan fîmkhur rawh u. #Mt 16.6; Mk 8.15

Tu nge ṭih tûr

(Mt 10.28-31)

2Lang lo tûra thuhrûk eng mah a awm lo va, hriat loh tûra zêp rûk eng mah a awm hek lo. #Mk 4.22; Lk 8.17 3Chuvângin, thima in sawi apiang kha êngah an la hria ang a; pindan chhûngrila beng bula in thusawi kha, in chunga chuangin an la tlângaupui ang. 4Tin, ka ṭhiante u, ka hrilh a che u, taksa tihluma, chumi hnua eng mah dang ti leh thei tawh lote chu hlau suh ang che u. 5Amaherawhchu, tu nge in hlauh tûr ka hrilh lâwk ang che u: a tihhlum hnu pawha Gehenna-a paih theihna thu neia chu hlau rawh u; a ni, ka hrilh a che u, amah mawlh chu hlau rawh u. 6Chawngzawng panga dâr tangka pahnihin an hralh ṭhîn lo vem ni? Nimahsela, an zînga pakhat mah Pathianin a hmaih ngai si lo. 7In samzaite lam pawh hi chhiar vek a ni asin. Hlau suh u; chawngzawng tam tak aiin in hlu zâwk a ni.

Isua pawm leh hnâwl

(Mt 10.32-33; 12.32; 10.19-20)

8Tin, ka hrilh a che u, mite hmaa mi ṭan apiang, Pathian vântirhkohte hmaah Mihring Fapain a ṭan ve ang. 9Nimahsela, mite hmaa mi phat chu, Pathian vântirhkohte hmaah phat a ni ve ang. 10Tin, Mihring Fapa sawisêl apiang chu, an sawisêlna chu ngaihdamsak a ni ang; Thlarau Thianghlim meuh sawi chhia erawh chu, a sawichhiatna chu ngaihdamsak a ni lo vang. #Mt 12.32; Mk 3.29

11Tin, inkhâwmna ina mite, lalte, hotute hmaa an hruai hunah che u chuan, ‘Engtin nge, eng thuin nge ka chhân ang, eng thu nge ka sawi ang?’ tiin lungkham suh ang che u; #Mt 10.19-20; Mk 13.11; Lk 21.14-15 12chutih hun takah chuan eng nge in sawi tûr rem, Thlarau Thianghlimin a hrilh ang che u,” a ti a.

Mi hausa â tehkhin thu

13Mipui zînga tu emawin Isua hnênah, “Zirtîrtu, ka u hnênah ro mi sem ve tûrin hrilh rawh,” a ti a. 14Nimahsela, ani chuan a hnênah, “Mihring, nangni chungah tuin nge rorêltuah leh sum semtuah mi siam?” a ti a. 15Tin, an hnênah, “Fîmkhur ula, awhna rêng rêng lakah chuan invêng rawh u; sum ngah hi mihring dam chhan a ni lo ve,” a ti a.

16Tin, an hnênah tehkhin thu a sawi a: “Mi hausa tu emaw a lo a hlâwk êm êm a; 17tichuan, a inngaihtuah a, ‘Engtin nge ka tih ang aw? Ka buh leh bâl dah khâwmna ka nei si lo va,’ a ti a. 18Tin, ‘Heti hian ka ti teh ang: ka buh inte ka ṭhiat ang a, a aia lianin ka sa ang a; chutah chuan ka buh leh ka sum zawng zawng ka dah khâwm ang. 19Tin, ka thlarau hnênah, “Thlarau, kum tam tak chhûng atân sum tam tak i khâwl hi; châwl la, eiin bâr la, hlim takin awm rawh,” ka ti ang,’ a ti a. 20Nimahsela, Pathianin a hnênah, ‘Mi â, zâninah hian i thlarau an lâksak dâwn che a ni; i thil deh chhuahte kha tu ta nge ni ta ang le?’ a ti a. 21Mahni tâna sum khâwla, Pathian lama ngah si lo chu, chuti chu a ni ṭhîn,” a ti a.

Pathian ring rawh u

(Mt 6.25-34)

22Tin, a zirtîrte hnênah, “Chuvângin, ka hrilh a che u, ‘Eng nge ka ei ang aw?’ tiin in nunna thu leh, ‘Eng nge ka silhin ka fên ang aw?’ tiin in taksa thu lungkham suh u. 23Ei tûr aiin nunna a thupui zâwk a ni, silhfên ai pawhin taksa a thupui zâwk a ni. 24Choâkte hi ngaihtuah rawh u, buh an tuh lo va, an ât hek lo; zêm te, buh in te pawh an nei lo; nimahsela, Pathianin a châwm si a; nangni chu savate ai chuan in hlut zâwkzia mai chu! 25Tin, nangni zîngah lungkham avângin tuin nge mahni dung lam tawng khata tisâng chuang thei? 26Hemi tê mah ti thei lo che ua, engati nge thil dang in lungkham ṭhin?

27Tûktinpâr ṭhan zia hi ngaihtuah rawh u; hna an thawk lo, la pawh an kai hek lo; nimahsela, ka hrilh a che u, Solomona meuh pawh a ropuina zawng zawnga a inthuam khân, hêng tûktinpâr pakhat tluk pawh hian cheiin a awm lo. #1 Lal 10.4-7; 2 Chr 9.3-6 28Chutichuan, ram hnim, vawiin anga nung, a tûka thuka tuah leh mai tûr mah Pathianin chuti kauva a chei chuan, aw, nangni rin tlêmte u, chumi ai chuan silhfên a va pe dâwn che u êm!

29Tin, in ei tûr te, in in tûr te zawng suh u; tuilairap angin awm pawh awm suh u. 30Khawvêla hnam tinin chûng thil zawng zawng chu an zawng ṭhîn a ni; chûng chu in mamawh tih in Pain a hre reng si a. 31Ama ram zawng zâwk rawh u; tichuan, chûng thil pawh chu a pêk belhchhah dâwn che u nia. 32Pâwl tlêmte u, hlau suh u; ram pêk che u hi in Pa lâwm zâwng tak a ni.

Vâna ro khâwl khâwm

(Mt 6.19-21)

33In neih apiang hralh ula, mi retheite hnênah pe rawh u; vânah rûkru kal lohnaah, sûlrûl ei chhiat lohnaah chuan tangka ip hlui thei lo te, sum ral thei lo te insiam rawh u. 34In ro awmna apiangah in rilru pawh a awm dâwn si a.

Chhiahhlawh inring reng

35Puan veng rengin, in khâwnvâr pawh alh rengin awm ula; #Mt 25.1-13 36miin an pu lawi chaw ei, a lo haw huna kawngkhâr a rawn kik veleha lo hawn thei nghâl tûra an lo nghâk reng ang hian awm rawh u. #Mk 13.34-36 37An pu a lo kal hunah bâwih lo nghâk reng a hmuhate chu an eng a thâwl ang; tihtak meuhvin ka hrilh a che u, ani chuan a puan a rawn veng ang a, anmahni chu chaw kîlin a ṭhuttîr ang a, an rawng a rawn bâwl ang. 38Zanlaiah emaw, thawh hunah emaw a lo kala, chutianga a rawn hmuh chuan chûng bâwihte chu an eng a thâwl ang. 39Amaherawhchu, hei hi hre rawh u, rûkru a lo kal hun tûr in neituin hria sela, a vêng ang a, a in a reh pawhtîr lo vang. #Mt 24.43-44 40Nangni pawh inring rengin awm rawh u, in rin loh hunah Mihring Fapa a lo kal dâwn si a,” a ti a.

Chhiahhlawh rinawm leh rinawm lo

(Mt 24.45-51)

41Tin, Peteran, “Lalpa, he tehkhin thu hi keimahni chauh nge min hrilh, mi zawng zawng?” a ti a.

42Tin, Lalpan, “Sum enkawltu rinawm, fing tak, a puin a hun apianga an chaw chan tûr semsak tûrin, a chhûngte chunga hotua a siam tûr chu tu ber nge ni ang le? 43A pu a lo kal hunah bâwih chutiang tia a rawn hmuha chu a eng a thâwl ang. 44Dik takin ka hrilh a che u, a neih zawng zawng chunga hotuah a siam ang. 45Amaherawhchu, chu bâwih chuan a rilruin, ‘Ka pu a lo kal lawk dâwn lo ve,’ tiin bâwihnute, bâwihpate lo vêl sela, eiin bârin lo rui ta sela; 46chu bâwiha pu chu a rin loh nîah, a hriat loh laiin a lo kal ang a, bung hnihah a rawn chhuah ang a, mi rinawm lote chan ang a chantîr ang. 47Bâwih, a pu duh zâwng hre reng chunga lo inring si lova, a pu duh zâwng ang pawha ti lo chu vawi tam tak an vua ang. 48Amaherawhchu, hre lo chunga vuakna khawp thil ti chu vawi tlêm tê an vua ang. Tu pawh tam tak an pêka hnênah chuan tam tak an phût ang, tu pawh tam tak an kawltîra hnênah chuan tam deuh an phût ang.

Isua vânga inṭhenna

(Mt 10.34-36)

49Khawvêlah mei thlâk thla tûra lo kal ka ni; tûnah pawh kâng tawh pang sela ka va ti êm! 50Nimahsela, baptisma chan tûr ka nei, chumi tleitlâk hma loh chu ka thaw a va ipik êm! #Mk 10.38 51Khawvêla rem lêntîra lo kal emaw mi ti elo? Hnai lo ve, ka hrilh a che u, do lentîr tûra lo kal zâwk ka ni; 52tûn hnuah chuan chhûng khatah mi panga an indo vang, pathumin pahnih, pahnihin pathum. 53An indo vang a, pain a fapa, fapain a pa; nuin a fanu, fanuin a nu; piin a mo, movin a pi,” a ti a. #Mik 7.6

Hun awmzia hriat tûr

(Mt 16.2-3)

54Tin, mipui hnênah pawh chuan, “Thlang lama chhûm chhuak in hmuh chuan, ‘Ruah a sûr dâwn,’ in ti nghâl ṭhîn a; tin, a lo ni ngei ṭhîn. 55Tin, chhim thli tleh in hriat chuan, ‘Thaw a sa dâwn e,’ in ti ṭhîn a; tin, a lo ni ngei ṭhîn. 56Nangni vervêkte u, khawvêl leh vân awmzia pawh in hre fiah thiam si a, engati nge tûnlai thil hi in hriat fiah thiam loh hi? 57Engati nge nangmahnin a fel chu in ngaihtuah loh?

I khingpui nên inrem rawh

(Mt 5.25-26)

58Tin, rorêltu hmaa i khingpui nên in kal hunin, kal pahin a lakah fihlîmna mawlh zawng hrâm rawh; chuti lo chuan, rorêltu chuan mi man hotu a mantîr ang chia, mi man hotu chuan tân inah a khung hlauh dah ang che. 59Ka hrilh a che, dâr tangka derê tê pawh i tlâk kim hma loh chuan chuta ta chu i chhuak lo hul hual ang,” a ti a.

Currently Selected:

LUKA 12: MIZOVBSI

Highlight

Copy