Ọyịkụra 9

Ịsụpa Anijipiti nini ê sú ha.

1Dị Ẹnẹyịmavara rẹ kà a yi Imosiisi dị ọ ka ọ̀ na kà a yị Ihwarawo ka ọnị Ẹnẹyịmavara Ohomorihi Anihiburu ka ọ̀ hụrẹ aza anị ụvọ vị ẹ̀ na, dị ẹ̀ na hẹkẹ ọnị. 2Ọ kà òo yi ka ọnị ẹ yị zẹẹ ka ẹ̀ na, dị ọ zị za wa jẹẹ nị, 3ọnị vaa pa ịva yị ịsụpa anị ene hì ịnị aarẹ, dị ụkụ odivi wụ̀ umaata anị ọnịrị ịkẹrịkẹtẹ anị ne beri ịnyaakụmị ọnịrị imaaru anị ọnịrị atẹmẹ beri ẹvụ anị nịnị. 4Ama ọnị Ẹnẹyịmavara vaa tẹ ẹhwị tụ́ ịnị ịsụpa Anisirẹrị ọnịrị ịsụpa Anijipiti. Ẹ yị nyị ịsụpa Anisirẹrị ene vee sú. 5Dị Ẹnẹyịmavara jị ụmẹ nị, dị ọ ka ụhwọọ ọnị vavọọ vaa mẹ ịnị ẹtẹ ọnọọ nị. 6Ịzẹyịza eyinẹhẹ anị dị Ẹnẹyịmavara vavọọ mẹ nị. Dị avaba ịsụpa Anijipiti sú va ha nị. Ama ẹ yị nyị ịsụpa Anisirẹrị ikonya ene sú. 7Di Ihwarawo tụ́ aza ka ẹ̀ na zama ịsụpa Anisirẹrị re nị. Di e re ka ẹ yị nyị ịsụpa Anisirẹrị ikonya ene sú nị. Ama ayị Ihwarawo ọ sị sị kà geri-geri. Ọ yị zẹẹ ka aza ẹnẹẹ ẹ̀ na.

Ịtahụ ộ tụra hi Anijipiti nịnị ẹngụ.

8Dị Ẹnẹyịmavara rẹ kà a yị Imosiisi ọnịrị Eerọnị dị ọ ka ẹ̀ ká atịtọ ohihi ụvọ ẹyịva hụụnị arasị di Imosiisi ọ̀ yà eyi Ihwarawo dị ọ̀ tụ́ ọ ahị vaa hịrẹ. 9Ọ̀ ka atịtọ ọnọọ vaa garaa hi avaba ẹtẹ Ijipiti. Dị ịtahụ edivi-edivi tụra hi ịnị ẹngụ aza ọnịrị ịsụpa ịnị avaba ẹtẹ Ijipiti. 10#Ẹtẹ 16.2Ịzẹyịza dị ẹ na ká atịtọ hụụnị arasị dị ẹ na jẹẹ ọvịdị Ihwarawo nị. Di Imosiisi tụ́ ọ ahị hi ẹbẹẹba nị. Dị ịtahụ edivi-edivi aa tụraa hi ịnị ẹngụ aza ọnịrị ịsụpa kẹnẹ nị. 11Ọnịvọpa nịnị ẹ yị kụkụ zụ jẹẹ pè Imosiisi agụvị ịtahụ ana tụra wa ọnịrị avaba Anijipiti. 12Ama Ẹnẹyịmavara ọ raà mẹ ka ayị Ihwarawo ọ katẹngụ. Ọ yị zẹẹ ka ọnị ọ dọ ịrẹyị Imosiisi ọnịrị Eerọnị tụ́ ịzọọ. Avọọ Ẹnẹyịmavara mẹ̀ vịdị kị kà a yị Imosiisi nị.

Ata ihinẹba ộ zụ̀ hi ẹtẹ

13Dị Ẹnẹyịmavara rẹ kà a yị Imosiisi dị ọ ka, “Ọ kwẹẹtẹ ẹnẹnẹ viri-viri dị ọ̀ vara gẹrị Ihwarawo. Ọ kà dị ọ̀ kà a yọ ka ọnị Ẹnẹyịmavara ana vị Ohomorihi Anihiburu ka ọnị ka ọ̀ hụrẹ aza anị ụvọ dị ẹ̀ na hẹkẹ ọnị. 14Ọ kà ọ̀ kà a ka ọ̀ yị hụrẹ wa ụvọ ọnị vaa kụ́ ẹngụkataa tù ọnịrị anụkọrọ anị ne beri aza anị. Ọ kà ọ̀ kà a ka ọnọọ vaa mẹ ka ọ̀ yẹ ka ẹ yị nyị ọza anka ọnị Ẹnẹyịmavara ịnị avaba ẹhẹ. 15Ẹnẹyịmavara kà Imosiisi ọ̀ rẹ kà a yọ ka ọnị yaanị nyẹngụ sị ụkụ za ọnịrị aza anị dị ọnị wụ̀ avaba ẹnịnị hụrẹ ẹhẹ. 16#Iro 9.17Ama ọnị ộ navọ wa ka ẹ̀ yị yà ẹhẹ agụvị dị ẹ̀ yẹ ka ọnị ọ nyị ụkata. Ọ kà ọnọọ ọ̀ vaa mẹ ka aa kà ịrẹkụkụ anị ịnị avaba ẹhẹ nị. 17Ọ kà ọ̀ kà a ka ọnị ka a vi ee yii wù, dị ọ̀ yị zẹẹ ka ẹ̀ naa, 18ụmẹ aanị ụhwọọ, ọnị vaa zụ̀ ata orihi hi ịnị avaba ẹtẹ Ijipiti. Ọ kà ẹngụ ata orihi ọnọọ ộ yị vịdị vavọọ zụ̀ da hụrẹ ụmọrụmọ vẹ ịnị Ijipiti pooro ve tù ajịnị. 19Dị ọ rẹ ka Imosiisi ọ̀ kà a ka Ihwarawo ọ̀ kà a yị aza anị ka ẹ̀ kụ́ ịsụpa ẹnịnị ọnịrị avaba ịsị ẹ̀ẹ nyị hi ịnị aarẹ zwe na tẹ̀ ịzị ata orihi ò yi ve zuu tụ́ wa. Ọ ka ọ̀ kà a yọ ka ata orihi ọnọọ vaa zụ̀ kú aza ọnịrị ịsụpa ene ịnị aarẹ dị ẹ̀ yị na tẹ̀, di e sú.” 20Anụkọrọ Ihwarawo ẹnị ê hí angwa agụvị ịrẹyị ẹnị Ẹnẹyịmavara kà. Di e wuse zwe dị ẹ na kụ́ ọrịhị ẹnịnị ọnịrị ịsụpa ẹnịnị hụụnị aarẹ vẹ ini eehi nị. 21Ama â nyị aza ẹnyị ẹnịnị ene ro ka ịrẹyị ẹnị Ẹnẹyịmavara vị ịrẹyị ịyẹyẹ, dị ẹ navọ ọrịhị ẹnịnị ọnịrị ịsụpa ẹnịnị hi ịnị aarẹ nị. 22Dị Ẹnẹyịmavara kà a yị Imosiisi dị ọ ka ọ tana ụvọ tụ́ ẹba di ata orihi ọ̀ zụ̀ hị́ avaba ẹtẹ Ijipiti. Ọ kà ata orihi vaa zụ̀ụ hi ịrẹsụ ọza ọnịrị ịsụpa ne beri avaba ịsa ịnị aarẹ Ijipiti. 23Ịzẹyịza di Imosiisi tana okutẹ anị hi ẹbẹẹba nị. Dị Ẹnẹyịmavara mẹ ka apaana ihinẹba ọ̀ọ há di ata orihi aa zụ̀, dị ịnyanya aa rị vee-vee nị. Dị Ẹnẹyịmavara vavọọ zụ̀ ata orihi hi ẹtẹ ịnị avaba ẹtẹ Ijipiti nị. 24#Ẹtẹ 8.7; 16.21Ata orihi ộ zụ̀, dị ịnyanya aa rị vee-vee nị. Ata orihi ộ yị vịdị vavọọ zụ̀ rata da ịnị ẹtẹ Ijipiti. 25Dị ata orihi tụ́ avaba ịsa ene hi Ijipiti nị. Ô tụ́ aza ọnịrị ịsụpa ne beri avaba ịsa ana chị tụ́ ịnị aarẹ, dị ọ dà ọchị va ha nị. 26Ini okokooro Igoseni ịzị Anisirẹrị nịnị hi kẹnẹ ata orihi ọ̀ yị rẹ vaa zụ̀ụ hi nị.

27Di Ihwarawo va tụ́ na hị́ Imosiisi ọnịrị Eerọnị nị. Dị ọ ka ọnị ộ dọ booro aanị ka ọnị ọ sị ebira odivi mẹ̀. Ịsị Ẹnẹyịmavara mẹ ọ gẹ ẹ nị. Dị ọ ka ọnịrị avaba aza anị e si nyeeyi nị. 28Dị ọ ka aarịhịnị Imosiisi ọ̀ dá ịpẹ yị Ẹnẹyịmavara kà opomi ọnịrị ata orihi ọnọnị ô zee ọgọnị. Ọ kà ọnị aa hụrẹ wa ụvọ ka ẹ̀ẹ na. Ọ kà asị ẹ kụkụ yà ịzọọ. 29Di Imosiisi tụ́ ohi dị ọ ka ọnị ọ̀ọ sị jịnẹ hụụnị ẹkụra, ọnị vaa tụ́ ụvọ dị ọnị dá ịpẹ yị Ẹnẹyịmavara Opomi vaa zaa jẹẹ dị ata orihi ana aa zụ̀ jị, ka ịjọnọọ Ihwarawo vaa yẹ ka Ẹnẹyịmavara ọ nyị avaba ẹhẹ nị. 30Dị ọ ka ama ọnị ọ yẹ ka ọnịrị anụkọrọ anị ee yị ve hí angwa Ẹnẹyịmavara ana vị Ohomorihi.

31Ọchị ẹnyị aanị ana aa sị omi ini ịnẹ anị hị́ ịta ọnịrị ịsa ịnị aarẹ ana aā hị́ ibaari vi ana ata orihi du ha hi ịnị aarẹ. Ibaari ẹnị ẹ sị chaka ịrẹsụ hi ẹhẹ ụmẹ ọnọọ dị ọchị ana aa sị omi ini ịnẹ anịị̄ hi ịta ọnị maanị aa jị ododo nị. 32Ata orihi ọnọọ o rè vee di ihu ana aā hị́ ihwiti ọnịrị ihu ọsa ene venee ana aā hị́ ikumini, agụvị ka eni e mē jintu mẹ.

33Di Imosiisi hụụ ịda Ihwarawo dị ọ jịnẹ hụụnị ẹkụra nị. Dị ọ gana ụvọ anị, dị ọ dá ịpẹ; yị Ẹnẹyịmavara nị. Di opomi ọnịrị ata orihi jị, dị orihi ọ̀ yị kụkụ zụ̀ hi ẹtẹ nị. 34Ịjị Ihwarawo re ka opomi ọnịrị ata orihi ne beri orihi e si ji, dị ọ raa mẹ̀ ebira odivi anị nị. Dị ọnịrị anụkọrọ anị rẹ sị ayị ẹnịnị kà geri-geri nị. 35Anka Ẹnẹyịmavara mẹ vịdị mẹ ka Imosiisi ọ̀ kà a, ayị Ihwarawo ọ rẹ sị kà geri-geri. Ọ yị zẹẹ ka ọnị ọ̀ hụrẹ Anisirẹrị ụvọ ka ẹ̀ na.

Currently Selected:

Ọyịkụra 9: EBTP

Highlight

Copy