Oyinyima 40

Ijosẹẹhụ ộ kà iruvo ụra yị aza

1Ộ vana dà kụ̀, ịnị ụmẹ ọnya, dị ọza anaā ká echee yị ohinọyị Ijipiti ọnịrị ohirẹsụ ọza anaā mẹ̀ ịsọyịrị yọ mẹ̀ ebira odivi ana kụ́ ohinọyị ayị nị. 2Ayị ọ sị kụ́ ohinọyị agụvị ịrẹyị ọnị ọza anaā ká echee yọ ọnịrị ọza anaā mẹ̀ ịsaa yọ mẹ. 3Dị ọ ka a kụ́ wa ne hi ini ẹngwa nị. Ọga isoja ana si eyi pe irehi ohinọyị ọ sị eyi pè ẹngwa ịzọọ nị. Ịzọọ Ijosẹẹhụ ọnị rẹ yà aa mẹ ẹngwa nị. 4Dị ọga isoja ọnọọ ka Ijosẹẹhụ ọ̀ zị wa ụtụ nị.

Ọ́ mẹ̀ dà kù ẹnị ẹ vavọọ hi ịnị ẹngwa, 5ịnị ịrahụ ẹkụhị ọnya dị ọza anaā ká echee yị ohinọyị Ijipiti ọnịrị ọza anaā mẹ̀ ịsaa yọ ene hi ini ẹngwa dudu ra ụra nị. Ọzọza vị ana ra ụra anị, dị ụra ọzọza rẹ nyị iruvo nị. 6Ijosẹẹhụ mè ve hee wa ẹnẹnẹ ịhị ọnọọ, di o re ka ẹngụ ẹnị ẹyịva ẹ sị và hi nị. 7Di Ijosẹẹhụ va họ̀ wa ka, sị ẹ vẹ dị ẹ maanị vara eyihi ajịnị? 8Dị ẹ ka ẹnị ệ ra ụra, ẹnị ẹ yi re ọza kà iruvo anị yị ẹnị. Di Ijosẹẹhụ kà Ohomorihi kẹnẹ oō yẹ iruvo ụra nị. Ẹ kà ụra ẹnị ẹnịnị ra yị ọnị.

9Dị ohirẹsụ ọza anaā ká echee yị ohinọyị kà ụra anị yị Ijosẹẹhụ dị ọ kà ọnị ộ ra ụra ka ọchị anaā hị́ ịvayịnị yà ọvịdị anị. 10Ọ kà ọchị ọnọọ ộ ha avọ́ ẹẹta. Avị anị mẹ̀ yị hā kẹnẹ, dị aa tụ́, dị ẹtụtụ si vi nị. 11Dị ọnị vana sị ako Ihwarawo rị ụvọ, dị ọnị sị ẹtụtụ ẹnẹẹ dị ọnị kama a hi ịnị ako Ihwarawo dị ọnị sị na yị Ihwarawo nị. 12Di Ijosẹẹhụ kà a yọ ka iruvo ụra anị yị: Ọ kà avọ́ ẹẹta ẹnẹẹ vị ana jẹẹ yị ẹkụhị ẹẹta. 13Ọ kà ọ̀ọ naa mẹ ẹkụhị ẹẹta, ohinọyị vaa sị ọ hụụnị ẹngwa, dị ọ và a nọ udi anị ịyẹẹyẹ. Dị ọ raa sị ako ohinọyịị ká echee yọ anka ọ mẹ̀ vịdị mẹ ịnị ụmẹ ọnị ọ sịị ká echee yọ. 14Di Ijosẹẹhụ ka aarịhịnị ịjị ọ̀ọ maanị ne si zoza yọ, ọ̀ navọ ọ tamayị anị. Ọ kà ọ navọ kwogwo ọ kà ịrẹyị anị yị ohinọyị dị ọ̀ sị ọnị hụụnị ẹngwa ịzẹnị. 15Ọ kà ịnị ẹtẹ Anihiburu a sị ụkata za ọnị hụrẹ vẹ nị. Ọ kà ọnị mè re tù ịzẹnị, ẹ yị nyị ịsị ọnị mẹ dị a sị ọnị va tụ́ ịnị ẹngwa ọọhẹ kẹnẹ nị.

16Ịjị ọga ọza anaā mẹ̀ ịsaa yị ohinọyị re ka iruvo ụra oni Ijosẹẹhụ kà ô zoza, dị ọnị rẹ kà ụra ọnị ọ ra yị Ijosẹẹhụ nị. Dị ọ ka: Ọnị ọ rẹ ra ụra ọnya. Ọ kà ọnị ọ ra ụra ka ọnị ộ si uji Ịbụrẹẹdị ẹẹta tụ́ ịrẹsụ. 17Ịnị uji ana yà ẹbẹẹba keekere, dị ịsa irenyi-irenyi ana a mẹ yị Ihwarawo yà ịnị anị nị. Ama di inomi nịnị vẹ dị ẹ va rị ọ ịrẹsụ anị nị. 18Di Ijosẹẹhụ ka, “Iruvo ụra anị yi, o. Ọ kà uji ẹẹta ẹnẹẹ vị ana jẹẹ yị ẹkụhị ẹẹta. 19Ọ kà ọ̀ọ naa mẹ ẹkụhị ẹẹta, ohinọyị vaa sị ọ hụụnị ẹngwa, dị ọ jị ọ ịrẹsụ, dị ọ sị ọ gẹ ọchị. Di inomi nịnị vẹ dị ẹ yaa rị uye anị.” 20Ịzẹyịza ịhyẹgwẹta anị ana vị ẹkụhị oni ohinọyị aa rị eche ẹkụhị ana a sị ma a, dị ọ mẹ̀ ịsa yị avaba ezi ahụ anị nị. Dị ọ tụ́ na kụ́ ọza anaā ká echee yọ ọnịrị ọza anaā mẹ̀ ịsaa yọ hụụnị ẹngwa nị. Dị ọ kụ́ wa ve tù ezi ahụ anị nị. 21Dị ọ sị ọza anaā vịdịị ká echee yọ varẹma nọ udi anị, dị ọ rẹ kụkụ aa ká echee yị Ihwarawo nị. 22Di Ihwarawo na kù ọza anaā vịdịị mẹ̀ ịsaa yọ nị. Ụra ẹnịnị vị ana sẹ anka Ijosẹẹhụ mẹ̀ yị kà a yị wa. 23Ama ọga ọza anaā ká echee yị ohinọyị ọ rẹ vaa tamayị Ijosẹẹhụ, ayị Ijosẹẹhụ ô hi ọ.

Currently Selected:

Oyinyima 40: EBTP

Highlight

Copy