Oyinyima 17

Ọyịjị ụvẹvẹnẹ ana vị apọtẹrẹwa oto Ohomorihi

1Ẹkụhị ọnya Ẹnẹyịmavara o re ne tù Abụramị. Ịjọnọọọ, Abụramị ọ sị gụ ịrayị ẹnarẹwụ tụra ịhịịna. (909) Dị ọ kà a yị Abụramị dị ọ ka Ọnị ọ vị Ohomorihi Ochẹtẹẹngụ nị. Ọ kà Abụramị ọ̀ọ wụ́ ịrẹyị anị, asị ọ mẹ̀ ebira ene divi. 2Ọ rẹ ka ịrẹyị ọnị ọnị pè e kà tịtẹ ọnị vaa jẹẹ pè e. Ọ kà ọnị rẹ vaa mẹ ka ịpa anị ẹ̀ rụrụ ẹtẹẹtẹrẹ. 3Di Abụramị tana tụra ẹtẹ, di Ohomorihi rẹ kà a yọ ka: 4“Ịrẹyị oni oni pè e kà yị: ọnị ka ada anẹkụra otomiroku ọ vaa vị nị. 5#Iro 4.17Ẹ yị kụkụ vị Abụramị ịrẹha anị rị, ọnị ọ kụkụ rị Abụrahamị nị, agụvị ka ọnị ọ raà vara a ada otomiroku anẹkụra. 6Ezi anị vaa rụrụ ẹnẹmẹhị, anẹkụra ọrụrụ vaa zị oze ịpa awụụ haa hi ẹhẹ. Ezi anị ẹnyị vaa vị ohinọyị. 7#Irk 1.55Di Ohomorihi rẹ ka Ịrẹyị ọnọnị ọnị ọnị maanị pè e ọnịrị ezi anị ịrẹma-ịrẹma kà aanị vị ana jẹẹ pooro. Ịrẹyị pooro zịna-zịna ọ vị nị. Ịrẹyị ọnọọ ọ vị ka ọnị vaa vị Ohomorihi ọnịrị ezi anị ịrẹma-ịrẹma pooro zịna-zịna. 8#Ụkọ 7.5Ẹtẹ ọnị ọ yà ịnị anị aanị vị ọnị ọnị vaa sịị yị ọnịrị ezi anị ịrẹma-ịrẹma. Ọ kà ọnị ka avaba ẹtẹ Ikanaani ọnị vaa sịị yọ di ahịka ọnị ọ kụkụ nyị pooro nị. Ọ rẹ ka ọnị ọ vaa vị Ohomorihi ẹnịnị nị.”

9Di Ohomorihi rẹ kà a yị Abụrahamị dị ọ ka: Ọnị dee, â nyị ka ọnị ne beri ezi anị ịrẹma-ịrẹma ẹ̀ jẹẹ pè ịrẹyị oni oni pè e kà aanị pooro ịnị ẹhẹ ẹnịnị. 10#Ụkọ 7.8; Iro 4.11Ọ rẹ ka ọnị ọ vaa mẹ ịnị ịrẹyị oni mi pè ọnịrị ezi anị ịrẹma-ịrẹma kà tịtẹ yị. Ọ kà avaba ẹnịnị ana aa vị ọnọrụ vị ana vaa jị ụvẹvẹnẹ. 11Ọ kà ẹ vavọọ vaa jị ụvẹvẹnẹ. Ọnị ọ vaa vị apọtẹrẹwa ka â nyị ọkatịtẹ ana yà ịnị akakana ọnịrị wa nị. 12Ọ kà ọnọrụ ana àa sị gụ ẹkụhị ịhịnta ịnị aza anị vị ọnị ọ vaa jị ụvẹvẹnẹ. Avaba anọrụ ene vee hi ini ovwoovu anị vị ọnị ọ vaa jị ụvẹvẹnẹ, òo zee e eyi à ma a ini ohweje awụ òo zee e eyi ọ sị ẹkẹhị na hị́ ọ ịnị ụvọ ọzọga. 13Ọ kà ozi ana a ma ini ohweje anị ọnịrị ozi ọnị ọ sị ẹkẹhị anị na hị́ vị ọnị ọ vaa jị ụvẹvẹnẹ. Ohomorihi rẹ ka apọtẹrẹwa ọnọọ vị ana vaa yà ịnị ẹngụ ẹnịnị ana vaa sị zụ ka ịrẹyị ọnọnị vị ana jẹẹ pooro zịna-zịna. 14Ọ kà àa nyị ọnọrụ ẹnẹ ẹ̀ yị jị ụvẹvẹnẹ, ọnị yị kụkụ vaa za a tụ́ ịnị aza anị, agụvị ka ọ yị jẹẹ pè ịrẹyị ọnọọ.

15Di Ohomorihi rẹ kà a yị Abụrahamị dị ọ ka, “Hụrị ajịnị na, asị ụ rẹ kụkụ hị́ ose anị Isarayi. Ịrẹha anị ọ kụkụ rị Isera nị. 16Ọ rẹ ka ọnị vaa mẹ ka ò zee yọ, dị ọnị mẹ ka ọ̀ ma ozi ọnọrụ ọnyaa yị ọ. Ọ kà ọnị vaa mẹ ka ò zee yọ, ọnyị anẹkụra ọrụrụ ọ vaa vị nị. Ẹnyị ini ezi anị vaa vị ohinọyị. 17Di Abụrahamị tana tụra ẹtẹ, dị ọ và eyi kú ẹtẹ di ee nyinyi nị. Di ee ro o ịnị ayị anị ka: áá kụkụ zụ ma ozi yị ọza ana sị gụ ịrayị ẹchẹhị? Isera ana sị gụ ịrayị ẹnarẹwụ aanị ọ kụkụ zụ ma ozii?” 18Di Abụrahamị kà a yị Ohomorihi dị ọ ka ọ̀ọ kụkụ sị Isimẹrị ka ọ̀ dọ ọnị ịrẹsụ yọ? 19Di Ohomorihi ka: Eyiye, Isera ose anị vaa ma ozi ọnọrụ ọnya. Ọ̀ọ sị ọ ma dị ọ yị ọ Ayiziiki. Ọ kà Ịsị ọnị pè e kà tịtẹ aanị, ọnị ọnị vaa sịị yị nị, beri ezi anị ịrẹma-ịrẹma. 20Ọ rẹ ka ini oze ịrẹyị Isimẹrị, ọnị ọ wụ́ ịrẹyị ọnị ọ kà. Ọ kà ọnị rẹ vaa mẹ ka ò re zee yị ọnị, dị ọnị rẹ ha, dị ọ rụrụ ẹtẹẹtẹrẹ. Ọ vaa ma ezi ẹwụrẹva dị ẹnịnị vị ohinọyị. Ohomorihi ka ọnị rẹ vaa mẹ ka ọnị ọ̀ rẹ vị anẹkụra ọbanyị. 21Ọ kà ama ịsị ọnị ka ọnị vaa mẹ ịnị ịrẹyị ọnị mi pè e kà tịtẹ aanị, Ayiziiki ọnị vaa mẹ̀ ẹ yị nị. Ọ rẹ ka ụmẹ aanị ụpẹ ọsa, Isera sị ozi ma yọ. 22Ịjị Ohomorihi sị ịrẹyị anị kà yị Abụrahamị ta, dị ọ hụụ ịda Abụrahamị di aa nọ ẹbẹẹba nị. 23Ịhị ọnọọ gẹdẹ-gẹdẹ, di Abụrahamị sị Isimẹrị ozi anị ọnịrị ọrịhị ana a ma ini ohweje anị ne beri ọnị ọ sị ẹkẹhị anị hị́ ọnịrị avaba anọrụ ịnị aza anị, dị ọ jị wa ụvẹvẹnẹ nị, anka Ohomorihi mẹ̀ kà a yọ nị. 24Abụrahamị ọ sị gụ ịrayị ẹnarẹwụ tụra ịhịịna dị ọnị rẹ vavọọ jị ụvẹvẹnẹ ịhị ọnọọ nị. 25Isimẹrị ozi anị ọnị vị ịrayị ẹwụrẹta dị a jị ọ ụvẹvẹnẹ. 26Ịhị ọnị Ohomorihi maanị kà ịrẹyị yị wa aanị Ábụrahamị ọnịrị Isimẹrị ozi anị jị ụvẹvẹnẹ nị. 27Ịhị ọnọọ avaba anọrụ ini ohweje Abụrahamị, aza ana a ma ini ohweje anị ọnịrị aza ọnị ọ sị ẹkẹhị anị hị́ hụụnị ụvọ ọzọga, ịhị ọnọọ ọnịrị wa jị ụvẹvẹnẹ nị.

Currently Selected:

Oyinyima 17: EBTP

Highlight

Copy