Oyinyima 43

Ẹyịnyara Ijosẹẹhụ ẹnịrị Ịbẹnjamịnị ệ varẹma nọ Ijipiti

1Ụngwẹ aa kịị kụụ hu avọọ ịnị ẹtẹ Ijipiti. 2Ịjị Ijekọvụ ọnịrị aza anị sị akụ ana a na hị́ hụrẹ Ijipiti vẹ rị ta, dị kà a yii ezi anị ka, “Ẹ va na rẹ na hị́ akụ chee va yị ẹnị.” 3Di Ijuda tụ́ ohi dị ọ ka, “Ọnọrụ ọnọọ vị ana nyayịnẹ hú ẹnị ụvọ dị ọ ka à yị vị ọhụva ẹnịnị saasa ẹnị vẹ, asị ẹnị kụkụ jị ahụ ngụ ịda ẹnịnị. 4Ọ kà ọ̀ọ zẹẹ ka ọhụva ẹnịnị ọ̀ saasa ẹnị na, dị ẹnị na hị́ ịsa va yọ. 5Ọ kà ama ọ̀ọ ka asị ọ nọ, ẹnị ẹ yị vaa na, ka, agụvị ka ọnọrụ ọnọọ o re è hú yi ụvọ ka asị ẹnị kụkụ jị ahụ ngụ ịda anị à yị vị ẹnị sị ọhụva ẹnịnị vẹ.” 6Di Ijekọvụ ka, sị ọ mẹ̀ ọnị aanị? Sị ẹ vẹ dị ọ kà a yị ọnọrụ ọnọọ ka ẹnị ệ nyị ọhụva ọsa. 7Di e tụ́ ohi dị ẹ ka, Ọnọrụ ọnọọ vị ana họ̀ ẹnị use ịrẹyị ẹngụ ẹnịnị chẹẹchẹ-chẹẹchẹ ka ọnị ọ yẹ ẹnị ẹnị vị. Ọ rẹ họ̀ ẹnị use anda ẹnịnị. Ộ họ̀ use ka ada ẹnịnị wáá yị yà ẹhẹ. Dị ọ rẹ ka ẹnị ẹẹ nyị ọyịnyara ọsa. Ẹ ka avaba ịsị ẹnị kà yọ vị ohi ịrẹyị ọnị ọ họ̀ ẹnị use. Ẹ ka ẹnị ẹ yị hyakụ ro o vụrụ-vụrụ ka ọ vaa kà a ka ẹnị ẹ sị ọyịnyara ẹnịnị za ẹnị aa vaa na. 8Di Ijuda kà a yị ada anị dị ọ ka, “Ọ jẹẹ ọnịrị ozi ọnọọ ọ̀ zị, dị ẹnị ẹẹ na booro aanị, ka à yị vị avọọ vị ụngwẹ aa wụ ẹnịrị ọ ne beri ezi ẹnịnị hi ịzẹnị nị. 9Dị ọ rẹ ka ọnị ọ sị ẹngụ anị jẹẹ. Àa nyị ịsị ẹ mẹ̀ ẹ ọ̀ọ za ọnị. Ọ kà ọnị ọ yị sị ọ vavẹ va yọ, dị ọnị ọ sị ọ ve chire e ụvọ dị ọ yẹ ka ọnị ọ nyị ịvị anị pooro nị. 10Dị ọ rẹ ka, à yị vị ẹnị ẹnị maanị ee tụra ẹtẹ aanị, ẹnị yaanị zị na vavẹ tù ụpẹ ẹẹva da.” 11Dị ada ẹnịnị tụ́ wa ohi dị ọ ka, “Ẹhẹẹ, àa vị avọọ yọ, â nyị ịsị a vọrọ ka ẹ mẹ. Ọ kà ẹ̀ Sị ịnị ẹtụtụ ene zoza hu ịnị ẹtẹ ọnọnị za, dị ẹ sị na mẹ ọnọrụ ọnọọ ẹyịza. Dị ọ rẹ ka Ịnị ịsa ẹnẹ ẹ yaa sị, ẹ̀ sị ẹhụ, ọnya ọchị ana sị wụ ozoza irenyi-irenyi ne beri ẹtụtụ ọchị ipisitachiyo ọnịrị arịmọndị naa yọ. 12Ọ kà dị ẹ̀ varẹma sị ẹkẹhị oze ẹẹva za, ọ ka ẹ̀ Sị ẹkẹhị ana a varẹma tụ́ ịnị achuchu ẹnịnị za, ka ọ zụ hwọọ ahịka vi e nyee eyi nị. 13Dị ẹ̀ sị ọhụva ẹnịnị, dị ẹ̀ kwẹẹtẹ dị ẹ̀ẹ nọ ịda ọnọrụ ọnọọ. 14Dị ọ ka Ohomorihi Ochẹtẹẹngụ ọ̀ navọ ọ̀ vayị ẹnịnị. Ọ̀ navọ ọ̀ zẹẹ ka ọnọrụ ọnọọ ọ̀ hụrẹ ọhụva ẹnịnị ọnịrị Ịbẹnjamịnị, ụvọ vavẹ. Ọ kà àa vị aanị yọ, àa vi ezi anị ta nị, vị ẹ ta avọọ nị.” 15-16Ịzẹyịza dị ẹ kụ́ ịsa ẹnị ẹ yaa sị naa mẹ ọnọrụ ọnọọ ẹyịza, dị ẹ rẹ sị ẹkẹhị oze ẹẹva za, dị ẹ sị Ịbẹnjamịnị vaka ẹngụ di e si hu aa nọ Ijipiti nee tu Ijosẹẹhụ nị. E mè tù ịzọọ di Ijosẹẹhụ re ẹnịrị Ịbẹnjamịnị dị ọ kà a yi ezi ahụ “ana si eyi pe irehi anị” dị ọ ka: ẹ̀ kụ́ aza ẹnẹẹ nọ ini eehi ịda anị. Dị ọ rẹ ka ọ̀ na sị ịsụpa ọnya dị ọ̀ wụ̀ ọ, dị ọ̀ sị mẹ̀ ịsa. Ọ kà ọnịrị aza ẹnẹẹ ẹ dudu vaa rị ịsa ụmẹ ọọdụ ajịnị nị. 17Di ozi ahụ ọnọọ na mẹ̀ ịsa oni Ijosẹẹhụ kà yọ, dị ọ kụ́ aza ẹnẹẹ nọ ini eehi Ijosẹẹhụ nị. 18A mẹ̀ kụ́ aza ẹnẹẹ nọ ini eehi Ijosẹẹhụ, dị angwa ee hi wa nị. Dị ẹ ka: áá yẹ ka agụvị ẹkẹhị ịhyọọ ana a sị varẹma tụ́ ini achuchu ẹnịnị a sị kụ́ ẹnị vẹ ịzẹnị aanị nị. Ẹ ka ee sì ka ọnị ọ za ẹnị dị ọ kụ́ ẹnị mẹ ọrịhị anị, dị ọ̀ rẹ dọ ẹnị ịkẹrịkẹtẹ ẹnịnị. 19Dị e ne tù ozi ahụ Ijosẹẹhụ, dị ẹ jẹẹ enoze di e yee pè e kà ịrẹyị nị. 20Dị ẹ ka, “Nda, ẹnị ẹ vịdị vẹ ịzẹnị va hị́ ịsọyịrị ịhyọọ. 21Ẹnị màa na dị ẹnị tù ịzị eē chi dị ẹnị nā achuchu ẹnịnị irenu nị. Di ọzọza ne tù ka ẹkẹhị anị yà ịnị achuchu anị nị, ọ yị hyakụ jị ha. Aarịhịnị ọnị ẹnị sị vavẹ aanị nị. 22Ẹ ka ẹnị ẹ rẹ sị ẹkẹhị ọsa rị ụvọ vẹ ka ẹnị ẹ̀ sị va hị́ ịsọyịrị. Ama ẹnị ẹ yị yẹ ọza ana sị ẹkẹhị ẹnịnị varẹma tụ́ ịnị achuchu ẹnịnị.” 23Di ozi ahụ Ijosẹẹhụ ọnọọ tụ́ ohi dị ọ ka, “Và ayị nẹtẹ, asị u hí angwa nịnị. Ẹyịyara ahịka Ohomorihi awụ nịnị ọnịrị Ohomorihi ada awụ nịnị ọ sị ẹkẹhị va tụ́ ịnị achuchu awụ nịnị nị. Ẹmaa dọ ẹkẹhị ọnị ụ vịdị sị vẹ nịnị.” Dị ọ na dị ọ na sị Isimiyọnị jịnẹ va yị wa nị. 24Ozi ahụ ọnọọ ọ raà kụ́ aza ẹnẹẹ nọ ini eehi Ijosẹẹhụ dị ọ ká enyi yị wa ka ẹ̀ sị nyịna ahụ nị. Dị ọ rẹ sị ịsọyịrị yị ịkẹrịkẹtẹ ẹnịnị nị. 25Aza ẹnẹẹ mẹ̀ yà ịda Ijosẹẹhụ, a ka a yi wa ka ọ vaa vẹ ịzọọ ụmẹ ọọdụ, dị ẹ vaa rị ịsa ịzọọ. Dị ẹ sị ịsị ẹ sị aa vaa mẹ̀ ẹ ẹyịza di e tenyi ọ tịtẹ nị.

26Ijosẹẹhụ mẹ̀ va sị ngụ ini eehi, dị ẹ tana tura ẹtẹ kú ọ, dị ẹ sị ẹyịza ẹnị ẹ sị naa yọ ngụ eehi ne tù ọ nị. Dị ẹ tana tụra ẹtẹ dị ẹ kụ́ ọ nị. 27Di Ijosẹẹhụ họ̀ wa ka ẹ́ẹ́ da hi nị. Dị ọ ka, “Nda ọnọọ ẹnị ọ ka o si bo yị yà ịzọọ? Ọọ da hị́.” 28Dị ẹ ka, “Ada ẹnịnị yị yà ịzọọ, ộ da hi.” Dị ẹ rẹ ka ịrẹsụ hi, dị ẹ kụ́ ọ nị. 29Di Ijosẹẹhụ kana eyi di o re Ịbẹnjamịnị ọyịnyara anị nị. Di Ijosẹẹhụ ka, “Ọhụva awụ nịnị ọnị waa kà nịnị wáá yị?” Di ọ ka a yẹ ka, “Ozi emi, Ohomorihi ọ̀ navọ ọ̀ mẹ ọyịza wụ.” 30Di Ijosẹẹhụ wụsẹ ne sì aha ọnya ịzị ọ na yà dị aa jị òrèrè nị, agụvị ka ariro Ịbẹnjamịnị yà ịnị ayị anị ẹtẹẹtẹrẹ. Di Ijosẹẹhụ ngụ ịnị aku anị, di o ne sụ ùnè nị. 31Dị ọ na nyịna eyi anị dị ọ jịnẹ vẹ nị. Dị ọ sị vụrị dị ọ ka: ẹ̀ kụ́ ịsa vẹ nị. 32Dị a sị ịsa Ijosẹẹhụ yọ irenyi nị, dị a rẹ si ịsa aza anịị yị wa tụ́ aha irenyi nị. Dị ọ rẹ sị ịsa Anijipiti ẹnị ẹnịrịị aa rị ịsa tụ́ aha irenyi yị wa nị. Anijipiti ọnịrị Anihiburu ẹ mā rị ịsa aha ọnya. Enyisi ọ vị yị Anijipiti nị. 33Ijosẹẹhụ mẹ ka ẹ̀ yaayịtẹ anka ẹ mẹmẹ vị ọzọkụ yị ẹngụ, Di e yee re ẹngụ nị, ẹhẹẹ, o si hi wa irenu. 34Di Ijosẹẹhụ ka à da ịsa anị na yị wa nị, dị ahịka ịsa Ịbẹnjamịnị ọ banyị hu ẹẹnị ana vọ nị. Ịsa anị ô huna ẹẹnịnị oze ẹẹhị. Di ẹnịrị Ijosẹẹhụ hú echee, e mè zụ hú kẹnẹ nị.

Currently Selected:

Oyinyima 43: EBTP

Highlight

Copy