Kəth Apos 5

Hananiya Ka Safiratu

1Amma mdə laga aɗi ka thləmari Hananiya, ka mwalankiɗa Safiratu, na ɗələmta kariyir ɗa laga. 2Antə tsa ku ɗuwar bwadukwa kwabari ka səndər mwalankiɗa, ka kətə bwadukwa kwaba ni ka mwanta akəma aposəlayeri ni. 3Amma Bitrəs pəla alari abbər, “Hananiya, kamnyar mi tə gə zhar ka Shatan ləkwa ɗəffa ga, har tə gə thlandər aka Mambəl na Ɓɗakkarkara, ka ɗuwamta bwadukwa kwabar fakər ngə nə ri? 4Akəmata ga aɗələmta fakə ni aɗi ar ngə wa ya? Tsuwa aghəla tə ga ku ɗələmta, aɗi sai su tə gə hir ka hara kəgari wa ya? Ka, apa madi tə gə hara dzam ngəni ɗimi ni akwa ɗəffa gə tsu ri? Ai ga aɗi thlandər aka mji wa, amma aka Hyel!”

5Sakatə Hananiya nggatə ndər ngəni, antə tsa ndla ka mta. Antə shanga mji na nggatə su ngəni ku thlivər ka duna. 6Antə mji na kusta səmbwa ka bartə mshiyirni akwa zhaɓi, ka ləɓəla ka tsa, ka ra harəmta ni.

7Aghəla awur makər, antə mwalankiɗa səmbwa tsuwa kula səndər su na hara wa. 8Antə Bitrəs pəla alari, “Pəla ali, ngəni an hangkur kwaba tə giri ɗələmta fakər giri ni kəgari ni ya?”

Antə mwala ni pəla, “I, apani.”

9Antə Bitrəs pəla alari abbər, “Kamnyar mi tə giri ka salngkiri paktə kər abbər ka giri ngkərtə Mambələr Mthlaku ri? Ngga kuraka səla mji na thlata akwa vəi har salngkiri akwa nyarmbwa, da ata kəɓəla ngə tsuwa!” 10Təkəma antə tsa ndla adzə səlari ka mta. Antə mji na kusta ni səmbwa ka wutə ni mtəmtari, antə da kəɓəla ni ka ra harəmta ni adzə salngkiɗa. 11Antə shanga mjir ikələziya ka mji damwa na nggatə su ngəni ku thlivər ka duna.

Aposəlayeri Ku hara Surndatayeri Kəga Seɗayeri Hang

12Antə apani aposəlayeri ni ku hara surndatayeri kəga seɗayeri hang akwa nca mji. Tsuwa shanga mji na hamta jiri ni tsu ata vəi duku akwa Vərandar Solaman. 13Amma mda aɗi akwa nca mambila mji ni na nggitə ləkwa nca ɗa wa, wala tə mji ni ana na ala ɗa olkur. 14Amma aghəla nda mji hang ku sə hamta jiri aka Mthlaku, ka jakəngkərdzi ala ɗa, shili kəga mwanki. 15Apani antə har mji ləkwa mwantə mjir ɗa na nggawa nggawa akwa lakwayeri ar kuta di, da akwa pwi ɗa ata katsarayeri kəga sərpiyayeri, natə ma sakatə Bitrəs ata təramta, to wala ka shanggurari təra ata kəra ɗa. 16Antə mji hang ku thlata akwa diyayeri na kalaktə Urushalima ka si ka tsaptədzi. Da akwa səntə mji na nggawa nggawa, kəga mji tə mambəl na ɗimi akwa ɗar bwani ala ɗa, antə shanga ɗa ku wutə mbantədzi.

Bwani Natə Aposəlayeri Ku Ɗari

17Antə prist na ol ni ka shanga mji na adzə ni, na mjir Saddukiya ni, ku səlkər aposəlayeri ni ka duna. 18Antə da thlata ka ngkəi aposəlayeri ni, ka ra pu ɗa akwa pərsənar mji na ndzang. 19Amma mdərthlentər Mthlaku ku si aviri, ka kəlar nyarmbwayeri ar pərsəna ni, ka səɓəla ka da, ka pəla, 20“Mwar giri, ka giri ra thləthlata akwa mbwar vəngkər səli, ka pəla aka mji shanga ndərayeri na ar mpika bilən ngəni.” 21Sakatə aposəlayeri ni ku nggatə ndər ni, antə da ləkwa mbwar vəngkər səli ni ɗəɗəpə mbing ka ləkwa thlipa.

Sakatə prist na ol ni ku si ka mji na adzə ni, ka kəga mjir majalisa ka shanga mji na ol'olər Israila akwa tsaptədzi, ka thlentə kuraku akwa pərsəna ni abbər ka mdə sənta ala ɗa aposəlayeri ni akəma ɗa. 22Amma sakatə mjir gadi ni si, da aɗi wutə aposəlayeri ni akwa pərsəna wa, antə da ngka ka ra pəla aka mjir majalisa abbər, 23“Yeru wutə nyarmbwar pərsəna ni harharari ɓəɓal, ka shanga mjir gadi ni athləthlata akwa nyarmbwayeri ni, amma sakatə yeru kəlar nyarmbwa ni, yeru aɗi wutə mda ambwa wa!” 24Sakatə olər mjir gadi mbwar vəngkər səli ni ka pristayeri na ol'ola ni nggatə ndər ni, da ku ndəndatədzi ka duna, ka ləkwa damitədzi ata kəra laku tə su ni ata sə kura akwa.

25Antə mdə laga si ka pəla ala ɗa abbər, “Mji tə giri pu akwa pərsəna ni, da athləthlata akwa mbwar vəngkər səli akwa thlipa aka mji.” 26Antə olər mji gadi mbwar vəngkər səli ni mwari kəga mjirni na ol'ola ka səntə aposəlayeri ni, amma aɗi ka dunar ɗəvə wa, kamnyar da akwa thlivər mji asi ndzəndzəhtə ɗa ka pela.

27Sakatə da ku səntə aposəlayeri ni, ka mwantə ɗa akəma mjir majalisa ni, antə prist na ol ni yu ɗa abbər, 28“Yeru ku ndəkərtə thləma giri abbər giri aɗiya jaktə thlipa akwa thləma mdə ngəni kəra wa, amma nggədza giri akwa ndlətə shanga Urushalima ka surthlipər giri ni, har giri akwa bara vəngkər watsəɓər bikər mtərni ni ata kəra yeru.” #Mat 27:25

29Amma Bitrəs ka mambila aposəlayeri shinau ka pəla, “Ku ndzi dwali ka yeru kələngkər aka Hyel, ta aka mji! 30Hyelər kəkayeri ar mburu ku thlentə Yesu natə giri tsi ni atar kukwamta ni ata udzəm ni. 31Antə Hyel haptə səliyirni ka vəi ni abwa mazəmari, ka tsa ndzi Mdə na ola ata kəra shanga mji ka Mdər mbanta, kamnyar ka mjir Israila wutə lakur tubi ata kəra bikayeri arɗa, ka mdə yafitə ɗa. 32Antə yeru an seɗar shanga su nayeri ni, ka tsuwa Mambəl na Ɓɗakkarkara, natə Hyel ku hamta aka mji na ana kələngkər alari.”

33Sakatə mjir majalisa nggata apani, antə ɗəffa ɗa ɓzə ka duna, har tə da bara ka da tsi aposəlayeri ni. 34Amma mdər Farisi laga akwa majalisa ni, na ka thləmari Gamaliyel, maləmər thlipə tsawur Musa, natə shanga mji ana nar səli, thlata akwa nca ɗa ka thləthlata, ka tsawa abbər ka mdə ləɓəla ka aposəlayeri ni katagu. 35Antə tsa pəla aka mjir majalisa ni, “Mjir Israila, ka giri hara hangkal ka su tə giri ata hara aka mji nayeri ni. 36Kamnyar akwa məvayeri na təramta ni, mdə laga aɗi ka thləmari Thleudas na thlatə ka namtə kərni abbər tsa mdə laga na ola. Antə mji ku hara kudzəhə ka aru nfwar na nu, amma mdə ku tsi ni, ka titiləmta shanga mji na nu ni, antə su tə tsa baɗitə ni ku mti. 37Aghəla nda tsuwa antə mdə laga ka thləmari Yahuda, mdər Galili ku thlata akwa sakar jika mji, ka səvatə mji hang aghəlari. Amma tsa mdə ku sə tsi ni tsuwa, ka titiləmta shanga mji na nu ni. 38Antə akwa su ngəni tsuwa, I akwa pəla ka giri psi lakur mji ngəni, zhar giri ɗa. Kamnyar ma su na akwa ɗəffa ɗa ni wala su tə da akwa harari ni an kəthlər mda, suari ata kura. 39Amma ma su ni thlata akəla Hyel, giri aɗi ata mzhi nggyari ɗa kasəla wa. Kamnyar ta su ni asə ndzi abbər giri akwa mpa ka Hyel!”

Antə majalisa ni ku dlu sauriyirni ni. 40Antə da jaktə kəgambwa aposəlayeri ni, ka dlaɓu ɗa, ka ndəkərtə thləma ɗa abbər da aɗiya jaktə gari akwa thləma Yesu kəra wa, kambəla da psi ɗa tə da təra. 41Antə aposəlayeri ni ləɓəla kazhar mjir majalisa ni, ka təra akwa kucali kamnyar har tə da ku mzhi tə Hyel ku namtə ɗa mji na pwa, na amzhi ka mdə hara ala ɗa bwani ka kəli səliyir ɗa kamnyar thləma Yesu. 42Antə tədək viri, da akwa ləkəma ka thlipa ka ngkər labar na msəra ata kəra Yesu abbər tsa an Kristi ni, akwa mbwar vəngkər səli ka akwa kəyayeri ar mji.

Currently Selected:

Kəth Apos 5: KNB

Highlight

Copy