Ọyịkụra 18

Ijetiro ô ne hee Imosiisi.

1Ijetiro vi ohirẹsụ irehi Ohomorihi tụ́ Imidiyani, dị ahịka ọyẹ Imosiisi ọ rẹ vị nị. Ịnị ụmẹ ọnya ộ wụ́ avaba ịsa oni Ohomorihi mẹ yị Imosiisi ọnịrị Anisirẹrị ana vị aza anị. Ộ wụ́ Ẹnẹyịmavara mẹmẹ kụ́ Anisirẹrị hụrẹ Ijipiti. 2#Kụra 2.21,22Imosiisi ộ vịdị tụ́ Izipora ose anị nọ eehi. Dị ọnịrị ozi anị ẹyịva ne chi ịda Ijetiro ọyẹ Imosiisi nị. 3#Ụkọ 7.29Imosiisi ka ọnị vị ọzọga tụ́ ịnị ẹtẹ ọzọga, agụvị avọọ dị ọ ka ozi anị ọnya ọ rị Igerisomi nị. 4Imosiisi rẹ ka Ohomorihi anị ada anịị̄ hẹkẹ ộ gụ ọnị ụvọ dị ọ dọ ọnị tụ́ ka asị Ihwarawo wụ ọnị nị. Agụvị avọọ dị ọ ka ozi anị ọsa ọ rị Eriyerezi nị. 5Ẹkụhị ọnya dị ọyẹ Imosiisi ana vị ọnọrụ ne beri ose Imosiisi ọnịrị ezi anị ẹyịva ne tù Imosiisi ịnị ụnọmị ịzị ẹ kụ́ udi tụ́ ọgụrị ataba Ohomorihi nị. 6Di Ijetiro ve ne tù ọ, ộ vịdị ra à tụ́ hi ọ ka oni Ijetiro ada ose anị ne beri ose anị ọnịrị ezi anị ee vee hee yi, o. 7Di Imosiisi kwẹẹtẹ ka ọnị aa naa gẹrị ọyẹ anị nị. Ọ mẹ̀ na sị gẹrị ọ, di Imosiisi tana tụra ẹtẹ kụ́ ọ, di e kú ẹngụ irenu nị. Ịjị ẹ sị ẹngụ kụ́, dị ẹ ngụ ịnị ajẹngụ nị. 8Di Imosiisi kà a yị Ijetiro avaba ịsị Ẹnẹyịmavara hụ agụvị Anisirẹrị mẹ Ihwarawo ọnịrị Anijipiti nị. Dị ọ rẹ kà a yọ avaba ẹngụkata ene tù wa ózee ọnịrị Ẹnẹyịmavara mẹmẹ dọ wa tụ́ nị. 9Ijetiro mẹ̀ wụ́ avaba ịsa ọyịza ẹnị Ẹnẹyịmavara mẹ yị Anisirẹrị ọnịrị ọ mẹmẹ dọ wa tụ́ hụụnị ụvọ Anijipiti, ịnẹ anị ô hine ẹtẹẹtẹrẹ. 10Di Ijetiro ka, “Ò zee yi Ẹnẹyịmavara ana maanị dọ wụ tụ́ hụụnị ụvọ Anijipiti nịnị ọnịrị Ihwarawo. 11Ma sị yẹ ka Ẹnẹyịmavara o huna avaba ori nịnị nị. Wéē re ịsị ọ mẹ aza ana aa chamayịị yị Anisirẹrị.” 12Di Ijetiro ana vị ọyẹ Imosiisi sị ịsa vẹ ka à sị mẹ̀ ịsọvọ yị Ohomorihi dị à rị ọ ịra nị. Dị ọ rẹ sị ịsa ịsọvọ ọsa vaka a vẹ nị. Di Eerọnị ọnịrị avaba azọkụ Anisirẹrị vẹ ka ẹnịrị ọyẹ Imosiisi è dudu va rị ịsa ọnọọ ọvịdị Ohomorihi nị.

Imosiisi ộ nyị ọdọvịdị ka ẹẹ gụ ọnị ụvọ.

(Ọda 1.9-18)

13Eyinẹhẹ anị, di Imosiisi na yaayịtẹ ka ọnị ọ̀ọ mẹ̀ ọkarẹyị yị aza ẹnẹẹ nị. Dị ẹnịnị jẹẹ pè e pooro hụrẹ ẹnẹnẹ na ngụ oruva nị. 14Ijetiro mè re ịsị Imosiisi aa mẹẹ yị aza ẹnẹẹ dị ọ va họ̀ Imosiisi dị ọ ka, “Sị waa mẹ yị aza ẹnẹnị aanị? Sị ẹ vẹ di ahịka ẹwụ ịnya aa mẹ̀ ọkarẹyị dị avaba aza maanị jẹẹ pè wu pooro hụrẹ ẹnẹnẹ na ngụ oruva?” 15Di Imosiisi ka, “Aza ẹnẹnị vi ene ee vee họ̀ use ka ẹnị ẹ̀ yẹ ịsị Ohomorihi sì. 16Ẹ̀ẹ rẹ nyị ahankata, dị ẹ kụ́ ọ vẹ ịda amị. Dị mị mẹ̀ ọkarẹyị yị wa, dị mị rẹ sị ọda Ohomorihi zụ̀ wa.” 17Dị ọyẹ Imosiisi ve tụ́ ohi dị ọ ka, “Ịsụ waa mẹ aanị ọ yị vọrọ. 18Wáā mẹ ka ọ̀ há ẹwụrị aza ana aa vẹ ịda awụ aanị nị. Ụkọrọ ọnọnị ọ sị banyị, ẹwụnyara ọ yị zụ mẹ̀ ẹ. 19Ohomorihi ọ̀ navọ ò sere wu. Batọ me pè wu juwe ọnya. Ẹwa vị odeyi aza ẹnẹẹ ọvịdị Ohomorihi. Dị waa kụ́ ịrẹyị ẹnịnị nee tù ọ. 20Waa sị ịrẹyị Ohomorihi ọnịrị ọda anịị zụ̀ wa. Dị waa zụ̀ wa ebira ana vọrọ ka ẹ̀ẹ mẹ ọnịrị ịsị a vọrọ ka ẹ̀ẹ mẹẹ yị Ohomorihi. 21Re sì aza ana zụ mẹ ẹkụra ịnị ẹngụ aza ẹnẹẹ, aza ana nyị angwahi Ohomorihi ana rụra sị ayị tụra. Asị ẹnịnị vị aza ana aa dọ ochirerenu. Dị wa nyị wa dị ẹnị ẹ̀ rẹ dà aza sị eyi pè. Aza ẹnyị ẹ zụ si eyi pè aza ẹnị akahị, dị aza ẹnyị sị eyi pè aza ẹnị ẹchẹhị, dị aza ẹnyị rẹ sị eyi pe aza ẹnị ẹvarẹwụ dị áaza ẹnyị vị ẹẹwụ. 22Kà a ka aza ẹnẹẹ ẹ̀ẹ mẹ̀ ọkarẹyị yị aza ẹnẹẹ pooro. Kà a ka ịrẹyị ana àa sị katẹngụ, ẹ̀ kụ́ ọ ve tù wu, dị ẹnị ụvọta èe re tụ́ ịnị ịrẹyị eweyi-eweyi yị ẹngụ ẹnịnị. Ọnọọ vaa mẹ ka ẹnya awụ ọ̀ hẹrẹ agụvị ka aza ẹnẹẹ vaa gụ wụ ụvọ. 23Wàa maanị mẹẹ anka Ohomorihi mẹ̀ kà a wụ, ọ yị vaa ngụ wụ ẹngụ. Avaba aza ẹnẹnị aa nọ eehi, dị ịnẹ ẹnịnị ee hine.” 24Imosiisi ộ dọ ịrẹyị ọyẹ anị tụ́ ịzọọ dị ọ mẹ avaba ịsị ọ ka ọ̀ mẹ nị. 25Di Imosiisi nyị aza hụụnị avaba Anisirẹrị ana zụ mẹ ẹkụra nị. Dị ọ sị wa mẹ odeyi aza ẹnẹẹ nị. Dị ọ sị wa mẹ odeyi aza ẹnẹẹ nị. Aza ẹnyị ệ sị eyi pè aza ẹnị akahị, dị aza enyi si eyi pè aza ẹnị ẹchẹhị, di aza ẹnyị vị aza ẹnị ẹvarẹwụ dị áaza ẹnyị vị aza ẹnị ẹẹwụ nị. 26Dị aza ẹnẹẹ aa mẹ̀ ọkarẹyị yị aza pooro nị. Ịrẹyị ọ̀ọ sị katẹngụ, dị ẹ kụ́ ọ nọ ịda Imosiisi. Dị ẹnị ụvọta ee tụ́ ohii tụ́ ịnị ịrẹyị eweyi-eweyi. 27Di Imosiisi sị ọyẹ anị na tụ́, di o si hu aa nọ eehi anị nị.

Currently Selected:

Ọyịkụra 18: EBTP

Highlight

Copy