Ọyịkụra 22

Ọda ana za ụta ọyị rị

1Ọza òo ne yị imaaru àa vị atẹmẹ dị ọ wụ̀ ọ à vị ka dị ọ ná a nị o vee si ụta varẹma. Àa vi imaaru o ne yi nị, imaaru ẹẹhị o vee sii si ụta imaaru ọnya ọnọọ nị. A va vị atẹmẹ o ne yi nị, dị ọ sị atẹmẹ ẹẹna sị ụta atẹmẹ ọnya. 2Oyi àa chaka irehi ka ọnị ọ̀ ngụ ọ dị a nya a ịsa di o sú nị, ọza ana wụ̀ ọ ọ yị rị ịvị, agụvị ka vị ọ ka ọnị ọ̀ dọ ẹngụ anị tụ́ nị. 3Ama eyi ọ̀ọ sị nị dị ọ vavọọ wụ oyi nị, ọ vaa rị rị ịvị ka ộ wụ̀ ọza. Ọza òo yi oyi, ò si ụta varẹma. Ọ̀ yị nyị ịsị a vọrọ ka ò si si ụta oyi oni o yi. 4Ọza ọ̀ọ vavọọ ne yi ịsụpa, ẹhụụ imaaru, ịkẹrịkẹtẹ à vị atẹmẹ, ọ rẹ vavọọ si ụta varẹma oze ẹẹva. 5Ọza ọ̀ọ kụ́ ịsụpa na rị ịnị avị àa vị ịnị ụbazị dị ọ zẹẹ ka ẹ̀ há na rị aarẹ ọza ẹnẹsa nị, vi o vee si ụta varẹma nị. Ana mẹ hu keekere ịnị ịsa ịnị aarẹ à vị ụbazị anị o ve sii si ụta nị. 6Ọza ọ̀ọ jị ịra tụ́ avị dị ọ rị avị ịra na ngụ ịnị aarẹ ọza ẹnẹsa dị ọ na rị akụ ana a mẹ hi ẹtẹ àa vị ana jẹẹ ịra nị, ọza ana jị ịra tụ́ avị avọọ vee si ụta ịsa ana rị ịra. 7Ọza ọ̀ọ dọ ka ọnị aa si ẹkẹhị àa vị ogu ọnyọọnyị tẹ ọza di e ve yi ọ hụụnị eehi anị nị, àa za oyi ọnọọ, oyi ọnọọ a vee si ụta varẹma nị. O vee si ụta ịsa oni o yi oze ẹẹva. 8Ama ọza ò yi re oyi ọnọọ, dị ọza ana nyị irehi nọ ịzị Ohomorihiī yà dị ọ na hị́ eku ka ẹ yị vị ọnị ọ vara eyi yi ogu ọhụva anị. 9Àa kụ ịrẹka ka ê re ịsa ịnị ụvọ ọza ẹhụụ imaaru, ịkẹrịkẹtẹ, atẹmẹ, awuru ọnịrị ogu tura ogu ene èe vú aanị nị, ẹnị ẹyịva ẹ̀ nọ ịzị Ohomorihiī yà. Ọza ọnị Ohomorihi ọ̀ọ sị zụ ka ọnị ọ rị ịvị nị, di o si ụta yị ọnọhụva nị. Ịsa ene vu avọọ vị oni o vee si oze ẹẹva. 10Ọza ọ̀ọ sị ịsụpa yị ọza, ẹhụụ ịkẹrịkẹtẹ, imaaru, atẹmẹ àa vị ịsụpa ọnyọọnyị. Ịsụpa ọnọọ òo sú à vị ka dị ọ̀ tụ̀ ụnava, ọ̀ hyakụ vị ka â sị ọ ọza ọ̀ yị mẹ̀ yà ịzọọ, 11aza ẹnẹẹ vaa nọ ọvịdị Ẹnẹyịmavara naa hị́ eku dị à sị mẹ̀ ọkarẹyị. Ọza ana a sị ịsụpa yị vaa hị́ eku ka ẹ yị vị ọnị ụvọta ọ vara eyi yi ịsụpa ọhụva anị. Ọ̀ọ vavọọ sị eku hị́, ọza ana nyị ịsụpa ọnọọ vavọọ vaa dọ. Ẹ yị nyị ụta ana kụkụ aa varẹma sị ọ. 12Ama àa vi e ve yi ịsụpa ọnọọ hụụ ịda ọza ana sị yị nị, â nyị ka ò si ụta yị ọza ana nyị ịsụpa anị. 13Àa va vị uye ịnị avị, ọ wụ̀ ịsụpa ọnọọ, â nyị ka ọ̀ si oku anị va zụ̀ ọza ana nyị di ò re e. Ịjọnọọ ọza ọ yị kụkụ vaa kà a ka ò si ụta ịsụpa oni uye wụ. 14Ọza ọ̀ọ na pà ọhụva anị ịsụpa dị ịsụpa ọnọọ tụ̀ ụnava à vị ka di o sú ọ́za ana nyị ọ̀ yị mẹ̀ yà ịzọọ nị, â nyị ka ọza ana na pà ịsụpa ọnọọ ò si ụta varẹma. 15Ama ọza ana nyị ịsụpa ọnọọ ọ̀ọ yà ịzọọ dị ịsa vavọọ mẹ ịsụpa anị nị, asị a kà a ka ò si ọza ana nyị ịsụpa ọnọọ ụta varẹma. Àa vị ẹkẹhị ọ sị na dọ ịsụpa ọnọọ nị, ẹkẹhị ọnị ọ sị dọ ọ kẹnẹ ọ vị ụta oni o vee si nị.

Ọda ana za ebira ọnịrị ahẹkẹ ọyị mẹ

16 # Ọda 22.28,29 Ọnọrụ òo re ozwoorihi ọnị ọza ọ̀ yị nyị di o vene e dị ọnịrị ọ sị sụ nị, â nyị ka ò si ẹkẹhị ịrẹsụ anị dị ọ̀ kụkụ nyị ọ. 17Ada ozi ọnọọ òo yi dị ọ ka ọnị ọ yị sị ga a nị, ẹkẹhị ịrẹsụ ozwoorihi ọnọọ vị ana aa mịị mẹẹ yị ada anị. 18#Ọda 18.10,11Ọnẹẹ ana aa mẹ ẹbẹ vị ana a vaa wụ̀. 19#Ire 18.23; 20.15,16; Ọda 27.21Ọza ene ne pè uye sụ́, a wụ̀ ọ. 20#Ọda 17.2-7Ọza ọ̀ọ na mẹ̀ ịsọvọ yị ori dị ahịka ẹ yị vị ẹmị Ẹnẹyịmavara kẹnẹ aa mẹ ịsọvọọ yị nị, à wụ̀ ọza ọnọọ. 21#Kụra 23.9; Ire 19.33,34; Ọda 24.17,18; 27.19Asị ụ chamayị yị ọzọga nịnị. Asị ụ rẹ mẹ ehuna yị wa nịnị. Wáā yẹ ka ẹwụ nịnị rẹ vịdị vị ọzọga tụ́ Ijipiti. 22Asị ụ mẹ osoku ọnịrị ozi oku rị nịnị. 23Wàa mẹ wa rị di e nowu va za mị nị, mị vaa ba wa owu. 24Ayị vaa kụ́ mị dị mị ka à wụ nịnị ịnị ịrẹkụ. Ịjọnọọ di ose ewu nini vara osoku, di ezi ewu nịnị rẹ vara ozi oku nị. 25#Ire 25.35-38; Ọda 15.7-11; 23.19,20Wàa sị ẹkẹhị rere aza amị ịnị ẹngụ awụ nịnị ana vị onosiye, asị ụ mẹ̀ ebira ọza ana aā sị ẹkẹhịị rere ọza ka ọnị ọ̀ sị rị ọgụ. Asị ụ dọ ọ ọtụrọsarẹsụ nịnị. 26#Ọda 24.10-13Ọza ọ̀ọ rị wụ ụta dị ụ dọ ọ awuru, vaa naa yọ ọyị àa vaa ngụ ẹtẹ. 27Awuru ọnọọ kẹnẹ ọ nyị ene ee sii kú ẹngụ nị. Wàa dọ ọ, sị u ka ò si kú ẹngụ na sụ? Ẹngụ ọza ọnọọ òo nowu va za mị, mị vaa baa owu agụvị ka mịị̄ vayị ọza. 28#Ụkọ 23.5Wẹ yị nyayịnẹ kụ Ohomorihi ụhụ. Wẹ yị nyayịnẹ kụ ọdọvịdị awụ nịnị ụhụ. 29Òo si tù ka wa sị ịnị akụ awụ ọnịrị eche awụ ne beri angwẹ awụ va mị, asị ụ ngụ ayịsa anịị mị. Ozi ịpaapa awụ ọ̀ọ vị ọnọrụ, ẹmị ụ waa sịị yị nị. 30Ozi ịpaapa ọnị imaaru ọnịrị atẹmẹ awụ ọ̀ọ ma, ẹmị ụ waa sịị yị nị. Ẹ̀ẹ vavọọ ma ozi dị ụ naavọ pè ọnyị ẹnịnị mẹ ẹkụhị ịhịmba. Ịhị ẹ tụ́ ọ ẹkụhị ịhịnta dị ụ sị ọ va mị. 31#Ire 17.15Aza amị ụ vị nịnị nị. Agụvị avọọ asị ụ na rị uye ana ahịka uye ịnị avị ọ wụ nị. Ẹngụ ẹnẹẹ vi oni u vee nee ta yị irezi nịnị.

Currently Selected:

Ọyịkụra 22: EBTP

Highlight

Copy