Markus 15

Mji Ku Mwantə Yesu Akəma Bilatus

(Mat 27:1-2; Luk 23:1-5; Yah 18:28-38)

1Ɗəɗəpə mbing antə pristayeri na ol'ola kəga mji damwa na ol'ola, kəga maləmayeri ar thlipə tsawur Musa, ka shanga mjir majalisa, hara sauri. Antə da mbwahə Yesu, ka təra ka tsa, ka ra hamta ni aka Bilatus. 2Antə Bilatus pəla, “Ga an kuthlir mjir Yahudi ni ya?” Antə Yesu pəla alari, “I, apatə ga ku pəla.”

3Antə pristayeri na ol'ola ku burkatə Yesu ata kəra suayeri hang. 4Antə Bilatus jaktə yu ni abbər, “Ga aɗi ata hamta amsa wa ya? Wul jili hangkurər su tə da akwa pəla ata kəra gə ni.”

5Amma ba kulini Yesu aɗi shinangkər wala raka wa. Antə su ni ku ndatə Bilatus.

Mji Ku Thlamta Shariyar Mta Ata Kəra Yesu

(Mat 27:15-26; Luk 23:13-25; Yah 18:39—19:16)

6Tsuwa ku ndzi sur hara akwa kəlara sakar Kucalər Fəlɓəla Kəi, ka tsa psi ala ɗa mdə pal akwa pərsəna, mdə tə da an kiɗa. 7Tsuwa mdə laga aɗi akwa pərsəna ni ka thləmari Barabbas, ata kəma duku ka maɗa' shambar laga, na tsi mda akwa haptə hangkal tə da hara ni. 8Sakatə mji ku tsaptədzi dlama dlama, antə da yu Bilatus abbər ka tsa hara ala ɗa tsu apatə tsa ana hara ala ɗa hwatu. 9Antə Bilatus pəla, “Giri akwa bara kəi psi ala giri kuthlir mjir Yahudi ni ya?” 10Kamnyar tsa ku sənda ata bəbal abbər səlka an vu tə pristayeri na ol'ol ni hamta ni alari ni.

11Amma pristayeri na ol'ola ku hatəkər aka mji ka da pəla ka mdə psi ala ɗa Barabbas ata vəya Yesu ni. 12Antə Bilatus yu ɗa abbər, “Man tə kəi hara aka mdə tə giri ana kəga ni abbər kuthlir mjir Yahudi nə ri?”

13Antə da haptə kuraku ka pəla, “Kukwamta ni!”

14Antə Bilatus pəla, “Kamnyar mə ri? Man ɗimikur tə tsa hara ri?” Amma mji ni haptə kuraku ka duna ka pəla, “Ka mdə kukwamta ni!”

15Kamnyar tə Bilatus akwa bara ka tsa hara su na ata kəskəra dlama, antə tsa psi ala ɗa Barabbas. Antə tsa vu tə mdə ɓu Yesu ka kwandeng, ka hamta ni ala ɗa ka da ra kukwamta ni.

Sojayeri Ku Hara Kyartəkur Aka Yesu

(Mat 27:27-31; Yah 19:2-3)

16Antə sojayeri ni mwantə Yesu akwa bəbalər ɓukcir gwamna, natə mda ana pəla Praitoriyum ni, ku kəgatə shanga sojayeri ata kəma duku. 17Antə da hadzə ləptu lipəla aka Yesu, ka namtə dzakwar kuthlikur ka mtəhəra, ka tsangkər ata kərari. 18Antə da baɗitə thlawar ni ka pəla, “Bundi, kuthlir mjir Yahudi!” 19Antə da ləkwa tsa ni ka zwal akwa kərari ata kər ata kər, ka tifəngkər alari mtili. Antə da zuzuri akəmari abbər da akwa vəngkər alari səli nggwa. 20Sakatə da ku kuri hara kyartəkur alari, antə da fəi ləptu lipəla nda, ka jaktə hadza alari ləptərni ni, ka ləɓəla ka tsa, kamnyar ka da ra kukwamta ni.

Sojayeri Ku Kukwamta Yesu

(Mat 27:32-44; Luk 23:26-43; Yah 19:17-27)

21Da akwa mwa, təng da wutə mdə laga akwa təramta, ka thləmari Siman, mdər Sayirin, baba' Alekzanda ka Rufus. Tsa thlata akwa mtaku akwa təramta, antə sojayeri vu ni dwali ka tsa kəl udzəm kadləkadla ar Yesu ni.#Rom 16:13 22Antə da mwantə Yesu ata vəi tə mda ana kəga abbər Golgothla natə karapwari an “Vəi Kugwar Kər.” 23Antə da hamta alari yimər anap gwargwarari ka mur, amma tsa aɗi hir sari wa. 24Antə da kukwamta ni, ka ndəkəi ləptayeri arni akwa daɓwa ɗa atar ndzəh kuriya ata kər, kamnyar ka mdə səndə su tə waskəi ata wutari. 25Da kukwamta Yesu ata saka əmdla na ɗəɗəpa. 26Antə da rəbutə su tə da burkatə ni kamnyar ni abbər, “KUTHLIR MJIR YAHUDI” 27Tsuwa da ku kukwamta mjir thla laku suɗa adzə ni, pal abwa mazəmari ka pal abwa matsəkarari. 28Apani antə su tə mdə pəla akwa kakaɗu ni ku sə nghyaɓəladzi abbər, “Mdə ku jikau ni akwa nca mjir biku.”

29Antə mji na akwa təramta adzə ɗa ləkwa kədaɓ kəra ɗa, ka mnya ɗimi alari, akwa pəla, “Yauwa! Gə na ata mzhi huzamta mbwar vəngkər səli ka jaktə hənta akwa kuta vir makər ni, 30mbantə kər ngə ja! Ma ga an Ɓzər Hyel ni, səghəi ata udzəm kadləkadla ni!”

31Tsu apani tsuwa pristayeri na ol'ola, ka maləmayeri ar thlipə tsawur Musa, ku hara kyartəkur alari akwa daɓwa ɗa abbər, “Tsa ku mbantə mji laga, amma tsa amzhi mbantə kərni wa! 32Ka Kristi na Kuthlir mjir Israila ni, səghəi ata udzəm kadləkadlə ni kulini, ka mburu wuta ka hamta jiri alari!” Antə mji na suɗa natə mdə kukwamta ɗa ata vəi duku ka Yesu ni, mnya ɗimi alari tsuwa.

Mtər Yesu

(Mat 27:45-56; Luk 23:44-49; Yah 19:28-30)

33Sakatə pci təpkər antə kuthlu si ka hartə shanga tsəɗi ni, har ka mwanta aka saka makər. 34Ata saka makər antə Yesu haptə kuraku ka pəla, “Eloi, Eloi, lama sabakthlani?” Karapwari an “Hyel arna, Hyel arna, kamnyar mi tə gə təra kazhar ra ri?”

35Sakatə mji laga na athləthlata anda nggatə kurakə ni, antə da pəla, “Wul giri tsa akwa kəga Iliya!” 36Antə mdə laga hwi, ka hau soso akwa yimər anap na mumwasu, ka hata ata zwal, ka ha aka Yesu ka tsa sa, ka pəla, “Ndzi ka mburu wutə nuhum Iliya ata si ka kəli ni ata udzəm kadləkadlə ni!”

37Antə Yesu haptə kuraku ka duna, antə ɗəffari ləɓəla.

38Antə lapəli ar mbwar vəngkər səli ni ntaudzi ka bwa suɗa, baɗita amta har ka ləghəi. 39Sakatə olər sojayeri na athləthlata anda akəma Yesu ni nggatə Yesu akwa tuwa, ka wutə laku tə tsa mta akwa, antə tsa pəla, “Jiri, mdə ngəni Ɓzər Hyel!”

40Tsuwa mwanki laga aɗi anda na thləthlatə catta akwa wul su na akwa hara. Akwa nca ɗa an Maryamu Magdalin, ka Maryamu na mama' Yakub na raka ka Yusuf, ka Salomi. #Luk 8:2-3 41Tun ahar Galili antə mwanki ngəni baɗitə nu Yesu akwa wulwul ni. Tsuwa mwanki aɗi damwa hang na paktə si ka tsa akwa Urushalima.

Mdə Ku Harəmta Yesu

(Mat 27:57-61; Luk 23:50-56; Yah 19:38-42)

42Sakatə tahaku ku hara, tə mda akwa ɗəmhədzi kamnyar səɓəla ɗəpari Vir Ghərəmtaghəra, 43antə mdə laga ka thləmari Yusuf na mdər Arimathliya si. Antə Yusuf, pal akwa nca mjir Majalisa, natə tsa ka kərni akwa sək kuthlikur Hyel, ku mwari kula thlivəra adzə Bilatus, ka kiɗə mshiyir Yesu. 44Bilatus ku ndatədzə sakatə tsa nggata abbər Yesu ku kurtə mtə ni. Antə tsa kəga olər sojayeri ni, ka yu ni abbər Yesu ku kurtə mtə ya. 45Sakatə tsa nggaɓəla akəla olər sojayeri ni abbər jiri, antə tsa psi mshiyirni ni aka Yusuf. 46Antə Yusuf səntə zhaɓər lilin, ka kəlghəi mshiyir Yesu, ka pərtə ni akwa zhaɓər lilin ni, ka ra peri ni akwa kul tə tsa ntuli ata pirakthlya. Antə tsa takəltə pela laga ka hartə mnya kul ni kəgari. 47Tsuwa Maryamu Magdalin ka Maryamu na mama' Yusuf akwa wul ɗa, ka wutə vəi tə mdə harəmta Yesu ata.

Currently Selected:

Markus 15: KNB

Highlight

Copy