Luka 1
1
Thlawardzi Aka Thliyofilus
1Tsu apatə mji hang ku vu duna ɗa abbər ka da rəbutə labar ata kəra suayeri na ku hara akwa nca mburu, 2antə da ku rəbutə tsu apatə mji na akwa baɗitari ku ngkər ala mburu, da na ku wutə suayeri ni ka nca ɗa, tə da ku ngkər labarari tsuwa. 3Apani tsuwa antə ku ndzi kalkal ali, abbər kəi rəbuta ala gə ndərayeri ni ka vəyari ka vəyari, kamnyar I ku karatə shanga suayeri ngəni ka nuɓəla ɗa ata ata tsu ɗəm, ya Thliyofilus gə na təramta ka ɓɗakkur. 4I ku hara apani kamnyar ka gə səndə jirkurər labar ata kəra suayeri natə mdə ku thlipa ala gə hwatu.
Yaɓəladzər Yahwana Na Mdər Hara Baptizma
5Akwa sakatə Hirudus an kuthlər mjir Yahudiya, antə prist laga aɗi na ka thləmari Zakariya, natə tsa akwa zarar pristkur ar Abija, antə tsa ka mwala akwa nca maɗankwiyir Haruna, ka thləmari Alisabatu. 6Antə japwa ɗa tsuwa harar ɗa ɓɗaku akəma Hyel, da ana kələngkər aka shanga tsawayeri ka suayeri tə mdə thlamta abbər ka mdə hara na ar Mthlaku kalkal. 7Amma da aɗi ka ɓzər wa, kamnyar Alisabatu aɗi wutə ɓzər wa, antə tsuwa japwa ɗa ku hali.
8Vir laga sakatə Zakariya akwa hara kəthlərərni na ar pristkur akəma Hyel akwa mbwar vəngkər səli, akwa sakar kəthlər na arni, 9apatə pristayeri ana hara, antə cara ku kətə ni abbər ka tsa an ləkwa mbwar vəngkər səli ka tsa mbamta sur shiwura. 10Sakatə tsa akwa mbamta sur shiwura, shanga dlamar mji aɓəla akwa hara adduwa ata saka na ndaga.
11Antə mjir Thlentər Hyel Mthlaku ku si ka thləthlata adzə ni abwa mazəma vəi hamta saɗaka ar mbamta sur shiwura ni. 12Sakatə Zakariya ku wutə ni, antə thlivəra ku ngkəi ni tə tsa ku yakata. 13Amma mdərthlentərhyel ni pəla alari, “Ga aɗiya thlivər wa, Zakariya! Kamnyar Hyel ku nggatə adduwar nga, antə mwalankiri Alisabatu ata sə yaɓəla ala gə ɓzər sal, tə ga ata sə vəta alari thləmari Yahwana. 14Antə ga ata sə ndzi ka kucali ka ɗəffu mwapu, tsuwa mji hang ata sə hara kucali akwa sakar yaɓəladzərni. 15Tsa ata sə ndzi mdə na ka olkur akəma Mthlaku, antə tsa aɗi ata sə sa yimər anap wa, wala sur sa damwa na mwavər wa, kamnyar Hyel ata sə nghyantə ni ka Mambəl na Ɓɗakkarkara tsu akwa kuta mama'ni. 16Antə tsa ata sə səntə mjir Israila hang adzə Mthlaku na Hyel arɗa. 17Antə tsa ata sə mwa akəma Mthlaku, tsuwa ka tsa hara kəthlərərni ka shanga dunari ka dunar ɗəffari apa ar naɓi Eliya. Tsa ata sə səntə mjir ya ka maɗankyar ata kəma duku ka damwa, antə tsa ata sə shinantə ɗəffa mji na aɗi ana kələngkər wa ka da ndzi ka hal na pwa, tə apani antə tsa ata ɗəmhə mjir Mthlaku alari.”
18Antə Zakariya pəla aka mdərthlentərhyel ni, “Apa madi antə I ata sə səndari abbər, su ngəni ata sə ndzi tsu apani ri?” Kamnyar I mdə na ku hali antə mwalankiya tsuwa ku hali.
19Antə mdərthlentərhyel ni shinau alari ka pəla, “I an Jibrailu, na ana thləthlata akəma Hyel, antə tsa ku thlentə ra kəi gari ala ga, kəi pəla ala gə labar ngəni na ɓɗaku ni. 20Amma nggədza ga ku nggəlar ta kələngkər aka ndər ni, na ata ndzi jiri ma virari ku sə hara. Ata kəra ngəni, kamnyar tə ga ku nggəlar ta kələngkər ali antə ga aɗi ata mzhi gari kəra wa, tar ma vir tə alkawal ngəni ku nghyaɓəladzi.”
21Antə mji na aɓəla akwa səka Zakariya ni, ku ndatədzi kamnyar tə tsa ku fəi akwa mbwar vəngkər səli. 22Sakatə tsa ku səɓəla, antə tsa aɗi mzhi ndəra ala ɗa wa, antə da ku sənda abbər tsa ku wutə su akwa wulsu akwa mbwar vəngkər səli, antə kamnyar tə tsa aɗi mzhi pəla wala ndər duku wa, tsa ku hara seɗar gari ala ɗa ka tsiyari daci kula ndəra.
23Sakatə sakar kəthlərərni akwa mbwar vəngkər səli ku kuri, antə tsa ku təra ka laha ngkiɗa. 24Aghəla virayeri ngəni antə mwalankiɗa Alisabatu ku kətə hur, antə har thliya ntəfu tsa ku ɗuwar kərni avi, antə tsa ana pəla. 25“Kulini antə Mthlaku ku dlar ra akwa virayeri ngəni, sakatə tsa ku wulha ra, ka kələmta səli ali ata nca mji.”
Yaɓəladzər Yesu Kristi
26Akwa thliya na ngkwakur ar Alisabatu sakatə tsa ku kətə hurər Yahwana, antə Hyel ku thlentə mdərthlentərni, Jibrailu akwa di na ola akwa tsəɗi Galili, tə thləmari an Nazareth. 27Ka tsa mwari adzə ɓzərngkwa laga natə sal laga ka thləmari Yusuf na akwa dur ar Dauda an zhutə ni, thləma ɓzərngkwa ni an Maryamu. #Mat 1:8 28Antə mdər thlentə ni ku si adzə Maryamu ka pəla alari, “Usa gə na mdər wutə msərakur, tə Mthlaku andzi adzə nga!” 29Amma tsa ku ndatədzi mwavər ata kəra ndər ngəni, ka dzama ata kər akwa ɗəffari abbər, thlawardzi jili madi ngəni ri? 30Antə mdərthlentərhyel pəla alari, “Ga aɗiya thlivər wa, Maryamu, kamnyar gə mdər wutə msərakur akəla Hyel. 31Nggədza tsuwa ga ata sə kətə hur, ka yaɓəla ɓzər sal, antə giri ata sə vətə thləmari Yesu. #Mat 1:21 32Tsa ata sə ndzi mdə na ola, antə mda ata sə kəga ni abbər, Ɓzər Hyel na Amta ta Shang: Antə Hyel Mthlaku tsuwa ata sə hamta alari dəkəl Kuthlikur ar kəkarni Dauda. 33Antə tsa ata sə hara kuthlikur ata kəra dur ar Yakub ba saka madi, kuthlikur arni tsuwa akur wa.”
34Antə Maryamu pəla aka mdərthlentərhyel ni, “Apa madi tə su ngəni ata sə harari, kamnyar tə I aɗi səndə sal wa?”
35Antə mdərthlentərhyel ni shinau alari ka pəla, “Mambəl na Ɓɗakkarkara ata sə si ata kəra ga, dunar Hyel na Amta ta shang tsuwa ata sə hara shanggur ala ga, kamnyar ngəni antə Ɓzər na ɓɗakkarkara na ata sə yaɓəladzi ni, mda ata sə kəga ni abbər, Ɓzər Hyel. 36Nggədza tsuwa, Alisabatu na yangkura ga, wala tə tsa ku hali, tsu tsa ka hur ar ɓzər sal adzə ni, antə ngəni an thliyar ni na ngkwakur tə tsa ka hur ni, tsa tə mji ana pəla abbər tsa aɗi ata wutə ɓzər wa. 37Amma su aɗi na kula Hyel amzhi harari wa.”
38Antə Maryamu pəla, “Nggədza ra, I mafar Mthlaku, ka tsa ndzi ali tsu apa ndər natə ga ku pəla ni.” Antə mdərthlentərni ku zhar ni ka təra.
Maryamu ku Mwari Ra Thlawar Alisabatu
39Akwa virayeri ni antə Maryamu ku ɗəmhədzi ka mwari ka huva akwa tsəɗi na ka garayeri, akwa di na ola akwa tsəɗiyir Yahuda. 40Antə tsa ku ləvəi akwa kəyir Zakariya ka thlawar Alisabatu. 41Amma sakatə Alisabatu ku nggatə thlawardzi Maryamu, antə ɓzərni ku ɓuji akwa kutari, antə Alisabatu tsuwa ku nghyantədzi ka Mambəl na Ɓɗakkarkara, 42antə tsa ku pəla ka kuraku na ola abbər, “Gə ka barka akwa nca mwanki, barka tsuwa aka ɓzər natə ga ata sə yaɓəlari! 43Antə apa madi tə I wutə ɓɗakkur ngəni ri, har tə mama' Mthlakərna ku si adzə ra? 44Kamnyar nggədza, sakatə I ku nggatə kurakər thlawardzər nga akwa thlimi, antə ɓzər na akwa kuti ku ɓuji kamnyar kucali. 45Tsa ka barka tsuwa, tsa na ku hamta jiri aka su tə mdə ku pəla alari, na thlata akəla Mthlaku, abbər ata sə ndzi jiri.”
Har Huwa Natə Maryamu Ku Hara
46Antə Maryamu pəla,
“Ɗəffi ata na olkur aka Mthlaku,
47mambələrna tsuwa ata hara kucali
kamnyar Hyel an Mdər mbantə ra.
48Kamnyar tsa ku wulha talakakur ar mafarni,
kamnyar nggədza akəmazi,
antə shanga zamanayeri ata sə kəga ra mdər barka.
49Kamnyar Hyel na ka duna ku hara suayeri na ol'ola
ali.
Thləmari tsuwa an Ɓɗakkarkara.
50Tsa ana kətadzə mji na ana thlivər ni
akwa shanga zamanayeri.
51Tsa ku hara kəthlərayeri na ol'ola ka tsiyari,
mji na ka ɗəffər olkur tsa ku
titiləmta ɗa ka dzamər ɗəffa ɗa.
52Tsa ku kəlghəi kuthlyayeri na ol'ola ata dəkəlayeri arɗa,
talakayeri tsuwa antə tsa ku jakə olkur ala ɗa.
53Mji na ka mi ku ndlantədzi ka suayeri na ɓɗakkarkara,
mjir gəna tsuwa antə tsa ku kədləmta
ka tsiya ɗa gapani kula su akwa.
54Tsa ku kəsi alkawal tə tsa ku hara aka kəkayeri ar
mburu,
antə tsa ku sə dlar buɗar ni Israila,
55tə tsa ku nghyantə alkawal arni aka kəkayeri ar mburu,
ka aka Ibrahim ka durər ni ba saka madi.”
56Antə Maryamu ku ɗarndzi adzə Alisabatu apa thliya makər kambəla tsa ngka aharngkiɗa.
Yaɓəladzər Yahwana Na Mdər Hara Baptizma
57Kulini antə sakar yar Alisabatu ku hara, antə tsa ku yaɓəla ɓzər sal. 58Antə ntəwulayeri arni kəga mji na yangkurari ku nggata abbər Mthlaku ku ncantə kətadzər mdərni na ola alari, antə da ku hara kucali kəga tsa.
59Sakatə ɓzər ni ku hara vir ncisu antə da ku si kamnyar thla kaciya alari, antə da ku bara ka da vəta alari thləmari Zakariya tsu apa thləma baba'ni, 60amma mama'ni pəla, “Aɗi apani wa, mda ata kəga ni Yahwana.”
61Antə da pəla alari, “Amma aɗi akwa nca dur nga na ka thləm ngəni wa!” 62Antə da hara seɗa aka baba'ni, ata yu ni abbər arni tsa hir ka mdə kəga thləma ɓzər ni mə ri?
63Antə tsa yuwa abbər ka mdə na alari sur rəbuta, tə tsa rəbuta abbər, “Thləmari Yahwana.” Antə shanga ɗa ku ndatədzi. 64Ata saka na ndaga mnya Zakariya ku kəlardzi. Su na ku mbwi kyanggyari ku mpəlidzi, təkəma tsa ku baɗitə labar ka damwa ata hu Hyel. 65Antə shanga ntəwulayeri na anda ku thlivəra, antə labar ata kəra suayeri ngəni ku titiləmtadzi bamama akwa shanga tsəɗiyir garayeri ar Yahudiya, 66Kəlara mdə na ku nggatə su ngəni ku dzama ata kər akwa ɗəffari, ka yuwa abbər, “Ɓzər ngəni ata sə ndzi məmə ri?” Kamnyar dunar Mthlaku aɗi adzə ni.
Zakariya Ku Hara Naɓikur Ka Hu Hyel
67Antə Zakariya na baba' Yahwana ku nghyantədzi ka Mambəl na Ɓɗakkarkara, tə tsa ku hara naɓikur ka pəla:
68“Ka mburu hu Mthlaku tsa na Hyelər Israila,
kamnyar tsa ku sə dlar mjirni ka na ala ɗa msərmsərkur.
69Tsa ku hamta ala mburu Mdər mbantə na ola,
akwa dur ar buɗar ni Dauda,
70Tsa ku hara alkawal atar
naɓiyayeri arni na ɓɗakkarkara tsu waci abbər,
71ka tsa mbantə mburu ta dawayeri ar mburu,
ka tsuwa tsa ata mbantə mburu ta dunar
shanga mji na ku nggəlar mburu.
72Kamnyar ka tsa ncantə kətadzə natə tsa
ku hara alkawalari aka kəkayeri ar mburu,
ka tsuwa ka tsa ɗangtə alkawal arni na ɓɗakkarkara.
73Kahyel natə tsa ku hara aka Ibrahim na baba'
mburu,
74ka tsa sə msərantə mburu,
akwa tsiya dawayeri ar mburu
abbər ka mburu sə hara
kəthlər alari kula thlivəra,
75ka mburu ndzi Ɓɗakkarkara ka kəthlər ɓɗakkur akəmari
akwa shanga virayeri ar mpika mburu.
76Antə gə na ɓzərna tsuwa,
mda ata sə kəga nga abbər ga an naɓi
ar Hyel na amta ta shang.
Ga ata sə mwa akəma Mthlaku
kamnyar ɗəmha alari laku.
77Tsuwa ga ata pəla aka mjirni abbər da
ata sə wutə mbantədzi atar tifəmtar bikayeri arɗa.
78Kamnyar Hyelər mburu an mdər
kətadzə mda ka mdər wul mda.
Tsa ana hara ka parakər vəi na
amtazi na ar mbantədzi ka tsa
mbila ata kəra mburu.
79Ka tsa mbila tsuwa aka mji na
andzəndzi akwa kuthlu ka shanggur ar mta,
ka tsa pwar səla mburu akwa mwa
akwa lakur msərmsərkur.”
80Antə Yahwana ku kəla, ka hara ɓəɓal akwa mambəla. Tsuwa tsa ku ndzi akwa mtaku, tar vir natə tsa ku sə wutədzi aka mjir Israila.
Currently Selected:
Luka 1: KNB
Highlight
Share
Copy
Want to have your highlights saved across all your devices? Sign up or sign in
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.
