OHÚTU 33

Ujékɔ̄pu jila mla Ísɔ

1Ujékɔ̄pu je eyī gicō, anɔ́ɔ ó mā Ísɔ yɔ̄ ī wā mɛ́mla ācɛ úlā nēe bá mla anú ā. Anɔ́ɔ ó le ayípɛ̄ ɔlɛ́ nū kɔ̄ lɛ Urécɛ̄lu, Ulɛ́ya mɛ́mla anyā ōcɛ̄hɔ̄ ɛpa kú ɔlɛ́ nū ā. 2Ó kwú anyā ōcɛ̄hɔ̄ mɛ́mla ayípɛ̄ ɔlɛ́ uwā ā ú kpó bá ɔbū. Ulɛ́ya mɛ́mla ayípɛ̄ ɔlɛ́ nū kwúcē uwá, Urécɛ̄lu mɛ́mla Ujósɛ̄fu tá ámōōmɛ á. 3Ujékɔ̄pu abɔ̄yī nū gbɔbū lɛ uwa. Ó túkpɛɛ́ igbo ahāapa abɔ̄ ó yɔ̄ ī túbla ɔyínɛ́ nū, Ísɔ ajaajɛ ā.

4Amáŋ Ísɔ le inya kwu gaá jīla anú ɔwɛ, lɛ ɔ́ kwú bɔ́tū. Anɔ́ɔ uwá ɛpɛlɛ́ɛpa gbɔɔ́ ō jikwū á. 5Eko nɛ̄ Ísɔ pīyeyī le ācɛnyā mɛ́mla ayí ā má ā, ó da ɔ́ ɔ̄kā kahíníī, “Ānyɛ bá mɛ́mla uwɔ yɔ̄ ā?” Ujékɔ̄pu tóohi kahíníī, “Ɔkpani, ayí nɛ̄ Ɔwɔicō méyīnyinyi um kpó gā um ā bá abɔ́ɔ á.” 6Anɔ́ɔ anyā ōcɛ̄hɔ̄ ā mɛ́mla ayí uwā le pɛ́ wā ajaajɛ, anɔ́ɔ é le túkpɛɛ́ lɛ Ísɔ á. 7Ulɛ́ya mɛ́mla ayí nū le pɛ́ wā ajaajɛ klla túkpɛɛ́ lɛ ɔ́ dúú. Ācɛ ámōōmɛ ā wɛ Ujékɔ̄pu mɛ́mla Urécɛ̄lu. É le pɛ́ wā ajaajɛ klla le túkpɛɛ́ lɛ ɔ́ dúú. 8Ísɔ dɔɔ̄kā kahíníī, “Ɔdí nɛ̄ a bī ɔtū ɛ́ɛ́ nɛ̄ a tū ācocɛ̄hɔ̄ mɛ́mla aɛ́bɛ́ ā ɛhɔ̄ fu um ā?” Ujékɔ̄pu tá ɔ́ɔ̄ ohi kahíníī, “O yá ɛ́ɛ́ kú ɔtū kú uwɔ kóō gāajɛ nɛ̄.” 9Amáŋ, Ísɔ kahíníī, “N le lɛ jɛ̄ iyī um ɛɛ́, ɔyínɛ́ um. Lɛ ɔdā nɛ̄ a lɛ ā kpó tū lɛ iyí uwɔ.” 10Anɔ́ɔ Ujékɔ̄pu kahíníī, “Ehée, ɔ́dāŋ ka ɔtū kú uwɔ gāajɛ ɛgiyí um ɔkwɛ̄yi, mīyɛ ɛhi kú um ŋmá abɔ̄ um. Eyī kú uwɔ nɛ̄ n má ícɛ nyā lɛbɛ̄ɛka eyī kú Ɔwɔicō nɛ̄ n má ɔkwɔ̄ɔ̄kwɛ̄yi ā. Ofíyɛ́ dúú, ɛ́gɛ́nɛ̄ a mīya um lɔɔlɔhi lɛ ā. 11Kóocōō mīyɛ ɛhi nɛ̄ n bī gé lɛ uwɔ ā. Ɔwɔicō le eyīnyinyi um má nɛ̄hi anɔ́ɔ ó kpó ɛjɛ̄ɛ̄jī aɔ́dā nēe ce um ɛgbá kpɛ́mm ā ga um má.” Abɔ̄ ó gbɔ̄ɔkɔ lɛ ɔ̄ yɛɛ ā, anɔ́ɔ Ísɔ mīyɛ á.

12Anɔ́ɔ Ísɔ kahíníī, “Ālɔ̄ tíkpó nyɔ̄ mɛ́ɛ́nɛ.” 13Amáŋ Ujékɔ̄pu tóohi kahíníī, “Óndú um, a jé ka ayípɛ̄ ā í lɔfú iyē lɛ ā ŋ́, n klla kē ī gbɛlá kwu aálá, mɛ́mla aɛ́na mɛ́mla ayí uwā nɛ̄ŋcɛ́ ā. Ɔ́dāŋ ka ɔ̄cɛ lɛ uwá pikpaa kú iyāwu ō yɛ ligbó ɛcī ékpónú ōfōōfūnū, ɛjɛ̄ɛ̄jī aɛ́bɛ́ ā géē je pɛ́kwú. 14Kóocōō ɔkpani um, gbɔbū ká ā bēē nyɔ̄ mɛ́ɛ́nɛ. Cɛ́ɛ́ n tá uwɔ ɔkwu ɛmɛɛma, ɛ́gɛ́nɛ̄ ɔfú bī ami mɛ́mla ayípɛ̄ mɛ́mla aɛ́bɛ́ ā lɛ glá ā, jāā gbéeko nɛ̄ alɔ gaá le jīla tɔ̄há ajɛ kú Ɛ́dɔm.”

15Ísɔ kahíníī, “Ká n mabɔ̄ ācɛ ɔlɛ́um ōhī nēe bá nyā tá, kéē bá pī uwɔ.” Amáŋ Ujékɔ̄pu tóohi kahíníī, “Ó cɛgbá gɛ ŋ́. N tíne kú ɔtū kú uwɔ kóō gāajɛ ōfōōfūnū nɛ, ɔkpani um.” 16Ísɔ gbɔɔ́ ō pīyɛyí ícíícɛ ɔ́ɔmā gā Uséyɛ, ajɛ kú Ɛ́dɔm. 17Amáŋ Ujékɔ̄pu le tá Usúkɔ̄tu, anɔ́ɔ ó lɛ inu gwó lɛ iyī nū klla le ɛga o kpó aɛ́bɛ́ kú nū tū gwó á. Ohígbū ɔ́ɔmā nēé hī abɔ́ɔ ka Usúkɔ̄tu á. 18Abɔ̄ Ujékɔ̄pu pīyɛyí ŋmá Umɛsopotámīya ɛbɔ́ wā igelī kú Ussɛ́kɛm ajɛ kú Ukénan ā, anɔ́ɔ ó le áklɔ̄kpɛ kú nū cē kwu ipú ajɛ nōo kwu igelī ā ajaajɛ ā. 19#Ujós 24.32; Ujɔ́n 4.5Ó le ajɛ ɔ́ɔmā piíí ā lá ŋmá abɔ̄ kú ayí kú Uhámɔ, nōo wɛ ádā kú Ussɛ́kɛm ā, īkpō kú ije nɛ̄hɛ́ ofɛhɔ̄. 20Ó le ede nōó géē gwɛ́ɛya ɛyí nū ā gwó abɔ́ɔ, anɔ́ɔ ó hī ɔ̄ kahíníī, ‘Ɛ́l-Ɛ́lōhi Ísrɛ̄lu.’ nɛ̄ ɛyí nū wɛ, “Ɔwɔicō nōo wɛ Ɔwɔicō nɛ̄ Ísrɛ̄lu ī gbā ā.”

Currently Selected:

OHÚTU 33: IFBCL

Highlight

Copy