Odeyi 4

Â za Ipita ọnịrị Ịjọọnụ nọ ini ikootu

1Ipita ọnịrị Ịjọọnụ vị ana aa yịị kà ịrẹyịị yị aza ẹnẹẹ, dị ohirẹsụ irehi Ohomorihi nịnị ọnịrị ọga iporisi irehi Ohomorihi ne beri Anisadusi nịnị vene ve tù wa nị. 2Ayị aa kụ́ wa, agụvị ka odeyi ẹẹva ẹnẹẹ aa kà a yị aza ka Ijeesu ọ sị ha hụụnị isu. Ọnọọ vaa sị zụ̀ ka oku nịnị rẹ vaa haa hụụnị isu. 3Dị ẹ za wa, dị ẹ kụ́ wa ne hi ini otumare, ka ẹ̀ yà ịzọọ ne tù eyinẹhẹ anị nị, agụvị ka ọyị ộ ta. 4Aza ọrụrụ-ọrụrụ ana wụ́ ịrẹyị odeyi nịnị ệ dọ wụ́. Ịrịka anọrụ ịnị ẹnịnị vị ẹhụụ akahị-akahị oze ẹẹhị (5,000).

5Eyinẹhẹ anị, dị ọdọvịdị Aniju nịnị beri azọkụ nịnị ọnịrị ọzwọzọda nịnị kụ́ gụ Íjerusarẹmị nị. 6Aza ẹnẹnị re hi ịzọọ: Ihanasi ohirẹsụ ọbanyị irehi Ohomorihi, beri Ikayahwasi ọnịrị Ịjọọnụ ne beri Arẹkịsanda ọnịrị aza ana vọ ana vị anda ohirẹsụ ọbanyị irehi Ohomorihi. 7Dị ẹ hị́ Ipita ọnịrị Ịjọọnụ ka ẹ̀ vẹ ọ́vịdị ẹnịnị nị. Ẹ mẹ̀ vẹ, dị ẹ họ̀ wa ka, “Ịsị ụ mẹ nịnị aanị, ẹnẹ sị ụkata ọnọọ wụ nịnị? Ẹnị ụ sị ịrẹha anị mẹ̀ ẹ nịnị?”

8Ụhwẹ Ọnịnị ộ dọ avaba ayị Ipita, di o tụ́ wa ohi dị ọ ka, “Ẹwụ nịnị ọdọvịdị ọnịrị azọkụ anda ayị! 9Wàa họ̀ yị use nịnị ini oze ịsa ozoza ana mẹ oswahụ ọnọnị, ka a mẹmẹ mẹ̀ ẹ ụkụ. 10Â vọrọ ka avaba awụ nịnị ọnịrị avaba Anisirẹrị ọ̀ yẹ ka ọnọrụ ọnọnị ộ jẹẹ ịzẹnị booro aanị, ẹngụ anị ộ ta saka-saka ini oze ụkata Ijeesu Ikirisiti Anịnazarẹtị, ọnị ụ kanyị za ọchị apavahị nịnị, dị Ohomorihi ha a hụụnị isu. 11#Ahẹ 118.22Ijeesu Íwe Ohomorihi kà ịrẹyị ini oze anị nị, ka ‘Ịrẹta ẹnẹ ẹwụ nịnị ọtụrarehi yi tịtẹ, ọnị ọ vana vị ọọnyị ịnị ịrẹta ana a sịị̄ dà irehi nị.’ 12Ẹ yị nyị ọza ẹnẹsa ana zụ dọ ọza há, Ẹ yị nyị ọza ẹnẹsa íruvo ihinẹba ọnọnị oni Ohomorihi sị ịrẹha anị yị aza ka ọ̀ọ dọ waa há.”

13Ịjị anikootu maanị wụ́, ô hí wa irenu ka ayị Ipita ọnịrị Ịjọọnụ ọ́ maanị vị́, ịnị ụmẹ ana ahịka aza kẹnẹ ẹ vị nị, ẹnịnị ẹ yị yẹ iwe. Ệ yẹ ka ịdị Ijeesu ẹ vịdị yà nị. 14Ama ẹ yị nyị ịsị ẹ zụ kà, agụvị ka eyee re oswahụ ọnọọ ana a mẹ ụkụ ka ọ jẹẹ pe wa. 15Dị ẹ ka Ipita nịnị ẹ̀ hụụnị ikootu jịnẹ tụ́ ẹhẹ nị. Dị ẹnịnị ee pe ẹngụụ gẹ eyi, 16dị ẹ ka, “Sị ị vaa mẹ aza ẹnẹnị aanị? Avaba aza ana ra hi Ijerusarẹmị ẹ sị yẹ ka ẹnị ẹ maanị mẹ apọtẹrẹwa ọbanyị ọnọnị aanị nị. Yẹ yị kụkụ nyẹngụ kà a ka ireche yọ nị. 17Ama dị asị ịrẹyị ọnọnị gara hi ẹtẹ hu avọọ, à vẹ ya kà wa ọnọ ka asị ẹ rẹ̀ kà ịrẹyị ịnị ịrẹha Ijeesu ọnọnịị yị ọzọnyị-ọzọnyị.”

18Dị ẹ hị́ wa, dị ẹ mẹ ọda yị wa ka ẹ yị kụkụ nyayịnẹ kà ịrẹyị ịnị ịrẹha Ijeesu, ẹ yị rẹ nyayịnẹ vavọọ zụ̀ aza ịsa nị. 19Dị Ipita ọnịrị Ịjọọnụ tụ́ ohi dị ẹ ka, “Ẹwụ nịnị ọ̀ kà a dị a re, ọ́ọ́ vọrọ ini eyi Ohomorihi ka ya wụ́ ịrẹyị awụ nịnị huna ịrẹyị Ohomorihi? 20Agụvị ka ẹyị e yi zụ kú irenu, dị asị ị kà ịrẹyị ẹnẹ ẹyị ụvọta si re, dị ị rẹ sị ọọ wụ́.” 21Dị anikootu kà wa ọnọ hu avọọ ẹtẹẹtẹrẹ, dị ẹ hụrẹ wa ụvọ nị. E yi re oze sị ụya rị wa, agụvị ka avaba aza vị ana aa sị ụgaa yị Ohomorihi agụvị ịsa ana mẹ. 22Ọza ọnị ụkọrọ ohyozirenu ọnọnị mẹ ịnị ẹngụ anị ana a mẹ ụkụ aanị, o si huna ozi ịrayị ẹbẹẹva.

Aduwa ọnị ọdọwụ nịnị mẹ

23A mẹ̀ sị wa hụrẹ ụvọ kẹnẹ, dị Ipita ọnịrị Ịjọọnụ varẹma nọ ịdị anda ẹnịnị, dị ẹ na kà a yị wa ịsị ohirẹsụ ẹbanyị irehi Ohomorihi ọnịrị azọkụ nịnị kà nị. 24#Kụra 20.11; Ine 9.6; Ahẹ 146.6Ẹ mẹ̀ vavọọ wụ́, di e dudu sị ayị vị ọnya, di e nowu hị́ Ohomorihi nị. Dị ẹ ka: Ohi-ọmenezeyi Ananyịwa, ẹwa mẹ ẹbẹẹba ọnịrị ẹtẹ nị. Ẹwa rẹ mẹ òkū ọnịrị avaba ịsị e hi ịnị anị nị. 25#Ahẹ 2.1,2Wâ mẹ ka Idevidi ada ayị ana vị ozi ahụ awụ ọ̀ sị ụkata Ụhwẹ Ọnịnị kà a ka: “Sị ẹ vẹ dị ayị anarịmadọwụ nịnị aa dà ọva, sị ẹ vẹ dị anẹhẹ aa gẹ eyi kẹnẹ-kẹnẹ? 26Ohinọyị anẹhẹ ẹ sị ẹngụ tenyi, ohirẹsụ aza nịnị ẹ sị ẹngụ kụ́ gụ agụvị Ohomorihi ọnịrị Ikirisiti anị. 27#Irk 23.7-11; Imt 27.1,2; Ịmk 15.1; Irk 23.1; Ịjọ 18.28,29Ịzẹyịza, Ịhẹrọdị ọnịrị Ịpọntụsị Ipayireti beri anarịmadọwụ nịnị ọnịrị Anisirẹrị nịnị ệ kụ́ gụ ẹkụra ọnọnị agụvị Ijeesu Ozi ewu ọnịnị ọnị ụ sị nyị. 28Ệ gẹ ka ẹnị ẹ̀ mẹ̀ ịsa ẹnẹ ẹwụ vịdị sị ọọ kà ịnị ụkata awụ ọnịrị u mè sì ọ ka ọ vaa mẹ. 29Ananyị yị, wee re, e mèe chire yi angwa. Aarịhịnị, sị ọtụtụrụma yị ezi ahụ awụ ẹtẹẹtẹrẹ ka ẹ̀ zụụ kà ịrẹyị awụ! 30Sị ụkata awụ mẹ aza ụkụ! Navọ ụkọrọ ohyozirenu ọnịrị apọtẹrẹwa ẹ̀ẹ mẹ ịnị ịrẹha Ijeesu Ozi ewu ọnịnị!”

31Ịjị ẹ sị aduwa mẹ̀ ta, dị ịzị ẹ kụ́ gụ henyi nị. Dị Ụhwẹ Ọnịnị dọ ayị avaba ẹnịnị, dị ẹyaa sị ọtụtụrụma kà ịrẹyị Ohomorihi nị.

Ọdọwụ nịnị ệ và ịsa ẹnẹnị bẹ

32 # Ụkọ 2.44,45 Avaba ẹnịnị ana dọ wụ́ vị ana và ịnẹ bẹ, dị ẹ nyị ayị ọnya nị. Ẹ yị nyị ọza ana kà a ka ịsị ọnị nyị ka áanị ịnyara kẹnẹ ọ vị nị. Ịsị ẹ̀ẹ nyị, vi e dudu aa gà a nị. 33Apositeri nịnị ệ sị ụkataa dọ ivenu ka Ijeesu Ikirisiti ọ sị ha hụụnị isu. Dị Ohomorihi aa mẹ ọyịzaa yị avaba ẹnịnị nị. 34Ẹ yị nyị ọza ana rị ụya ịsọnyị-ịsọnyị ịnị ẹnịnị. Aza ana àa nyị ẹtẹ, àa vị irehi, dị ẹ ná a, dị ẹ sị ẹkẹhị anị vẹ, 35dị ẹ sị yị odeyi nịnị. Dị aa gà ẹ yị aza, anka ị́sa mẹmẹ aa rị ọzọza ụya.

36Â nyị ọza ịnya aanị ana aā hị́ Ijosẹẹhụ. Anireevi ana a ma ẹkụra Ịsayịpịrụsị, ọ vị nị. Apositeri nịnịị̄ hị́ ọọ Ịbanabasị, oni iruvo anị vị “Ọtwọzọtụtụrụma”. 37Ộ nyị ẹtẹ, dị ọ ná a, dị ọ sị ẹkẹhị anị va yị odeyi nịnị nị.

Currently Selected:

Odeyi 4: EBTP

Highlight

Copy