Markus 13

Mda Ata Sə Ndlamta Mbwar Hyel

(Mat 24:1-2; Luk 21:5-6)

1Sakatə Yesu ku səɓəla akwa mbwar vəngkər səli, antə pal akwa nca mjirthlipərni pəla alari, “Maləm, wul jili ɓɗakkur mbwayeri ngəni akwa ndatə mdə ni! Wul jili ol'olkur pelayeri na akwa dza mbwayeri ni!”

2Antə Yesu pəla alari, “Ga akwa wul shanga mbwayeri ngəni ol'ol ni ja wa! Pela aɗi wala duku na ata sə mbila ata kəra nvwani kula mdə huzamta wa.”

Seɗar Bwaniyayeri Na Ata Sə Hara

(Mat 24:3-14; Luk 21:7-19)

3Sakatə Yesu andzəndzi ata Gar Zaitun awul mbwar vəngkər səli, antə Bitrəs, ka Yakub, ka Yahwana, ka Andrawus, si adzə ni da shiɗa ka pəla alari, 4“Pəla ala yeru, nawa antə suayeri ngəni ata sə hara ri? Tsuwa man ata ndzi seɗar shanga suayeri ngəni abbər da abaka hara nə ri?”

5Antə Yesu pəla ala ɗa, “Ka giri hara hangkal ta mda asə shamta giri. 6Kamnyar mji hang ata sə si akwa thləmi ka pəla, ‘I an Kristi ni,’ har ka da shamta mji hang. 7Giri ata sə nggatə mji akwa mpayeri, ka mji thlivərantə giri abbər da ata sə mpa giri, amma hangkala giri aɗiya thlatə wa. Kamnyar dwali ka suayeri ngəni hara, amma sakar kurari aɗi hara katagu wa. 8Tsəɗi ata sə mpa ka tsəɗi nvwani, ka kuthlikur mpa ka kuthlikur nvwani, antə mi ata sə təri, tsuwa di ata sə kənggərantədzi akwa vəyayeri zumzum. Amma shanga suayeri ngəni an baɗitər bwani daci.

9 “Antə tar ka giri hara hangkal, kamnyar da ata sə mwantə giri aka alkaliyayeri, ka da ɓu giri akwa mbwayeri ar vəngkər səli. Da ata sə mwantə giri akəma gwamnayeri ka kuthlyayeri kamnyar thləmi, kamnyar hara ala ɗa seɗa ata kəri. #Mat 10:17-20; Luk 12:11-12 10Amma na ntangkəma, tar ka mdə ngkər labar na msəra ni aka shanga mji. 11Tsuwa kəlara sakatə da ku fatə giri ka mwantə giri akwa shariya, giri aɗiya huvə damitədzi ata kəra su tə giri ata sə pəlari wa. Ar giri, pəla giri kəlara su na ku si akwa ɗəffa giri akwa saka ndaga. Kamnyar aɗi giri an ata gari nə wa, amma Mambəl na Ɓɗakkarkara. 12Mda ata sə ɓəli ɓzərma'ni, har ka mdə tsi ni, tsuwa baba ata sə ɓəli ɓzərni. Maɗankyar ata sə nggəlar ndərər mji na ya ɗa, har ka da hara ka mji tsəgəi mji na ya ɗa ni. 13Shanga mji ata nggəlar giri kamnyar na, amma kəlara mdə na ku nggitə har ka vədza aka kurari, tsa ata mbantədzi.” #Mat 10:22

Sakar Bwaniyayeri Na Mwavər Ka Duna

(Mat 24:15-28; Luk 21:20-24)

14 “Ma sakatə giri ku wutə sur cika na ɗimi ni athləthlata akwa vəi na aɗi kalkal ka tsa thləthlata ata wa. Ka mdər karatə ni vədzə hangkalari. Tsuwa sakanda ka mji na akwa Yahudiya hwi mwari akwa garayeri. 15Mdə na ata kəra mbwarni aɗiya səghəi wa, wala ləkwa mbwarni kamnyar kətə su wa. #Luk 17:31 16Tsuwa mdə na akwa fakəu aɗiya ngka avi kamnyar kətə sur pudzərni wa. 17Tsuwa sha ku wutə mwanki na ka dza ɗa suɗa, ka mwanki na ka maɗa' ata hili akwa saka ndaga! 18Ka giri kiɗə Hyel diya, ta su ngəni asə hara aviyar! 19Kamnyar jili bwani na ata sə hara akwa saka ndaga ni, aɗi ɗar hara təng tə Hyel namtə duniya har ka vədza aka vir na ashina wa. Tsuwa mda aɗi ata jaktə harari kəra wa. #Kəl Yah 1:14 20Ma abbər Mthlaku an aɗi namtə virayeri ni ka da ndzi kwadang wa, mda aɗi na ata wutə mbantədzi wala duku wa. Amma kamnyar mji carcara, natə tsa an carɓəla, antə tsa kəmta virayeri nda ka da ndzi kwadang.

21 “Sakanda wala mdə laga an pəla ala giri, ‘Wula, nggədza Kristi azi!’ wala, ‘Ndaga ni anda!’ Giri aɗiya kələngkər wa. 22Kamnyar mji laga ata sə thlata ka thlandər abbər da an Kristi, wala thlandər abbər da naɓi, ka da hara seɗayeri kəga surndatayeri, kamnyar ka da shamta mji, har ma purəm kəga mji na carcara, ma ahara. 23Antə ka giri hara hangkal, nggədza I ku kurtə pəla ala giri shanga su akəmata sakari ahara.”

Sakar Səyir Ɓzər Mda

(Mat 24:29-31; Luk 21:25-28)

24 “Amma təkəma aghəla sakar bwani na mwavər nda,

“ ‘Antə pci ata hara kuthlu,

tsuwa thliya aɗi ata mbəl wa. #Kəl Yah 6:12

25 Sasəlkayeri tsuwa ata təgəri akwar amtazi,

tsuwa Hyel ata kənggərantə shanga su na amtazi.’ ” #Kəl Yah 6:13

26 “Sakanda antə da ata sə wutə Ɓzər Mda akwa si akwa dlambayeri ka kuthlikur na ola ka səli. #Kəl Yah 1:7 27Tsuwa tsa ata sə thlentə mjirthlentərni, ka da tsaptə shanga mjirni na carcarari akwa shanga duniya, baɗita abwani har ka mwanta aka datari na abwanda.”

Karapu Ata Kəra Nfur Kamnda

(Mat 24:32-35; Luk 21:29-33)

28 “Thlipə giri su ata kəra nfur kamnda. Kəlara sakatə tsiyari ku hara ngyingyaɓu ka baɗitə ɗəɗa thlali, giri ku sənda abbər vəya ku hara kudzəha. 29Tsu apani tsuwa ma sakatə giri ku wutə suayeri ngəni akwa hara, ka giri sənda abbər saka ku hara kudzəha, har anyarmbwa. 30I akwa pəla ala giri jirkur, mjir zaman ngəni aɗi ata mtəgəmtadzi wa, tar ma shanga suayeri ngəni ku hara. 31Vəi na amtazi ka duniya ata sə kura, amma ndərayeri arna aɗi ata kur cap wa.”

Mda Aɗi Na Asəndə Virari Wala Sakar Wa

(Mat 24:36-44)

32 “Amma mda aɗi na səndə viri wala sakatə suayeri ngəni ata sə hara nə wa, wala mjirthlentərhyel na amtazi, wala Ɓzər, aɗi səndə wa, tar Tədda shini an sənda. #Mat 24:36 33Ka giri vədzə hangkala giri, ka ndzi ɗəmhəɗəmhari, kamnyar giri aɗi asəndə sakatə saka ndaga ata sə hara wa. 34Ata sə ndzi tsu apa mdə na ata lənggu. Sakatə tsa abaka zhar kəyirni antə tsa ata vu kəi ni akwa tsiya mafayeri arni, ka hamta kəthlər ala ɗa, waskəi ka kəthlərərni, ka tsawa aka mdər wul nyarfu tsuwa abbər ka tsa ndzi ɗəmhəɗəmhari. #Luk 12:36-38 35Apani kuji ka giri ndzi ɗəmhəɗəmhari, kamnyar giri aɗi səndə sakatə mdərkəi ata sə ngka avi wa. Kamnyar tsa ata mzhi ngka wala tahaku, wala kərathlər viri, wala tuwar fugəm, wala ɗəɗəpa. 36Ta ma tsa asə si kakər kula səndər giri ka wutə giri ata heni. 37Su natə I pəla ala giri antə I akwa pəla aka shanga mji, abbər, Ka giri ndzi ɗəmhəɗəmhari.”

Currently Selected:

Markus 13: KNB

Highlight

Copy