Oyinyima 25

Ezi ọsa ana Abụrahamị vana ma.

(1 Ịtọ 1.32-33)

1Abụrahamị ộ vana nyị ọnẹẹ ọsa ọnị ịrẹha anị rị Iketura. 2Ezi oni Iketura ma yị Abụrahamị ẹ vị Izimirani, Iyokisani, Imedani, Imidiyani, Isibaki ọnịrị Isuwa. 3Di Iyokisani ọnị ma Ịsẹba ọnịrị Idedanị nị. Di Idedanị ọnị vị ada ịrẹsụ ẹnẹnị nị: Asuri, Iretusimi, ọnịrị Irewumimi. 4Ezi Imidiyani ẹnị rẹ vị Ehwa, Ehwẹrị, Ịhanọkị, Abida ọnịrị Eridaha. Avaba ẹnẹẹ ẹ vị ezi ọnịrị aazị Iketura nị.

5Abụrahamị vị ana kụ́ avaba ogu anị yị Ayiziiki. 6Ama di o ve sú, ộ kụ́ ịsa mẹ ezi oni ese anị ọsa ma yọ ẹyịza. Dị ọ va ka ẹ̀ hụụnị eehi yị Ayiziiki nị. Ộ ka ẹ̀ nọ ẹkụra ana yà oze ọnị ọyịị̄ zịị vẹ.

Isu Abụrahamị

7Abụrahamị o si bo ẹtẹẹtẹrẹ, ọ sị gụ ịrayị ẹchịhịnta tụra ẹwụrẹhị, 8Abụrahamị vị ana nyayịnẹ bo di o ve sú. Ó ku orubo ẹtẹẹtẹrẹ, dị ẹhẹ anị zoza nị. Ộ vaa ụhwẹ ha dị o ne tu ohiku anị nịnị ene vịdị su nị 9Di Ayiziiki ọnịrị Isimẹrị ezi anị ne e tụ́ ịnị ụtẹha Imakipera nị. Ụtẹha ọnọọ vị ana yà ịnị ẹtẹ Ehwironi ana vi ozi Izohari Anihiti. Ọ maanị gụrị Imamire. 10#Oyn 23.3-16Ẹtẹ ọnọọ Abụrahamị hị́ hụụnị ụvọ Anihiti nị. Ịzọọ e ne Abụrahamị ọnịrị Isera ose anị tụ́ nị. 11Abụrahamị mè wusu, Ohomorihi ộ mẹ̀ ka ò zee yị Ayiziiki ozi anị. Di Ayiziiki kwẹẹtẹ na ra ọgụrị ịzị aa hị́ “Ịbẹẹrị-Ịraha-Ịrọyị” (ịkangga ọza ana yàrà eneē re mị).

Ezi Isimẹrị

12Isimẹrị vi ozi Abụrahamị. Ihaga ana vị Anijipiti ozi ahụ Isera ọ ma a yọ nị. 13Ịrẹha ezi Isimẹrị ọnọọ yị. Ẹ mẹmẹ vị̀ yị ẹngụ a sị hị́ wa aanị nị. Inebayoti, Isimẹrị vịdị ma nị. Ana vọ ẹ rị: Ikeda, Adibeeri, Imibisami, 14Imisima, Iduma, Imasa 15Ihadadi, Itema, Iyeturi, Inahasi ọnịrị Ikedema. 16Ẹnẹẹ ẹ vị ezi Isimẹrị nị. Ịrẹha ẹnịnị aā sịị hị́ ẹkụra ọnịrị udi ọzọza nị. Ẹnị ẹwụrẹva ẹnẹẹ ẹ vị ohiku ịrẹsụ ẹnẹẹ nị.

17Isimẹrị vị ịrayị ẹchịhịnọnyị tụra ẹwụrịhịmba di o ve sú. 18Ezi Isimẹrị vị ana ra ịnị ẹtẹ ana yà ịnị akakana Ihavira ọnịrị Isuri. Ịzọọ vị ana và eyi ọnị ọyịị̄ zị hụrẹ ịnị ẹtẹ Ijipiti ózee Asiriya. Ọ yị ra va hura ezi Abụrahamị ana vọ.

Ịtọpa Iisọ ọnịrị Ijekọvụ

19Ịtọpa Ayiziiki ozi Abụrahamị yị. 20Ayiziiki vị ịrayị ẹbẹẹva dị ọ va nyị ose anị ana aā hị́ Irebeka. Irebeka ọnọọ vị ozi Ibetuwẹrị Anarami ịnị akẹbẹẹba Imesopotamiya. Irebeka rẹ vị ọyịnyara Ịrabanị. 21Ose Ayiziiki vị ọbọrị, dị Ayiziiki aa dá ịpẹẹ yị Ẹnẹyịmavara nị. Ẹnẹyịmavara ộ wụ́ aduwa anị, di Irebeka ee zyẹẹ nị. 22Ezi ẹnẹẹ vị ẹẹva di eyee zigi ẹngụ ịnị ịrẹka Irebeka nị. Di Irebeka ka, “Ọnọnị rẹ rị aanị?” Dị ọ ka ọnị aa naa họ̀ Ẹnẹyịmavara kà ọ̀ kà a yị ọnị nị. 23#Iro 9.12Ọ mẹ na họ̀ ọ, Di Ẹnẹyịmavara tụ́ o ohi dị ọ ka: Anẹkụra ẹẹva e hi ịnị ịrẹka anị nị. Anẹkụra ẹẹva ọ vaa ma nị, ama vị ẹ vaa gàa hi nị. Ọnya ọ vaa nyị ụkata hu ọsa nị. Ana vị ọzọkụ ọ vaa hẹkẹ ana vi ozweyi nị. 24Ụmẹ mẹ̀ si tù ka ò ma ozi, di ahịka ịzẹyịza adẹgụnẹva ọ ma nị. 25Ịpaapa mẹ jịnẹ vẹ, dị ọ vi ovivi, dị ẹngụ anị vị ẹyị-ẹyị anka ịta ẹyị-ẹyị avọọ nị, agụvị avọọ di aa hị́ ọ Iisọ nị. Iruvo Edomi ô vene ịrẹyị ẹnị ẹẹ̄ hị́ ovivi ịnị ẹkụra Anihiburu. 26Dị ọhụva anị ọnị rẹ jịnẹ vẹ nị, dị ahịka vị ọ sị ụvọ za Iisọ ibezi ahụ nị, agụvị avọọ di aa hị́ ọnọọ Ijekọvụ nị. Ayiziiki vị ịrayị ẹbẹẹta di Irebeka vavọọ ma ezi ẹnẹẹ. Ijekọvụ ini Ihiburu, ô vene ịrẹyị ẹnị ẹẹ̄ hị́ ibezi ahụ (Oyn 27.36).

Iisọ mẹmẹ sị ọzọkụ anị yị Ijekọvụ

27Ezi ẹnẹẹ mẹ̀ sị hụ̄, Iisọ ọnị vị ozube obooro, dị ọọ̄ ngụ avị nị. Ijekọvụ ọnị vị ọza hẹẹ aanị, di ahịka ini eehi ọọ̄ yà nị. 28Ayiziiki vị ana nyayịnẹ sì ịrẹyị Iisọ agụvị ka ọ nyị iravu uye ịnị avị. Ama di Irebeka oni sì ịrẹyị Ijekọvụ nị.

29Ẹkụhị ọnya Iisọ ộ hụụnị avị vẹ, ụngwẹ aa kụ̀ ọ ẹtẹẹtẹrẹ, dị ahịka vi o ve tù ka Ijekọvụ ee ne ẹpẹ nị. 30Di Iisọ ka: Ijekọvụ, ọ̀ ká ọọmẹ ovivi anị ọnọọ yị ọnị dị ọnị ọ rị ọ de, ka ụngwẹ aa vaa wụ̀ ọnị: (Iruvo ana a sịị hị́ Iisọ Edomi ọ vị ọnọọ nị.) 31Di Ijekọvụ ka, “Ọ̀ọ ka ọnị ọ̀ ká yọ, ọ sị udi ọzọkụ awụụ yị ọnị kẹ.” 32Di Iisọ ka: Ọnị mèe vee sú aanị, sị ọnị aa rị ịnị udi ọzọkụ? 33#Ihib 12.16Di Ijekọvụ ka: Ọ̀ hị́ eku kẹ ka ộ sị udi ọzọkụ anị yị ọnị. Ịzẹyịza dị ọ hị́ eku, dị ọ sị udi ọzọkụ anị yị Ijekọvụ nị. 34Di Ijekọvụ va sị ịbụrẹẹdị, dị ọ ká ẹpẹ tụ́ ọ yị Iisọ, di Iisọ rị ọ di o hú enyi tụ́ ọ dị ọ kwẹẹtẹ di aa na nị. Aanị Iisọ mẹ̀ za udi ọzọkụ anị, dị ọ si eyi wụ̀ ọ nị.

Currently Selected:

Oyinyima 25: EBTP

Highlight

Copy