Kəth Apos 7

Gari Tə Istifanus Hara

1Antə prist na ol ni yu Istifanus abbər, “Apani jiri ya?”

2Antə Istifanus shinau ka pəla, “Maɗaməma ka təddayeri, psi gir thləma giri ali. Hyel na ka səli ku ncantə kərni aka Ibrahim na kəkar mburu sakatə tsa akwa Mesopotamiya, akəmata tsa aɗu ka ra ndzi ahar Haran. 3Tsa pəla alari, ‘Zhar tsəɗiyir nga kəga yangkura ga, ka gə mwari akwa tsəɗi tə I ata ncanta ala ga.’ 4Antə Ibrahim ku zhar tsəɗi mjir Kaldiya, ka ra ndzəndzi akwa Haran. Aghəla mtər baba'ni, antə Hyel kələmta ni kazhar vəi ngəni ka mwantə ni akwa tsəɗi tə giri akwa kulini ni. 5Amma Hyel aɗi hamta aka Ibrahim bwar kifərni akwa tsəɗi ni katagu wa, wala apa dza pal. Amma Hyel ku hara alkawal abbər tsəɗi ni ata ndzi arni kəga kəkayeri arni, wala tə saka nda Ibrahim aɗi ka ɓzər katagu wa. 6Antə Hyel an pəla abbər kəkayeri arni ata sə ndzi mətəpi akwa tsəɗi na ar mji damwa. Tsuwa mjir tsəɗi ndaga ata sə namtə ɗa apa mafa, ka hara ala ɗa bwani har məva aru nfwar. 7Amma Hyel pəla, ‘I ata sə hara shariya aka tsəɗi tə da hara mafakur alari ni, kəi ɗi ni. Antə aghəla nda da ata səɓəla akwa tsəɗi ni, ka vəngkər səli ali akwa vəi ngəni ni.’ 8Antə Hyel mbwi alkawal ka Ibrahim ata kəra thla kaciya. An su na hara tə sakatə Ibrahim yaɓəla Ishaku, tsa thlamta alari kaciya akwa vir na nciskur ka yarni. Antə Ishaku ku yaɓəla Yakub, antə Yakub ku yaɓəla kəkayeri ar mburu na kumnya suɗə ni.

9“Antə kəkayeri ngəni ku səlkər ɓzərma' ɗa Yusuf, ka ɗələmta ni, tə mdə kətə ni ka mwantə ni ahar Masar, amma Hyel ku ndzi adzə ni. 10Antə tsa ku msərantə ni akwa shanga bwaniyayeri arni, ka na alari msərakur ka ɗəɗukur akəma kuthlir Masar. Antə kuthli ni ku vəi ni gwamna ata kəra tsəɗi Masar ka ata kəra shanga mjir kutakəyirni tsuwa. 11Aghəla nda antə mi ku təri akwa shanga tsəɗi Masar ka Kanana, antə bwani na mwavər ku si ata kəra ɗa. Apani kəkayeri ar mburu aɗi mzhi wutə susəm wa. 12Amma sakatə Yakub nggata abbər susəma aɗi ahar Masar, antə tsa thlentə kəkayeri ar mburu ni ntangkəma. 13Akwa mwarər ɗa na suɗkur ni antə Yusuf ncantə kərni aka maɗada'ni, antə kuthlir Masar səndə mjir ga Yusuf. 14Aghəla nda antə Yusuf thlenta abbər ka baba'ni ka shanga yangkurari si ahar Masar ni. Tsuwa shanga ɗa an mji murfəkumari ka ntəfu. 15Antə Yakub ku ləghəi akwa Masar. Tsuwa anda antə tsa ku mti, tsa ka kəkayeri ar mburu ni. 16Amma mdə ku mwantə mshiyir ɗa ahar Shekem, ka harəmta ɗa akwa kul natə Ibrahim mastə ka kwaba hang akəla maɗa' Hamor akwa Shekem.

17“Amma sakatə sakar alkawal tə Hyel hara aka Ibrahim ni ku hara kudzəha, hangkurər mjir mburu na ahar Masar ku jakə hang ka duna. 18Har kuthli laga akwa Masar ku sə wutədzi na aɗi səndə su ata kəra Yusuf wa 19Antə kuthli ngəni ku dəkəi mjir mburu, tsa hara kəmanggarkur aka kəkayeri ar mburu, akwa dwalitə ɗa ka da pumta maɗankyarər ɗa ata uwa ka da kurəmtadzi. 20Antə akwa saka ngəni antə mdə yaɓəla Musa, tsuwa tsa ɓzəngkyar ni ɓɗaku jiri. Antə mdə ku wul ni mnyar thliya makər avi akwa kəyir baba'ni. 21Sakatə mdə ku ra psəmta ni, antə ngkwar kuthlir Masar kətə ni ka kəlantə ni apa ɓzər kutari. 22Antə mdə thlipta alari shanga ɗəɗukur ar mjir Masar, tsuwa tsa mdə na asəndə gari ka hara kəthlər.

23“Saka tə Musa ku hara məva nfwarkumari, antə tsa ɗangta abbər kalkal ka tsa ra wuli maɗama'ni mjir Israila. 24Sakatə tsa wutə mdər Masar laga akwa hara bwani aka mdər Israila nvwani. Antə Musa mbuli mdər Israila ni ka ntəmta ɗimikur tə mdər Masar hara alari ni, ka tsa ni ka tsi ni. 25Musa akwa dzama abbər mjirni Israila ata nggaɓəla abbər Hyel akwa bara hara kəthlər ka Musa ka tsa msərantə ɗa, amma da aɗi nggaɓəla wa. 26Səɓəla ɗəpari tsuwa tsa wutə mjir Israila suɗa akwa mpa, antə tsa mwari adzə ɗa abbər ka tsa shwalatə ɗa, akwa pəla, ‘Maɗara, japwa giri su duku diya! Kamnyar mi tə giri akwa dəkəi nvwa dzi ri?’ 27Amma mdə na akwa dəkəi nvwa ni ni tərəmta Musa abwa duku, akwa pəla, ‘Wan vətə nga ata olkur ka mdər hara shariya ata kəra yeru ri? 28Nənga ga akwa bara tsi ra tsu apatə ga tsi mdər Masar naha ni ya?’ 29Sakatə Musa nggatə ndər ngəni antə tsa hwi kazhar Masar, ka ra ndzi akwa tsəɗi Midiyan. Anda tsa yaɓəla maɗashili suɗa.

30“Aghəla sakatə məva nfwarkumari ku təramta, antə mdərthlentərhyel laga wutədzi aka Musa akwa kyanggyara u'u, ata nfu laga raka akwa mtaku kudzəhə ka Gar Sinai. 31Sakatə Musa wutə su ngəni antə tsa ndatədzi. Sakatə tsa shahədzi kudzəha abbər ka tsa wulɓəla, təng tsa nggatə kuraka Mthlaku akwa pəla, 32‘I an Hyelər kəkayeri ar nga, Hyelər Ibrahim, ka Ishaku, ka Yakub.’ Antə Musa ku yakata, har tə tsa aɗi mzhi nggitə wul u'u ni kəra wa.

33“Antə Mthlaku pəla alari abbər, ‘Ntsui ɓaɓiyir nga, kamnyar vəi tə ga athləthlata ata ni, tsa Vəi na ɓɗakkarkara. 34Jiri, I ku wutə jili bwani tə mjirna akwa ɗarari akwa Masar, I ku nggatə tuwar ɗa, antə I ku səghəi kamnyar kəi msərantə ɗa. Antə asər, kəi thlentə nga ahar Masar.’

35“To Musa ngəni, natə mjir Israila nggəlari akwa pəla, ‘Wan vətə nga ata olkur ka mdər hara shariya ata kəra yeru ri?’ Tsa an mdə tə Hyel thlentə ni ka tsa ndzi mdə na ola ka mdər msərantə ɗa, ka dlarər mdərthlentərhyel na wutədzi alari akwa nfu na raka nda. 36Antə tsa an səɓəla ka da akwa Masar atar hara surndatayeri ka seɗayeri akwa Masar, ka Manda Duwathlu, ka akwa mtaku, akwa məva nfwarkumari. 37Ngəni an Musa na pəla aka mjir Israila abbər, ‘Hyel ata sə carɓəla ala giri naɓi akwa nca giri, tsu apatə tsa ku carɓəla ra ni.’ 38Ngəni an mdə na akwa nca mjir Israila na tsaptədzi akwa mtaku nda, ata kəma duku kəga kəkayeri ar mburu, ka mdərthlentərhyel na gari alari akwa Gar Sinai ni. Tsuwa tsu tsa an dlu ndər akəla Hyel na ka mpika ka sə hamta ala mburu ni.

39“Amma kəkayeri ar mburu nggəlar ta kələngkər alari. Da tərəmta ni abwa duku, akwa ngguka abbər kuji ka da jaktə ngka ahar Masar.

40“Antə da pəla aka Haruna, ‘Namta ala mburu hyelayeri na ata mwa akəma mburu. Kamnyar mburu aɗi səndə su na hara aka Musa na fwaɓəla mburu akwa Masar ni wa.’ 41Antə da ku namtə haptu akwa dludzər kəna, ka hamta alari saɗaka, ka ləkəma akwa hara kucali aka su tə da nam ka tsiya ɗa.

42“Apani antə Hyel shinardzi kazhar ɗa, ka hamta ɗa aka vəngkər səli aka suayeri na amtazi, apa pci, ka thliya, ka sasəlkayeri, apatə mdə rəbuta akwa kakaɗər naɓiyayeri abbər,

“ ‘Giri na mjir Israila,

giri ku hamta ali mwaɓiyayeri tə giri tsəgəi,

ka saɗakayeri sakatə giri akwa mtaku

məva nfwarkumari nda ya?

43Ai tentər haptu Molek antə giri kəta

ka dludzər Refan na haptu sasəlka ar giri,

haptayeri tə giri ana vəngkər səli ala ɗa.

Antə apani I ata famta giri,

kəi mwantə giri abwanda Babila.’ ”

44“Waci kəkayeri ar mburu ku ndzi ka tentər shanggura Hyel akwa mtaku. Ngəni an tent tə Hyel tsawa aka Musa ka tsa namta, apatə mdə ku ncantə dludzari alari ni. 45Aghəla məvayeri laga antə kəkayeri ar mburu dlu tent ni akəla kəkayeri na kəmata da, ka si kəgari sakatə mwari kəga Joshuwa ka dlutsə tsəɗi akəla durayeri natə Hyel kədləmta aka kəkayeri ar mburu ni. Antə tent ni ku ndzi anda har ka vədza aka sakar Dauda. 46Dauda ku wutə mdəkur ata nca Hyel, har tə tsa kiɗə abbər ka tsa namtə mbwa aka Hyelər Yakub. 47Amma Solaman an sə hənta alari mbwa ni.

48“Wala apani Na Amta ta Shang aɗi ana ndzi akwa mbwayeri tə mdə nam ka tsi wa. Apatə naɓi Ishaya pəla abbər,

49“ ‘Vəi na amtazi an dəkəl kuthlikurərna,

duniya tsuwa an kulahər putə səli.

Jili mbwa madi antə giri ata hənta ali nə ri?

Wala tsuwa vəi madi antə

I ata mzhi ghərəmtaghəra akwa ri?

50Aɗi I an namtə shanga suayeri ngəni wa ya?’ ”

51“Kəra giri ɓəɓal kamta! Gir kərɗi akwa ɗəffa giri, mji kula thləm! Tədəku giri akwa nggəlar su tə Mambəl na Ɓɗakkarkara akwa pəla ala giri tsu apatə kəkayeri ar giri hara waci. 52Naɓi madi kula kəkayeri ar giri hara bwani alari ri? Da tsəgəi naɓiyayeri na ngkər su ata kəra səyir Mdər Jirkur ni, mdə tə giri haɗa ɓəli ni ka tsi ni ni. 53Giri an dlu Tsawur Hyel akəla mjirthlentərhyel, amma giri aɗi akwa ɓəlari wa!”

Mji Ku Ndzəndzəh Istifanus Ka Tsi Ni

54Sakatə mjir majalisa nggatə suayeri antə ɗəffa ɗa ɓzə ka duna ata kərari, har tə da ləkwa ɓɗəɓɗə mnya ɗa kamnyar ɗəffa ɗa. 55Amma ar Istifanus na nghyinghyari ka Mambəl na Ɓɗakkarkara, tsa haptə ncari amtazi, ka wutə səliyir Hyel, ka Yesu athləthlata abwa mazəma Hyel. 56Antə tsa pəla, “Wul giri, I akwa wul vəi na amtazi kəlarkəlarari, ka Ɓzər Mda athləthlata abwa mazəma Hyel!”

57Amma mjir majalisa ni hara kuraku ka duna, ka dzəɓtə thləma ɗa, ka pungkərdzi ata kərari ata saka duku. 58Antə da kəɓəla ni kazhar kuta di, ka ndzəndzəhtə ni ka pela. Antə mjir seɗayeri pwi ləptayeri arɗa akwa tsiya ɓzərdakwi laga ka thləmari Shawulu. 59Sakatə da akwa ləkəma ka ndzəndzəh Istifanus, antə tsa hara adduwa abbər, “Mthlaku Yesu, dlu mpikəi.” 60Antə tsa zuzuri, ka haptə kuraku ka duna akwa pəla, “Mthlaku, ga aɗiya kəsi bikər mji ngəni akwa ɗəffa gə wa.” Sakatə tsa pəlamta ndər ngəni, antə ɗəffari ləɓəla.

Currently Selected:

Kəth Apos 7: KNB

Highlight

Copy