Luka 16

Karapu Ata Kəra Olər Vəi Kəthlər Na Ɗəɗu

1Antə Yesu pəla aka mjirthlipərni, “Waci mdər gəna laga aɗi ka mdər kəthlər alari na ola tə tsa zhar shanga surni akwa tsiyari. Təng vir laga mji si ka pəla aka mdər gəna ni abbər mdə na ola tə tsa vəngkər ata kəra kəthlər ni akwa famnya kwabar nga. 2Antə mdərkəyirni ni kəga ni ka pəla alari, ‘Man tə I akwa nggatari ata kəra gə nə ri? Jikaɓəla ali hangkur su tə gə wuta akwa kəthlər ni, kamnyar an ndəka giri ka kəthlər ni ashina.’ 3Antə mdər kəthlər ni dzama akwa ɗəffari abbər, ‘Təng tə mdərkəyirna ata kədləmta ra akwa kəthlər ashina ni, man tə kalkal kəi hara ri? Kamnyar kulini I amzhi tsuhu kəra wa, tsuwa ata ndzi sur səli ali kəi ləkwa kiɗa. 4I asəndə su tə I ata harari, natə ka mji sə dlu ra akwa kəyayeri arɗa, ma sakatə mdə ku salamtə ra akwa kəthlərərna ni.’

5 “Apani antə tsa kəgatə shanga mji tə mdərkəyirni akwa nu ɗa təmbəl ka da si akəma ri pal pal. Antə tsa pəla aka mdə na si ntangkəma abbər, ‘Təmbələr mdərkəyirna yiɗau an ata kəra gə ri?’ 6Antə mdə ni pəla, ‘Garwar mal aru pal.’

“Antə olər vəi kəthlər ni pəla alari, ‘Dlu kakaɗə ni, ka gə ndzəndzi taktar, kara rəbutə ntəfkumari.’ 7Antə tsa pəla aka mdə damwa tsuwa abbər, ‘Ar nga yiɗau an ata kəra ga ri?’ Antə tsa pəla, ‘Bufər alkama dəpu pal.’ Antə olər vəi kəthlər ni pəla alari, ‘Dlu kakaɗə ni kara rəbuta aru nciskumari.’

8 “ ‘Antə mdər gəna ni ku hu olər vəi kəthlər arni na kula jirkur ni, kamnyar ɗəɗukurərni ni. Kamnyar mjir duniya ni ɗəɗu akwa mwa ka mjir zamanər ɗa, təramta mjir parakəu.’ ”

9 “Antə I akwa pəla ala giri, ka giri hara kəthlər ka gənar giri, kamnyar ka giri wutə pazhayeri aka kəra giri, kamnyar ma sakatə su ku hila ala giri, da ata mzhi dlu giri akwa kəyayeri arɗa na har ba saka madi. 10Kamnyar kəlara mdə na ata ndzi ka jirkur akwa su na raka, tsa ata ndzi ka jirkur tsuwa akwa su na ola. Tsuwa kəlara mdə na ata ndzi kula jirkur akwa su na raka, tsa ata ndzi kula jirkur tsuwa akwa su na ola. 11Antə ma giri aɗi ndzi ka jirkur ata kəra gənar duniya ni wa, wan ata nggitə zhar gəna na jirari akwa tsiya giri ri. 12Tsuwa ma giri aɗi ndzi ka jirkur ata kəra sur mdə wa, wan ata na ala giri su na ar giri ri?

13 “Buɗa aɗi na amzhi hara kəthlər aka mdərkəi suɗa ata saka duku wa. Kamnyar tar ka tsa nggəlar na duku, ka hir na dukwari, wala ka tsa kələngkər aka na duku, ka rutəmta na dukwari. Giri amzhi hara kəthlər aka Hyel ka aka gəna ata kəma duku wa.” # Mat 6:24

Thlipayeri Damwa Tə Yesu Hara

(Mat 11:12-13; 5:31-32; Mar 10:11-12)

14Sakatə mjir Farisi, na hir kwaba dzau ni, nggatə shanga suayeri tə Yesu pəla ni, antə da ncaɓwi ka kumshi ni. 15Antə Yesu pəla ala ɗa, “Giri an ana namtə kəra giri abbər giri ka jirkur akəma mji, amma Hyel asəndə ɗəffa giri. Kamnyar suayeri tə mji ana namta abbər da an su na ola, da an sur cika ata nca Hyel.

16 “Tsawur Musa ka kakaɗər naɓiyayeri an su tə mji akwa nuwari har ka sənta akwa sakar Yahwana. Tsu akwa saka ndaga antə mdə baɗitə ngkər labar na msəra ata kəra kuthlikurər Hyel, tsuwa waskəi akwa kəɗarari ka tsa ntsəu kərni akwa ka dwali. #Mat 11:12-13 17Kamnyar ata ndzi kasəla aka vəi na amtazi ka duniya ka da kura, ta ka ɗahə duku na raka ta shang ləɓəla akwa Tsawa.” #Mat 5:18

Thlipər Yesu Ata Kəra Ndəkə Ka Mwala

(Mat 19:1-12; Mar 10:1-12)

18 “Kəlara mdə na ku nggəlar mwalankiɗa ka kəl mwala damwa, tsa akwa ləka. Tsuwa mdə na ku kəl mwala na ku ndəkə ka salngkiɗa, tsa akwa ləka.” # Mat 5:32; 1 Kor 7:10-11

Mdər Gəna Laga Ka Lezəru

19 “Mdər gəna laga aɗi, na ana hatə kari natə masari mwavər, kalar ndləngi həng'ha, kari tə mdə nam ka puwa na ɓɗaku, ka dəɓamtadzi akwa səm msəra tədəku. 20Tsuwa akwa nyarfurni mdər bwani laga aɗi ka thləmari Lezəru na ana ndzəndzi anda tədəku, tsuwa shanga dzari ka mbəlku. 21Antə arni tsa ana bara ka mdə na alari wala an susəma na pumtadzi ata kəra tebər mdər gəna ni. Har wala kilayeri ana si ka nyar mbəlkayerari ni. 22Da aɗi da aɗi, təng vir laga mdər bwani ni mta, antə mjirthlentərhyel kətə ni ka mwantə ni adzə Ibrahim. Vir laga tsuwa təng mdər gəna ni ku mta, antə mdə harəmta ni. 23Sakatə mdər gəna ni akwa ɗar bwani akwa kəyir u'u na akwa duniyar mji mtəmta, antə tsa haptə ncari amta, ka wutə Ibrahim anda ciju, ka Lezəru adzə ni. 24Antə mdər gəna ni kəga ni ka pəla, ‘Baba Ibrahim, kətadzə ra bu, ka gə thlentə Lezəru ka tsa hau kuleng tsiyari akwa yimi, ka tsa mtathli ali kyanggyari, kamnyar I akwa ɗar bwani na ka duna akwa u'u ngəni!’

25 “Amma Ibrahim pəla alari, ‘Ɓzərna, ɗangta abbər sakatə ga akwa duniya, gə ka shanga suayeri na ɓɗakɓɗaku, tsuwa Lezəru akwa ɗar bwani. Amma kulini tsa akwa nggatə msərakur azi, antə ga ana akwa bwani ni. 26Bamnda suayeri ngəni ma, ku na ola na zurang aɗi akwa daɓwa mburu kəga giri, kamnyar ta mjir bara thlata azi ka mwari adzə giri, asə mzhi mwari, tsuwa ta mji laga asə thlata anda ka si adzə yeru.’ 27Antə mdər gəna ni pəla, ‘To baba, ma apani, I akwa kiɗə nga ka gə thlentə Lezəru ka tsa mwari akwa kəyir baba'na, 28kamnyar I ka maɗama'na na shili ntəfu, ka tsa tsaktə ɗa, ta da asə si akwa vəi bwani ngəni mwavər ni.’ 29Amma Ibrahim pəla, ‘Ai maɗama' ngə ni ata mzhi karatə su tə Musa ka naɓiyayeri rəbuta. Ka da psi thləm aka su tə da akwa pəla ala ɗa.’ 30Antə mdər gəna ni pəla, ‘Awa, aɗi ata hara baba wa! Amma ma har mdə laga an thlata akwa mtəmta ka mwari adzə ɗa, da ata tubi.’ 31Amma Ibrahim pəla alari, ‘Ma da aɗi mzhi psi thləma ɗa aka Musa ka naɓiyayeri wa, wala mda an thlata akwa mtəmta, da aɗi ata nggatə nə wa.’ ”

Currently Selected:

Luka 16: KNB

Highlight

Copy