Ọyịkụra 24

Anisirẹrị ệ dọ avaba ịrẹyị oni Ohomorihi kà

1Dị Ẹnẹyịmavara hị́ Imosiisi dị ọ ka ọnịrị Eerọnị ne beri Inadabi ọnịrị Abidu è dudu hịrẹ ataba ve tù ọnị nị. Ọ kà ẹnịrị azọkụ Anisirẹrị ẹnị ẹtarẹwụ ẹ̀ jẹẹ ẹ́nẹẹnẹ dị ẹ̀ tana tụra ẹtẹ yị ọnị 2di Imosiisi ọnị ịnya ò tere pè ọnị. Ọ kà asị aza ana vọ tere pè ọnị Ẹnẹyịmavara kà asị Anisirẹrị ana vọ tere pè ataba ọnọọ. 3Imosiisi ộ na dị ọ na kà a yị aza ẹnẹẹ avaba ịrẹyị ẹnị Ẹnẹyịmavara kà ọnịrị ọda ọnị ọ mẹ nị. Dị Anisirẹrị nịnị sị irenu tọ̀ ọnya dị ẹ ka avaba ịsa ẹnị Ẹnẹyịmavara ọ̀ọ ka ẹnị vaa mẹ nị. 4Di Imosiisi va chẹrẹ avaba ịrẹyị ẹnị Ẹnẹyịmavara kà nị. Ẹnẹnẹ viri-viri eyinẹhẹ anị, di Imosiisi kwẹẹtẹ dị ọ jị ụta tụ́ iruvo ataba ọnọọ nị. Dị ọ sị ịrẹta jị ọhẹ ẹwụrẹva tụ́ ọ nị. Ọhẹ ẹwụrẹva ọnọọ ọ jẹẹ yị ịrẹsụ ẹwụrẹva ana vị Anisirẹrị. 5Di Imosiisi tụ́ ezwọọmụha dị ẹ na mẹ̀ ịsọvọ ana aā rị ịraa yị Ohomorihi nị. Dị ẹ rẹ sị ezi imaaru dị ẹ wụ̀ ọ mẹ̀ ịsọvọ yị Ẹnẹyịmavara di e dudu rị ọ nị. 6Di Imosiisi sị achẹva imaaru ọnọọ dị ọ sị tụ́ ịnị ẹnya nị. Dị ọ sị achẹva ana vọ di o chee sẹ ụta ọnọọ nị. 7Dị ọ va sị iwe ana chẹrẹ ịzẹzẹ anị Anisirẹrị zẹẹ Ohomorihi tụ́ dị ọ kà a zụ̀ aza ẹnẹẹ nị. Di e tụ́ ohi dị ẹ ka ẹnị ệ dọ, ẹnị vaa mẹ avaba ịsị Ẹnẹyịmavara ọ̀ọ mẹ ọda anị. 8#Imt 26.28; Ịmk 14.24; Irk 22.20; 1 Ịkọ 11.25; Ihib 10.29; Ihib 9.19,20Di Imosiisi sị ọnị ọ sị tụ́ ịnị ẹnya tịtẹ di o che e sẹ aza ẹnẹẹ ẹngụ nị. Dị ọ ka, “Anya ịzẹzẹ oni u pè Ẹnẹyịmavara zẹẹ nịnị yị. Avaba anị yị ịnị ịrẹyị ọnị ọ kà.” 9Di Imosiisi ọnịrị Eerọnị ne chire Inadabi ọnịrị Abihu na vaka azọkụ Anisirẹrị ẹtarẹwụ dudu hịrẹ nọ ịnị ataba 10di e re Ohomorihi anị Anisirẹrị aa hẹkẹ nị. Ịzị ọ kụ́ ahụ hi vị ana sị mẹẹ ka enyusẹ ozoza nyoo-nyoo ẹnyị aanị ana aā hị́ ịsahwaya a sị mẹ̀ ẹ nị. Ộ nị anka eguhi. 11Ohomorihi ọ yị sị ụya rị azọkụ Anisirẹrị ẹnẹẹ. Ẹnịnị ê re Ohomorihi, dị ẹ varẹma rị, di e hú nị. 12Dị Ẹnẹyịmavara kà Imosiisi ọ̀ hịrẹ vẹ ịrẹsụ ataba dị ọ̀ va yà ịzọọ nị. Ọ kà ọnị aa sị ịrẹta ẹẹva ọnị ọnị chẹrẹ ọda ẹnẹẹ tụ́ yọ dị ọ̀ sị naa kọ aza ẹnẹẹ. 13Di Imosiisi ọnịrị Ijosuwa ozi ahụ anị tenyi ẹngụ ẹnịnị, di Imosiisi hịrẹ ataba Ohomorihi na nị. 14Di Imosiisi kà a yị azọkụ Anisirẹrị ka ẹ̀ jẹẹ zi ẹnị ịzọọ dị ẹnị ẹ̀ vavẹ ve tù wa nị. Ọ kà Eerọnị ọnịrị Ihuri yà ịzọọ pè wa, agụvị avọọ àa nyị aza ana nyị ahankata, ẹ̀ kụ́ ọ ne tù wa. 15Imosiisi mẹ̀ hịrẹ ataba na, di eguhi và kú ataba ọnọọ nị. 16Di ẹtohweyi ụbanyị Ẹnẹyịmavara yà ịnị ataba ọnọọ nị. Avọọ eguhi ọnọọ mè kú ataba ọnọọ mẹ ẹkụhị ịhịnọnyị nị. Ịhị ẹ tụ́ ọ ẹkụhị ịhịmba, dị Ẹnẹyịmavara va yà ini eguhi ọnọọ dị ọ hị́ Imosiisi nị. 17Anisirẹrị nịnị vi ene ee re eguhi igirima Ẹnẹyịmavara ọnọọ anka ịra ana aa rị ịra ịrẹsụ ataba ọnọọ avọọ. 18#Ọda 9.9Di Imosiisi ngụ eguhi ọnọọ ọ màa hịrẹ nọ ịnị ataba ọnọọ nị. Dị ọ vavọọ yà ịnị ataba ịzọọ ọọdụ ọnịrị ịrahụ ẹkụhị ẹbẹẹva nị.

Currently Selected:

Ọyịkụra 24: EBTP

Highlight

Copy