Ọyịkụra 14
14
Anisirẹrị ệ jịnẹ oku ovivi
1Dị Ẹnẹyịmavara kà a yi Imosiisi dị ọ ka: 2“Kà ẹ yị Anisirẹrị ka ẹ̀ varẹma dị ẹ̀ na kụ́ udi tụ́ Ipi-Ihahiroti ana yà ịnị akakana Imigidori ọnịrị òkū. Ẹnịnị ẹ kú udi gụrị oku dị ẹ̀ maanị và eyi ka Ịbaarị-Izehwọnị gẹdẹ-gẹdẹ. 3Ihwarawo vee ro ka we si nyeeyi dụ kụkụ aa ngụ ịnị ụnọmịị zị nị. Dị ọ ka òkū ọ sị wụ nịnị gu hi tụ́ ịnị ụnọmị. 4Mị rẹ vaa mẹ ka ayị Ihwarawo ọ̀ katẹngụ dị aa dụ wụ nịnị. Ịjị màa rẹ sị Ihwarawo ọnịrị isoja anị hú ẹtẹ ịrẹha amị rẹ vaa zị avọọ nyị ụbanyị. Anijipiti vaa yẹ ka ẹma vị Ẹnẹyịmavara nị.” 5A mẹ̀ na kà a yi ohinọyị Anijipiti ka aza ẹnẹẹ e si hu, di Ihwarawo ọnịrị anụkọrọ anị sị ayị vara nị. Dị ẹ ka, “Sị ị mẹ aanị? Wéē re ị mẹ̀ hụrẹ Anisirẹrị nịnị ụvọ ka ẹ̀ẹ na dị asị ẹ kụkụ mẹ̀ ụkọrọ yị.” 6Dị ọ ka è tenyi ụkẹkẹ oni umaata tura tịtẹ yị ọnị, dị ọ kụ́ isoja anị nị. 7Ộ kụ́ ịkẹkẹ oni umaata tura ene zoza hu keekere. Ịkẹkẹ ẹnẹẹ vị akata. Dị ọ kụ́ avaba ịkẹkẹ oni umaataā tura ana vọ hi Ijipiti nị. Dị a nyị ọga isoja ana si eyi pè avaba ẹnịnị nị. 8Dị Ẹnẹyịmavara mẹ ka ayị Ihwarawo ohinọyị Anijipiti ọ̀ katẹngụ, dị ọ kụ́ chire Anisirẹrị ana aa kanyị ahụ ẹtẹẹ na nị. 9Dị avaba isoja Anijipiti ne beri umaata ọnịrị ịkẹkẹ oni umaataā tura ọnịrị aza ana aa sị waa zị kụ́ chire Anisirẹrị nị. Dị ẹ na saasa wa ịzị e kụ́ udi tụ́ ụtọ òkū ọgụrị Ipi-Ihahiroti nị. Ịzọọ vị ana và eyi kà Ịbaarị-Izehwọnị. 10Ịjị Anisirẹrị nịnị re ka Ihwarawo ọnịrị Anijipiti aa dụ ẹnịị vẹ, dị angwa ee hí wa, di e nowu na za Ẹnẹyịmavara nị. 11Dị ẹ hị́ Imosiisi dị ẹ ka, “Aanị ka ẹ yị nyị ikuta hi Ijipiti? Sị ẹ vẹ dị ụ kụ́ yị vẹ ịnị ụnọmị ịzẹnị ka wa va wụ yị? Sị ụ mẹ dị ụ kụ́ yị hụrẹ Ijipiti aanị? 12Yàa vịdị kà a wụ Ijipiti ka wa navọ yị hẹẹ dị ya vị ọrịhị ẹnịnị? Yàa vana vị ọrịhị Anijipiti ọnị ọ gụ yị hu ka ye ve su và hị́ ịnị ụnọmị ịzẹnị nị.” 13Di Imosiisi tụ́ aza ẹnẹẹ ohi dị ọ ka, “Asị u hí angwa nịnị. Ọzọza ò tenyi ẹngụ anị jẹẹ ka u vee re Ẹnẹyịmavara mẹ̀ vaa dọ yịị tụ́ ajịnị. Anijipiti ọnị ụ maanị ee re nịnị aanị, we mē vene re wa nịnị. 14Ẹnẹyịmavara vụ ịrẹvụụ wụ nịnị. Ama ọzọza ọ̀ jẹẹ hẹẹ.” 15Dị Ẹnẹyịmavara kà a yi Imosiisi dị ọ ka, “Sị ẹ vẹ di wee nowuu hị́ mị? Kà a ka Anisirẹrị ẹ̀ẹ sị ụsẹẹ tụ́ ọvịdị. 16Tana okutẹ awụ, dụ wa tana ụvọ tụra oku ọnọọ. Oku vaa gàa hi ẹẹva dị Anisirẹrị ẹ̀ zi oze ịnị akakana oku na para hu ịrẹsụ ẹtẹ ọyịwụ. 17Mị vaa mẹ ka ayị Anijipiti ọ̀ katẹngụ dị ẹ yaa dị waa na. Ịsị mị rẹ vaa mẹ Ihwarawo ọnịrị isoja anị ne beri ịkẹkẹ oni umaataā tura ọnịrị aza anị anaā tụra umaata vaa mẹ ka aza ẹ̀ẹ sị ụbanyịị mị. 18Anijipiti vaa yẹ ka ẹma vị Ẹnẹyịmavara nị, ịjị màa sị wa hú ẹtẹ.” 19Di anggẹẹrị Ohomorihi ana vịdị yà ọvịdị isoja Anisirẹrị aa na và nọ ịrẹma dị ọ na jẹẹ ịrẹma nị. Di eguhi ana da jẹẹ ọvịdị ọnị và nọ ịrẹma dị ọ na jẹẹ ịrẹma Anisirẹrị nịnị nị. 20Dị ọ jẹẹ ịnị akakana isoja Anisirẹrị ọnịrị isoja Anijipiti nị. Ịnị avaba ịrahụ di eguhi vị ịrahụ yị aneyi ọnya, ama dị ọ vị ẹtohweyi yị aneyi ọsa nị. Aza ẹnyị ẹ yị kà pè ọsa ịnị avaba ịrahụ ọnọọ. 21Di Imosiisi tana ụvọ hi òkū nị. Ịnị avaba ịrahụ ịhị ọnọọ dị Ẹnẹyịmavara mẹ ka ahị ọbanyị ọ̀ tụ́ hụrẹ oze ọnị ọyịị̄ zị vẹ dị ọ kụ́ enyi varẹma dị ọ mẹ ka okuha ọ̀ wụ nị. Enyi o si cheva. 22#1 Ịkọ 10.1,2; Ihib 11.29Di Anisirẹrị zi oze ini òkū na para hu ịrẹsụ ẹtẹ ọyịwụ nị. Di enyi kà jẹẹ gụgụrụgụ eyi ụvọrị ọnịrị eyi ụvọha ẹnịnị nị. 23Dị Anijipiti nịnị kụ́ chire wa na ngụ ini òkū nị. Ẹnịrị umaata ẹnịnị beri ịkẹkẹ oni umaataā tura ne beri aza ana aa sị waa zị ẹ vavọọ dụ wa na ngụ ini òkù nị. 24Éyi màa vaa nị, dị Ẹnẹyịmavara zi oze ịnị ịra ana dà jẹẹ ọnịrị eguhi ọnọọ và eyi chi ve re isoja Anijipiti nị. Dị ọ kụ́ ẹvazi ngụ wa ẹngụ nị. 25Dị ọ mẹ ka ahụ ịkẹkẹ ẹnịnị ẹ̀ tụ̀ nị. Ịkẹkẹ ẹnẹẹ ẹ yị kụkụ zẹẹ ka ẹnị ẹ̀ zị ụsẹ. Di Anijipiti nịnị ka, “Vẹ ye zwe kwooze yị Anisirẹrị nịnị! Ẹnẹyịmavara ọ jẹẹ pè wa di eè pè yịị vụ̀ ịrẹvụ nọ.” 26Dị Ẹnẹyịmavara kà a yi Imosiisi dị ọ ka, “Tana ụvọ awụ hi òkū, di enyi ò sì kú Anijipiti beri ịkẹkẹ ẹnịnị oni umaataā tura ọnịrị onumaata ẹnịnị.” 27Ịzẹyịza di Imosiisi tana ụvọ anị hi òkū ọnọọ nị. Éyi màa nị̄, di enyi ree sìi vaabẹ nị. Dị Anijipiti nịnị zwe na ngụ ọ, dị Ẹnẹyịmavara vavọọ hì wa na và hi ini òkū nị. 28Di enyi sì và nọ udi anị, dị ọ mụnẹ ịkẹkẹ oni umaataā tura ọnịrị onumaata nịnị nị. Avọọ oku mẹ̀ mụnẹ avaba isoja Ihwarawo ana saasa a nị. Ikonyara ọ yị ha. 29Dị Anisirẹrị nịnị ẹnị zi oze ini òkū ọnọọ, dị ahịka ịrẹsụ ẹtẹ ana wụ ẹnị zị na para hu nị. Di enyi maanị dà gụgụrụgụ jẹẹ eyi ụvọrị ọnịrị eyi ụvọha ẹnịnị nị. 30Ịhị ọnọọ Ẹnẹyịmavara ộ dọ Anisirẹrị tụ́ hụụnị ụvọ Anijipiti nịnị. Di Anisirẹrị re ka Anijipiti ê sú va hi ụtọ oku nị. 31Ịjị Anisirẹrị maanị re ụkata ọbanyị ẹnị Ẹnẹyịmavara si tụ́ ẹhẹ dị o si pè Anijipiti vụ ịrẹvụ ẹnịnị ê hí angwa anị. Dị ẹ sị ayị tụra a ọnịrị Imosiisi ana vị ozi ahụ anị nị.
Currently Selected:
Ọyịkụra 14: EBTP
Highlight
Share
Copy
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
Ọyịkụra 14
14
Anisirẹrị ệ jịnẹ oku ovivi
1Dị Ẹnẹyịmavara kà a yi Imosiisi dị ọ ka: 2“Kà ẹ yị Anisirẹrị ka ẹ̀ varẹma dị ẹ̀ na kụ́ udi tụ́ Ipi-Ihahiroti ana yà ịnị akakana Imigidori ọnịrị òkū. Ẹnịnị ẹ kú udi gụrị oku dị ẹ̀ maanị và eyi ka Ịbaarị-Izehwọnị gẹdẹ-gẹdẹ. 3Ihwarawo vee ro ka we si nyeeyi dụ kụkụ aa ngụ ịnị ụnọmịị zị nị. Dị ọ ka òkū ọ sị wụ nịnị gu hi tụ́ ịnị ụnọmị. 4Mị rẹ vaa mẹ ka ayị Ihwarawo ọ̀ katẹngụ dị aa dụ wụ nịnị. Ịjị màa rẹ sị Ihwarawo ọnịrị isoja anị hú ẹtẹ ịrẹha amị rẹ vaa zị avọọ nyị ụbanyị. Anijipiti vaa yẹ ka ẹma vị Ẹnẹyịmavara nị.” 5A mẹ̀ na kà a yi ohinọyị Anijipiti ka aza ẹnẹẹ e si hu, di Ihwarawo ọnịrị anụkọrọ anị sị ayị vara nị. Dị ẹ ka, “Sị ị mẹ aanị? Wéē re ị mẹ̀ hụrẹ Anisirẹrị nịnị ụvọ ka ẹ̀ẹ na dị asị ẹ kụkụ mẹ̀ ụkọrọ yị.” 6Dị ọ ka è tenyi ụkẹkẹ oni umaata tura tịtẹ yị ọnị, dị ọ kụ́ isoja anị nị. 7Ộ kụ́ ịkẹkẹ oni umaata tura ene zoza hu keekere. Ịkẹkẹ ẹnẹẹ vị akata. Dị ọ kụ́ avaba ịkẹkẹ oni umaataā tura ana vọ hi Ijipiti nị. Dị a nyị ọga isoja ana si eyi pè avaba ẹnịnị nị. 8Dị Ẹnẹyịmavara mẹ ka ayị Ihwarawo ohinọyị Anijipiti ọ̀ katẹngụ, dị ọ kụ́ chire Anisirẹrị ana aa kanyị ahụ ẹtẹẹ na nị. 9Dị avaba isoja Anijipiti ne beri umaata ọnịrị ịkẹkẹ oni umaataā tura ọnịrị aza ana aa sị waa zị kụ́ chire Anisirẹrị nị. Dị ẹ na saasa wa ịzị e kụ́ udi tụ́ ụtọ òkū ọgụrị Ipi-Ihahiroti nị. Ịzọọ vị ana và eyi kà Ịbaarị-Izehwọnị. 10Ịjị Anisirẹrị nịnị re ka Ihwarawo ọnịrị Anijipiti aa dụ ẹnịị vẹ, dị angwa ee hí wa, di e nowu na za Ẹnẹyịmavara nị. 11Dị ẹ hị́ Imosiisi dị ẹ ka, “Aanị ka ẹ yị nyị ikuta hi Ijipiti? Sị ẹ vẹ dị ụ kụ́ yị vẹ ịnị ụnọmị ịzẹnị ka wa va wụ yị? Sị ụ mẹ dị ụ kụ́ yị hụrẹ Ijipiti aanị? 12Yàa vịdị kà a wụ Ijipiti ka wa navọ yị hẹẹ dị ya vị ọrịhị ẹnịnị? Yàa vana vị ọrịhị Anijipiti ọnị ọ gụ yị hu ka ye ve su và hị́ ịnị ụnọmị ịzẹnị nị.” 13Di Imosiisi tụ́ aza ẹnẹẹ ohi dị ọ ka, “Asị u hí angwa nịnị. Ọzọza ò tenyi ẹngụ anị jẹẹ ka u vee re Ẹnẹyịmavara mẹ̀ vaa dọ yịị tụ́ ajịnị. Anijipiti ọnị ụ maanị ee re nịnị aanị, we mē vene re wa nịnị. 14Ẹnẹyịmavara vụ ịrẹvụụ wụ nịnị. Ama ọzọza ọ̀ jẹẹ hẹẹ.” 15Dị Ẹnẹyịmavara kà a yi Imosiisi dị ọ ka, “Sị ẹ vẹ di wee nowuu hị́ mị? Kà a ka Anisirẹrị ẹ̀ẹ sị ụsẹẹ tụ́ ọvịdị. 16Tana okutẹ awụ, dụ wa tana ụvọ tụra oku ọnọọ. Oku vaa gàa hi ẹẹva dị Anisirẹrị ẹ̀ zi oze ịnị akakana oku na para hu ịrẹsụ ẹtẹ ọyịwụ. 17Mị vaa mẹ ka ayị Anijipiti ọ̀ katẹngụ dị ẹ yaa dị waa na. Ịsị mị rẹ vaa mẹ Ihwarawo ọnịrị isoja anị ne beri ịkẹkẹ oni umaataā tura ọnịrị aza anị anaā tụra umaata vaa mẹ ka aza ẹ̀ẹ sị ụbanyịị mị. 18Anijipiti vaa yẹ ka ẹma vị Ẹnẹyịmavara nị, ịjị màa sị wa hú ẹtẹ.” 19Di anggẹẹrị Ohomorihi ana vịdị yà ọvịdị isoja Anisirẹrị aa na và nọ ịrẹma dị ọ na jẹẹ ịrẹma nị. Di eguhi ana da jẹẹ ọvịdị ọnị và nọ ịrẹma dị ọ na jẹẹ ịrẹma Anisirẹrị nịnị nị. 20Dị ọ jẹẹ ịnị akakana isoja Anisirẹrị ọnịrị isoja Anijipiti nị. Ịnị avaba ịrahụ di eguhi vị ịrahụ yị aneyi ọnya, ama dị ọ vị ẹtohweyi yị aneyi ọsa nị. Aza ẹnyị ẹ yị kà pè ọsa ịnị avaba ịrahụ ọnọọ. 21Di Imosiisi tana ụvọ hi òkū nị. Ịnị avaba ịrahụ ịhị ọnọọ dị Ẹnẹyịmavara mẹ ka ahị ọbanyị ọ̀ tụ́ hụrẹ oze ọnị ọyịị̄ zị vẹ dị ọ kụ́ enyi varẹma dị ọ mẹ ka okuha ọ̀ wụ nị. Enyi o si cheva. 22#1 Ịkọ 10.1,2; Ihib 11.29Di Anisirẹrị zi oze ini òkū na para hu ịrẹsụ ẹtẹ ọyịwụ nị. Di enyi kà jẹẹ gụgụrụgụ eyi ụvọrị ọnịrị eyi ụvọha ẹnịnị nị. 23Dị Anijipiti nịnị kụ́ chire wa na ngụ ini òkū nị. Ẹnịrị umaata ẹnịnị beri ịkẹkẹ oni umaataā tura ne beri aza ana aa sị waa zị ẹ vavọọ dụ wa na ngụ ini òkù nị. 24Éyi màa vaa nị, dị Ẹnẹyịmavara zi oze ịnị ịra ana dà jẹẹ ọnịrị eguhi ọnọọ và eyi chi ve re isoja Anijipiti nị. Dị ọ kụ́ ẹvazi ngụ wa ẹngụ nị. 25Dị ọ mẹ ka ahụ ịkẹkẹ ẹnịnị ẹ̀ tụ̀ nị. Ịkẹkẹ ẹnẹẹ ẹ yị kụkụ zẹẹ ka ẹnị ẹ̀ zị ụsẹ. Di Anijipiti nịnị ka, “Vẹ ye zwe kwooze yị Anisirẹrị nịnị! Ẹnẹyịmavara ọ jẹẹ pè wa di eè pè yịị vụ̀ ịrẹvụ nọ.” 26Dị Ẹnẹyịmavara kà a yi Imosiisi dị ọ ka, “Tana ụvọ awụ hi òkū, di enyi ò sì kú Anijipiti beri ịkẹkẹ ẹnịnị oni umaataā tura ọnịrị onumaata ẹnịnị.” 27Ịzẹyịza di Imosiisi tana ụvọ anị hi òkū ọnọọ nị. Éyi màa nị̄, di enyi ree sìi vaabẹ nị. Dị Anijipiti nịnị zwe na ngụ ọ, dị Ẹnẹyịmavara vavọọ hì wa na và hi ini òkū nị. 28Di enyi sì và nọ udi anị, dị ọ mụnẹ ịkẹkẹ oni umaataā tura ọnịrị onumaata nịnị nị. Avọọ oku mẹ̀ mụnẹ avaba isoja Ihwarawo ana saasa a nị. Ikonyara ọ yị ha. 29Dị Anisirẹrị nịnị ẹnị zi oze ini òkū ọnọọ, dị ahịka ịrẹsụ ẹtẹ ana wụ ẹnị zị na para hu nị. Di enyi maanị dà gụgụrụgụ jẹẹ eyi ụvọrị ọnịrị eyi ụvọha ẹnịnị nị. 30Ịhị ọnọọ Ẹnẹyịmavara ộ dọ Anisirẹrị tụ́ hụụnị ụvọ Anijipiti nịnị. Di Anisirẹrị re ka Anijipiti ê sú va hi ụtọ oku nị. 31Ịjị Anisirẹrị maanị re ụkata ọbanyị ẹnị Ẹnẹyịmavara si tụ́ ẹhẹ dị o si pè Anijipiti vụ ịrẹvụ ẹnịnị ê hí angwa anị. Dị ẹ sị ayị tụra a ọnịrị Imosiisi ana vị ozi ahụ anị nị.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.