ILUKU 10
10
IJisọsị Du Angịnyị Angị Ohu Ịta Kụrụ Iwo Ẹrụ Kpehe
1Ụka kọ nọ chẹẹ, Ọngọlahị chụ angịnyị angị ohu ịta kụrụ iwo chiriri. Ọ daa ẹrụ kpehe ji ịlahị nyamwụ angị imimiimiiye ka epweji ịlẹ wuu kọọwa ayịdang nwụlanọ kọ ka ka. 2IJisọsị byi angịwẹ yẹkẹẹ, “Anụ wo mẹ! Egbe ịlẹrụ nya Ohe Oluhye Adịda ga kpụ ọhyahya lụmẹ lẹ, ma, áhị́ tị ye alụkụrwọ ịlẹrụ ọọwa gbuu kaka. Lẹ, anụ raabwọ bịlẹ Ohe Oluhye Ayịdọlẹrụ chajị kọ ka du alụkụrwọ ị-myị ẹrụ nyamwụ wẹ ẹpwụ nya ẹrụ kaka hya egbe ịịwa họọ mẹ. 3Anụ yẹ mẹ! Anụ kele mẹ! Am juwa duunu ẹrụ kpehe lala anyị nya ịkpịlọ ịlẹpwarịrị nya iru nya ijwo lẹ! 4Anụ kpa ịkọbọ lee okpoko ọhẹ-lọhẹ ba ịlọnụ kpong-kpong koo. Lee, ọ-kpa ịbang ọ-ya ang ju ọhẹ-lọhẹ koo. Lee, ọ-kpa ugbẹtẹ ọhẹ-lọhẹ gbe ịlọnụ ẹkpẹ kpong-kpong ka ịnyịnyị! Anụ bịrị ụka juwa da ọnụ chị ọngọngọhẹ ụ-ụgbẹyị kpong-kpong ka ịnyịnyị. 5Ọdọdẹpwa nya ọng myị́ ọng ọlẹ kanụ ka jụ ka lẹ, anụ́-ụ jene byi alụwa yẹkẹẹ, ‘Okpunyi nya Ohe Oluhye a jam ọdọdẹpwa ọlẹ.’ 6Ó-ri ká ọngịnyị nya okpunyi ọhẹ-lọhẹ á juwa ọdọdẹpwa ọọwa aalẹ, okpunyi nya Ohe Oluhye ọlẹ kanụ chị kụrụ alụwa ka hi juwa ha ọngọọwa lẹ. Ma, ọ́ tị ri ká ọngọ ọlịnyị á juwa ụ-ụwa ka aalẹ, okpunyi nyanụ ọọwa ka tịrẹkpẹ baanụ rụ ụka kanụ ka rụ bwu ụwa lẹ. 7Ẹpwa nya ọng myị ọng ọlẹ kanụ ju ụga ene lẹ aalẹ, ụ-ụwa kem, anụ ka hụ gbee pwụ ụka ọlẹ kanụ ka rụ bwu epweji ọọwa lẹlẹ. Ụ-ụwa, anụ ka juwa ri ang oriri bala ọ-nwa ang ọnwanwa ọnyị myị ọnyị kị ka ya hanụ ịnyịnyị lẹlẹ. Chajị, ọngọlẹ kị diro ụkụrwọ chịla kọ ka ye uri nya ụkụrwọ ọọwa pyii lẹ. 8Epweji myị́ epweji ọnyị ká alụwa á yenu la okpunyi lẹ aalẹ, ang oriri ọnyị myị ọnyị kị ya hanụ lẹ, anụ́-ụ ye ri mẹ. 9Anụ́-ụ họ alẹdụrụ ilepweji ọlịnyị wuu uda mẹ. Kanụ ya ẹla nya Ohe Oluhye ju alụwa yẹkẹẹ, ‘Ịpyị Adịrahụ nya Ohe Oluhye junu chwẹẹ lụmẹ lẹ!’ 10Ma, epweji ọnyị myị ọnyị ọlẹ kanụ jụ ka, ká alụwa á tị myị yenu la okpunyi kaka lẹ aalẹ, anụ́-ụ kele kaka godayị rịrị o-opeje nyaa, kanụ byaa yẹkẹẹ, 11‘Anụ alepweji ọlẹ, ahị jam wụ ọrụ nya ọpyị nyanụ ọlẹ kọ baahị ẹ-ẹpẹtẹ hụrụ cheeji, nyọka ri ang ibeenu tụụnụ pyịpyị lẹ! M byinu yẹkẹẹ, ịpyị Adịrahụ nya Ohe Oluhye junu chwẹẹ lụmẹ lẹ!’ 12M byinu yẹkẹẹ, ụma nya akama ọtụka ọlẹ ká Ohe Oluhye yẹ ala ịSọdọm ugbeene lẹ, ọ ka ri ọmọnụma ị-ịlahị nya ang ọlẹ ká Ohe Oluhye ka họ alepweji ọọwa la ẹnụtụrụ ohyẹẹkpẹ.”
Akama nya Epweji Ịmyịmyị-ka
(ịMatiyu 11:20-24)
13Ụka ọọwa, iJisọsị yẹkẹẹ, “Anụ alepweji nya iKorasịn bala ala ịBẹtịsayịda ị-yẹ irya da ka ịwẹ, anụ ri enyi gu obyi lẹ! Chajị, iru nya ụkụrwọ ẹbyẹbyị ịtụka-ịtụka ịlẹ kam họ e-epweji nyanụ wuu lẹ, ó-ri ụma nya ụkụrwọ ẹbyẹbyị ịlịnyị kị họ e-epweji nya ala ịTaya bala ịSayịdọn lẹẹ, ịnọ, ịwa ayịdang ka kụrụ ịwụrụ nya owuru ọkpakpa juwa hụhụ a-agbụ nya ọmẹjẹ irya ọyẹda chajị nya ịhọbịrị ịhọhọ nyaa lụka ọọwa lẹ! 14Ma, akama nya ala ịTaya bala ala ịSayịdọn ịwẹ ka ri ọmọnụma u-uhye nya akama ọtụka ọlẹ ká Ohe Oluhye ka yẹnụ lụka nya eje ohyẹẹkpẹ nyamwụ. 15Anụ ala ịKapẹnawụm ị-yẹ irya da ka ịwẹ, kanụ wẹẹ kpa ịlọnụ ka uhye lala ịnyaa ka ya ẹtẹ kịla egbamwụ alẹ wẹẹ, Ohe Oluhye ayịdang ka kpanụ weji bwu ụwa, kaka ju ka ẹpwụ nya obwila wurum lụka ohyẹẹkpẹ kpaa, anụ́-ụ yẹ!”
16IJisọsị myịmyị byaa yẹkẹẹ, “Ọng myị́ ọng ọlẹ kọ wo ẹla nyanụ juwa kpa họ ụkụrwọ aalẹ, ẹla nyam am ayịdang a wẹ ká ọngọọwa wo ịnyịnyị lẹlẹ. Ma, ọng myị́ ọng ọlẹ kọ tị pwanụ lẹ aalẹ, am ayịdang a wẹ ká ọngọọwa pwa ịnyịnyị lẹlẹ. Ọng myị́ ọng ọlẹ kọ tị pwam am ayịdang lẹ aalẹ, ọngọlẹ kọ dum ẹrụ warị wẹ odehe ọlẹ a wẹ ká ọngọọwa pwa ịnyịnyị lẹlẹ.”
Ọnyànyà nya Angị iwo irwiye Ịlẹ Ká IJisọsị Du Ẹrụ
17Ịnyị, angịnyị angị iwo irwiye ịlẹ ká iJisọsị du ẹrụ a nyà la ọkẹkẹnị ọchịchị lẹlẹ. I byi iJisọsị yẹkẹẹ, “Ọngọlahị ee, ahị kpa ọngịrị nya ẹnyị nyang kụrụ alegu inyibyi chẹẹchẹẹ lẹ!”
18IJisọsị byaa yẹkẹẹ, “M dọmwụ yẹ Ohe Onyobyi ayịdang kọ chị abwọ piloo lala apya ọlẹ kọ kaa chị nyịrọrọ bwu uhye weji. 19Anụ yẹ mẹ! M ya ọngịrị ọlẹ kanụ ka kpa jẹdịyẹ bwu uhye nya ilo bala ịgịrịhya wụlẹlẹ hanụ lẹ. M ya ọngịrị myị́ ọngịrị ọ-kpa kụrụ Ohe Onyobyi oluji ọwẹ wuu junu ụ-ụbwọ ịnyịnyị lẹ! Ịngịịwẹ wuu á ka jụụnụ họ abwaabwọhẹ myị́ kpong-kpong ka. 20Ma, anụ tị juwa chị ọkẹkẹnị chajị nya ụkụrwọ ẹbyẹbyị ịlịịwẹ wuu koo! Ma, anụ tụtụ juwa chị ọkẹkẹnị chajị nyọlẹ kị da ẹnyị nyanụ ụ-ụwa e-epwoohe lẹ mẹ!”
IJisọsị Chị Ọkẹkẹnị Ọtụka-ọtụka
(ịMatiyu 11:25-27; 13:16-17)
21Ụka ọọwa, iJisọsị ayịdang juwa chị ọkẹkẹnị ọtụka-ọtụka bwula ọngịrị nya Olegu Ịgọgọ. Ịnyị, ọ raabwọ ha Ohe Oluhye ụ-ụwa yẹkẹẹ, “Oo! Ahụ Ohe Oluhye Adịda, Ọngọ họ epwoohe bala odehe, m jing obe chajị nyọlẹ ká họ ká etu nya ụkụrwọ ẹbyẹbyị ịlẹ kpịbaa hi angịlẹ kị ri angị jẹ́ ẹla bala angị jẹ́ ang lụmẹ nya odehe ọlẹ. Ma, ká tị chị etu nyaa ehe mẹjẹ angịlẹ kị tị jẹ́ ang gbuu ka. Ee Adada, họ ịnyị mẹ, chajị ịnyị kpangga a ri irya ọnahị nyang ene-ene lẹ.”
22“Am ayịdang a ri ọngọlẹ ká Ohe Oluhye Adam tụụbwọ hi ang myị́ ang wuu ju ụ-ụbwọ lẹlẹ. Chajị ọngọngọhẹ á juwa ọlẹ kọ jẹ́ Ọnyẹwẹ nya Ohe Oluhye yẹẹyẹẹ kaka, kẹnẹ-kẹnẹ, Ohe Oluhye Adịda ayịdang mẹ ịnyị! Ọngọngọhẹ ọkịla á tị juwa kọ jẹ́ Ohe Oluhye Adịda ọọwa yẹẹyẹẹ ka ịnyịnyị. Kẹnẹ-kẹnẹ, Ọnyẹwẹ nya Adịda ụbwọọmwụ kem bala angịlẹ wuu ká Ọnyẹwẹ ọọwa á chụ kọ mẹ Adịda ọọwa jaa ịnyịnyị lẹ mẹ ịnyị!”
23Ụka ká iJisọsị jahị kpata da angịjụgbẹyị nyamwụ lẹ, ọ byaa ụbwaa-ụbwaa yẹkẹẹ, “Ahị ọwawa ka juwa ha angịlẹ kị ka yẹ ụma nya ang ịlẹ ká ẹhị nyanụ wẹẹ yẹ lẹẹlẹẹ. 24Chajị m byinu yẹkẹẹ, iru nya alọmwụ nya Ohe Oluhye inyogo bala ịdịrịhụ inyogo lụmẹ-lụmẹ, ịno juwa mama nyọka kpẹhị nya ịlaa yẹ ang ịlẹ kaanụ ayịdang wẹẹ yẹ alẹ. Ma, ọ tị chịkpẹẹ haa kpụ, ị yaa myị́ kaka. Ịnọ, ịwa ayịdang juwa tọ eleko nyọka wo ang ịlẹ kaanụ ayịdang wẹẹ wo alẹ ịnyịnyị. Ma, ọ́ tị chịkpẹẹ haa kpụ, i-wo myị́ kaka ịnyịnyị.”
Oja nya Ọla ỊSameriya Ọnyịịla
25Ịnyị, ịtịcha ọ-mẹ ehile nya iMosisi jẹ ọhẹ ọlẹ kọ juwa tịtọ kọ ka kpa ịtọ ọtọtọ kịla iJisọsị ata a wuleji kele kaka byoo yẹkẹẹ, “Ayịbahị ịtịcha, anyị, m tị́ ka họ kam ka la ọhịhị ọmyịmyị-ka lẹẹ mẹ?”
26IJisọsị wẹ byoo yẹkẹẹ, “Anyị, ị tị́ da ụ-Ụpwụ nya ehile nya Ohe Oluhye kpong-kpong ene? Ịịyẹ a tị́ ri etu nyaa ká jẹ́ ene?”
27Ọ wẹ byi iJisọsị yẹkẹẹ, “Ehile ọọwa yẹkẹẹ, Ọngọlahị Ohe Oluhye nyang ka háng nya ịlẹhị-ịlẹhị bwu ẹpwụ ọkịlẹtụ nyang wuu, bwu ẹpwụ nya ugbodu okpukpuru nyang wuu, bwu ẹpwụ nya ọngịrị nyang wuu bala irya omeme nyang wuu ịnyịnyị. Ọngịnyị ehe ọọnang nyang ka háng nya ịlẹhị-ịlẹhị lala ịlọng ịnyịnyị.”
28IJisọsị wẹ byoo yẹkẹẹ, “O hiigu, a jẹ́ wẹ yẹẹyẹẹ lụmẹ. Rụ kele kaka ba ehile ọọwa jẹ mẹ aalẹ, a ka la ọhịhị ọmyịmyị-ka lẹ.”
29Ma, jaabwọ ká ọlẹng ọọwa juwa tịtọ kọ ka mẹ ọchịla-chịla nya ịlọmwụ jẹ lẹ, ọ byi iJisọsị yẹkẹẹ, “Kpakpakpa lẹẹ, o-owo a tị́ ri ọngịnyị ehe ọọnam?”
30Ịnyị, iJisọsị a kpa oja ọlẹ wẹ byoo yẹkẹẹ, “Ụka ọhẹ juwa ká ọlẹng ọhẹ juwa jẹ bwu iJerusalẹm hireji kele ka iJeriko. Ọọwa lẹ, alagbụrụ ịhyẹ a gba mịlọọ ụ-ụgbẹyị lẹ, ị nọọ ang myị́ ang nyamwụ wuu tụ ịwụrụ ịlịnyịrọ nyamwụ lẹ, ị nyọọ nya ịlẹhị-ịlẹhị ju igu chwẹẹ lẹ, ị tụụbwọ hyọọ ụ-ụwa, rụnyẹ rụ lẹlẹ. 31Ụka ọọwa, ọlẹng ọkịla iya nya Ohe Oluhye ọhẹ juwa chịpwụrụ bwu ụgbẹyị ọọwa. Ụka kọ jẹ pwụ ẹga nya ọngọlẹ kị họ ang lẹ, ọ cheji ba rụ hwẹẹ bwu ọka nya ụgbẹyị hyọọ lẹlẹ. 32Ọlẹng ọkịla ọhẹ kọ bwu imwawụ nya iLivayị chịpwụrụ bwu ụgbẹyị ọọwa ịnyịnyị. Ụka kọ pwụ ẹga nya ọlẹng ọwẹ kị họ ang wẹ lẹ, ọ cheji ba rụ hwẹẹẹ bwu ọka nya ụgbẹyị ọọwa ịnyịnyị lẹlẹ.
33“Ụka ká ọlẹng nya ala ịSameriya ọhẹ ọlẹ kọ juwa jẹ kanyị bwu ụgbẹyị ọọwa pwụ ẹga nya ọlẹng ọlẹ kị họ ang wẹ, kọ yọọ lẹ, ọ la olegu nya ahyẹẹrwẹrwa ẹ-ẹga kọ ji lẹlẹ. 34Ụka ká ọla ịSameriya ọọwa pwụ ẹga nya ọlẹng ọwẹ lẹ, ọ kele kaka wuloo eji lẹ, ọ kpa ere hụ́ abẹ nyamwụ lẹ, ọ gu ida jwaa lẹlẹ. Ịnyị lẹ, ọ hu ọngọwẹ hụhụ u-uhye nya ụnyịrẹ nya ịlọmwụ lẹ, ọ kpọọ kele ka ube nya angga ọlụwa juwa kpẹhị rịrọọ ụ-ụwa lẹlẹ. 35Ịnyị, ụka ká ahị pyẹ lẹ, ọla ịSameriya ọọwa a gba okpoko lala ihiri imiiye nya alụwa ha ọngọ kpẹhị rịrị ube ọọwa lẹ, ọ byi ọngọọwa yẹkẹẹ, ‘Aa kpẹhị rịrị ọlẹdụrụ ọlẹ yẹẹyẹẹ gbem mẹ. Ang myị́ ang ọlẹ ká bịrị jwọọ, ụka kam nya tịrẹkpẹ, m ka nwụ uri nyamwụ.’ ”
36Ịnyị, iJisọsị a tọ ịtịcha ọ-mẹ ehile nya iMosisi jẹ ọọwa wo yẹkẹẹ, “Ẹnwa ọlẹng, o-owo lẹpwarịrị nya angị ịta ịwẹ a tị́ họ ẹla ha ọlẹng ọlẹ ká aleyi họ ang wẹ lala ọọnamwụ?”
37Ụka ọọwa, ọlịtịcha ị-mẹ ehile nya iMosisi jẹ ọọwa wẹ byi iJisọsị yẹkẹẹ, “Ọlẹng ọlẹ kọ kpa olegu nya ahyẹẹrwẹrwa họ ọlẹng ọwẹ ọnahị ịnyị!” IJisọsị wẹ byoo yẹkẹẹ, “O hiigu. A jẹ́ ịnyị lẹ aalẹ, aa kele kaka họ ịnyịnyị mẹ oo!”
IJisọsị Ju ỊMata Bala IMeri Ụga
38Ụka ká iJisọsị bala angịjụgbẹyị nyamwụ juwa bajẹ ịnyịnyịịnyị lẹ, ị pwụ epweji ọhẹ lẹlẹ. Ịnyị, ọnyang ọhẹ e-epweji ọọwa kị wụrụ ịMata a wụrụ iJisọsị ẹpwa lẹlẹ. 39ỊMata la ọnyịnịna ọnyang ọhẹ ọlẹ kị wụrụ iMeri. IMeri ọọwa kele kaka hụhụ i-ijata nya Ọngọlahị iJisọsị juwa ke ụrụ pịlẹẹ la ang ọmẹjẹ nya iJisọsị. 40Ụka ọọwa, ịMata juwa nwụ ịlọmwụ la ẹga nya ang oriri ọhọhọ ha iJisọsị anyị ụbwọọmwụ-ụbwọọmwụ. Ịnyị, ụka kọ chị ịMata aga ịnyị lụmẹ lẹ, ịMata a kele kaka byi iJisọsị yẹkẹẹ, “Ọngọlahị ee! Ọ ri ọlẹ ká ọnyịnam á myị warị kaka myị ẹrụ ọhẹ-lọhẹ tam ka wẹ lẹ, ó gung ọ-ọkịlẹtụ kpong-kpong kaka? Byoo kọ warị kaka dam ụbwọ chẹẹ mẹ, Adam!”
41Ma, Ọngọlahị iJisọsị wẹ byoo yẹkẹẹ, “ỊMata, ịMata, a juwa nwụ ịlọng la olo nya imahị bala o-hu akama ha ịlọng u-uhye nya iru nya ang lụmẹ-lụmẹ kaka kpoye. 42ỊMata, ang ookpokpo ụbwọọmwụ a ri ang ọbaba lụmẹ lẹ! Ang ọọwa a ri ẹla nya ọhịhị ayịdang ọlẹ ká iMeri chụ wẹ lẹlẹ. Ọngọngọhẹ á tị juwa ọlẹ kọ ka nọọ ẹla ọọwa myị́ kpong-kpong kaka.”
Currently Selected:
ILUKU 10: IBNO
Highlight
Share
Copy
Want to have your highlights saved across all your devices? Sign up or sign in
Igede Bible © The Bible Society of Nigeria, 2019.
