OHÚTU 49

Ujékɔ̄pu le Ɔhā hɛ́ ce ayí nū nɔ̄nyīlɔ

1Ujékɔ̄pu le odúúdú ayí nū kpó hīīgwú, anɔ́ɔ ó da uwa kahíníī, “Aá lɛ iyī aá túbá, ká n lɛ ɔdā nōo géē yá á ɛ̄cɔ̄bū ā ka lɛ aá.

2Aá le jīla tɔ̄há, ká aá pó, ayí kú Ujékɔ̄pu.

Aá jāhɔ̄ lɛ ɔkɛ̄lā kú Ísrɛ̄lu, ádā aá.

3“Urúbɛn, awɔ wɛ ɔ́kplá kú um á, awɔ wɛ ɔfú kú um á.

Awɔ wɛ ɔyí aflɛ́yí kú um oŋmá eko nɛ̄ n je pīya ɔ̄cɛnyīlɔ ā.

Awɔ le ojīlīmā klla lɔfú fíyɛ́ odúúdú ayínɔ̄nyīlɔ kú ɔlɛ́ um á.

4Á klá cíí glá ŋ́ bɛ̄ɛka éŋkpɔ̄ ísu nɛ̄hi nōo yɔ̄ ī túgbagwú ā.

Á gáā wɛ aflɛ́yí gɛ ŋ́,

ohígbū ka a le agōdō kú um nyíla.

A gaá le gbo mla ɔnyā nɛ̄ n gē gwutá mla anú.

5Usímīyɔn mɛ́mla Ulífāyi wɛ ɛdɔ ɔ̄cɛ éékpó.

É bī iyɔ́fú kú uwā le yúúfú.

6N gáā wɛ ojuju o yá tayínū kú aá ŋ́!

N kē gáā wɛ ipú ojīla kú uwā ŋ́.

Ohígbū keé gē ŋmó ācɛ eko nēé le cɔ̄nū.

Ijā ō he kú uwā wɛ ka o cē ɔbá ɛna ikpó. 7N lɛ okónu tá lɛ aá ohígbū ánya kú aá, ohígbū koó nwuné íbí.

N tokónu lɛ aá ohígbū ka eko nɛ̄ aá le cɔ̄nū, aá lɔnɔɔtū nɛ̄hi.

N géē je ayááyí kú aá fíyákātā bá ɛga dóódu kú ajɛ kú Ísrɛ̄lu.

N géē yá kú aá lā wu ācɛ ohile kú Ísrɛ̄lu ipú. 8“Ujúda, ayínɛ́ uwɔ géē cɛ̄tra uwɔ.

A géē yá aólɛlā kú uwɔ lé.

Ayínɛ́ uwɔ géē tūkpɛɛ̄ iyɔ̄bū uwɔ.

9 # Áluk 24.9; Mafú 5.5 Ujúda ā lɛbɛ̄ɛka ágábá ā, nōo ī ŋmó ɛbɛ́ klla ī kwúcē gā ɔ̄gɔ̄ kú nū ā,

nyɔ̄ ī nāŋdaa gwutá ajɛ mɛ́ɛ́lɛ́.

Ɔ̄nyɛ bɔ́tū junwalu lɛ ɔ́ glá āa?

10Ɔ̄cɛ dúú í gáā je okwutɛ kú ɔfú ŋmá ɛgiyí Ujúda glá ŋ́,

Ayááyí nū í cɔcɛ́ eko dóódu.

Ācɛ kú aéwo géē bī ɛ̄gbā gé lɛ ɔ́.

É klla í túkpɛɛ́ í lɛ ojīlīmā ce ɔ́.

11Ó géē lɛ ijaki kú nū wū ɔcí ufáyin.

Ó géē lɛ ejé nɛ̄ɛ̄nɛ̄hi nōó lɔfú lɛ ejé ā na īlī kú nū.

12Ó géē gwá ejé nɛ̄ɛ̄nɛ̄hi nōo í je ɔ́ eyī pīya ɔnɔ̄wá yōō,

Ayīnu kú nū í je pīya ɛnɛ̄hɛ́ oŋmá lɛ amɛ̄ ɛna ō gwá nɛ̄ɛ̄nɛ̄hi.

13“Usébūlɔn géē lā okónu ísu.

Úkɔngɔ̄ kú ísu ā géē je pīya ɛga ō bá kú aúgbéenyi.

Ajɛ kú nū géē yɛ jāā í kwu Usídɔn.

14“Ísāka ā lɔfū bɛ̄ɛka ijakī ā,

nōó gwutá ajɛ ohígbū ogbɛnū kú ɛkpa kú iyó nōó bī ā.

15Eko nōó le má ka ɛga omlɛ́nyɔ́ ā ɔ́ɔ lɔhi ō yɔ̄,

nɛ̄ ajɛ ā ɔ́ɔ kē gbiiyē nɛɛ.

Cɛ́ɛ́ ó gē tá igbīhi kú nū wāajɛ kéē kpó iyó ce ɔ́.

É le ɔ́ pi abɔ̄fú kóō yúklɔ́ bɛ̄ɛka ɔfiyɛ ā.

16“Udáni géē wɛ ɔ̄cɛ nōo í gbō ācɛ ɔlɛ́ nū bɛ̄ɛka aípɔ́ɔma ohile kú Ísrɛ̄lu ā.

17Udáni géē lɛbɛ̄ɛka ɛgwā nōo tá ɔwɛ ā.

Ó lɛbɛ̄ɛka ogwiji kú okónu ɔwɛ,

nōo gē kwú ɔnya ikpó,

cɛ́ɛ́ kóō cɛ̄ lɛ ɔ̄cɛ nōo gē ce ɔnya ā le pīyɔcíkōtō.

18“N gē gbēyī ká ā lɛ um nyatá, Óndú.”

19“Ɔ́wá kú ācɛ o héjulúgwu géē kpɔ́fú gwū Ugádi, amáŋ Ugádi géē

pīyeyī tū uwā, géē nū uwā inya ŋmá ɛgiyí nū.

20“Ajɛ kú Ássa géē yá ɔdōlé olɔhi nɛ̄hi.

Ajɛ ā í yá ɔdōlé nōo cíka lɛ ɔcɛ́.

21“Unáfutāli lɛbɛ̄ɛka ikpɛ̄ɛnu nēe yɔ̄ ī kwinya gē yɛ icííci ā,

nōo gē ma ayí olɔhi ā.

22“Ujósɛ̄fu lɛbɛ̄ɛka ɔcí ufáyin nōo ī gwá īkpō nɛ̄hi, nōo bū kwu ɔkpá ajaajɛ ā.

Ó kē ī tábɔ̄ gla ɔdɔ kú igá ā#49.22 Ujósɛ̄fu lɛbɛ̄ɛka ɔcí nōo kwu okónu njɔɔlɔ, ɔcí ō gwíīkpō nōo gē nyīla ābɔ̄ kú nū ga ɛyí ɔdɔ

23Aólɛlā kú nū géē kpɔ́fú kwu ɔ́ lɔfú lɔfú.

É géē nū ɔ̄ inya í tá ɔyī lɛ ɔ́

í wū ɔ́ ɔtū klíicō.

24Amáŋ abɔ̄ kú nū nōo bī ɔtā ā í jiliyē ŋ́,

abɔ̄ kú nū kē lɔfú nɛ̄hi.

Ɔwɔicō kú Ísrɛ̄lu nōo lɔfú nɛ̄hi ā,

í lɔfú tū ɔ̄ iyē á.

Anú wɛ Ɔwɔicō kú Ujékɔ̄pu

nōo gē leyīkwu ɔ́

klla gē gbō ā á.

25Ɔwɔicō kú ádā uwɔ gē tú uwɔ abɔ̄ á,

Ɔwɔicō nōo lɔfú fíyɛ́ dúú ā gē hɔ́hā ce uwɔ

ŋmá ɔkpáncō á.

Ó gē hɔhā ce uwɔ nɛ̄ a géē lɛ éŋkpɔ̄ nōo ī pɛ́ ŋmá ɛga olipú kú ipú ajɛ ā.

Ó géē hɔhā ce uwɔ nɛ̄ a í ma ayí alɛwa.

26Ɔhā nɛ̄ ádā uwɔ géē hɛ́ ce uwɔ ā nwuné fíyɛ́ aɔ́dā olɔhi nɛ̄ alɔ mīyɛ ŋmá ɛfu nōo kwāájɛ piyóó.

Aɔ́hā nēe bá nyā kéē wɛ ákú Ujósɛ̄fu.

Ɔwɔicō kóō lɛ ɔhā nyā hɛ́ ce Ujósɛ̄fu nēé kwú ɔ̄ yá otrɛ̄yí kú ayínɛ́ nū ā.

27Ubɛ́njamīn lɛbɛ̄ɛka ɔgwú obɔ̄bí ā.

Ó gē lé ɛbɛ́ nōó ŋmó ā ɔcɔ̄ɔ̄cī. Cɛ́ɛ́ ɔ̄nɔ̄ɔ̄nɛ̄ ó kwú ɛbɛ́ nōo hile ā ú kɔ̄.”

28Aípɔ́ɔma igwɛ́ɛpa kú Ísrɛ̄lu ā, mɛ́mla ɛlā nɛ̄ ádā uwā ka lɛ uwá, mɛ́mla ɔhā nōo cíkā lɛ ɔnyɔɔnyɛ ā bá abɔ́ɔ á.

Ujékɔ̄pu gekwū, é lɛ ɔ́ nyi

29Ujékɔ̄pu le ɔ́da je lɛ ayí nū kahíníī, “Abālɔbányā n gáā ga ɛgiyí aádā um ɔlékwū ɛ́ɛ́. Aá lɛ um nyi mɛ́mla aádáádā um, ipú ɔ̄gɛ̄cɔ̄ nōo yɔ̄ ajɛ kú Ɛ́frɔn, ipú ajɛ kú ācɛ Uhɛ́ti ā. 30#Ohút 23.3-20Ɔ̄gɛ̄cɔ̄ ā yɔ̄ ipú ajɛ kú Umakpéla, ɛnɔ̄ɔ̄cī kú Umámre ipú ajɛ kú Ukénan, nɛ̄ Ébrahām lá ŋmá ɛgiyí Ɛ́frɔn, ɔ̄cɛ Uhɛ́ti ā. Ó ka abɔ́ɔ géē wɛ ɛga o nyi okwū kú anúɔ á. 31#Ohút 25.9,10; Ohút 35.29Abɔ́ɔ ā nēé nyi Ébrahām mɛ́mla Usára, ɔnyā nū á. Abɔ́ɔ ā nēé nyi Áyísīki mɛ́mla ɔnyā nū Urebéka á. Abɔ́ɔ nɛ̄ n kē nyi Ulɛ́ya á. 32É lá ajɛ ā mɛ́mla ɔ̄gɛ̄cɔ̄ kú nū ā ŋmá ɛgiyí ācɛ Uhɛ́ti.” 33#Ācot 7.15Eko nɛ̄ Ujékɔ̄pu le ɔ́da je lɛ ayí nū kwɛyí ā, anɔ́ɔ ó le ikpó kú nū kpó ŋmá ajɛ ga agōdō, má gwutá. Anɔ́ɔ ó mā ɛ́nyɔ́ le tá ɔlékwū á.

Currently Selected:

OHÚTU 49: IFBCL

Highlight

Copy