ULÚKU 8

Ācɛnyā nēe í tá Ujísɔ̄si abɔ̄ ā

1Ó yɔ̄ yɛɛ ā, Ujísɔ̄si gbɔɔ́ ō yɛ ŋmá aigelī nɛ̄hi mɛ́mla eyīpɔ́lɛ́ éyi ga ɔhá, yɔ̄ ī tɔ́ɔna kú ɔ̄kōolɔhi lɛyíkwu ajɔ̄ɔ̄cɛ́ kú Ɔwɔicō. Ayíkpó igwɛ́ɛpa ā nyɔ̄ mla anú. 2#Umát 27.55,56; Umák 15.40,41; Ulúk 23.49Ācɛnyā nɛ̄ Ujísɔ̄si hɛ́tá ŋmá ōcē mɛ́mla aɛ́nɛ̄ ó nú aálelékwū obɔ̄bí ŋmá uwá iyē ā ī nyɔ̄ mla anú dúú. Ācɛnyā ā wɛ Umerí (nēé hī ka Umágādalini ā) nɛ̄ é nū aálalékwū obɔ̄bí ahāapa ŋmá iyē nū ā. 3Ujowána, nɛ̄ ɔbá nū wɛ ɔ̄cocɛ̄hɔ̄ kú ipɔ́ɔnū kú Uhɛ́rɔ̄du ā, mɛ́mla Ususána mɛ́mla ācɛnyā alɛwa ohile nēe bī agbénú kú uwā le tá Ujísɔ̄si mla ayíkpó kú nū abɔ̄ ā.

Ācīije kú ɔ̄cɛ onyi ikpɔ̄dā ā

4Ācɛ bá ī pɛ́ wā ɛgiyí Ujísɔ̄si ŋmá igelī éyi ga ɔhá, anɔ́ɔ eko nɛ̄ ɛwa nɛ̄hi le jīla ā, Ujísɔ̄si le ācīije nyā tá lɛ uwá. 5“Ɛ̄cī éyi ó lɛ ɔ̄cɛnyīlɔ éyi nōo nyɔ̄ gaá nyi ikpɔ̄dā. Abɔ̄ nōo yɔ̄ ī mī ikpɔ̄dā ā, ōhī kú nū le pɛ́ bá ɔwɛ, nɛ̄ ācɛ lɛ ikpó da uwá báajɛ. Anɔ́ɔ aígbáanɔ lɛ uwá kpó tá lé ŋmá ajɛ á. 6Ōhī kú ikpɔ̄dā ā le pɛ́ bá ajɛ kú ápátɛ́cɔ̄, anɔ́ɔ eko nɛ̄ ɔdɛ̄hɔ̄ ā le bū wɛ̄ɛcɛ ā, e kwú yɔɔlá tāajɛ ohígbū ka ajɛ ā í lɛ éŋkpɔ̄ ŋ́. 7Ōhī kú ikpɔ̄dā ā le pɛ́ bá ipú ujē. Ujē ā le jɛ̄ tɔ̄há mla ikpɔ̄dɛ̄hɔ̄ ā, anɔ́ɔ ujē ā í cɛ̄ lɛ uwá jɛ̄ glá ŋ́ má. 8Īkpɔ̄dā ōhī le pɛ́ gaajɛ olɔhi. Īkpɔ̄dɛ̄hɔ̄ ā le jɛ̄, é klla le īkpō olɔhi gwá. Éyééye kú uwā gwá īkpō ofɛhɔ̄ ofɛhɔ̄.” Anɔ́ɔ Ujísɔ̄si lɛ ɛlā kú nū bī wā í ŋmɛ́yí yɔ̄ í kahíníī, “Aá jāhɔ̄ lɛ ɛlā nɛ̄ n yɔ̄ ī ka ā, ɔ́dāŋ ka aá lɛ ahɔ̄ opó ɛlā!”

Ɔdā nōo yá nɛ̄ Ujísɔ̄si ī kwu īta ā

9Ayíkpó kú Ujísɔ̄si le ɔ̄kā kú ɔdā nōo wɛ ɛyí ita ā da ɔ́. 10#Ayis 6.9Anɔ́ɔ ó tá uwā ohi kahíníī, Ɔwɔicō lɛ ɔ́ yá tɔ́ɔtɛ́ lɛ aá ká aá lɛ ɛlā ɔkwɛ̄yi kú ajɔ̄ɔ̄cɛ́ kú Ɔwɔicō nōo tayínū ā jé. Amáŋ ɛgiyí ācɛ ohile ā, é gē bī ita le kɛlā ɔkwɛ̄yi o tayínū ā lɛ uwá. Cɛ́ɛ́ ɔ́dāŋ kéē kōō plleyī nááná é gáā má ɔdā dóódu ŋ́, é gē jāhɔ̄ nááná, é gáā jɛ́yí nū ŋ́.

Ujísɔ̄si le ɛyí ita kú ɔ̄cɛ o nyi īkpō ka lɛ uwá

11“Ɛ̄nyā wɛ ɔdā nɛ̄ ɛyí kú ita ā wɛ á. Īkpɔ̄dɛhɔ̄ ā wɛ ɛlā kú Ɔwɔicō. 12Aíkpɔ̄dā nēe pɛ́ bá ɔwɛ ā kwɛyí ācɛ nēe pó ɛlā ā, amáŋ ebilíi le yá, kéē kwú mlanyi ɛlā nēé pó ā cɛ́ɛ́ kéē híīī mīyɛ ɛlā ā cɛ̄ dɛ̄ɛ̄, ɛ́ɛ́ nɛ̄ Ɔwɔicō kōō ī nya uwá tá ŋ́. 13Aíkpɔ̄dā nēe pɛ́ bá ajɛ kú ápátɛ́cɔ̄ ā kwɛyí ācɛ nēe le olɛhɔ̄ ā pó mīyɛ cɛ̄ mla ɔtū nɛ̄hɛ́. Amáŋ ɛlā ā í ga ipú ɔtū kú uwā ŋ́. Ɛlā ā yɔ̄ ipú ɔtū kú uwā eko kpií. Amáŋ eko nēé le ojámá yá uwā kéē má ɛ́gɛ́nɛ̄ é lɔtūce Ɔwɔicō lɛ ā, é tá ka aá pó ɛlā ā gɛ ŋ́. 14Aíkpɔ̄dā nēe pɛ́ bá ipú ɔcí ujē ā kwɛyí ācɛ nēe pó ɛlā ā, amáŋ unwalu mɛ́mla agbénú mɛ́mla abahi kú oyēeyī nyā lɛ ɛlā ā kwu bá, anɔ́ɔ é jɛ̄ gajɛ ō gwá ikpō ŋ́ má. 15Aíkpɔ̄dā nēe pɛ́ bá ajɛ olɔhi ā kwɛyí ācɛ nēe pó olɛhɔ̄ ā klla mīyɛ ɔ́ tū ipú ɔtū olɔhi kú uwā. É lɛ ɔ́ tá ɔtū jāā gbéeko nēé lɛ ikpō gwá.

Agege ī cɛ̄ lɛ ɔ̄cɛ í mɛ́ɛ́bɛ

16 # Umát 5.15; Ulúk 11.33 “Ɔ̄cɛ dúúmā í lɛ ɔlá hɛ́ kwu agege kwú odée í klá anú ámāŋ kóō kwú ɔ̄ ú háyi útāngōdō ŋ́. Ikɔkɔ ɔ́ɔmā ó kwú ɔ̄ ú ce ɔdā ō le agege ce ɔ́, cɛ́ɛ́ ācɛ ī mɛ́ɛbɛ abɔ̄ é gē bēhé wā ipú inu ā. 17#Umát 10.26; Ulúk 12.2Ɔdā dúúmā nēé kwú tayínū ŋmá ɛgiyí ācɛ, é géē bī ɔ̄ wɛ̄ɛcɛ péee. Ó lɛ ɔdā dúúmā nēé lɛ ácí ŋmó klá anú nēé gáā pīyɛ ɔ̄ tɛ́ɛcɛ gēdēē ŋ́ nɛɛ ŋ́. 18#Umát 25.29; Ulúk 19.26Aá má ka aá lɛ ɔtū tá ɔdā nɛ̄ aá pó ā. Ācɛ nēe lɛ ɔdée ā é géē je lɛ uwā fíyɛ́. Amáŋ ācɛ nēé lɛ ɔdā dúú ŋ́ mā, é géē mīyɛ ɔdā nēé kōō gbɛlá ka aá lɛ ā ŋmá ɛgiyí uwā.

Ɛ́nɛ́ mɛ́mla ayínɛ́ kú Ujísɔ̄si

19Ɛ́nɛ́ kú Ujísɔ̄si mɛ́mla ayínɛ́ nū le pɛ́ wā ɛgiyí nū, amáŋ é ma ɛga ga ɛgiyí nū glá ŋ́ ohígbū ɛwa kú ācɛ ā. 20Ɔ̄cɛ éyi da Ujísɔ̄si kahíníī, “Ɛ́nɛ́ uwɔ mɛ́mla ayínɛ́ uwɔ háyi ɛcɛ, é kē tíne kéē má uwɔ.” 21Ujísɔ̄si da odúúdú ācɛ ā kahíníī, “Ɛ́nɛ́ um mɛ́mla ayínɛ́ um wɛ ācɛ nēe le ɛlā Ɔwɔicō pó klla bī ɔ̄ le yúklɔ́ ā.”

Ujísɔ̄si tlá owu nɛ̄hi

22Ɛ̄cī éyi Ujísɔ̄si le tá ipú ɔ́kɔ mɛ́mla ayíkpó kú nū, anɔ́ɔ ó da uwá kahíníī, “Ālɔ̄ le hɛ́ ókpoó ā igbó ga ogbeé ɔhá kú nū ā.” Anɔ́ɔ é gbɔɔ́ á. 23Abɔ̄ ɔ́kɔ kú uwā ceyī enyi yɔ̄ ī nyɔ̄ ā, Ujísɔ̄si kwú iyɔ̄lā ú gbó. Anɔ́ɔ igbeékpónú owu nɛ̄hi gbɔɔ́ ō tá ŋmá icō wā eyī ókpoó ā, anɔ́ɔ éŋkpɔ̄ gbɔɔ́ ō cē tū ipú ɔ́kɔ ā gbɔɔgbɔɔ á. Ɛ̄nyā cɛ̄ lɛ odúúdú uwā má kwu ikwu ajaajɛ. 24Ayíkpó ā le tá ɛgiyí Ujísɔ̄si gaá lɛ ɔ́ héyī ŋmá iyɔ̄lā yɔ̄ ī kahíníī, “Ɔkpani, Ɔkpani! Alɔ gáā pɛ́ kwú ɛɛ́ n!” Ujísɔ̄si cāŋjɛ háyi icō anɔ́ɔ ó lɛ ɛgba dɛ̄ tū owu mɛ́mla éŋkpɔ̄ nɛ̄ úgbagwú yɔ̄ ī tá ɔ̄ ā, anɔ́ɔ é mā, nɛ̄ abɔ́ɔ má tá siimm á. 25Anɔ́ɔ ó da ayíkpó kú nū kahíníī, “Ɔdíyá nɛ̄ aá lɔtūce Ɔwɔicō ŋ́ mā?”

Amáŋ é le kpó hídáagó, ufi klla le uwá kpó kwú. É ka lɛ iyī uwā kahíníī, “Ɔnyɛ yɔ̄ ā mɛ́ɛ̄? Ó le ɛgba dɛ̄ tū owu mɛ́mla úgbagwú, é kē lɛ ɛlā kú nū pó!”

Ujísɔ̄si le ɔ̄cɛnyīlɔ éyi nɛ̄ lɛ alelékwū obɔ̄bí hɛ́tá

26Ujísɔ̄si mɛ́mla ayíkpó kú nū lɛ ɔkɔ pɛ́ hɛ́ ókpoó igbó le tá ajɛ kú Ugɛrásɛnesi nōo wɛ ɔlɛ́ kú ogbeé ɔhá nōo pīyeyī kwu Ugálīli ā. 27Abɔ̄ Ujísɔ̄si yɔ̄ ī bɛ̄cɛ ŋmá ɔ́kɔ ga okónu ókpoó ā, ɔ̄cɛnyīlɔ éyi nōo ŋmá igelī ā wā í jila ɔ́ ɔwɛ. Ɔ̄cɛ ā lɛ alelékwū obɔ̄bí. Ó tóohɛɛwa, í klla lā ɔlɛ́ gɛ ŋ́ gbojī ɛɛ́. Ɛga o nyí okwū wɛ ɔlɛ́ nū mɛ́ɛ̄ á. 28Eko nōó lɛ Ujísɔ̄si má ā, ó le ɔkɔ cɛyí le ɛgba dɛ̄, lɛ okwúukwu kpó kwajɛ túkpɛɛ́ iyɔ̄bū Ujísɔ̄si klla lɛ ɛgba dɛ̄, “Ujísɔ̄si, ɔyí kú Ɔwɔicō nōo fíyɛ́ dúú! Ɔdí gbo ákú alɔ mɛ́mla awɔ a? N gē gbɔ̄ɔkɔ gā awɔ, a híīī yá alɔ italā ŋ́!” 29Ó kɛlā nyā ohígbū ka Ujísɔ̄si da alelékwū obɔ̄bí nōo yɔ̄ ipú iyē kú nū ā kahíníī, “Le bɛ̄cɛ ŋmá ipú iyē kú ɔ̄cɛnyīlɔ ā!” Igbalɛwa alelékwū obɔ̄bí ā gē je ɔnyīlɔ nyā. Ācɛ gē lɛ odo ce ɔ́ klla ī lɛ ɔ́ŋgbá kwu ɔ́, amáŋ ó gē je odó ā cē klla je agbá ā kpó hɛ́, cɛ́ɛ́ alelékwū obɔ̄bí ā lɛ ɔ́ bī ga ipú ígbíli. 30Ujísɔ̄si le ɔ̄kā da ɔ́ kahíníī, “Iyē uwɔ lé ka ɔnyɛ̄ nɛ̄?” Ó tóohi kahíníī, “Iyē kú um lé ka ‘Igblíkútu.” Ohígbū ka aálelékwū alɛwa pɛ́ ga ipú iyē kú nū á. 31Aálelékwū obɔ̄bí ā le ɔkɔ gbā lɛ Ujísɔ̄si kóō híīī nū uwā ga ipú ɔlíkɔtɔ ŋ́. 32Ɔwá nɛ̄hi kú ókóme bá ajaajɛ abɔ́ɔ, é bá gē lúlé ɛháajɛ ɛfu. Anɔ́ɔ aálelékwū obɔ̄bí ā le ɔkɔ gbā lɛ Ujísɔ̄si ka, “Lɛ ɛga je lɛ alɔ kú alɔ le pɛ́ ga ipú aókóome nēe bá ánūmā a!” Anɔ́ɔ ó lɛ ɛga je lɛ uwá á. 33É le bɛ̄cɛ ŋmá ipú iyē kú ɔ̄cɛnyīlɔ ā, anɔ́ɔ é le pɛ́ tū ipú iyē kú ɔwa kú ókóome ā. Anɔ́ɔ odúúdú ɔwá kú ókóome ā wúlatū mla inya ŋmá icō ɛfu ā gwōtū ipú ókpoó ā anɔ́ɔ é le pɛ́ gebí ipú éŋkpɔ̄ á.

34Ācɛ nēe bá ī gbō aókóome ā le ɔdā nōo yá ā má, anɔ́ɔ é le pɛ́ kwu ga ipú igelī mɛ́mla aípɔ́lɛ́ ā gaá lɛ ɔ̄kā kú ɔdā nōo yá ā kpó ca klɛ́ɛcɛ á. 35Ācɛ le pɛ́ gɛcɛ kéē má ɔdā nōo yá ā. Eko nēé gā ɛgiyí Ujísɔ̄si ā, é le ɔ̄cɛ nɛ̄ aálelékwū bɛ̄cɛ ŋmá iyē kú nū ā má abɔ̄ ó cīce pī ikpó kú Ujísɔ̄si, lɛ úwé wiiyē, eyī klla le gbo ɔ́ gɔɔ. Ufi le odúúdú ācɛ ā kwú. 36Ācɛ nēe má ɔdā nōo yá ā le da ācɛ ā ɛ́gɛ́nɛ̄ ó yá lɛ ā ā. 37Anɔ́ɔ odúúdú ācɛ nēe ŋmá ajɛ kú Ugerasɛ̄nesi mɛ́mla aɔ́lɛ́ nēe bá pīyɛ̄ ɔ̄ biílí ā da Ujísɔ̄si kóō nyɛ̄ɛ̄ ŋmá ɔlɛ́ aá, ohígbū ka ufi le uwā kwú nɛ̄hi. Anɔ́ɔ Ujísɔ̄si le tá ɔ́kɔ anɔ́ɔ ó nyɛ̄ɛ̄ á. 38Ɔ̄cɛ nēé nū aálelékwū obɔ̄bí ŋmá iyē nū ā le ɔkɔ gbā lɛ Ujísɔ̄si kahíníī, “Cɛ̄ ká n̄ nyɔ̄ mla awɔ.” Amáŋ Ujísɔ̄si lɛ ɔ́ nū nyɔ̄ yɔ̄ ī da ɔ́ kahíníī, 39“Kwúcē ga ɔlɛ́ ká ā nyɔ̄ ī da ācɛ ɔdā nɛ̄ Ɔwɔicō yá gā awɔ ā.” Ɔ̄cɛnyīlɔ ā le yɛ bū ipú igelī ā yɔ̄ ī da ācɛ ɔdā nɛ̄ Ujísɔ̄si yá lɛ ɔ́ ā.

Ɔyínɔ̄nyā kú Ujáríyɔ̄si mɛ́mla Ɔ̄cɛnyā nōo yɔ̄ ī doōcē ā

40Eko nɛ̄ Ujísɔ̄si pīyɛyí ga abɔ̄ ɔhá kú okpoó ā, ācɛ ā mīyɛ anú, ohígbū ka odúúdú uwā húmáyī gbēyī nū. 41Anɔ́ɔ ɔ̄cɛ éyi, nēé hī ka Ujáríyɔ̄si gā á. Ó wɛ ɔ̄cɛ nōo ī leyīkwu ɛgogbɔ̄ɔkɔ kú igelī abɔ́ɔ. Ó túkpɛɛ́ iyɔ̄bū Ujísɔ̄si, anɔ́ɔ ó le ɔkɔ gbā lɛ ɔ́ kóō gā ɔlɛ́ anúɔ. 42Ohígbū ka ɔyínɔnya ékpó kú nū nōo wɛ iháyí igwɛ́ɛpa ā, yɔ̄ í kwú.

Abɔ̄ Ujísɔ̄si yɔ̄ ī nyɔ̄ ā, ɛwa kú ācɛ ā yɔ̄ ī pɛ́ klá anú ŋmá áklō dóódu. 43Ɔ̄cɛnyā éyi nōo húmáyī hóóyī iháyí igwɛ́ɛpa yɔ̄ ipú ɛwa ā. Ó kwú ɛjɛ̄ɛ̄jī agbénú nōó lɛ ā í kpó ŋmó lɛ aólobócí kpɛ́mm, amáŋ odóódu kú uwā í hɛ́ ɔ̄ tá glá ŋ́. 44Ó le yɛ ŋmá igbīhi gaá lɛ abɔ̄ kwu okónogwu kú úwé kú Ujísɔ̄si, anɔ́ɔ ɔkwɔɔkwu ɔ́ɔmā oyī nōó yɔ̄ ī hɛ́ ā mɛ yīīlī á. 45Ujísɔ̄si dɔɔ̄kā kahíníī, “Ɔ̄nyɛ̄ lɛ abɔ̄ kwu um āa?” Ɛjɛ̄ɛ̄jī ācɛ le kpó híhó koó wɛ aá ŋ́. Anɔ́ɔ Upíta kahíníī, “Ɔkpani, ɛwa kú ācɛ le yɛ jila awɔ tá, klla bá ī gbo klá awɔ!” 46Amáŋ Ujísɔ̄si kahíníī, “Ɔ̄cɛ éyi lɛ abɔ̄ kwu um, ohígbū ka n jé ɔ̄ ŋmá eko nɛ̄ ɔfú nyɛ̄ɛ̄ gɛcɛ ŋmá um iyē ā.” 47Ɔ̄cɛnyā ā má kéē lɛ ɔkwu anúɔ jé ɛɛ́, anɔ́ɔ ó fīyégbúlú wɛ̄ɛcɛ, gaá má gbo klá ikpó kú Ujísɔ̄si. Ipeyí ɛjɛ̄ɛ̄jī ācɛ ā ó lɛ ɔdā nōo yá ɛ́ɛ́ nōó lɛ abɔ̄ kwu ɔ́ ā kpó ka lɛ ɔ́ mɛ́mla ɛ́gɛ́nɛ̄ ó le hɛ́tá bōōbū ā. 48Ujísɔ̄si da ɔ́ kahíníī, “Adá um, ɔtū nɛ̄ a le ce Ɔwɔicō ā, lɛ uwɔ hɛ́tá. Nyō ɛbɔ́ mɛ́ɛnɛ.”

49Abɔ̄ ó yɔ̄ í kɛlā lɛ ɔ̄cɛnyā ā, ɔ̄cɛ éyi ŋmá ɔlɛ́ kú Ujáyírɔ̄si, ɔ̄cɛ nōo ī leyīkwu ɛgogbɔ̄ɔkɔ ā, wā í da ɔ́ kahíníī, “Ɔyí uwɔ nɔ̄nyā ā gekwú ɛɛ́, á je unwalu lɛ utíca ā gɛ ŋ́.” 50Amáŋ Ujísɔ̄si le ɛlā ā pó, anɔ́ɔ ó da Ujáriyɔ̄si kahíníī, “Ā híīī yúúfi ŋ́. Lɔtūce Ɔwɔicō, cɛ́ɛ́ ɔyí uwɔ í hɛ́tá.” 51Eko nōó gā ajɛ ɔlɛ́ ā, ó jɛga lɛ ācɛ dúúmā bēhé ga inu ā gwū Upíta mɛ́mla Ujɔ́ni mɛ́mla Ujɛ́mīsi, mɛ́mla Ádā mɛ́mla ɛ́nɛ́ kú ɔyí ā ŋ́. 52Ɛjɛ̄ɛ̄jī ācɛ bá yɔ̄ í jikwū klla bá gē yéēyīnyinyi kú ɔyí ā. Ujísɔ̄si kahíníī, “Áa jíkwū ŋ́. Ɔyí ā í kwú ŋ́, iyɔ̄la nōó yɔ̄ ī gbo á!” 53É gbɔɔ́ ō yɛhɛ tū ɔ̄ ohígbū kéē jé ka ɔyí ā gekwú. 54Amáŋ Ujísɔ̄si kwú ɔyí ā abɔ̄ ú gicō anɔ́ɔ ó kahíníī, “Nyāŋjɛ ɔyí!” 55Ó kwú héyī ŋmá ɔlékwū kpɔ́, anɔ́ɔ ó cāŋjɛ bōōbū á. Ujísɔ̄si da uwá kahíníī, “Aá lɛ odée je lɛ ɔ́ kóō le.” 56Ádā mɛ́mla ɛ́nɛ́ ɔyí ā le kpó hídáagó, amáŋ Ujísɔ̄si pī uwá ahɔ̄ kéē híīī da ɔ̄cɛ dúúmā ɔdā nōo yá ā ŋ́.

Currently Selected:

ULÚKU 8: IFBCL

Highlight

Copy