OHÚTU 31

Ujékɔ̄pu le kwu ŋmá ɛgiyí Ulában

1Ujékɔ̄pu le pó ka ayí kú Ulában ɛ́ɛ yɔ̄ gē ka kahíníī, “Ujékɔ̄pu le odúúdú aɔ́dā nēe wɛ ákú ádā alɔ ā kpó ɛɛ́. Odúúdú agbénū kú nū ŋmá ɔdā nɛ̄ ádā alɔ lɛ ā.” 2Ujékɔ̄pu le má ka, Ulában ɔ́ɔ̄ gáā gbonɛnɛ lɛ anúɔ bɛ̄ɛka otɛtɛ ā ɛ́ɛ́ gɛ ŋ́. 3Anɔ́ɔ Óndú ā da Ujékɔ̄pu kahíníī, “Kwúcē gaajɛ kú ɔlɛ́ ádā uwɔ, ɛgiyí ācɛ ɔlɛ́ uwɔ. N géē yɔ̄ mla uwɔ.” 4Anɔ́ɔ Ujékɔ̄pu le Urécɛ̄lu mɛ́mla Ulɛ́ya hīgwú ga ipácí, ɛga nɛ̄ aálá kú nū bá ā. 5Anɔ́ɔ ó da uwá kahíníī, “N le má ka ádā aá í gbonɛnɛ gā um bɛ̄ɛka otɛtɛ ā ɛ́ɛ́ gɛ ŋ́. Amáŋ, Ɔwɔicō kú ádā um ā yɔ̄ mla um. 6Aá ɛpɛplɛ́pa jé ka n yúklɔ́ lɛ ádā aá ŋmá odúúdú ɔfú kú um. 7Nááná, ó le um pīyatū, le ulé kú um pīyabɔ̄ igbo igwó. Amáŋ Ɔwɔicō í je ɛga lɛ ɔ́ kóō yá um ɔdā dúúmā ŋ́. 8Eko dúúmā nɛ̄ Ulában le ka kahíníī, ‘Odúúdú aɛ́wū ohíkākā ā géē wɛ ulé kú uwɔ á’ nɛɛ, cɛ́ɛ́ odúúdú aɛ́wū ā gē ma ayí ohíkākā. Ɔ́dāŋ koó klla ka, ‘Aɛ́wū ōtína cílɛ́cílɛ́ géē wɛ ulé kú uwɔ á’ nɛɛ, odúúdú aɛ́wū ā kē í ma ayí otína cílɛ́cílɛ́. 9Ɔwɛ ɛ́gɛ́nyā nɛ̄ Ɔwɔicō le kpó aɔ́dāajɛ kú ádā aá ŋmá ɛgiyí nū, je kpó gā um á. 10Eko nɛ̄ aɔ́dāajɛ gē ce īyī uwā a, n le ɔ̄na nā anɔ́ɔ n le má ka aópī nēe bá ī ce aɛ́wū wɛ ohíkākā ɛyɛ́ɛ́yɛ́yí, mɛ́mla otína cílɛ́cílɛ́. 11Alelékwū-ōtɛ̄hɔ̄ kú Ɔwɔicō ā kɛlā gā um ipú ɔ̄na kahíníī, ‘Ujékɔ̄pu!’ N tóóhi ka, ‘Ēē, ami yɔ̄ á.’ 12Anɔ́ɔ ó kahíníī, ‘Je eyī gicō ká ā má ɔ̄, odúúdú aópī nēe bá ī ce aɛ́wū aā wɛ ohíkākā mɛ́mla otína cílɛ́cílɛ́ ā. Ohígbū ka n lɛ ɔdā nɛ̄ Ulában yɔ̄ ī yá uwɔ ā má ɛɛ́. 13#Ohút 28.18-22Ami wɛ Ɔwɔicō nōo wā ɛgiyí uwɔ Ubɛ́tɛlu, ɛga nɛ̄ a le anɔ̄ tū ɛcɔ̄ ɛyí, klla cokónu gā um ā. Abālɔbányā, cāŋjɛ ká ā nyɛ̄ɛ̄ ŋmá ajɛ nyā, ká ā kwúcē ga ajɛ ɛga nēé ma uwɔ ā.’”

14Anɔ́ɔ Urécɛ̄lu mɛ́mla Ulɛ́ya tá Ujékɔ̄pu ohi kahíníī, “Alɔ í lɛ ukpɛ̄ dúú ɔlɛ́ ádā alɔ gɛ ŋ́. 15Ó je alɔ bɛ̄ɛka aílɔ́wā āa. Ó kwú alɔ ī kpó lá, abālɔbányā ó kē kwú ije nēé kpó tū alɔ ā í kpó ŋmó ŋmá ajɛ ɛɛ́. 16Odúúdú agbénú nyā nɛ̄ Ɔwɔicō kpó ŋmá ɛgiyí ádā alɔ ā, wɛ ákú alɔ mɛ́mla ayípɛ́ ɔlɛ́ alɔ mɛ́ɛ́nɛ. Yá ɔdā dúúmā nɛ̄ Ɔwɔicō da uwɔ ā mɛ́ɛ́nɛ.”

17Anɔ́ɔ Ujékɔ̄pu cāŋjɛ le ayí nū mɛ́mla anyā ɔlɛ́ nū kpó ce ɛyí aínyankwūlūmī. 18Anɔ́ɔ ó le odúúdú aɛ́wū kú nū mɛ́mla odúúdú aɔ́dāajɛ ɔhá nōó lɛ ā, mɛ́mla odúúdú agbénú kú nū nōó lɛ Umɛsopotámīya ā, kpó kóō gā ajɛ Ukénan, ɛgiyí ádā nū, Áyísīki á. 19Ulában le yɛ gaá wá aálá kú nū ɔnwū, anɔ́ɔ Urécɛ̄lu kwú ɛka ocɛyí kú ɔlɛ́ ádā nū ú uwī á. 20Ujékɔ̄pu le Ulában, ɔ̄cɛ Áram ā plla abɔ̄ ó cɛ̄ lɛ ɔ́ jé ka anúɔ gáā nyɛ̄ɛ̄ ŋ́ mā. 21Anɔ́ɔ ó le kwu mɛ́mla odúúdú aɔ́dā nōó lɛ ā. Ó le hɛ́ Ísu nēé hī ka Uyúfrētīisi ā bēhé, lɛyíkwu ɛyí ɛfu kú Ugílɛ̄di.

Ulāban nu Ujékɔ̄pu inya ga ɔwɛ

22Eko nēé le da Ulában ɛ̄cī ɔ́mɛtā ka Ujékɔ̄pu ɔ́ɔ le kwu ā, 23ó lɛ ācɛ ɔlɛ́ nū kpó, anɔ́ɔ ó nū Ujékɔ̄pu ɛ̄cī ahāapa jāā gbéeko nēé le ɔ́ kwú ɛfu kú Ugílɛ̄di. 24Amáŋ Ɔwɔicō gā ɛgiyí Ulában, ɔ̄cɛ Áram ā ipú ɔ̄na otú gbɔbū kóō gaajɛ ɛgiyí Ujékɔ̄pu ā, anɔ́ɔ ó da ɔ́ kahíníī, “Le ɛlá kwu ɔ́ ka ā híī fu ɔ́ ɔnū ɔwɛ dóódu fúlufúlu ŋ́. 25Ujékɔ̄pu le áklɔ̄kpɛ kú nū cē kwu ɛyí ɛfu éyi, Ulában mɛ́mla aɔ́máapú nū kē le ákú uwā cē kwu ɔlɛ́ ɛfu kú Ugílɛ̄di. 26Anɔ́ɔ Ulában da Ujékɔ̄pu ɔ̄kā kahíníī, “Ɔdíyá nɛ̄ a le um plla le ayínɔ̄nyā kú um kpó kwu bɛ̄ɛka ācɛnyā nēé kwú eko ɛfú ā a? 27Ɔdíyá nɛ̄ a le um plla le kwu wɛɛlɛ, nɛ̄ á ka gā um ŋ́ mā ā? Ɔ́dāŋ ka á yá ɔdā nɛ̄ a yá nyā ŋ́ nɛɛ, ń géē yɛ í lɛ uwɔ bītá mɛ́mla uce mɛ́mla ijā ō he nɛ̄hi. É kē í yɛ í lɛ uba mɛ́mla íyōyō gwō tá aá ɔkwu. 28Ɔdīyá nɛ̄ á jɛga gā um ká n̄ lɛ ayááyí um mɛ́mla ayí um nɔ̄nyá kwú bɔ́tū ŋ́ mā? Ucē kú olíla nɛ̄ a yá yɔ̄ á! 29N lɛ ɔfú nɛ̄ n gē yá uwɔ odée glá, amáŋ Ɔwɔicō kú ádā uwɔ pi um ahɔ̄ ka n̄ híī fu uwɔ ɔnū ɔwɛ dóódu ŋ́. 30N jé ka a le kwu ohígbū ka ɔtū nwula nwula ká ā cīgbīhi ga ɔlɛ́ yá uwɔ nɛ̄hi. Amáŋ ɔdíyá nɛ̄ a je ɛka ocɛyí kú um uwī ā?”

31Ujékɔ̄pu tá Ulában ohi kahíníī, “Ohígbū ka n yúufi ka a géē mīyɛ ayínɔ̄nyā kú ɔlɛ́ uwɔ ŋmá abɔ̄ um. 32Ɔ̄cɛ dóódu nɛ̄ a í má ɛka ocɛyí kú uwɔ ɛgiyí nū ā, é géē je ɔ̄cɛ ɔ́ɔmā ŋmó. Ācɛ ɔlɛ́ alɔ nēe bá nyā ā wɛ ijáalí. Tíne ɔdā dóódu nēe wɛ ákú uwɔ ā, cɛ́ɛ́ kú ā kwú kpó.” Ujékɔ̄pu í kē jé ka Urécɛ̄lu ɔ́ɔ je ɛka ocɛyí kú Ulában uwī ŋ́. 33Anɔ́ɔ Ulában le tá ipú áklɔ̄kpɛ kú Ujékɔ̄pu, anɔ́ɔ ó le yɛ tá ipú áklɔ̄kpɛ kú Ulɛ́ya, mɛ́mla ákú aɔ́fiyɛ nɔ̄nyā ɛpa ā. Amáŋ ó má ɛka ocɛyí kú nū ā ŋ́. Anɔ́ɔ ó le tá ipú áklɔ̄kpɛ kú Urécɛ̄lu. 34Urécɛ̄lu kwú ɛka ocɛyí ā ú, anɔ́ɔ ó kwú ɔ̄ ú tá ipú ɛkpa kú ɔdōcīce o cɛyí inyankwūlūmī nōó cīce ɛyí nū āa. Ulában le odúúdú ipú áklɔ̄kpɛ ā jila amáŋ ó má ɔ̄ ŋ́. 35Urécɛ̄lu da ádā nū ka, a híī cɔ̄nū mla um ŋ́, ohígbū ka ń cāŋjɛ iyɔ̄bū uwɔ glá ɛ́ɛ́ ŋ́. N yɔ̄ eko ɔ̄yā kú um.” Ulában le ɛga dóódu tíne ɛka ocɛyí kú nū ā, amáŋ ó má ɔ̄ ŋ́.

36Anɔ́ɔ Ujékɔ̄pu kwú cɔ̄nū á. Anɔ́ɔ ó dɔɔ̄ka kahíníī, “Ɔdōōbɔ̄bí nyá nɛ̄ n yá āa? Ɔdí wɛ íne nɛ̄ n bīya ɛ́ɛ́ nɛ̄ a gē nū um inya ká ā lɛ um kwú āa? 37A lɛ odúúdú iyó kú um kpó jila ɛɛ́, ɔdí kú ɔlɛ́ uwɔ nɛ̄ a má ā? Kwú ɔ̄ ú tá iyɔ̄bū ācɛ ɔlɛ́ um mɛ́mla ācɛ ɔlɛ́ uwɔ, kéē lɛ ɛpɔ̄ kú ami mɛ́mla awɔ hɛ́. 38Iháyí ofu yɔ̄ mɛ́ɛ̄ á, nɛ̄ n hímáyī yɔ̄ pī uwɔ, aálá kú uwɔ mɛ́mla aɛ́wū kú uwɔ í plla ɔyí ŋ́. Ń kē lé ɛbɛ́ omlede kú uwɔ dúúmā ŋ́. 39Eko dóódu nɛ̄ ɛbɛ́ obɔ̄bí le álá ŋmó nɛɛ, n géē mīyɛ ufu ā ce iyī um ɛyí. Ń gē je uwá gé lɛ uwɔ gē kɔkɔ ka ń jé ɔkwu kú ikwū kú uwā ŋ́ nɛɛ ŋ́. A le ukɔ́ tū ka ɔdā dóódu nēé kwú uwī otú mɛ́mla ɛnɔ, amíyɔ̄ lɛ ulé nū cílá. 40Ɛ́gɔ́ɔmā nɛ̄ āhɔ̄ kú um lɛ ā yɔ̄ abɔ́ɔ á. Ɛnɔ gē cɛ̄ um ɔlɛ́ɛnɔ, ofū kē ī ŋmó um otú. N kē ī gbiyɔ̄lā glá ŋ́. 41Ɛ́gɔ́ɔmā nōó hímáyī lɛ iháyí ofu dúúdú nɛ̄ n yɔ̄ mla uwɔ ā á. N yúklɔ́ gā uwɔ iháyí igwɛ́ɛnɛ ká n lɛ ayí uwɔ nɔ̄nyā ɛpa ā kpó lɛ. N klla kē yúklɔ́ iháyí ɛhīlī ohígbū aɔ́dāajɛ kú uwɔ. Nááná a pīya ulé kú um abɔ̄ igbigwó. 42Ɔ́dāŋ ka Ɔwɔicō kú ádā um, Ɔwɔicō kú Ébrahām mɛ́mla Áyísīki í yɛce um ŋ́ nɛɛ, ɔkwɔɔkwɛyi á géē yɛ í lɛ um nū ŋmá ɛgiyí uwɔ abɔ̄ áncā. Ɔwɔicō le ōwē mɛ́mla úklɔ́ kú abɔ̄ kú um má, ohígbū ɔ́ɔmā nōó ŋmó uwɔ ɛpɔ̄bí otú ɛ́nɛ̄ á.”

Ulában mɛ́mla Ujékɔ̄pu le okónu ce

43Anɔ́ɔ Ulában tá Ujékɔ̄pu ohi kahíníī, “Ayínɔ̄nyā nēe bá nyā wɛ ayí um, ayí nēé ma ā wɛ ayí um, aɔ́dāajɛ ā wɛ ákú um, odúúdú aɔ́dā nɛ̄ a má amānyā ā wɛ ákú um. Amáŋ ícɛ nyā ó lɛ ɔdā dúú nɛ̄ n yá glá nōo í bī ayínɔ̄nyā kú um mɛ́mla ayí kláajɛ glá gɛ ŋ́. 44N le tútū ká n̄ cokónu mla uwɔ ɛɛ́. Alɔ lɛ ɛcɔ̄ túbá ɛgiyí éékpó kóō tá alɔ ɛlá kwu okónu nɛ̄ alɔ í ce āa.” 45Anɔ́ɔ Ujékɔ̄pu kwú ɛcɔ̄ éyi ú anɔ́ɔ ó kwú ɔ̄ ú kwaajɛ kóō lɛ pīya ɔdōblatū á. 46Anɔ́ɔ Ujékɔ̄pu da ācɛ ɔlɛ́ nū kahíníī, “Aá lɛ ɛcɔ̄ túbá,” Anɔ́ɔ é le ɛcɔ̄ tīkwū bá á. Anɔ́ɔ é le ɔdōlé lé, ɛga nēé tú ɛcɔ̄ bá āa. 47Ulāban hī iyē kú abɔ́ɔ ā ka Ujɛga-sahadúta, #31.47 Ujɛga-sahadúta: Ɛyí iyē nyā okónu ācɛ Áram wɛ ‘ɛcɔ̄ ō tikwū bá kú ijáalí’ Amáŋ Ujékɔ̄pu hī ɔ̄ ka Ugálīīdi#31.47 UgálīīdƐyí kú iyē nyā okónu Uhíbru wɛ ‘ɛcɔ̄ ō tīkwū bá kú ijáalí’ 48Ulában da Ujékɔ̄pu kahíníī, “Ɛcɔ̄ nēé tīkwū bá nyā géē wɛ ɔdōblatū alɔ ɛplɛ́ɛpa.” Ɔ́ɔmā yá ɛ́ɛ́ nēé hī iyē kú abɔ́ɔ ka Ugáliid á. 49Ulában klla kahíníī, “Ká Óndú ā kóō leyīkwu alɔ eko nɛ̄ alɔ le fō gwiyī alɔ tá ā.” Anɔ́ɔ é hī abɔ́ɔ ka Umíspa. #31.49 Umíspa: Iyē nyā okónu Uhíbru lɛbɛ̄ɛka ɛlā nēé ka ka “ɛga nɛ̄ ɔ̄cɛ gē leyīkwu odée ŋmá” 50Ulában kɛlā kpɔ́ ka, Ɔ́dāŋ ka a lɛ ōwē yá ayí um nɔ̄nyā ámāŋ ka a lɛ anyā ɔhá lɛ, nááná nɛ̄ ń má uwɔ glá ŋ́ mā, bla ka Ɔwɔicō yɔ̄ ī má alɔ.

51Ɛcɔ̄ nɛ̄ n tīkwu bá ɔtāhɛ̄ alɔ mɛ́mla ɛcɔ̄ kú oblatū ā bá yɔ̄ á. 52Ɛcɔ̄ ōtīkwū bá nyā mɛ́mla ɛcɔ̄ kú oblatū nyā wɛ ijáalí kú alɔ. Ń gáā gla ɛcɔ̄ ō tīkwū bá ámāŋ ka ɛcɔ̄ ō blatū nyā gaá kpɔ́fú kwu uwɔ ŋ́. Á kē gáā gla uwá gaá kpɔ́fú kwu um glá ŋ́. 53Ɔwɔicō kú Ébrahām mɛ́mla ákú Unáhɔ#31.53 Ébrahām...Unáhɔ: Ébrahām wɛ ádā kú Ujékɔ̄pu nɔ̄nyākwɔ́cɛ á anɔ́ɔ Unáhɔ kē wɛ ádā kú Ulában nɔ̄nyākwɔ́cɛ á géē kɛpɔ̄ kú ami mɛ́mla awɔ á.” Anɔ́ɔ Ujékɔ̄pu bī iyē kú Ɔwɔicō kú Áyísīki le ɔkpá gbo á. 54Ujékɔ̄pu le ɔdāajɛ kú nū éyi ŋmó anɔ́ɔ ó kwú ɔ̄ ú gwɛ́ɛya ɛyi ɛfu ā, anɔ́ɔ ó le ācɛ ɔlɛ́ nū hīgwú kéē wā gaá lé ɔdōlé. Eko nēé le lé kwɛyí ā, é le gbo ɛyí ɛfu ā otú ɔ́ɔmā.

55Ɔ̄cɔ̄ɔ̄cī blibli kú oŋmɔ́ɔ̄cī nū ā, Ulában cāŋjɛ, le ayí nū nɔ̄nyā mɛ́mla ayááyí nū kwú bɔ́tū anɔ́ɔ ó le ŋ́ŋmóō tú uwā á. Anɔ́ɔ ó nyɛ̄ɛ̄ gbɔɔ́ ō ga ɔlɛ́ nū á.

Currently Selected:

OHÚTU 31: IFBCL

Highlight

Copy