Oyinyima 48

Ijekọvụ ộ mẹ̀ aduwa yi ezi Ijosẹẹhụ.

1Ẹkụhị ọnya dị a va kà a yị Ijosẹẹhụ ka ẹngụ aa zị ada anị nị. Di Ijosẹẹhụ kụ́ ezi anị ẹyịva, Ịmanasẹ ọnịrị Ehwireemi, di e si hu ee nee hee Ijekọvụ nị. 2Dị a na kà a yị Ijekọvụ dị a ka, “Ijosẹẹhụ ozi anị ộ vẹ ka ọnị ò ve hee eyi.” Ọ mẹ̀ vavọọ wụ́, di Ijekọvụ vụrị-vụrị kwẹẹtẹ yaayịtẹ ịnị aha ọyịsụ anị nị. 3#Oyn 28.13,14Di Ijekọvụ kà a yị Ijosẹẹhụ dị ọ ka, “Ohomorihi Ochẹtẹẹngụ ộ sị ẹngụ zụ̀ ọnị ọnị mẹ̀ yà Iruzi ịnị ẹtẹ Ikanaani dị ọ mẹ̀ aduwa mị nị. 4Dị ọ ka ọnị vaa mẹ ka ọnị ọ̀ ma ozi rụrụ ẹtẹẹtẹrẹ. Ọ kà ezi anị ẹ vaa vi ohiku anẹkụra ọrụrụ-ọrụrụ nị. Ọ kà dị ọ rẹ ka ọnị vaa sị ẹtẹ ọnọọ yị ezi anị ịrẹma-ịrẹma dị ahịka ẹnị ẹ kụkụ nyị pooro zịna-zịna nị. 5Dị ọ ka éē re ezi ẹẹva ọnị ọ ma ịnị ẹtẹ Ijipiti dị ọnị vavẹ aanị, ọnị ọ nyị ẹnẹẹ nị. Ọ kà ọnị ọ nyị Ehwireemi ọnịrị Ịmanasẹ anka ọnị mẹ̀ rẹ nyị Irubẹnị ọnịrị Isimiyọnị nị. 6Ọ kà ezi ọnị Ijosẹẹhụ ọ̀ọ vana ma ịrẹma ẹnẹẹ ẹ vaa vị aanị nị. Ọ rẹ ka ịnị ẹtẹ ana àa sị yị ẹnẹbẹnị ẹnịnị ẹnị rẹ vaa nyị ẹtẹẹ tụ́ nị. 7#Oyn 35.16-19Ọ kà agụvị ọnya anị ọnị vavọọ sị kà nị. Ọ kà ọnị mẹ̀ hụrẹ akẹbẹẹba Imesopotamiya aa vẹ Irechẹrị ve sú ịnị ẹtẹ Ikanaani nị. Ịrẹyị ọnọọ ộ zị ọnị ẹtẹẹtẹrẹ. Ọ kà ịjọnọọ ẹnị aa vaa ngụ Ehwirati. Dị ahịka oze Ehwirati ọnị ne e tụ́ nị. Ehwirati ọnọọ a kụkụ aa hị́ Ịbẹtịrẹhẹmị booro aanị nị.”

8Ijekọvụ ọ sị vịra, o yi kuku re ẹtẹ ẹtẹẹrẹ. Ijekọvụ mè re ezi Ijosẹẹhụ dị ọ ka, “Ẹnẹ vị ẹnẹnị?” 9Di Ijosẹẹhụ ka, “Nda, ezi emi yọ nọ. Ịzẹnị Ohomorihi yà sị wa yị ọnị nị.” Di Ijekọvụ ka, “Aarịhịnị ẹ̀ kụ́ wa vẹ ịzẹnị dị ọnị ọ̀ mẹ̀ aduwa yị wa.” 10Di Ijosẹẹhụ kụ́ ezi anị kà pè e nị. Di Ijekọvụ hara wa kú ayị, dị o kú wa irenu nị. 11Di Ijekọvụ kà a yị Ijosẹẹhụ dị ọ ka, “Ọnị o yi ro ka ọnị kuku vee re e. Ama Ohomorihi ọ va raà mẹ ka ọnị ọ̀ hyakụ re ezi anị bẹẹ.” 12Di Ijosẹẹhụ kụ́ ezi ẹnẹẹ hụụnị ahụ Ijekọvụ nị. Di Ijosẹẹhụ tana tụra ẹtẹ yị ada anị, 13dị ọ jị ụvọrị chire Ehwireemi dị ọ sị ọ tụ́ eyi ụvọha Ijekọvụ nị. Dị ọ rẹ jị ụvọha chire Ịmanasẹ dị ọ sị ọ tụ́ eyi ụvọrị Ijekọvụ nị. Dị ọ vavọọ kụ́ ẹnị ẹyịva tere pè ada anị nị. Ijekọvụ mẹ̀ mẹ̀ aduwa yị Ehwireemi ọnịrị Ịmanasẹ. Ijosẹẹhụ ọnị ụvọta ọ rẹ mẹ̀ aduwa yị avọọ nị. 14Di Ijekọvụ tana ụvọrị anị dị ọ sị tụra ịrẹsụ Ehwireemi ana vi ozweyi nị. Dị ọ rẹ tana ụvọha anị dị ọ sị tụra ịrẹsụ Ịmanasẹ ana vị ọzọkụ nị. Avọọ Ijekọvụ mẹ̀ và ụvọ anị para ẹngụ tụra wa ịrẹsụ nị. 15Di Ijekọvụ mẹ̀ aduwa yị Ijosẹẹhụ dị ọ ka, “Ohomorihi, oni ohiku anị Abụrahamị ọnịrị Ayiziiki hẹkẹ, Ohomorihi ana zụ̀ ọnị oze pooro ve tù ajịnị, 16anggẹẹrị ọnọọ ana dọ ọnị ha hụụnị avaba ịsa odivi, ọ̀ navọ kwogwo ò zee yi ezi ẹnẹnị. Ọ̀ navọ kwogwo a vaa sị waa tamayị ịrẹha anị ọnịrị ohiku anị nịnị ana vị Abụrahamị ọnịrị Ayiziiki. Ọ kà ọ̀ navọ ẹ va ma ozi rụrụ, dị ahịka vị ẹ gwẹtẹ ịnị ẹhẹ kẹnẹ nị.” 17Ijosẹẹhụ mè re ka ada anị ộ sị ụvọrị tụra Ehwireemi ịrẹsụ, ọ yị vavọọ hine e. Dị ọ sị ụvọ ada anị ka ọnị ọ̀ sị ọ hụrẹ ịrẹsụ Ehwireemi dị ọnị ọ̀ sị tụ́ ịrẹsụ Ịmanasẹ nị. 18Di Ijosẹẹhụ kà a yị ada anị dị ọ ka, “Nda, eyiye de; ọsọnị ọ vị ọzọkụ nọ, ọ̀ sị ụvọrị anị tụra a ịrẹsụ.” 19Ama ada anị ô yi, dị ọ ka, “Ọnị ọ̀ yẹ kẹnẹ ozi emi, ọnị ọ yẹ. Ịmanasẹ ọnị rẹ vaa vara ẹkụra ọnya, dị ọnị rẹ nyị ụbanyị. Ama ọhụva anị ọ vaa banyịị hu ọ nị. Irima ezi anị vaa vara anẹkụra ọrụrụ-ọrụrụ.” 20#Ihib 11.21Di Ijekọvụ mẹ̀ aduwa yị wa ịhị ọnọọ nị, dị ọ ka, “Anisirẹrị vị ana vaa mẹ̀ aduwaa yị ẹngụ dị ẹ ka Ohomorihi ọ̀ navọ ò zee wu anka o mè zee yị Ehwireemi ọnịrị Ịmanasẹ.” Avọọ ọ mẹ̀ sị Ehwireemi tụ́ ọvịdị Ịmanasẹ nị.

21Di Ijekọvụ va hị́ Ijosẹẹhụ dị ọ ka, “Ọ̀ yẹ o ka ọnị ee vee sú. Ama Ohomorihi vaa jẹẹ ịrẹma anị, dị ọ sị ọ varẹma nọ ịnị ẹtẹ ohiku anị nịnị. 22Ọ kà ọnị ộ da tụ́ ịnị ẹtẹ anị huna ọnị ọnị sị yị ẹnẹbẹnị anị nịnị. Ẹtẹ ọnọọ ọ vị ẹtẹ ịnị ataba ọnị ọnị dọ hụụnị ụvọ Anamọrị nịnị ịnị ịrẹkụ nị.”

Currently Selected:

Oyinyima 48: EBTP

Highlight

Copy