OŌYƐBƐ̄CƐ 14

Ācɛ Ísrɛ̄lu le bēhé Ísu Igwɛ̄bɛ́

1Óndú ā da Umósīsi kahíníī, 2“Lɛ ka lɛ ayí kú Ísrɛ̄lu kéē kwúcē igbīhi gaá le mlɛ́nyɔ́ iyɔ̄bū kú Upihahírɔ̄tu, ɔtāhɛ̄ kú Umígidɔlu mɛ́mla ísu igwɛ̄bɛ́ ā, iyɔ̄bū kú Ubálu-Uséfɔn. 3Ohígbū ká Uféro géē gbɛlá ka ācɛ kú Ísrɛ̄lu ā ɛ́ɛ le jī bá ipú ígbíli ɛɛ́.” 4“N géē yá kú ɔtū kú Uféro kóō le lɔfú, cɛ́ɛ́ kóō nū aá inya ī dɔɔ̄kā kóō lɛ aá kwú. Amáŋ ohígbū ɔdā nɛ̄ n géē yá anú mla aícɔ́ɔja kú nū ā, ācɛ géē cɛ̄tra um. Cɛ́ɛ́ ācɛ kú Íjīpiti géē jé ka n wɛ Óndú ā á.” Anɔ́ɔ é kē le yá lɛ ā á.

5Eko nɛ̄ ɔcɛ́ kú Íjīpiti le pó ka ācɛ ā le pɛ́ kwu ā, anú mɛ́mla aígabɔ̄ kú nū le ɔtū kú uwā pīyabɔ̄. Anɔ́ɔ é kahíníī, “Ɔdí nɛ̄ alɔ yá yɔ̄ āa? Alɔ cɛ̄ le ācɛ kú Ísrɛ̄lu ā le pɛ́ kwu ɛɛ́, alɔ í kē má ācɛ o yúklɔ́ kú ɔfiyɛ lɛ alɔ gɛ ŋ́.” 6Uféro lɛ aúgbɔ́ɔnya kú ɛfú kú nū mɛ́mla aíjɔ́ɔja kú nū tútū. 7Ó le aúgbɔ́ɔnya kú ɛfú úlā ce ofigwó (600) kú nū nēe lɔhi fíyɛ́ dúú mɛ́mla aɔ́há dóódu nēe bá ajɛ kú Íjīpiti ā kpó, klla lɛ aótrɛ̄yí fu kéē leyīkwu uwá. 8Óndú ā le ɔtú kú Uféro yá lɔfú. Anɔ́ɔ ó le nū ācɛ kú Ísrɛ̄lu nɛ̄ bī ɔtūkpūūlū bá ī nyɛ̄ɛ̄ ā inya. #14.8 bī ɔtūkpūūlū, ámāŋ Ɔwɔicō yɔ̄ ī gbō uwā ɛyí á 9Aícɔ́ɔja kú Íjīpiti ā mɛ́mla odúúdú ɔnya kú ɛfú mɛ́mla iyó ɛfú kú uwā, nū uwā inya jāā gbéeko nēé lɛ uwá kwú, ɛga nēé bá okónu ísu igwɛ̄bɛ́, iyɔ̄bū kú Upihahírɔ̄tu, ajɛ kú Ubaal-séfɔn ā.

10Eko nɛ̄ ayí kú Ísrɛ̄lu le Uféro mɛ́mla aícɔ́ɔja kú ɔlɛ́ nū má bá ī yɛ lɛyíkwu uwá ā, ɔtū kú uwā kwu wogodo, anɔ́ɔ é le ikwū je klá Óndú ā kóō tú uwā abɔ̄ á. 11É da Umósīsi kahíníī, “Únóji í bá Íjīpiti ŋ́ nɛɛ? A kpó alɔ wɛ̄ɛcɛ ŋmá Íjīpiti wā ipú ígbíli amānyā kú ālɔ̄ gáā kwú nɛɛ? Ɔdí nāa yá alɔ yɔ̄ ā? Nɛ̄ a kpó alɔ bɛ̄cɛ ŋmá Íjīpiti āa? 12Alɔ í da uwɔ ŋmáajɛ gbɔbū ɛ́ɛ́ kú ālɔ̄ nyɛ̄ɛ̄ ka ɔdā ɛ́gɛ́nyā géē yá ŋ́ nɛɛ? Alɔ da uwɔ ka habɔ̄ alɔ tá cíí, cɛ́ɛ́ kú ālɔ̄ cɔfiyɛ lɛ ācɛ kú Íjīpiti. Ó géē lɔhi lɛ alɔ fíyɛ́ kú ālɔ̄ cɔ̄fiyɛ ikɔkɔ ō wā í pɛ́ gekwú ipú ígbíli amānyā ā.”

13Anɔ́ɔ Umósīsi da ācɛ ā kahíníī, “Aá yúufi ŋ́. Aá māhayi cíí, kú aá má ɔdā nɛ̄ Óndú ā géē yá kóō nya aá tá ícɛnyā ā. Aá gáā má ācɛ kú Íjīpiti nēe bá nyā gbóógbóō ɛ́ɛ́ gɛ ŋ́. 14Óndú ā géē nuunu lɛ aá. Aá kóō bá cíí mɛ́ɛnɛ.”

15Óndú ā da Umósīsi kahíníī, “Ɔdíyá nɛ̄ aá gē jikwū klá um ā? Da ācɛ ā kéē yɛ gɔbū. 16Kwú okwutɛ kú uwɔ ā ú gicō kú ā lɛ ɔ́ nā kwu eyī kú ísu ā. Éŋkpɔ̄ ā í je kɔ̄ ɛpa. Ācɛ kú Ísrɛ̄lu ā géē yɛ ajɛ oŋmókókó bū ipú ísu ā ga ogbeé ɔhá. 17N géē yá ɔtū kú ācɛ kú Íjīpiti ā kóō lɔfú nɛ̄hi, nēe géē yá kéē nū ācɛ kú Ísrɛ̄lu inya, cɛ́ɛ́ ācɛ í cɛ̄tra um o ŋmá oyálé nɛ̄ n gáā yá ɔcɛ́, aícɔ́ɔja kú nū mɛ́mla aúgbɔ́ɔ́nya kú ɛfú mɛ́mla ācɛ o pɛ́ úwā. 18Eko nɛ̄ n lɛ uwá yálé, ācɛ kú Íjīpiti a géē jé ka ami ɔɔ́ wɛ Óndú ā á.”

19Alelékwū ōtɛ̄hɔ̄ kú Óndú ā, nōo húmáyī gbɔbū lɛ ācɛ kú Ísrɛ̄lu ā, le yɛ gaá yɔ̄ igbīhi uwā. Ɔ́kpa kú ɔlá ā nyɛ̄ɛ̄ ŋmá iyɔ̄bū le tá igbīhi, 20gaá yɔ̄ ɔtāhɛ̄ kú ācɛ kú Íjīpiti mɛ́mla ācɛ kú Ísrɛ̄lu. Ojuja ā le ɛga nɛ̄ ācɛ Íjīpiti bá ā yá dobū kpím amáŋ ó le ɔlá ō fíyajɛ je lɛ ācɛ kú Ísrɛ̄lu. Anɔ́ɔ aícɔ́ɔja í túblá iyī uwā ajaajɛ otú ɔ́ɔmā glá ŋ́.

21Umósīsi le abɔ̄ nāndaa lɛ okwutɛ kú nū miya kwu eyī kú ísu ā. Anɔ́ɔ Óndú ā bī owu olɔfú kú ɛnɔ̄ɔ̄cī lɛ enyi kú ísu ā nū ga igbīhī, le ɔ́ kɔ̄ ɛpa, anɔ́ɔ ɔwɛ le tá bū ipú ísu ā. Owu ā tá otú gbɔ́ɔ̄cī, anɔ́ɔ ó kwú ɔkwu kú ísu ā í pīya ajɛ íkpākplā á. 22#1 Ukɔ́r 10.1,2; Uhíb 11.29Anɔ́ɔ ācɛ kú Ísrɛ̄lu ā le bū ipú ísu ā, ɛyí ajɛ íkpākplā abɔ̄ éŋkpɔ̄ māháyi icō kpaakpa abɔ̄ ɛplɛ́ɛpa āa. 23Ācɛ kú Íjīpiti ā mɛ́mla odúúdú aɔ́nya, aúgbɔ́ɔnya ɛfú mɛ́mla ācɛ o pɛ́ ūwā, nū ācɛ kú Ísrɛ̄lu jāā gbéeko nēé gā ɔtāhɛ̄ kú ísu ā. 24Ɛ́ɛ́ kú eyī kóō nyā ā, Óndú ā pīyeyī má ajɛ ŋmá ipú ɔ́kpa kú ɔlá mɛ́mla ojuja ā. Anɔ́ɔ ó le aícɔ́ɔja kú Íjīpiti ā má. Anɔ́ɔ ó le ígbájí bī wā ipú uwā. 25Ó cɛ̄ lɛ akā kú aúgbɔ́ɔ́nya kú ɛfú kú uwā ā le hɛ́ tāajɛ, anɔ́ɔ é bá ī pi uwá abɔ̄fú mɛ́mla ákanya nɛ̄ɛ̄nɛ̄hi, ɛ́ɛ́ nēé gē fu gɔbū á. Anɔ́ɔ ācɛ kú Íjīpiti ā kahíníī, “Óndú ā gē nuunu tá alɔ, lɛ ayí kú Ísrɛ̄lu ɛɛ́. Ālɔ̄ le bɛ̄cɛ ŋmá amānyā.”

26Óndú ā da Umósīsi kahíníī, “Lɛ abɔ̄ kú uwɔ nańdaa kwu eyī ísu ā, cɛ́ɛ́ kú éŋkpɔ̄ ā kóō kwú cīgbīhi.” 27Anɔ́ɔ Umósīsi lɛ abɔ̄ kú nū nāńdaa le okwutɛ kú nū miya kwu eyī éŋkpɔ̄ ā, anɔ́ɔ éŋkpɔ̄ ā kwúcē á. Ācɛ kú Íjīpiti ā yá kéē le kwu ŋmá ipú éŋkpɔ̄ ā, amáŋ Óndú ā lɛ uwá kpó tá tū ipú ísu ā. 28Anɔ́ɔ éŋkpɔ̄ ā kwú cīgbīhi klá ācɛ kú Íjīpiti mɛ́mla odúúdú iyéfú kú uwā, nēé bī gē nū ācɛ kú Ísrɛ̄lu inyā ā. Ɔ̄cɛ ékpónú kú uwā í hile ŋ́. 29Amáŋ ācɛ kú Ísrɛ̄lu ā le bū ipú ísu ā ɛyí ajɛ íkpākplā ā gɛɛcɛ, bū ɔtāhɛ̄ kú ɔdɔ kú éŋkpɔ̄ nōo háyiicō kpaakpa abɔ̄ ɛpɛlɛ́ɛpa ā.

30Ɛ̄cī ɔ́ɔmā ā, Óndú ā lɛ ayí kú Ísrɛ̄lu nyatá ŋmá abɔ̄ kú ācɛ kú Íjīpiti ā. Anɔ́ɔ ācɛ kú Ísrɛ̄lu má okwū kú ācɛ kú Íjīpiti ā bá okónu ísu ā bɛɛ́ɛ̄. 31Eko nɛ̄ ayí kú Ísrɛ̄lu lɛ ɛ́gɛ́nɛ̄ Óndú ā bī ɔfū nɛ̄hi kú nū ā le ācɛ kú Íjīpiti ā yálé ā, é le ojīlīmā nɛ̄hi ce Óndú ā fíyɛ́. Anɔ́ɔ é kwú ɔtū ú ce Óndú ā mla Umósīsi ɔ̄cocɛ̄hɔ̄ kú nū ā.

Currently Selected:

OŌYƐBƐ̄CƐ 14: IFBCL

Highlight

Copy