OHÚTU 19

Ɔbíipú kú ācɛ Usɔ́dɔm

1Eko nɛ̄ aálelékwū ōtɛ̄hɔ̄ ɛpa kú Óndú ā gā Usɔ́dɔm ɔ̄nɔ̄ɔ̄nɛ̄ ā, Ulɔ́tu cīce okónɔɔwɛ nōo yɛ ga Usɔ́dɔm ā. Eko nōó le uwá má ā, ó cāŋjɛ gaá jīla uwá ɔwɛ, anɔ́ɔ o túkpɛɛ́ lɛ eyī pīya klá ajɛ iyɔ̄bū uwā. 2Anɔ́ɔ ó kahíníī, “Aɔ́kpani um, n gē gbɔ̄ɔkɔ lɛ aá kú aá le yɛce ɔlɛ́ um. Aá lɔfú lɛ ikpó kú aá na cɛ́ɛ́ aá le gbo gbɔ́ɔ̄cī. Ɔcɔ̄ɔ̄cī aá lɔfú nyɔ̄ ɛga nɛ̄ ī nyɔ̄ āa.” Anɔ́ɔ é tá ɔ̄ ohi kahíníī, “Ehée, alɔ géē gbo ɔɔ́pu.” 3Ó gbɔ̄ɔkɔ lɛ uwá piyóó, anɔ́ɔ é cɛ̄ le tá ɔlɛ́ nū á. Ulɔ́tu le igbō nōó gē nū ŋ́ bákánjɔ̄, ó le ucɛ yá lɛ uwá, anɔ́ɔ é le lé á. 4Amáŋ gbɔbū ɛ́ɛ́ kéē gwutá ā, odúúdú ācɛ kú Usɔ́dɔm, kwu ayípɛ̄ kwu anyākwɔ́cɛ, le pɛ́ gaá le yɛ ɔlɛ́ ā tá. 5#Āco 19.22-24Anɔ́ɔ é dɛ̄gba hī Ulɔ́tu igwú da ɔ́ kahíníī, “Iní nɛ̄ ācɛ nēe wā ɛgiyí uwɔ ɔ̄nɛ̄mā ā bá āa? Lɛ uwá kpó wɛ̄ɛcɛ gé lɛ alɔ kú ālɔ̄ lɛ ikpó uwā ce.” 6Ulɔ́tu le bɛ̄cɛ wā ɛgiyí ācɛ ā, le ɔwɛ pi gwū igbīhī iyīnū. 7Anɔ́ɔ ó da uwá kahíníī, “N gē gbɔ̄ɔkɔ lɛ aá ayínɛ́ um, aá híī yá ucē kú ɔ́bíipú nyā ŋ́. 8Aá má ɔ̄, n le ayínɔ̄nyā ɛpa, nēé jé ācɛnyīlɔ jééjéē ɛ́ɛ́ ŋ́. Aá háyi ká n le uwá kpó wɛ̄ɛcɛ gé lɛ aá kú aá yá ɔdā dóódu nōo he aá ɔtū mla uwá. Aá híī yá ācɛ nēe bá ā ɔdā dúúmā ŋ́, ohígbū ka é wɛ ugbɔga kú ɔlɛ́ um.” 9Amáŋ é da Ulɔ́tu kahíníī, “Nyɛ̄ɛ̄ ŋmá ɔwɛ, a wɛ ílɔ́wá, ɔ̄nyɛ nɛ̄ a wɛ ɛ́ɛ́ nɛ̄ a gē da alɔ ɔdā nɛ̄ alɔ géē yá āa? Nyɛ̄ɛ̄ ŋmá ɔwɛ, ámāŋ alɔ géē yá uwɔ ɔdōbɔ̄bí fíyɛ́ uwā.” É le Ulɔ́tu kwu ga igbīhi, anɔ́ɔ é le tá ɛgiyí ɔwɛ ā kéē ca ɔ́ á. 10Amáŋ ācɛ ɛpa nēe bá ipú inu ā, nā abɔ̄ daa wɛ̄ɛcɛ, le Ulɔ́tu pi wā inu, anɔ́ɔ é le ɔwɛ gwū á. 11#2 Aɔ́cɛ́ 6.18Anɔ́ɔ ē lɛ obūdeyī tū klá ācɛ nēe bɛ́ɛcɛ ā, cɛ́ɛ́ kéē híī jé ɛgiyí ɔwɛ gɛ ŋ́.

Ulɔ́tu nyɛ̄ɛ̄ ŋmá Usɔ́dɔm

12Ācɛ ɛpa ā da Ulɔ́tu kahíníī, “Ɔ́dāŋ nɛ̄ a lɛ ɔ̄cɛ ɔhá dúúmā amānyā gɛɛ, kwu aóhilí uwɔ nɔ̄nyīlɔ, mɛ́mla ayí uwɔ nɔ̄nyīlɔ mɛ́mla ayínɔ̄nyā ámāŋ ɔ̄cɛ dúúmā nɛ̄ a lɛ ipú igelī nyā, lɛ uwá kpó bɛ̄cɛ ŋmá amānyā. 13Ohígbū ka alɔ gaá je amānyā yíífi, ohígbū ka ɛlā nēé kpó ce ācɛ amānyā le Ɔwɔicō ā le nwuné iyɔ̄bū nū ɛɛ́. Óndú ā ke lɛ alɔ tɛ̄hɔ̄ ká ālɔ̄ gaá lɛ ɔ́ yíífi.” 14Anɔ́ɔ Ulɔ́tu le bɛ̄cɛ gaá le ka lɛ aóhilí nū nɔ̄nyīlɔ, nēe gaá lɛ ayí nū nɔ̄nyā ā kahíníī, “Aá nyɛ̄ɛ̄ ŋmá amānyā ohígbū ka, Óndú ā gaá je amānyā yíífi ɛɛ́.” Amáŋ, aóhilí nū ā gbɛlá ka ɔ́ɔ yɔ̄ ī hiijā.

15Eko nɛ̄ ɔ̄cɔ̄ɔ̄cī gā ā, aálelékwū-ōtɛ̄hɔ̄ ā ŋmúleyīkwū tū Ulɔ́tu kahíníī, “Cāŋjɛ ká ā kwú ɔnyā uwɔ mɛ́mla ayí uwɔ nɔ̄nyā ɛpa nēe bá amānyā ā ú kpó, ká ā nyɛ̄ɛ̄ ŋmá amānyā, cɛ́ɛ́ ká aá híī je yíífi ipú italā nēé gáā yá igelī nyā ŋ́.” 16#2 Upít 2.7Ulɔ́tu yɔ̄ ī pīyɔkwajɛ, amáŋ Óndú ā le eyīnyinyi nū má, anɔ́ɔ ācɛ ā le abɔ̄ tū anú mɛ́mla ɔnyā nū abɔ̄ mɛ́mla ayí nū nɔ̄nyā ɛpa ā, le uwá kpó bɛ̄cɛ ŋmá ipú igelī ā á. 17Eko nēé le uwá kpó bɛ̄cɛ ā, anɔ́ɔ éyi kú uwā da uwá kahíníī, “Áā kwinya ohígbū oyēeyī ká aá, aá pīyeyī má igbīhi ɛ́ɛ́ nɛ̄ aá kōō ī māhayi ɔpɛ́ dúúmā ŋ́. Aá kwinya ga ɛyí ɛfu ā, ohígbū nɛ̄ aá géē je yíífi.”

18Amáŋ Ulɔ́tu tá uwā ohi kahíníī, “Ehée, aóndú um, ó híī lɛ ā ŋ́.” 19Aá le ɔdā olɔhi nɛ̄hi yá gā um klla le oyēeyī kú um nyatá ɛɛ́. Amáŋ ɛfu ā le ligbó nɛ̄hi ŋmá amānyā. Ámíyā géē yá um, nɛ̄ n géē kwú gbɔbū ɛ́ɛ́ ká n gaajɛ abɔ́ɔ, cɛ́ɛ́ n gekwú. 20Aá má ipɔ́lɛ́ nɛ̄ŋcɛ́ nōo kwu ɔ́ɔmā a? Ó kwu um ajaajɛ fíyɛ́. Ká ālɔ̄ lɛ kwu ga abɔ́ɔ cɛ́ɛ́ alɔ le wi. Ó kē wɛ ipɔ́lɛ́ nɛ̄ŋcɛ́,.”

21Anɔ́ɔ aálelékwū-ōtɛ̄hɔ̄ ā tá ɔ̄ ohi kahíníī, “N cɛ̄, nyɔ̄ abɔ́ɔ, ń gaá je ipɔ́lɛ́ ɔ́ɔmā yíífi gɛ ŋ́. 22Nyɔ̄ fíyaa! Kwinya nyɔ̄ abɔ́ɔ! N gaá yá ɔdā dúúmā ŋ́ gbéeko nɛ̄ aá i tá abɔ́ɔ.” Ohígbū ka Ulɔ́tu hī ipɔ́lɛ́ ā ka ɔlɛ́ nɛ̄ŋcɛ́ ā, iyē kú ipɔ́lɛ́ ɔ́ɔmā kwú pīya Usówa.#fr 19.22 UsówaIyē ā lɛbɛ̄ɛka “ɛnɛ̄ŋcɛ́” okónu kú ācɛ Uhíbru ā.

É le Usɔ́dɔm mɛ́mla Ugomóra yíífi

23Ɛnɔ yɔ̄ ī bɛ̄cɛ eko nɛ̄ Ulɔ́tu gaajɛ Usówa ā. 24#Umát 10.15; 11.23,24; Ulúk 10.12; 17.29; 2 Upít 2.6; Ujúd 1.7Anɔ́ɔ Óndú ā le yá ka ɔlá nōo lɛbɛ̄ɛka ɔlá kú ɛcōwō kóō yā bɛ̄ɛka ɔwɔ ā ŋmá ɔkpáncō klá aígelī nēé hī ka Usɔ́dɔm mɛ́mla Ugomóra á. 25Anɔ́ɔ ó kwú ɛjɛ̄ɛ̄jī aígelī ā kpó yíífi, kwu odúúdú ɔpɛ́ ā mɛ́mla odúúdú ācɛ nēe lā ipú aígelī ā klla mɛ́mla ɛjɛ̄ɛ̄jī ɔdā nēe gē jɛ́ ŋmá ajɛ ā. 26#Ulúk 17.32Amáŋ, ɔnyā kú Ulɔ́tu le eyī pīya le igbīhi má, anɔ́ɔ Óndú ā kwú ɔ̄ ú pīya ɛcɔ̄ kú ɔmā nōo kwaajɛ bɛ̄ɛka ɔ́kpá ā. 27Anɔ́ɔ Ébrahām le yɛ ɔ̄cɔ̄ɔ̄cī le tá ɛga nōó māháyi iyɔ̄bū Óndú ā. 28Ó le eyī pīya má Usɔ́dɔm mɛ́mla Ugomóra mɛ́mla odúúdú ajɛ nēe bá ɔpɛ́ ā, anɔ́ɔ ó má ódūdū ŋmá ajɛ gicō bɛ̄ɛka ódūdū kú ɔlá kú útuló ā. 29Eko nɛ̄ Ɔwɔicō je ɛjɛ̄ɛ̄jī aígelī kú ɔpɛ́, ɛga nɛ̄ Ulɔ́tu lā ā yíífi ā, ó le blakwu Ébrahām, anɔ́ɔ ó cɛ̄ lɛ Ulɔ́tu le kwu ŋmá abɔ́ɔ oyēeyī á.

Ohūtū kú ācɛ Umówābu mɛ́mla Ámɔ̄ri

30Abɔ̄ Ulɔ́tu le ufi yá ā, ó nyɛ̄ɛ̄ ŋmá Usówa, gaá lā ipú ɔ̄gɛ̄cɔ̄ ɛyí ɛfu mɛ́mla ayí nū nɔ̄nyā ɛpa ā. 31Adá kú nū ā da ɔyínɛ́ nū nɛ̄ŋcɛ́ ā kahíníī, “Ádā alɔ yɔ̄ ī je hīla ɛɛ́, ɔ̄cɛ dúúmā ī kē yɔ̄ ipú odúúdú ɛcɛ ā#19.31 odúúdú ɛcɛ; ámāŋ ipú ajɛ nyā nōo géē wā í lɛ alɔ ɔnyā kú ālɔ̄ ma ayí gɛ ŋ́. 32Wā kú ālɔ̄ yá kú ádā alɔ kóō lɛ ejé gwá, kú ālɔ̄ gaá gwutá mla anú, cɛ́ɛ́ ká ālɔ̄ lɛ ayí ma ŋmá iyē kú ádā alɔ.” 33Otú ɔ́ɔmā ā, é le yá ká ádā uwā kóō lɛ ejé gwá, anɔ́ɔ ɔyínɔ̄nyā aflɛ́yí kú nū ā gaá le gwutá mla anú á. Ulɔ́tu í jé eko nōó wā gaá gwutá mla anú klla cāŋjɛ ā ŋ́, ohígbū ka ejé lɛ ɔ́ kwú. 34Oŋmɔ́ɔ̄cī nū ā, adá ā da ɔyínɛ́ nū nɛ̄ŋcɛ́ ā kahíníī, “Ami gbo mla ádā alɔ otú ɛ́nɛ̄ á. Ālɔ̄ yá kóō lɛ ejé gwá otú mā kpɔ́, cɛ́ɛ́ ká ā gaá gwutá mla anú, cɛ́ɛ́ kú ɔnyɔɔnyɛ ká ālɔ kóō lɛ ɔyí lɛ ŋmá iyē nū.” 35Anɔ́ɔ é le yá ká ádā uwā ā kóō lɛ ejé gwá otú ɔ́ɔmā kpɔ́, anɔ́ɔ ɔyí nū nɔ̄nyā nɛ̄ŋcɛ́ ā gaá gwutá mla anú á. Ulɔ́tu í klla jé eko nōó wā gaá gwutá mla anú mla eko nōó cāŋjɛ ā ŋ́. Ohígbū ka ejé le ɔ́ kwú kpɔ́. 36Ɔwɛ ɔ́ɔmā ā Ulɔ́tu le ayí nu nɔ̄nyā ɛpɛlɛ́ɛpa ā jipú. 37Adá ā le ɔyí ma, anɔ́ɔ ó kwú iyē ú ce ɔ́ ka Umówābu á. Anú wɛ ádáádā kú ācɛ Umówābu nēe bá jāā kwu eko nēé tɔ́kpá nyā á. 38Ɔyí nū nɔ̄nyā nɛ̄ŋcɛ́ ā le ɔyí ma dúú, anɔ́ɔ ó kwú iyē ú ce ɔ́ ka Ubenámmī á. Anú wɛ ádáádā kú ācɛ Ámɔ̄ri jāā kwu eko nēé tɔ́kpá nyā á.

Currently Selected:

OHÚTU 19: IFBCL

Highlight

Copy