Yahwana 2

Kucalər Kəldzi Na Hara Ahar Kana Ar Galili

1Akwa vir na makərkur, antə kəldzi laga hara ahar Kana na akwa Galili. Tsuwa mama' Yesu anda akwa vəi kəldzi ni. 2Tsuwa mdə ku bara Yesu kəga mjirthlipərni ka da si akwa vəi kəldzi ni. 3Sakatə yimər anap ku kuri, antə mama' Yesu pəla alari, “Da aɗi ka yimər anap kəra wa.”

4Antə Yesu pəla alari, “Aiyi mwala, ngəni aɗi damitədzərna wa. Sakarna aɗi hara katagu wa.”

5Antə mama' Yesu pəla aka buɗayeri ni, “Ka giri hara kəlara su tə tsa ku pəla ala giri.”

6Mdə ku pwi gəlamayeri ngkwa tə mdə nam ka pela, kamnyar pu yimər kəcimtadzi apatə mjir Yahudi ana hara hwatu. Kəlara gəlam ana kəsi yimi apa galan sərkumari ka mwanta aka makkumari. 7Antə Yesu pəla aka mjir kəthlər ni, “Nghyantə giri gəlamayeri ni ka yimi.” Antə da nghyantə ɗa pakcaku. 8Antə tsa pəla ala ɗa, “Kulini kətsə giri, ka giri mwanta aka mdə na ola ata kəra vəi kəldzi ni.” Antə da kətsə ka mwanta alari. 9Sakatə mdə na ola ata kəra vəi kəldzi ɗar yimi ni, təng tsa nggatə yimi ni ku ndzi yimər anap. Amma tsa aɗi səndə vəi tə yimi ni thlata akwa wa, wala tə mjir kəthlər na kəi yimi ni ku sənda. Antə mdə na ata kəra vəi kəldzi ni kəga sala mwala ni, 10ka pəla alari abbər, “Hwatu, mda ana haɓəla yimər anap na msərari ntangkəma, antə ma sakatə mji ku sa ka mzhi ɗa, tsa ata səntə yimər anap na mumwasari! Amma ar nga ntangkəma gə ɗuwamta na msərari ni, tar kulini antə gə səɓəla kəgari!”

11Ngəni an surndatə na ntangkəma tə Yesu hara, tsuwa tsa hara surndatə ngəni ahar Kana na akwa Galili, vəi tə tsa baɗitə ncaɓəla səliyirni. Antə mjirthlipərni ku hamta jiri alari. 12Aghəla ngəni, antə Yesu, ka mama'ni, ka maɗama'ni, ka mjirthlipərni, mwari ahar Kafarnahum, ka ɗarndzi anda mnyar vir yiɗauwa. #Mat 4:13

Yesu Ku Mwari Akwa Mbwar Hyel

(Mat 21:12-13; Mar 11:15-17; Luk 19:45-46)

13Sakatə Kucalər Fəlɓəla Kəi ar mjir Yahudi abaka hara kudzəha, antə Yesu mwari ahar Urushalima. 14Sakatə tsa mwari akwa kuta bəbalər mbwar vəngkər səli antə tsa wutə mji akwa ɗəl thla, kəga təma, kəga kataparayeri, kəga mjir canji kwaba akwa ləkəma ka fəliyir ɗa. 15Antə tsa namtə kwandeng laga ka səwa, ka kədləɓəla ɗa shang purəm kəga təma kəga thla, kazhar kuta bəbalər mbwar vəngkər səli ni. Tsuwa tsa ku shinamta tebərayeri ar mjir canji kwaba ni, ka titiləmta kwabar ɗa. 16Antə tsa pəla aka mji na akwa ɗəl katapar ni abbər, “Famta giri suayeri ngəni! Giri aɗiya namtə kəyir Təddarna apa kasəku wa.” 17Antə mjirthlipərni ɗangtə su tə mdə rəbuta akwa kakaɗu abbər, “Mwaɓərna abwar mbwar nga ata mba ra akwa ɗəffi apa u'u.”

18Antə mjir Yahudi na ol'ola yu ni abbər, “Surndatə madi tə ga ata harari kamnyar ncanta ala yeru abbər Hyel ku na gə dunar hara su apani ri?”

19Antə Yesu pəla ala ɗa, “Huzamta giri mbwar vəngkər səli ngəni, antə I ata jaktə həntə ni akwa kutar vir makər.” #Mat 26:61; 27:40; Mar 14:58; 15:29 20Antə mjir Yahudi pəla alari, “Mdə hara məva nfwarkumari ka ngkwa akwa hən mbwar vəngkər səli ngəni, antə ar ngə ga ata həntari akwa kutar vir makər daci?”

21Amma mbwar vəngkər səli natə Yesu gari ata kər ni an dzari. 22Sakatə Yesu ku thlata akwa mtəmta antə mjirthlipərni ɗangta abbər tsa ku pəla su apani. Antə da ku hamta jiri aka su tə mdə ku rəbuta akwa kakaɗər Hyel ka gari tə Yesu pəla ni.

Yesu Asəndə Su Na Akwa Ɗəffa Mda

23Sakatə Yesu ahar Urushalima akwa sakar Kucalər Fəlɓəla Kəi, antə mji hang ku hamta jiri alari sakatə da wutə surndatayeri tə tsa hara ni. 24Amma Yesu aɗi mbərsa ka da wa, kamnyar tsa asəndə shanga mji karkar. 25Antə tsa aɗi akwa tur ka mdə ngkər alari su ata kəra mdə wa, kamnyar tsa asəndə su na akwa ɗəffa mda.

Currently Selected:

Yahwana 2: KNB

Highlight

Copy