Yahwana 17

Yesu Ku Hara Adduwa Kamnyar Kərni

1Aghəla tə Yesu ku gari ngəni, antə tsa haptə ncari amtazi ka pəla,

“Tədda, saka ku hara. Haptə səliyir Ɓzər nga, kamnyar ka Ɓzər nga haptə səliyir nga. 2Kamnyar ga ku hamta alari kuthlikur ata kəra shanga mji, ka tsa hamta mpikə na akur wa aka shanga mji na ku hamta jiri alari. 3Mpikə na akur wa ngəni tsuwa an ka da səndə nga abbər ga an Hyel duku na jirari ni, ka Yesu Kristi natə gə thlentə ni. 4I ku haptə səliyir nga akwa duniya atar kuri kəthlər tə gə hamta ali kəi hara ni. 5Antə kulini Tədda, haptə səliyirna ka jili səli tə I kəgari akəma ga təng akəmata mda anamtə duniya.

Yesu Ku Hara Adduwa Kamnyar Mjirthlipərni

6 I ku kurtə ngkərɓəla laku tə ga akwa aka mji tə gə hamta ɗa ali akwa duniya ni. Hwatu da an ar nga, antə gə hamta ɗa ali. Tsuwa da ku kələngkər aka ndərər nga. 7Kulini da ku nggaɓəla abbər shanga su tə gə hamta ali ni thlata akəla ga. 8I pəla ala ɗa ndərayeri tə gə pəla ali ni, tsuwa da ku dluwa, ka nggaɓəla tsuwa abbər jiri I thlata adzə nga. Tsuwa da ku hamta jiri abbər ga an thlentə ra.

9 I akwa hara adduwa kamnyar ɗa. I aɗi akwa hara adduwa kamnyar duniya wa, amma kamnyar mji tə gə hamta ali ni, kamnyar da an ar nga. 10Shanga su tə I kəgari an ar nga, tsuwa su na ar nga an arna. Tsuwa atar ɗa mji ku wutə olkur səli tə I kəgari. 11I aɗi akwa duniya kəra wa, amma arɗa da tsu akwa duniya. Arna I akwa mwari adzə nga. Antə Tədda na Ɓɗakkarkara, ɓəlatə ɗa ka dunar kuthlikur na akwa thləma gə ni bu, thləma ga tə gə na ali ni, kamnyar ka da ndzi duku, tsu apatə mwa duku. 12Sakatə I adzə ɗa, I ku ɓəlatə ɗa, ka wulwul kəra ɗa ka dunar kuthlikur na akwa thləma gə tə gə hamta ali ni. Wala pal akwa nca ɗa aɗi na sha wa, tar na duku na shahari hwatu nda, tsuwa kamnyar ka su tə mdə rəbuta akwa kakaɗə ni nghyaɓəladzi. #Yah 13:18 13Amma kulini I akwa mwari adzə nga. I ku pəla ala ɗa suayeri hang akwa sakatə I adzə ɗa akwa duniya ni, kamnyar ka da ndzi nghyinghyari ka jili kucalərna ni. 14I pəla ala ɗa ndər tə gə pəla ni. Antə duniya ni ku nggəlar ɗa kamnyar tə da aɗi ar duniya wa, tsu apatə I aɗi ar duniya wa ni. 15I aɗi akwa kiɗa abbər ka gə fwaɓəla ɗa akwa duniya wa, amma I akwa kiɗa abbər ka gə ɓəlatə ɗa ta Shatan. 16Da aɗi ar duniya wa, tsu apatə I aɗi ar duniya wa ni. 17Ka gə kəcimta ɗa ka jirkur ka da ndzi ɓɗakkarkara, kamnyar ndərər nga an jirkur. 18Apatə ga ku thlentə ra akwa duniya, antə I ku thlentə ɗa akwa duniya tsuwa. 19Kamnyar ɗa antə I akwa hamta kərna, kamnyar ka da hamta kəra ɗa ka jirkur ala ga tsuwa.

Yesu Ku Hara Adduwa Kamnyar Shanga Mjir hamta Jiri Alari

20 Tsuwa aɗi kamnyar nayeri ni shiɗa antə I akwa hara adduwa nə wa, amma kamnyar shanga mji na ata sə hamta jiri ali atar gariyir ɗa. 21I akwa kiɗa abbər ka shanga ɗa ndzi duku, tsu apatə gə na Tədda akwa iya, tsuwa I akwa gə ni. Tsuwa ka da ndzi akwa mwa. Apani antə mjir duniya ni ata hamta jiri abbər ga an thlentə ra. 22Daraja tə gə na ali ni, I ku hamta ala ɗa, kamnyar ka da ndzi duku tsu apatə mwa duku. 23I ata ndzi akwa da, gə tsuwa akwa iya, kamnyar ka da paktədzi ka ndzi duku ka jirkur. Kamnyar apani antə duniya ata sənda abbər ga an thlentə ra, ka sənda abbər ga ku hir ɗa kalkal apatə ga ku hir ra.

24 Tədda, I akwa bara abbər ka mji tə gə hamta ali ni sə ndzi adzə ra akwa vəi tə I akwa, ka da wul səliyirna natə gə hamta ali ni, kamnyar ga ku hir ra təng akəmata mda anamtə duniya. 25Tədda na ka jirkur, mjir duniya aɗi səndə ngə wa, amma I ku səndə nga. Tsuwa mji ngəni ku sənda abbər ga an thlentə ra. 26I ku ngkərɓəla ala ɗa laku tə ga akwa, tsuwa I ata ləkəma ka ngkər ala ɗa, kamnyar wala da ma ka da wutə jili hirkur tə gə ncanta ali ni, tsuwa kəi ndzi akwa da.”

Currently Selected:

Yahwana 17: KNB

Highlight

Copy