Luka 3
3
Yahwana Na Mdər Hara Baptizma Ku Ngkər Labar Hyel
(Mat 3:1-12; Mar 1:1-8; Yah 1:19-28)
1Akwa məva na kumnya ntəfkur ar kuthlikurər Tibariyus Kaisar, sakatə Pontiyus Bilatus ku ndzi gwamna ar tsəɗi Yahudiya, antə Hirudus tsuwa ku ndzi olər tsəɗi Galili, tə Filibus na ɓzərma'ni tsuwa ku ndzi olər Ituriya ka Tarakunitus, ka Lisaniyas ku ndzi olər Abilene, 2sakanda tsuwa Annas ka Kayafas da an olər pristayeri, antə akwa saka na ndaga antə labar ar Hyel ku si aka Yahwana, na ɓzər Zakariya akwa mtaku. 3Antə Yahwana ku dlarhə shanga tsəɗi na ata mnya Thlyagha Jodan akwa ngkər ndərər Hyel abbər ka mji tubi, ka mdə hara ala ɗa baptizma, kamnyar ka mdə yafitə ɗa ata kəra bikər ɗa. 4Tsu apatə mdə ku rəbuta akwa kakaɗər naɓi Ishaya abbər,
“Kuraka mda akwa kəga akwa mtaku, abbər,
‘Namtə gir laku aka Mthlaku,
namtə gir alari laku ni dwaɗu.
5Kəlara mular madi ka mdə shikta,
antə kəlara gar madi ka ɗəɗəgəl madi
tsuwa ka mdə namtə ka ndzi ɓəɓal patərathlu,
lakwayeri na mbalmbalari kamndə thlentə dwaɗu,
lakwayeri na jukul jukul ka da ndzi patərathlu.
6Antə shanga mji ata sə wutə mbantədzi ar Hyel.’ ”
7Antə Yahwana ku pəla aka dlamar mji na ku səɓəla kamnyar ka tsa hara ala ɗa baptizma abbər, “Giri na pwapwayeri! Wan pəla ala giri ka giri hwi ta ɗəffə bwarbwarkurər Hyel na ata sə si ri? #Mat 12:34; 23:33 8Tar ka giri hara suayeri na ata ncanta abbər giri ku tubi ata kəra bikayeri ar giri. Giri aɗiya dzama akwa ɗəffa giri abbər, giri an maɗa' Ibrahim wa, kamnyar I akwa pəla ala giri, Hyel ata mzhi namtə pela ni ka da ndzi maɗa' aka Ibrahim. #Yah 8:33 9Kamnyar wala kulini antə mdə ku vədza kəma aka nggilanga nfwayeri, antə kəlara nfwa madi na aɗi ata ya munya na ɓɗaku wa antə mda ata nthləmta ni ka psuwa akwa u'u.” #Mat 7:19
10Antə dlamar mji ni yuta alari abbər, “Man tə ka yeru hara ri?”
11Antə tsa shinau ala ɗa ka pəla, “Mdə na ka ləptu suɗa ka tsa nar na dukwari aka mdə na aɗi kəgari wa, mdə na ka susəma tsuwa antə ka tsa hara tsu apani.”
12Antə mjir dlu tsəma ku si tsuwa kamnyar ka tsa hara ala ɗa baptizma, tə da pəla alari, “Maləm, man tə ka yeru hara ri?” #Luk 7:29 13Antə tsa pəla ala ɗa, “Ka giri dluwa ka təramta natə mdə ku thlamta ala giri wa.” 14Antə sojayeri tsuwa ku yu ni ka pəla, “Ar yeru tsuwa man tə ka yeru hara ri?” Antə tsa pəla ala ɗa, “Giri aɗiya dlutsə su akəla mda ka dwali wa, wala vəngkər su aka mdə gapani ka thlandər wa, amma ka giri mbwi ɗəffa giri ata kəra watsəɓər giri.”
15Kamnyar tə mji akwa səka səyir Kristi, antə shanga ɗa akwa yu yu su akwa ɗəffa ɗa ata kəra Yahwana abbər nuhum ngəni an Kristi ni ya. 16Amma Yahwana shinau ala ɗa shang, ka pəla, “I ana hara baptizma ala giri ka yimi, amma mda aɗi na ata si, na ku təramta ra, natə ɓɗakkurərna aɗi mzhi wala kəi mpəli səwur ɓaɓiyirni wa. Tsa ata hara ala giri baptizma ka Mambəl na Ɓɗakkarkara, ka u'u tsuwa. 17Tsa ka sur kətəra akwa tsiyari, natə tsa ata kətəra kəgari, antə tsa ata mwanta alkama akwa bi, amma cwangcwangari antə tsa ata mbamtari ka u'u na akur wa.”
18Akwa lakwayeri zumzum hang antə Yahwana ku ngkər labar na msəra aka mji ka kiɗə kəra ɗa abbər ka da zhar harar ɗa. 19Amma Yahwana ku mpa aka Kuthli Hirudus kamnyar tsa ku kəl Hirudiya na mwalar ɓzərma'ni Filibus, ka ata kəra suayeri damwa na ɗimi ɗimi tə tsa ku hara. #Mat 14:3-4; Mar 6:17-18 20Antə Hirudus kuri hilantə su ni atar hambwa Yahwana ni akwa pərsəna.
Yesu Ku Dlu Baptizma
(Mat 3:13-17; Mar 1:9-11)
21Sakatə shanga mji ku dlu baptizma, antə mdə ku hara baptizma aka Yesu tsuwa. Sakatə tsa akwa hara adduwa antə vəi na amtazi ku kəlardzi, 22tə Mambəl na Ɓɗakkarkara ku səghəi ata kərari ka dzari dludzi ka bukəl. Antə kuraku laga ku thlata akwar amtazi akwa pəla, “Ga an Ɓzərna natə I hira! I akwa nggatə msərakur nga ka duna.” #Mar 1:11; Luk 9:35
Dur Ar Yesu Kristi
(Mat 1:1-17)
23Yesu ku hara məva makkumari sakatə tsa baɗitə kəthlər arni.
Akwa dzamər mji tsa an ɓzər Yusuf,
Yusuf na ɓzər Heli,
24Heli na ɓzər Matthlat,
Matthlat na ɓzər Lawi,
Lawi na ɓzər Malki,
Malki na ɓzər Yanna,
Yanna na ɓzər Yusuf,
25Yusuf na ɓzər Mattathliyas,
Mattathliyas na ɓzər Amos,
Amos na ɓzər Nahum,
Nahum na ɓzər Esli,
Esli na ɓzər Naggai,
26Naggai na ɓzər Maathla,
Maathla na ɓzər Mattathliyas,
Mattathliyas na ɓzər Semeyin
Semeyin na ɓzər Yusek,
Yusek na ɓzər Joda,
27Joda na ɓzər Yahwana,
Yahwana na ɓzər Resa,
Resa na ɓzər Zerubbabel,
Zerubbabel na ɓzər Sheyaltiyel,
Sheyaltiyel na ɓzər Neri,
28Neri na ɓzər Malki,
Malki na ɓzər Addi,
Addi na ɓzər Kusam,
Kusam na ɓzər Elmadam,
Elmadam na ɓzər Er,
29Er na ɓzər Joshuwa,
Yusuf na ɓzər Eliyezer,
Eliyezer na ɓzər Yorim,
Yorim na ɓzər Matthlat,
Matthlat na ɓzər Lawi,
30Lawi na ɓzər Simeyon,
Simeyon na ɓzər Yahuda,
Yahuda na ɓzər Yusuf,
Yusuf na ɓzər Yonam,
Yonam na ɓzər Eliyakim,
31Eliyakim na ɓzər Meleya,
Meleya na ɓzər Menna,
Menna na ɓzər Mattathla,
Mattathla na ɓzər Nathlan,
Nathlan na ɓzər Dauda,
32Dauda na ɓzər Yesse,
Yesse na ɓzər Obed,
Obed na ɓzər Bowaz,
Bowaz na ɓzər Salmon,
Salmon na ɓzər Nashon,
33Nashon na ɓzər Amminadab,
Amminadab na ɓzər Admin,
Admin na ɓzər Arni
Arni na ɓzər Hezron,
Hezron na ɓzər Perez,
Perez na ɓzər Yahuda,
34Yahuda na ɓzər Yakub,
Yakub na ɓzər Ishaku,
Ishaku na ɓzər Ibrahim,
Ibrahim na ɓzər Tera,
Tera na ɓzər Nahor,
35Nahor na ɓzər Serug,
Serug na ɓzər Reyu,
Reyu na ɓzər Peleg,
Peleg na ɓzər Aber,
Aber na ɓzər Shela,
36Shela na ɓzər Kainan
Kainan na ɓzər Arfakshad,
Arfakshad na ɓzər Shem,
Shem na ɓzər Nuhu,
Nuhu na ɓzər Lamek,
37Lamek na ɓzər Methlusela,
Methlusela na ɓzər Enok,
Enok na ɓzər Yared,
Yared na ɓzər Mahalaleyel,
Mahalaleyel na ɓzər Kainan,
38Kainan na ɓzər Enosh,
Enosh na ɓzər Seth,
Seth na ɓzər Adam,
Adam na ɓzər Hyel.
Currently Selected:
Luka 3: KNB
Highlight
Share
Copy
Want to have your highlights saved across all your devices? Sign up or sign in
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.
