Ọyịkụra 15

Ahẹ oni Imosiisi jị

1 # Ẹtẹ 15.3 Ahẹ oni Imosiisi ọnịrị Anisirẹrị jị gono Ẹnẹyịmavara ịhị ọnọọ yị: “Maa jị ahẹ gono Ẹnẹyịmavara agụvị ka ọ sị ọnịvị amị huna, ọ raà sị zụ̀ ka ọnị Ộ nyị ụbanyị. Umaata ọnịrị onumaata vị ọnị ọ tụ́ ụvọ và hi òkū. 2#Ahẹ 118.14; Ayị 12.2Ẹnẹyịmavara ọ vị ụkata amị, ọnị ọ vị aha ọyịtẹ̀ amị nị, ọnị ọ vị Ohomorihi ana ada amị hẹkẹ nị, mị vaa sị ọ ngụ ịrẹyị. 3Ẹnẹyịmavara vị ọkụrẹkụ, Ịrẹha anị ọ rị Ẹnẹyịmavara nị. 4Ịkẹkẹ Ihwarawo oni umaataā tura ọnịrị isoja anị vị ẹnị Ẹnẹyịmavara tụ ụvọ và hi òkū. Ene hu ini isoja Ihwarawo vi oni òkū Ịkịịkẹ mụnẹ. 5Enyi ana nyịnẹ ọ sị wá mụnẹ, ẹ zị nọ iruvo enyi anka ịrẹta avọọ. 6Ẹnẹyịmavara, ụvọrị awụ ộ nyị ụkata ọnịrị ụbanyị, Ẹnẹyịmavara, ụvọrị awụ ụ sị gara ọnịvị awụ ha nị. 7Wâ sị ụkata ọbanyị awụ hú ọnịvị awụ ẹtẹ Ịjị ụ kụ́ ayị ana ngụra dị ọnịvị awụ rịra va ha anka avị avọọ nị. 8Ụ mẹ̀ tụ́ ahị hi òkū, di enyi anị kụ́ na jẹẹ gụgụrụgụ nị. Enyi ene vịdị ee sì vụ̀ụ́vụụ ộ kụ́ na jẹẹ anka ugene avọọ. Iruvo enyi ọ sị za tụ́ ịnị akakana òkū. 9Ọnịvị ô wo oto ka ọnị aa dụ yị, dị ọnị ọ̀ dà jị yị. Ọ kà ọnị aa kụ́ ogu ayị òo mè zee ọnị eyi. Ọ kà ọnị aa tụ́ ụhwọ anị dị ọnị ọ̀ sị wụ yị. 10Ama ụhwẹ ụ tụ́ kú wa, di òkū mụnẹ wa nị. Di e chì ngụ enyi ene ee sì vụụ-vụụ anka enyusẹ avọọ nị. 11Ẹnẹyịmavara, ye re ọnị a nyẹngụ si juwe awụ ịnị avaba ori nịnị? Ẹnẹ ka ọnịrị ẹwụ ộ vị ọpa? Áá nyị ọza ana vị ọnịnị dị ọ rẹ nyị ụbanyị anka ẹwụ. Aza vi ene ee hí angwa agụvị ka wá nyị ụbanyị. Ẹ yị nyị ọza ana zụ mẹ̀ ụkọrọ ịvọpa ẹbanyị-ẹbanyị ọnị ụ waa mẹ. 12Wâ tana ụvọrị awụ, dị ẹtẹ mụnẹ ọnịrị ayị nị. 13Ụụ̄ sì ịrẹyị ọza pooro, o mē du wu eyi, ọnị ọ mẹ ka aza ọnị ụ hị́ varẹma waa zụ̀ wa oze nị. Ụ vaa sị ụkata awụụ sị wa na ngụ ịnị ẹtẹ awụ ana vị ọnịnị. 14Anẹkụra ệ wụ́ ọ dị ẹgahị sị ngụ wa ẹngụ nị. Angwahi ọ sị ngụ Anihwirisiti nịnị ẹngụ. 15Angwa vee hi ohinọyị Anedomi. Ẹgahị vaa ngụ ọdọvịdị Animowabi nịnị ẹngụ. Anikenaani ẹnị raa hụrẹ ayịnẹ. 16Angwahi ọnịrị ẹgahị vaa ngụ wa ẹngụ. Ẹnẹyịmavara, ẹnịnị mè re ụkata awụ, ẹngụ ẹnịnị e si hị́ azọnọ. Avọọ ẹnịrị angwahi màa jẹẹ re ẹtẹ pooro dị aza awụ ẹ̀ na para hu nị. Ẹwa dọ aza awụ ẹnẹẹ tịtẹ ka asị ẹ kụkụ vị ọrịhị nị. 17Ụ vaa kụ̀ waa vẹ, di ụ mẹ ka ẹ̀ yà ịrẹsụ ataba awụ. Ẹnẹyịmavara, ịzọọ ụ sị mẹ eehi awụ nị. Ẹwa sị ụvọ awụ dà irehi awụ ọnọọ nị. 18Ẹnẹyịmavara ẹwa vị ohinọyị pooro zịna-zịna nị.”

Ahẹ oni Imeriyamị jị

19Umaata Ihwarawo ọnịrị ịkẹkẹ anị oni umaataā tura vi ene chì ngụ òkū. Dị Ẹnẹyịmavara mẹ ka enyi ọ̀ varẹma sì kú wa nị. Ama Anisirẹrị ẹnị vị ana zị ụsẹ na para hu ịrẹsụ ẹtẹ ọyịwụ. 20Di Imeriyamị ana vị ọnịsẹ ana vị onyeyiza Imosiisi sị ọpanyị ana sịị̄ jị ahẹ nị; ụvọ dị ẹ yaa dụ ọ ịrẹma dị ẹ yaa nyị ẹzẹ nị. 21Di Imeriyamị aa jị ahẹ yị wa dị ọ ka, “Waa jị ahẹ gono Ẹnẹyịmavara agụvị ka ọ sị ọnịvị anị hú ẹtẹ. Ọnọọ ọ sị zụ̀ ka ộ nyị ụbanyị. Umaata ọnịrị onumaata vị ọnị ọ tụ ụvọ và hi ini òkū.”

Enyi ọnyịrẹyị

22Imosiisi ộ kụ́ Anisirẹrị hụrẹ oku Ịkịịkẹ dị ẹ na ngụ ịnị ụnọmị mẹ ẹkụhị ẹẹta, ẹnịnị e yi re enyi. 23Ẹ mẹ̀ va ngụ ịzị aā hị́ Imara, ẹnịnị e yi zụ hú enyi ana yà ịzọọ agụvị ka aa nyịrẹyị. (Ọnyịnyịrẹyị ọnọọ ọ mẹ ka aa hị́ ọ Imara nị.) 24Dị aza ẹnẹẹ aa rị ihuhuu hi Imosiisi dị ẹ ka, “Si yee hú aanị?” 25Di Imosiisi ve nowu na za Ẹnẹyịmavara nị. Dị Ẹnẹyịmavara va sị ọchị ọnya zụ̀ ọ nị. Di Imosiisi sị ọchị ọnọọ di o ne e ngụ enyi ọnọọ nị. Di enyi ọnọọ kụkụ sị rụra hú nị. Dị Ẹnẹyịmavara mẹ ọda yị wa ịzọọ ka ẹ̀ẹ saasa a nị. Dị ọ rẹ zama wa re ịzọọ nị. 26Dị Ẹnẹyịmavara kà ẹ̀ẹ sị ụtọ pè ịrẹyị ọnị ana vị Ohomorihi ẹnịnị dị ẹ yaa mẹ̀ ịsa ọnị ọnị re ka ộ vọrọ nị, dị ẹ sị eyi pè ọda anị dị ẹ yaa saasa a nị, ọnị ọ yị vaa zẹẹ ka ọnyọọnyị ịnị ụkụ ana za Anijipiti avọọ ọ̀ za wa. Ọ kà ọnị ọ vị Ẹnẹyịmavara anaā mẹ wa ụkụ nị. 27Anisirẹrị ẹ va sị ngụ Erimi. Â nyị aha enyi ẹwụrẹva ne beri ọsọchị ẹtarẹwụ ịzọọ. Dị ẹnịnị kụ́ udi gụrị oswe ẹnẹẹ nị.

Currently Selected:

Ọyịkụra 15: EBTP

Highlight

Copy