ILUKU 20

Ịtọ Chajị nya Ọngịrị nya IJisọsị

(ịMatiyu 21:23-27; ịMakị 11:27-33)

1Ẹnụtụrụ ọhẹ, iJisọsị juwa mẹ ang jẹ angịnyị bala o-juwa ya ẹla nya Ohe Oluhye u-ube ịgọgọ ọtụka nya Ohe Oluhye nya ala iJuu. Ịnyị, alegbeju ịgbahị nya angịkiliya ha Ohe Oluhye bala ịtịcha ị-mẹ ehile nya iMosisi jẹ bala ịgabwọ nya ala iJuu wuu a kele ka ẹga nyamwụ lẹlẹ. 2Ị byoo yẹkẹẹ, “Ayịbahị ịtịcha, ya jehi wẹẹ. Ale, ọngịrị nyang ọlẹ ká wẹẹ kpa họ ụkụrwọ ẹbyẹbyị ịwẹ wuu a tị́ bwu? Oowo a tị́ ya ọda nya ọọwa hang kpong-kpong?”

3Ịnyị, iJisọsị a wẹ byaa yẹkẹẹ, “O hiigu. Am ayịdang tịtị ka tọnụ ịtọ ookpokpo ịnyịnyị. Lẹ, anụ́-ụ wẹm ịtọ ọọwa mẹ. 4Kpakpakpa lẹẹ, ụka nya ịJọn ọngọ hụ enyi Ohe lẹ, o-owo a tị́ ya ọngịrị ọlẹ kọ kaa kpa hụ angịnyị enyi Ohe ọọwa họọ kpong-kpong? Ọngịrị ọọwa tị́ bwu epwoohe hireji lee ẹ-ẹga nya angịnyị ehe, ọ tị́ bwu?”

5Ịnyị, angịwẹ a juwa kụ ẹla ọọwa ha awụlẹ jaabwọ kị ka bwu wẹ iJisọsị lẹlẹ. I byi awụlẹ yẹkẹẹ, “Ó-ri kahị yẹkẹẹ, ‘O bwu epwoohe hireji,’ ọ ka byihi yẹkẹẹ, ‘Ee lẹ, ịịyẹ a tị́ du kanụ tị tị myị la ịJọn kaka mẹ?’ 6Ma, ọ́ tị ri kahị wẹ byoo yẹkẹẹ, ‘Ọngịrị ọọwa bwu ẹga nya angịnyị ehe’ aalẹ, iru nya angịnyị ịlẹ tị ka da ajwọ nwụhị. Chajị ịwa wuu myị yẹkẹẹ, ịJọn nyị ri ọlọmwụ nya Ohe Oluhye nya ịlẹhị-ịlẹhị.” 7Ọọwa lẹ, angịwẹ a wẹ byi iJisọsị yẹkẹẹ, “Ahị ayịdang á jẹ́ ẹga ká ọngịrị ọọwa bwu, ahị ka ya jeng ka!”

8Ịnyị, iJisọsị a tịtị wẹ byaa yẹkẹẹ, “O hiigu. Aalẹ, am ayịdang á tịtị ka ya jenu ẹga ọlẹ ká ọngịrị ọ-kpa họ ụkụrwọ ẹbyẹbyị nyam ịwẹ wuu bwu kaka ịnyịnyị.”

Oja nya Angị Kpẹhị Rịrị Ẹrụ

(ịMatiyu 21:33-46; ịMakị 12:1-12)

9Ịnyị, iJisọsị a kpa oja ọkpịta ọlẹ mẹ ang jẹ angịnyị yẹkẹẹ, “Ayịdọlẹrụ ọhẹ juwa, ọlẹ kọ wu ẹrụ nya alakọnụ hiigu-hiigu wuu lẹ, ọ hu ẹrụ ọọwa bá angịhyẹ kị ka kpẹhị rịrọọ họọ nya okpoko lẹlẹ. Ịnyị, ayịdọlẹrụ ọọwa a yegiri rụ kanyị ka epwoja ọkịla kaka hụ ụwa lụka ọtata lẹlẹ. 10Ụka kọ pwụ ụka nya egbe ịịwa ọhyahya, ayịdọlẹrụ ọwẹ du ọnchẹ nyamwụ ọhẹ kele ka ẹga nya angị kpẹhị rịrị ẹrụ ọọwa, chajị kị ka hya egbe nya alakọnụ ịlẹrụ ọọwa du ọnchẹ ọwẹ kịlọọ. Ma, angị kpẹhị rịrị ẹrụ ọọwa wu ọnchẹ ọọwa, nyi enyiri nya ịlẹhị-ịlẹhị wuu lẹ, ị tụụbwọ hyọọ rụ la abwabwọ kaka tọ ayịbamwụ lẹlẹ. 11Ayịdọlẹrụ ọwẹ myịmyị du ọnchẹ ọkịla ẹrụ kele. Ma, angị kpẹhị rịrị ẹrụ ịwẹ myịmyị gba mịla ọnchẹ oheeye ọọwa, nyi ọọ nya ịlẹhị-ịlẹhị, chị oyoyi jwọọ ụ-ụwa lẹ, ị tụụbwọ hyoo rụ la abwabwọ kaka tọ ayịbamwụ myịmyị lẹlẹ. 12Ayịdọlẹrụ ọọwa myịmyị du ọnchẹ ọhata ẹrụ kele. Ma, angị kpẹhị rịrị ẹrụ ọọwa wu ọnchẹ ọwẹ nyi, boo igo nya ịlẹhị-ịlẹhị lẹ, ị gbilọọ kpịla-kpịla kpehe hi ẹpwụ ẹrụ ọọwa lẹlẹ. 13Ịnyị, ọngọ wu ẹrụ nya alakọnụ ọọwa a yẹkẹẹ, ‘Anyị, m tị́ ka họ kpá lẹẹ mẹ? Ọ hiigu. M ka du ọnyị nyam olookpokpo ọlẹ kọ hám lụmẹ ẹrụ kele lẹ. Chajị, ó-ri ká angịwẹ á chẹhị chị kaka yẹ ọnyị nya ụbwọ nya ịlọm yẹ lẹ, ọhẹka, ị ka jwoo ihi kpáá!’ 14Ma, ụka ká angị kpẹhị rịrị ẹrụ ịwẹ chẹhị kaka yẹ ọnyị nya ayịdọlẹrụ ọọwa lẹ, ị me obyi ta awụlẹ yẹkẹẹ, ‘Ẹhẹẹ! Anụ kẹwẹ kahị nwụ ọnyị ọlẹng olookpokpo nya ayịdọlẹrụ ọwẹ mẹ. Chajị ọnyị ọwẹ kpangga a ka ri ugu nya adamwụ ị-ịlahị lẹ. Chajị ụka kahị nwọọ wuu lẹ, kahị go ang ugu ịlẹ wuu la mẹ!’ 15Ọọwa lẹ, angịịwa a kele kaka yụbwọ chị ọnyị ọọwa lẹ, ị gbilọọ kpehe hi ẹrụ nya alakọnụ ọọwa lẹ, ị nwọọ ụ-ụwa lẹlẹ.”

IJisọsị a myịmyị yẹkẹẹ, “Ee lẹ, ó-ri kọ la ịnyị, ụka ká ayịdọlẹrụ ọọwa á kele ka ẹrụ nyamwụ ọwẹ, anyanyị, anụ tị́ me irya kọ ka họ ẹ-ẹga nya angị kpẹhị rịrị ẹrụ nyamwụ ọọwa? 16M juwa byinu yẹkẹẹ, ayịdọlẹrụ ọọwa ka ta angị kpẹhị rịrị ẹrụ ịwẹ ayịreji wuu gbanggbang, ene kọ ka tụụbwọ hi ẹrụ nya alakọnụ ọọwa ju angịkịla ụ-ụbwọ.”

Ịnyị, ụka ká iru nya angịnyị ịlụwa wo ẹla oyaya nya iJisọsị ọwẹ lẹ, ị yẹkẹẹ, “Ịgọgọ! Ohe Oluhye a myị kọ la ịnyị koo!”

17Ọọwa lẹ, iJisọsị a mwụụrụ yaa chịng lẹ, ọ byaa yẹkẹẹ, “Ịịyẹ a tị́ ri etu nya ẹla ọlẹ kị da ẹ-ẹpwụ nya Ụpwụ Ịgọgọ lẹẹ ẹ-ẹgẹlẹ? Ẹla ọọwa a lẹẹ lẹ:

‘Ẹjwọ ọlẹ ká angị me ugulọ nya ube pwa, kị gbọọ ugu da ka ọka lẹ, ẹjwọ ọọwa kpangga a mwọọgịlẹ ri ẹjwọ ọnyọọngịrị ọlẹ kọ wu itiwe nya ube ọọwa kpa gogo wẹ lẹlẹ.’

18Ọng myị́ ọng ọlẹ kọ chabwọ kaka mịla ẹjwọ ọọwa aalẹ, ọngọọwa ka be ene yịgẹ-yịgẹ u-uhye nyamwụ. Ọng myị́-ọng ọlẹ ká ẹjwọ ọọwa ayịdang á tị chabwọ mịla ene lẹ aalẹ, ọ ka go ọngọọwa pwụrẹ pwụrẹ ịnyịnyị pyii lẹ.”

Ịtọ Chajị nya Ẹpwa Ọnyẹnyẹ

(ịMatiyu 22:15-22; ịMakị 12:13-17)

19Ụka ká ịtịcha ị-mẹ ehile nya iMosisi jẹ bala alegbeju nya angịkiliya nya Ohe Oluhye anyị wo oja ọkpịta ọọwa ịnyị lẹ, ị jẹ́ yẹkẹẹ, ịwa ayịdang, iJisọsị nyaa wẹẹ da etu ọwẹ lẹlẹ. Ọọwa lẹ, ị juwa maga la ụgbẹyị ọlẹ, ịnọ kị ka bwu wu iJisọsị ụ-ụwa lẹlẹ. Ma, ị tị juhi nya iru nya angịnyị ịlẹ kị juwa ta iJisọsị. 20Ịnyị, alegbeju nya ala iJuu ịwẹ a juwa kụ iJisọsị kụ kee nya ụgbẹyị ọlẹ kị ka bwu kpa wọọ lẹlẹ. Ọọwa lẹ, ị ya okpoko ju angịhyẹ ikiri lẹ, angịịwa a juwa kpa ịlaa lala alabwẹla ịnyịịla bala angị ya ẹla nya ịlẹhị, chajị kị ka jẹ́-ẹ wu iJisọsị kpa kaka la eje ị-ịlahị nya Adịrahụ nya ọpyị nyaa lẹlẹ. 21Ịnyị, alijẹẹhị ịịwa a byi iJisọsị yẹkẹẹ, “Ayịbahị ịtịcha, ahị jẹ́ yẹkẹẹ, ahụ kpakpakpa lẹ, a ri ọngịnyị ọlẹ ká ẹla oyaya bala ang ọmẹjẹ nyang wuu kaa ri ẹla nya ịlẹhị kem. Á tị kaa me irya ju iwe-ahụrụ nya ọngịnyị ehe kpa ya ẹla tọọ kpong-kpong ka ịnyịnyị. Ang ọlẹ kọ ri ụgbẹyị nya abwẹla ọnyịịla nya Ohe Oluhye ọhọhọ nya ịlẹhị-ịlẹhị kem ụbwọọmwụ, a tị kaa mẹjẹ ọngịnyị lẹ. 22Ịtọ nyahị a lẹẹ lẹlẹ: Kpakpakpa lẹ, ọ tị́ chịla ị-ịlahị nya ehile nyahị ahị ala iJuu wuu, kahị ka juwa nyẹ ẹpwa ha iSisa adịrahụ ọgbahị nya ala iRom ọlẹ kahị ji ekpeleji nyamwụ lee ọ́ tị́ chịla kahị ka họ ịnyị ka?”

23Ma, jaabwọ ká iJisọsị ayịdang jẹ́ ijẹẹhị ọlẹpwụ nyaa kpá wuu ene-ene lẹlẹ, ọ byaa yẹkẹẹ, 24“Anụ kpa ugbe nya okpoko ọhẹ warị kam dọmwụ yẹ wẹẹ.” Ụka ká iJisọsị yọọ, ọ byaa yẹkẹẹ, “Anụ ya jem wẹẹ. Ihwoto nya owo bala ẹnyị nya owo a tị́ wẹ u-uhye nya ugbe nya okpoko ọlẹ kpong-kpong ene?” Angịwẹ wẹ byi iJisọsị yẹkẹẹ, “Ụrụrụ bala ẹnyị nya adịrahụ iSisa ịnyị, Ayịbahị.”

25Ịnyị, iJisọsị a wẹ byaa yẹkẹẹ, “O hiigu. Ó-ri ịnyị lẹ aalẹ, anụ hu ang nya iSisa ha iSisa, kanụ hu ang nya Ohe Oluhye ha Ohe Oluhye ịnyịnyị tịtị mẹ!”

26Ịnyị lẹ, alijẹẹhị ịwẹ a ye ẹlẹlẹhẹ ọwẹwẹ tịpyọ nya iJisọsị ị-ịlahị nya aluche nya angịnyị kpụ, ị ka jẹ́-ẹ wọọ kaka lẹlẹ. Ọọwa lẹ, ẹla ọwẹwẹ nya iJisọsị ọọwa a laa ahịbwuu lụmẹ-lụmẹ lẹ, ị ya ẹlẹlẹhẹ bwu ọnụ nyaa myị́ kaka lẹlẹ.

Ịtọ U-uhye nya Owuleji Bwula Igu

(ịMatiyu 22:23-33; ịMakị 12:18-27)

27Ụka ọọwa, angịhyẹ ịlẹ kị wụrụ ala ịSadusii kele ka ẹga nya iJisọsị kaka tọọ ịtọ ọhẹ. Ala ịSadusii, a ri angịlẹ kịịwa ayịdang á myị yẹkẹẹ, ịngịngịhyẹ nyị ri owuleji bwula igu nya ọngịnyị ehe lụka ohyẹẹkpẹ kpong-kpong kaka lẹlẹ. 28Angịwẹ byi iJisọsị yẹkẹẹ, “Ayịbahị ịtịcha, yẹ ẹlẹhẹ lẹẹ tahị wẹẹ! IMosisi da ẹ-ẹpwụ nya ehile nyamwụ hahị yẹkẹẹ, ‘Ó-ri ká ọrụ-ahụ ọnyị myị ọnyị á gbu hi ahụ nyamwụ, kọ ri kị ma ọnyị ọhẹ-lọhẹ ene ka aalẹ, ọnyịnịna ọlẹng nya ogu ọọwa, a kele kaka chị ahụ-ogu ọọwa ida ye pyii, chajị kọ ka ma ọnyị ha ogu oleji ọọwa mẹ.’ 29Adịda ọhẹ tị jam ọ-ọpyị nyahị kọ ma anyị alẹng irwiye. Ụka ọọwa, ọnyị ọgbahị nyamwụ ye ahụ. Ma, ọ tị chị ukpo gbu hi ahụ ọọwa lụka ọlẹ kị ma ọnyị ọhẹ-lọhẹ ene kpong-kpong ka. 30Ọnyịnamwụ ọlẹng ọlẹ kị ma hilọọ, chị ahụ-ogu ọọwa ida ye. Ọnyị oheeye ọọwa gbu lụka kị ma ọnyị ọhẹ-lọhẹ ka ịnyịnyị. 31Ọnyị ọlẹng ọhata chị ahụ-ogu ọọwa ida ye. Ọnyị ọhata ọọwa gbu lụka ọlẹ kị ma ọnyị ọhẹ-lọhẹ ka ịnyịnyị. Ọọwa lẹ, igu a nwụ anyịnịna ịwẹ erike erike hi ta awụlẹ gbee pwụ ọnyị ọharwiye ohyẹẹkpẹ-ẹkpẹ nyaa wuu lẹlẹ. Ma, ọngọngọhẹ nyaa á tị ma ọnyị ọhẹ-lọhẹ ene kọọ gbu kaka. 32Ịnyị, igu a nwụ ahụ-ogu ọwẹ ayịdang ịnyịnyị lụka ohyẹẹkpẹ lẹlẹ. 33Lẹ, ịtọ nyahị ri yẹkẹẹ, o-owo kpangga lẹpwarịrị nyaa ịwa wuu a tị́ ka ri ọrụ-ahụ ọlam-ọlam lẹẹ, la ẹnụtụrụ nya owuleji bwula igu nya angị gbugbu lụka ohyẹẹkpẹ mẹ? Chajị anyịnịna alẹng angị irwiye ịwẹ wuu ye ọnyang ọwẹ hi tọ awụlẹ erike-erike wuu jịra lẹ.”

34IJisọsị wẹ byaa yẹkẹẹ, “O ri nya ịlẹhị, ám odehe ọlẹ lẹ, anyị alẹng jam ye ịhụ. Ị tị jam ya anyị anyang da ọrụ ịnyịnyị! 35Ma, angịlẹ wuu ká Ohe Oluhye ka chụ nya angị pwoku ọ-ka jụ ka ẹpwụ nya ọhịhị o-gbe oyi myị́ oyi lụka nya odehe ohyẹẹkpẹ lẹ, ụka kị wuleji bwula igu kpá, ahụ oyeye lee ọrụ ọrwọrwọ ọhẹ-lọhẹ á ka ji haa ụ-ụwa kaka. 36Chajị ụka ọọwa lẹ, angịịwa á ka jẹ́-ẹ gbu kpá ẹnẹnẹhẹ kaka. Chajị ọhịhị nyaa ka lala ịnya alegu-ẹrụ nya Ohe Oluhye ụka ọọwa lẹ. Angịịwa ka ri anyị nya Ohe Oluhye ayịdang kpangga, chajị nyọlẹ kị ka ji ẹpwụ nya ogu nya angị wuleji bwula igu ụka ọọwa ịnyịnyị lẹ. 37Anụ wo mẹ! Owuleji bwula igu ji ịnyịlẹhị. Chajị iMosisi dọmwụ ya jehi ịnyị ẹ-ẹpwụ nya ụpwụ ọlẹ kọ da rụ́ ụka ọlẹ ká ila juwa wuru u-uhye nya okoji ochiche-ochiche chahị jwọọ. Ụ-ụwa, iMosisi wụrụ Ọngọlahị Ohe Oluhye yẹkẹẹ, ‘Ohe Oluhye nya Ebiraham bala Ohe Oluhye nya Ayịsiki bala Ohe Oluhye nya iJekọbụ.’ 38Lẹ, ánụ yẹ wẹ ka? Ohe Oluhye ayịdang á ri Ohe Oluhye nya egu ịlịpyị ka! Ma, Ohe Oluhye nya angịlẹ kị la ọhịhị ọpyịyọọ nya Ohe Oluhye ịnyị! Chajị ẹ-ẹga nya Ohe Oluhye ọhịhị nya ọng myị́ ọng wuu a bwu lẹ.” 39Angịhyẹ lẹpwụ nya angị mẹ ehile nya Ohe Oluhye jẹ wẹ byi iJisọsị yẹkẹẹ, “Ayịbahị ịtịcha, a jẹ́ wẹ ẹlẹwẹ hiigu lụmẹ.” 40Chajị ịwa ayịdang á myịmyị byẹjẹ tọ iJisọsị ịtọ gụ ọọwa kaka.

Ịtọ Chajị nya Ọngọlẹ Ko Ri ỊKịrayịsị

(ịMatiyu 22:41-46; ịMakị 12:35-37)

41Ịnyị, iJisọsị a tọ angịlẹ kị juwa ịtọ yẹkẹẹ, “Ịịyẹ a tị́ du ká angịhyẹ juwa yẹkẹẹ, ọnyị nya iDevidi, ị-ịKịrayịsị ọlẹ kịị nyị juwa warị nyaa ri lẹ? 42Chajị iDevidi ọọwa ayịdang ya ẹ-ẹpwụ nya ụpwụ nya eje ọnyịịla nyamwụ yẹkẹẹ,

‘Ọngọlahị Ohe Oluhye byi Ọngọlam yẹkẹẹ, kẹwẹ kaka hụhụ lẹẹ, u-upwuriri nyam ẹ-ẹgẹlẹ,

43gbee pwụ ụka ọlẹ kaam ayịdang ka họ ká ka kụrụ aluji nyang wuu chẹẹchẹẹ, juwa kpa ata nyang rịraa e-egbeju mẹ!’

44Ee lẹ, ó-ri iDevidi kọ ri adịda nya ịKịrayịsị ọọwa ịnyịlẹhị lẹ, ịịyẹ a tị́, tị tị du ká iDevidi ọọwa wụrụ ịKịrayịsị ẹgẹwẹ wẹ yẹkẹẹ, ‘Ọngọlam’?”

IJisọsị Gbile Aliru nya Angịnyị Ụbwọ Ụ-ụrụ Chajị nya Ọmẹjẹ nya Ịtịcha nya Ehile

(ịMatiyu 23:1-36; ịMakị 12:38-40)

45Ịnyị, ụka ká angịnyị wuu juwa ke ụrụ lẹ, iJisọsị a byi angịjụgbẹyị nyamwụ yẹkẹẹ, 46“Anụ kpahị ju ịlọnụ ọgwọgụ, kanụ cheji ba ọmẹjẹ nya Ịtịcha ị-mẹ ehile nya iMosisi jẹ mẹ. Ịwa ayịdang kaa kụrụ ịwụrụ igbileji byịrịrị, juwa kele ka ojiya-ihi la ẹhị ọrịrịị-rịrị ká angịnyị ka da ọnụ chaa, juwa jwaa ihi nya ịlẹhị-ịlẹhị. Ịwa ayịdang kaa tịtọ kịịwa a ka hụhụ i-iwe ahụrụ ịtụka ilebe ị-mẹ ẹla nya Ohe Oluhye jẹ nya ala iJuu ịnyịnyị. Ị kaa tịtọ kịịwa a ka hụ i-iwe ahụrụ oluhye ọgụgụ wuu ẹ-ẹga myị́ ẹga ọlẹ kị wụrwaa ẹpwa kaka ri ang oriri ọtụka. 47Ị kaa kpa iwe-ahụrụ ọtụka ọlala nyaa họ angịlẹ kị ri ahụ-ogu ri kịrọrọ, juwa nu ahụ-ogu ịịwa ebe nyaa ịlẹ kị nwụ́ la ijẹẹhị ịnyịnyị. Ka kị họ ịnyị kpá lẹ, ị kaa tịtọ kị ka ya abwọ ke angịnyị a-ahị bwula abwọ ịrịrị inyediyo nyaa ha Ohe Oluhye lẹlẹ. Lẹ, akama ọyẹyẹ ọtụka-ọtụka ọlẹ kọ juwa godayị gbe aa u-uhye nya ang inyibyi ịhọhọ nyaa wuu ka lụmẹ gụ ịnya angịkịla lụka ohyẹẹkpẹ.”

Currently Selected:

ILUKU 20: IBNO

Highlight

Copy