Oyinyima 39
39
Ịrẹyị Ijosẹẹhụ ọnịrị ose Ipotihwa
1Ịhị ọnọọ Anisimẹrị ẹnẹẹ ẹ va raà sị Ijosẹẹhụ na ngụ Ijipiti. Â nyị ọnya aanị ana aā hị́ Ipotihwa. Ọga ọnya ọ vị ịnị aza ene ee pè ohinọyị Anijipiti mẹ̀ ụkọrọ nị. Ọnị ọ vị ọga isoja ene ee sere irehi ohinọyị Ijipiti nị. Ọnị ọ hị́ Ijosẹẹhụ vẹ Ijipiti nị. 2#Ụkọ 7.9Ẹnẹyịmavara ộ jẹẹ ịrẹma Ijosẹẹhụ, dị ọ mẹ ka ò zee yọ nị, agụvị avọọ dị ọga anị sị ọ ka ọ va yà ini eehi Anijipiti ana vị ọga anị nị. 3Ọga Ijosẹẹhụ ô re ka Ẹnẹyịmavara vị ana yà pè Ijosẹẹhụ. Ô re re ka Ẹnẹyịmavara vị ana mẹ ka ịsa tụra ịsa oni Ijosẹẹhụ ọ̀ọ sị ụvọ tụra vị eneē zoza. 4Ebira Ijosẹẹhụ o reè zee Ipotihwa eyi, dị ọ kụkụ mẹ̀ ẹ ozi ahụ anị ụvọta nị. Dị ahịka Ijosẹẹhụ Ipotihwa kụkụ si irehi anị chire ụvọ, dị Ijosẹẹhụ kụkụ sị eyi pè avaba ogu Ipotihwa nị. 5Hụrẹ ụmẹ ọnị Ipotihwa maanị sị sị irehi anị chire Ijosẹẹhụ ụvọ aanị, dị Ẹnẹyịmavara mẹ ka ò kukuu zee yị Anijipiti ọnọọ agụvị Ijosẹẹhụ nị. Aarẹ ọnịrị irehi anị ne beri avaba ogu anị vi ẹnẹ Ẹnẹyịmavara vana aa mẹ ka èe zoza ẹtẹẹtẹrẹ. 6Di Ipotihwa kụkụ hụrẹ avaba ogu anị ụvọ yị.
Ijosẹẹhụ ka ò sị eyi pè e nị. Ọ yị kụkụ hụrẹ ayị ịnẹ ogu anị ọnyọọnyị à yị vị ịsọyịrị anị kẹnẹ. Ijosẹẹhụ ô zoza ẹtẹẹtẹrẹ. Ọza òo re e, vị aa va a nị. 7Ụmẹ ọnya eyi ose ọga Ijosẹẹhụ ọ yị kụkụ hụụnị ẹngụ Ijosẹẹhụ. Ẹkụhị ọnya ọ ka ọ vẹ dị ọnịrị ọ ọ̀ọ sụ. 8Ama Ijosẹẹhụ ô yi. Dị ọ kà a yị ose ọga anị dị ọ ka: Ộ yẹ ka ọnị ọga anị sị avaba irehi anị chire ụvọ nị. Ọ kà ẹ yị kụkụ nyị ịsị ọga anị aa si ayị nọ ịnị anị ini eehi ọnọnị. Ọ kà ọ raà sị avaba ogu anị chire ọnị ụvọ. 9Ọ rẹ ka ẹ yị kụkụ nyị ọza ana nyị ọda hu ọnị ini eehi ọnọnị. Ọ kà ẹ yị rẹ nyị ịsị ọga anị ọ̀ yị sị yị ọnị, à yị hụhụ vị ọnị ịnya kẹnẹ agụvị ka ọnị ọ vị ose anị. Ọ kà o mè ro ka ọnị ọ zụ mẹ̀ ẹngụ ebira odivi ọnọnị, ebira odivi ọbanyị ọ vị ágada Ohomorihi nị.
10Ọnẹẹ ọnọọ vị ana aa yịị kụ́ ịrẹka hi Ijosẹẹhụ ẹngụ eyinị-eyinị, ama Ijosẹẹhụ ọ yị dọ ka ọnịrị ọ ọ̀ sụ. Ọ yị hyakụ dọ ka ọnị ọ̀ gụrị ọ. 11Ẹkụhị ọnya di Ijosẹẹhụ ngụ ini eehi ka ọnị ọ̀ na mẹ̀ ụkọrọ anị nị. Ịhị ọnọọ ezi ahụ ana vọ ẹ sị hụụnị eehi. 12Di ose ọga anị ọnọọ vana sị ụvọ ngụ ọ achị dị ọ rẹ ka, “Ọnị ee si ka ọnịrị ọ ọ̀ sụ.” Di Ijosẹẹhụ hụrẹ achị anị ụvọ yọ, di o zwe jịnẹ hụụnị eehi nị. 13Ịjị ose ọga anị re ka ọ raà hụrẹ achị ụvọ yị ọnị o si zwe tụ́ ẹhẹ, 14di o nowu hị́ ezida anị ana vọ nị. Dị ọ kà a yị wa dị ọ ka: Ee re ọga ẹnịnị mẹ̀ na sị Anihiburu ọnọnị vẹ ka ọ̀ va mẹ̀ ụhị nyị ẹnị. Ọ kà vị ọ ngụ tù ọnị ka ọnịrị ọnị ọ̀ọ sụ nọ. Ọ kà di ọnị ve nowu tụ́ ẹhẹ ka à ba ọnị owu nị. 15Ọ kà ọ̀ mẹ̀ wụ́ ka ọnị ê nowu tụ́ ẹhẹ, dị ọ navọ awuru anị tụ́ ịda anị, di o si zwe na jịnẹ nị. 16Di ose Ipotihwa sị achị ọnọọ tịtẹ pè ẹngụ ee zi ọva anị ka ọ̀ vẹ ini eehi nị. 17Ọva anị mẹ̀ vẹ, dị ọ rẹ vavọọ kà a yọ nị. Dị ọ ka: Ọrịhị Anihiburu ọnị ọ na sị vẹ ọ ngụ tù ọnị ka ọnị ọ̀ va mẹ̀ ụhị nyị ọnị nị. 18Ọ kà ama ọnị mè nowu tụ́ ẹhẹ ka à ba ọnị owu, dị ọ navọ achị anị tụ́ ịda anị, di o si zwe tụ́ ẹhẹ nị. 19Ịjị ọga Ijosẹẹhụ maanị wụ́ ịrẹyị oni ose anị kà, ka aanị Ijosẹẹhụ ozi ahụ anị mẹ̀ mẹ̀ ọnị nị, ayị ọga Ijosẹẹhụ ọ sị tụ́. 20Dị ọ ka à za Ijosẹẹhụ dị à sị ọ na tụ́ ịnị ẹngwa nị. Ịzị aā kụ́ anịnẹngwa ohinọyịị hi a sị Ijosẹẹhụ na tụ́ dị ọ yà ịnị ẹngwa ịzọọ nị. 21#Ụkọ 7.9Ama Ẹnẹyịmavara vị ana jẹ ịrẹma Ijosẹẹhụ. Ô yi hi ayị Ijosẹẹhụ, dị ọ mẹ ka ọga aza ene sị eyi pè anịnẹngwa è sì ịrẹyị Ijosẹẹhụ nị. 22Di ọga aza ene sị eyi pè anịnẹngwa sị Ijosẹẹhụ mẹ ọga avaba anịnẹngwa ana vọ nị. Ịsa tụra ịsa ana àa kụkụ mẹ ịzọọ, Ijosẹẹhụ éē nee họ̀ use nị. 23Ọga aza ana a sị si eyi pè ẹngwa ẹ yị kụkụ sị eyi nọ ịnị ịsa ana a raà sị chire Ijosẹẹhụ ụvọ. Ê re ka Ẹnẹyịmavara vị ana jẹẹ ịrẹma Ijosẹẹhụ. Avaba ịsị Ijosẹẹhụ ọ̀ọ mẹ vị ẹnẹ a mẹ ka ò zoza.
Currently Selected:
Oyinyima 39: EBTP
Highlight
Share
Copy
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
Oyinyima 39
39
Ịrẹyị Ijosẹẹhụ ọnịrị ose Ipotihwa
1Ịhị ọnọọ Anisimẹrị ẹnẹẹ ẹ va raà sị Ijosẹẹhụ na ngụ Ijipiti. Â nyị ọnya aanị ana aā hị́ Ipotihwa. Ọga ọnya ọ vị ịnị aza ene ee pè ohinọyị Anijipiti mẹ̀ ụkọrọ nị. Ọnị ọ vị ọga isoja ene ee sere irehi ohinọyị Ijipiti nị. Ọnị ọ hị́ Ijosẹẹhụ vẹ Ijipiti nị. 2#Ụkọ 7.9Ẹnẹyịmavara ộ jẹẹ ịrẹma Ijosẹẹhụ, dị ọ mẹ ka ò zee yọ nị, agụvị avọọ dị ọga anị sị ọ ka ọ va yà ini eehi Anijipiti ana vị ọga anị nị. 3Ọga Ijosẹẹhụ ô re ka Ẹnẹyịmavara vị ana yà pè Ijosẹẹhụ. Ô re re ka Ẹnẹyịmavara vị ana mẹ ka ịsa tụra ịsa oni Ijosẹẹhụ ọ̀ọ sị ụvọ tụra vị eneē zoza. 4Ebira Ijosẹẹhụ o reè zee Ipotihwa eyi, dị ọ kụkụ mẹ̀ ẹ ozi ahụ anị ụvọta nị. Dị ahịka Ijosẹẹhụ Ipotihwa kụkụ si irehi anị chire ụvọ, dị Ijosẹẹhụ kụkụ sị eyi pè avaba ogu Ipotihwa nị. 5Hụrẹ ụmẹ ọnị Ipotihwa maanị sị sị irehi anị chire Ijosẹẹhụ ụvọ aanị, dị Ẹnẹyịmavara mẹ ka ò kukuu zee yị Anijipiti ọnọọ agụvị Ijosẹẹhụ nị. Aarẹ ọnịrị irehi anị ne beri avaba ogu anị vi ẹnẹ Ẹnẹyịmavara vana aa mẹ ka èe zoza ẹtẹẹtẹrẹ. 6Di Ipotihwa kụkụ hụrẹ avaba ogu anị ụvọ yị.
Ijosẹẹhụ ka ò sị eyi pè e nị. Ọ yị kụkụ hụrẹ ayị ịnẹ ogu anị ọnyọọnyị à yị vị ịsọyịrị anị kẹnẹ. Ijosẹẹhụ ô zoza ẹtẹẹtẹrẹ. Ọza òo re e, vị aa va a nị. 7Ụmẹ ọnya eyi ose ọga Ijosẹẹhụ ọ yị kụkụ hụụnị ẹngụ Ijosẹẹhụ. Ẹkụhị ọnya ọ ka ọ vẹ dị ọnịrị ọ ọ̀ọ sụ. 8Ama Ijosẹẹhụ ô yi. Dị ọ kà a yị ose ọga anị dị ọ ka: Ộ yẹ ka ọnị ọga anị sị avaba irehi anị chire ụvọ nị. Ọ kà ẹ yị kụkụ nyị ịsị ọga anị aa si ayị nọ ịnị anị ini eehi ọnọnị. Ọ kà ọ raà sị avaba ogu anị chire ọnị ụvọ. 9Ọ rẹ ka ẹ yị kụkụ nyị ọza ana nyị ọda hu ọnị ini eehi ọnọnị. Ọ kà ẹ yị rẹ nyị ịsị ọga anị ọ̀ yị sị yị ọnị, à yị hụhụ vị ọnị ịnya kẹnẹ agụvị ka ọnị ọ vị ose anị. Ọ kà o mè ro ka ọnị ọ zụ mẹ̀ ẹngụ ebira odivi ọnọnị, ebira odivi ọbanyị ọ vị ágada Ohomorihi nị.
10Ọnẹẹ ọnọọ vị ana aa yịị kụ́ ịrẹka hi Ijosẹẹhụ ẹngụ eyinị-eyinị, ama Ijosẹẹhụ ọ yị dọ ka ọnịrị ọ ọ̀ sụ. Ọ yị hyakụ dọ ka ọnị ọ̀ gụrị ọ. 11Ẹkụhị ọnya di Ijosẹẹhụ ngụ ini eehi ka ọnị ọ̀ na mẹ̀ ụkọrọ anị nị. Ịhị ọnọọ ezi ahụ ana vọ ẹ sị hụụnị eehi. 12Di ose ọga anị ọnọọ vana sị ụvọ ngụ ọ achị dị ọ rẹ ka, “Ọnị ee si ka ọnịrị ọ ọ̀ sụ.” Di Ijosẹẹhụ hụrẹ achị anị ụvọ yọ, di o zwe jịnẹ hụụnị eehi nị. 13Ịjị ose ọga anị re ka ọ raà hụrẹ achị ụvọ yị ọnị o si zwe tụ́ ẹhẹ, 14di o nowu hị́ ezida anị ana vọ nị. Dị ọ kà a yị wa dị ọ ka: Ee re ọga ẹnịnị mẹ̀ na sị Anihiburu ọnọnị vẹ ka ọ̀ va mẹ̀ ụhị nyị ẹnị. Ọ kà vị ọ ngụ tù ọnị ka ọnịrị ọnị ọ̀ọ sụ nọ. Ọ kà di ọnị ve nowu tụ́ ẹhẹ ka à ba ọnị owu nị. 15Ọ kà ọ̀ mẹ̀ wụ́ ka ọnị ê nowu tụ́ ẹhẹ, dị ọ navọ awuru anị tụ́ ịda anị, di o si zwe na jịnẹ nị. 16Di ose Ipotihwa sị achị ọnọọ tịtẹ pè ẹngụ ee zi ọva anị ka ọ̀ vẹ ini eehi nị. 17Ọva anị mẹ̀ vẹ, dị ọ rẹ vavọọ kà a yọ nị. Dị ọ ka: Ọrịhị Anihiburu ọnị ọ na sị vẹ ọ ngụ tù ọnị ka ọnị ọ̀ va mẹ̀ ụhị nyị ọnị nị. 18Ọ kà ama ọnị mè nowu tụ́ ẹhẹ ka à ba ọnị owu, dị ọ navọ achị anị tụ́ ịda anị, di o si zwe tụ́ ẹhẹ nị. 19Ịjị ọga Ijosẹẹhụ maanị wụ́ ịrẹyị oni ose anị kà, ka aanị Ijosẹẹhụ ozi ahụ anị mẹ̀ mẹ̀ ọnị nị, ayị ọga Ijosẹẹhụ ọ sị tụ́. 20Dị ọ ka à za Ijosẹẹhụ dị à sị ọ na tụ́ ịnị ẹngwa nị. Ịzị aā kụ́ anịnẹngwa ohinọyịị hi a sị Ijosẹẹhụ na tụ́ dị ọ yà ịnị ẹngwa ịzọọ nị. 21#Ụkọ 7.9Ama Ẹnẹyịmavara vị ana jẹ ịrẹma Ijosẹẹhụ. Ô yi hi ayị Ijosẹẹhụ, dị ọ mẹ ka ọga aza ene sị eyi pè anịnẹngwa è sì ịrẹyị Ijosẹẹhụ nị. 22Di ọga aza ene sị eyi pè anịnẹngwa sị Ijosẹẹhụ mẹ ọga avaba anịnẹngwa ana vọ nị. Ịsa tụra ịsa ana àa kụkụ mẹ ịzọọ, Ijosẹẹhụ éē nee họ̀ use nị. 23Ọga aza ana a sị si eyi pè ẹngwa ẹ yị kụkụ sị eyi nọ ịnị ịsa ana a raà sị chire Ijosẹẹhụ ụvọ. Ê re ka Ẹnẹyịmavara vị ana jẹẹ ịrẹma Ijosẹẹhụ. Avaba ịsị Ijosẹẹhụ ọ̀ọ mẹ vị ẹnẹ a mẹ ka ò zoza.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.