OHÚTU 43

Ayínɛ́ kú Ujósɛ̄fu kwúcē wā Íjīpiti mɛ́mla Ubɛ́njamīn

1Ɔkpɛtā kú ajɛ kú Ukénan le nwuné tōōtɔ̄ɔ̄. 2Eko nɛ̄ é kwú ɔdōlé nɛ̄ é bī ŋmá Íjīpiti ā ú lé kwɛyí ā, ádā uwā da uwá kahíníī, “Aá nyɔ̄ igbɔhá kú aá lɛ ɔdōlé lígíí lá wā gé lɛ alɔ.”

3Amáŋ, Ujúda da ɔ́ kahíníī, “Ɔ̄cɛ ā pīya alɔ ahɔ̄ lɔfú lɔfú ka alɔ ɔ́ɔ í gáā má eyī olɔhi kú anúɔ ŋ́, ń táafú ŋ́, alɔ ɔ́ɔ le ɔyínɛ́ alɔ ā bī wā mɛ́mla alɔ. 4Ɔ́dāŋ ka a géē cɛ̄ kú ɔyínɛ́ alɔ ā kóō nyɔ̄ mɛ́mla alɔ, alɔ géē nyɔ̄ í lá ɔdōlé ā. 5Amáŋ ɔdāŋ ka á cɛ̄ ŋ́, alɔ í gáā nyɔ̄ ŋ́, ohígbū ka ɔnyīlɔ ā tū alɔ ukɔ́ ka anúɔ í gáā cɛ̄ lɛ alɔ wā ɛgiyí anúɔ ŋ́ ɔ́dāŋ ka alɔ í wā mɛ́mla ɔyínɛ́ alɔ ā ŋ́.” 6Ujékɔ̄pu kahíníī, “Ɔdī yā nɛ̄ aá bī ɔtūnōbí gé um o ŋmá lɛ ō da ɔnyīlɔ ɔ́ɔmā ka aá lɛ ɔyínɛ́ ɔhá ā?” 7É tóohi kahíníī, “Ɔ̄cɛ ā yɔ̄ gē da alɔ ɔ̄kā tɛnɛ́tɛnɛ́ lɛyíkwu ipɔ́nū kú alɔ ka, ‘Ádā aá yēeyī kpɔ́ ɛ́ɛ̄? Aá lɛ ɔyínɛ́ ɔhá ɛ́ɛ́ gɛɛ?” Alɔ kē cíkā ō cíla ɔ̄kā kú nū ā piíí. Ɔwɛ nyá nɛ̄ alɔ lɔfú jé koó í da alɔ ka alɔ lɛ ɔyínɛ́ alɔ bī wā ā a?” 8Anɔ́ɔ Ujúda da ádā nū kahíníī, “Mā ɔyí ā tá ga um, kú ālɔ̄ gbɔɔ́ ō nyɔ̄ bōōbū. O yá ɛ́ɛ́ kú ɔ̄cɛ dóódu kóō kwú ɛmiyɛ ŋ́ mā. 9N géē je oyēeyī kú um kwɛyí nū cɛ́ɛ́ ká ā bī kwɛyí nū. Kwú ɛjɛ̄ɛ̄jī unwalu kú nū í ce um ɛyí, ɔ́dāŋ ka ń je ɔ́ cīgbīhi gé lɛ uwɔ oyēeyī ŋ́. 10Ɔ́dāŋ ka alɔ í kpéeko bónū ŋ́ nɛɛ, alɔ í géē le yɛ pīyɛyí igbɛɛpa ɛɛ́.”

11Anɔ́ɔ ádā uwā da uwá kahíníī, “Ɔ́dāŋ ka ɛ́gɛ́nyā nōó í lɛ á nɛɛ, aá le ɛkpa kú aá tū mu mla aɔ́dā olɔhi fíyɛ́ dúú kú ajɛ ā, cɛ́ɛ́ aá kwú kpó gé lɛ igbómína ā. Aá bī anɔ̄, ɛnwú, okwumɛ́, mɛ́mla īkpɔ̄cí kú Upistákiyɔ mémla álmɔ̄ndu. 12Aá bī ije ɛga ɛpa fíyɛ́ ɛ́gɛ́nɛ̄ aá bī nyɔ̄ aflɛ́yí ā, aā kwú ije nēé je tá ipú ɛkpa kú aá ā ú bī nyɔ̄, eko ōhī é je mlanyī tá ipú ɛkpa kú aá nɛ ū. 13Aá kwú ɔyínɛ́ aá ú dúú, kú aá gbɔɔ́ ō nyɔ̄ ɛgiyí ɔ̄cɛ ɔ́ɔmā ā. 14Ɔwɔicō nōo lɔfú fíyɛ́ dúú ā, kóō yá kú ɔ̄cɛ ɔ́ɔmā kóō méyīnyinyi aá, cɛ́ɛ́ ó kwú Ubɛ́njamin mɛ́mla ɔyínɛ́ aá ɔhá ā í kwúcē igbīhi lɛ aá. Ɛjī kwɛjī lɛ ami nɛ̄, ɔ́dāŋ ka ayí um géē kwú piíí nɛɛ, é géē kwú.” 15Anɔ́ɔ ayínɛ́ ā le ɔdā kú ɛhi ā, ije ā mɛ́mla Ubɛ́njamīn kpó, anɔ́ɔ é nyɛ̄ɛ̄ le tá Íjīpiti gaá háyī iyɔ̄bū kú Ujósɛ̄fu á. 16Eko nɛ̄ Ujósɛ̄fu lɛ Ubɛ́njamīn má mɛ́mla uwá ā, ó da ɔ̄cɛ ō yá ɔdōlé kú ɔlɛ́ nū ā kahíníī, “Lɛ ācɛ ā bī wā inu, ká ā lɛ ɔdāajɛ éyi ŋmó ká ā lɛ ɔ́ tútū, ohígbū ka ācɛ ā géē lé ɔdōlé mɛ́mla um ɔlɛ́ɛnɔ.” 17Ɔ̄cocɛ̄hɔ̄ ā le yá ɛ́gɛ́nɛ̄ Ujósɛ̄fu da ɔ́ ā, anɔ́ɔ ó le ayínɛ́ ā kpó wā inu gé lɛ Ujósɛ̄fu á.

18Abɔ̄ é bá ī bī uwā ga inu ā, é yɔ̄ ī yúúfi, anɔ́ɔ é gbɛlá ka, “É yɔ̄ ī bī alɔ wā amanyā ohígbū ije nēé je kwúcē tá ipú ɛkpa kú alɔ eko aflɛ́yí ā. É lɔfú tū alɔ iyē igbledū glá, cɛ́ɛ́ é lɛ aíjakī kú alɔ kpó, cɛ́ɛ́ é lɛ alɔ kpó pīya aɔ́fiyɛ kú nū.” 19Anɔ́ɔ abɔ̄ é bá ī nyɔ̄ inu ā, é da ɔ̄cocɛ̄hɔ̄ nōo ī leyīkwu ɔlɛ́ Ujósɛ̄fu ā kahíníī, 20“kócōō, ɔkpani, alɔ wā gaá lá ɔdōlé aflɛ́yí á. 21Eko nɛ̄ alɔ gā ɛga ō gbo gbɔ́ɔcī ā, alɔ le ɛkpa kú alɔ nwūla, anɔ́ɔ ije kú ɔnyɔɔnyɛ kú alɔ ce ɛyí īkpɔ̄dā ipú ɛkpa kú nū ā. Alɔ le ije ā bī wā gé lɛ uwɔ ɛɛ́.” 22Alɔ bī ije ɔhá abɔ̄ wā í lá ɔdōlé. Alɔ í jé ɔ̄cɛ nōo je ije kú alɔ tá ipú ɛkpa kú alɔ ā ŋ́.” 23Ɔ̄cocɛ̄hɔ̄ ā tá uwā ohi kahíníī, “Aá mlɛ́nyɔ́ cíí. Aá yúúfi ŋ́. Ɔwɔicō kú aá, Ɔwɔicō kú ádā ā, lɔfú je ije ā kpó tū ipú ɛkpa kú aá lɛ aá á. N mīyɛ ije nɛ̄ aá cílá ā.” Anɔ́ɔ ó le Usímīyɔn bī gé lɛ uwá á. 24Ɔ̄cocɛ̄hɔ̄ ā le uwā bī wā ipú inu, anɔ́ɔ ó le éŋkpɔ̄ je lɛ uwá kéē lɛ ikpó kpó na. Ó kōō le ɔdōlé kpó lɛ aíjakī kú uwā. 25É le ɛhi kú uwā tútū kéē je lɛ Ujósɛ̄fu eko nōó gā ɔlɛ́ɛnɔ, ohígbū ka é le jé tɛtɛ ka aá géē lé ɔdōlé kú ɔlɛ̄ɛnɔ ā mla anú.

26Eko nɛ̄ Ujósɛ̄fu gā ɔlɛ́ ā, é le ɛhi kú uwā kpó gē lɛ ɔ́ ipú inu, anɔ́ɔ é túkpɛɛ́ klla lɛ eyī pīya klá ajɛ. 27Ó le ɔ̄kā kú ɛ́gɛ́nɛ̄ é yɔ̄ lɛ ā da uwā kahíníī, “Aá le ɛlā ka gā um lɛyíkwu ádā aá nōo wɛ ókplícī ā. Abɔ̄ ó yɔ̄ lɛ ā? Ó yēeyī klla yɔ̄ lɛhi kpɔ́ ɛ́ɛ̄?” 28Anɔ́ɔ é kahíníī, “Ádā alɔ nōo wɛ ɔ̄cocɛ̄hɔ̄ kú uwɔ ā yɔ̄ lɔhi, ó yēeyī kpɔ́ ɛɛ́.” Anɔ́ɔ é túkpɛɛ́ lɛ eyī pīya klá ajɛ iyɔ̄bū nū kpɔ́. 29Anɔ́ɔ ó je eyī gicō, le Ubɛ́njamīn, ɔyínɛ́ nū má, anɔ́ɔ ó da uwá kahíníī, “Ɔyínɛ́ nɛ̄ŋcɛ́, nɛ̄ aá gē kɛlā nū ā yɔ̄ á nɛɛ? Ɔwɔicō koó hɔ́hā ce uwɔ, ɔyí um.”

30Anɔ́ɔ Ujósɛ̄fu hápápá nyɛ̄ɛ̄, ohígbū ka ihɔtū kú ɔyínɛ̄ nū ā le mu ɔ́ ɔtū. Anɔ́ɔ ó le tá inu ɔlɛ́ nū gaá le ikwū je ohígbū koó bī iyī nū glá gɛ ŋ́. 31Eko nōó le eyī na ā, ó le bɛ̄cɛ, abɔ̄ ó yɔ̄ ī kwú īyī nū tū ā, ó le ɔ́da je kéē lɛ ɔdōlé bī wā.” 32É le ɔdōlé je lɛ ɔ́ ɛyɛ́ɛ́yí, é kē le je lɛ ayí kú Ujékɔ̄pu ā ɛyɛ́ɛ́yí, mla ācɛ kú Íjīpiti, nēe gē lé ɔdōlé mɛ́mla anú ā ɛyɛ́ɛ́yí, ohígbū koó wɛ ɔdēelihɔ kú ɔcɛ́ Íjīpiti kóō lé ɔdōlé mla ācɛ Uhíbru. 33É le uwá cīce lɛ eyī pīya kwu Ujósɛ̄fu, gbɔɔ́ ŋmá ɔ́kplá ā ga ɛnɛ̄ŋcɛ́ ā. Eko nēé le ɛ́gɛ́nɛ̄ é lɛ uwá cīce lɛ ā má ā, é pīyeyī má iyī uwā le kpó hídáagó. 34É cē ɔdōlé lɛ uwá ŋmá ɔdōlé kú Ujósɛ̄fu, amáŋ ɔdōlé kú Ubɛ́njamīn nwuné fíyɛ́ ákú uwā ɛga ɛhɔ̄. Anɔ́ɔ é le lé klla le gwá mla Ujósɛ̄fu bá gē gwéeyē mɛ́mla anú á.

Currently Selected:

OHÚTU 43: IFBCL

Highlight

Copy