Ịjọọnụ 11

Ịrasarụsị ô sú

1 # Irk 10.38,39 Â nyị ọnọrụ ọnya aanị ana aā hị́ Ịrasarụsị, ẹnẹ ẹngụ aa zị. Ẹkụra Ịbẹtanị ọ ra nị. Ịzọọ ọ vị ẹkụra Imeri ọnịrị onyeyiza anị Ịmata nị. 2#Ịjọ 12.3Imeri ọnọọ ọ vịdị va sị eturare sisi Ananyị yị, dị aa sị ẹyị aanịị nyee yọ ahụ nị. Ẹnẹbẹnị anị ẹ́ngụ aa zị aanị nị. 3Dị ẹyịnyara Ịrasarụsị anẹẹ tụ́ na kà a yị Ijeesu ka, “Ẹngụ aa zị ọta awụ ọnị ụ maanị sì ịrẹyị anị, o.” 4Íjeesu mẹ̀ vavọọ wụ́, dị ọ ka, “Ẹ yị vị ẹngụ isu aa zị Ịrasarụsị aanị. Ẹngụ ọnọnị vị ana vaa mẹ ka aza è re igirima Ohomorihi. Aza rẹ vaa hụ agụvị avọọ sị igirimaa yị Ozi Ohomorihi.”

5Ijeesu ô sì ịrẹyị Ịmata ọnịrị ọyịnyara anị ne beri Ịrasarụsị. 6Íjeesu mẹ̀ wụ́ ka ẹngụ aa zị Ịrasarụsị, dị ọ yị yà ịzọọ yà mẹ ẹkụhị ẹẹva tụ́ ọọ nị. 7Ịrẹma ọnọọ, di Ijeesu kà yị ezirẹma anị ka ẹ̀ vẹ, dị ẹnị ẹ̀ rẹ nọ Ijudiya nị. 8Dị ezirẹma anị ka, “Ọga, wáá kụkụ yẹ ka Aniju nịnị vị ene ee sì ka eni è ne wu ịrẹta ịzọọ ịhị ọnọọ? Ụ kụkụ raa nọ ịzọọ?” 9Dị Ijeesu ka, “Agogo ana yà ịnị ụmẹ dị ọyị ọ̀ ta, vị ẹwụrẹva. Agụvị avọọ, ọza ana àa zị ụsẹ ụmẹ ọọdụ, ọ yị vaa tụ́ ahụ, agụvị ka ee re ẹtẹ. 10Ama aza ana àa zị ụsẹ ịrahụ, vị aa tụ́ ahụ nị, agụvị ka ẹnịnị ẹ yị nyị ịra.”

11Ịjị Ijeesu vavọọ sị kà, dị ọ rẹ kà a yị wa ka, “Ịrasarụsị ọta ayị aa sụ ara. Ama maa na, dị ma na ha a ara.” 12Dị ezirẹma anị ka, “Ananyị yị, àa vị aa sụ ara nị, ẹngụ anị vaa nịya.” 13Ịsị Ijeesu sị ịrẹyị ọnọọ kà, ọ vị ka Ịrasarụsị ô wusu nị, ama dị ezirẹma anị ene ro o ka ara obooro íjeesu aa kà nị. 14Dị Ijeesu kụkụ kà a yị wa chapaa ka, “Ịrasarụsị ô wusu nị. 15Maa jẹ agụvị awụ nịnị ka mẹ yị yà ịzọọ, agụvị dị ụ wa zụ sị ayị tụra mị nịnị. Ama vẹ ye ne tù ọọ nịnị!” 16Dị Ịtọmọsị ana aā hị́ Ejima kà a yị ezirẹma ana vọ ka, “Vẹ ya saasa a na, dị ẹyị rị ọọ ò ne sú nịnị!”

Ijeesu ọọ̄ mẹ̀ ka ọza ọ̀ ha hụụnị isu nị.

17Ịjị Ijeesu naa vẹ, o ve tù ka ọ sị mẹ ẹkụhị ẹẹna ene e ne oku Ịrasarụsị. 18Ịbẹtanị ộ gụrị Ijerusarẹmị, ẹhụụ ịmẹẹrị ẹẹva avọọ ọ vị nị. 19Aniju ọrụrụ-ọrụrụ ệ vẹ ịdị Ịmata ọnịrị Imeri ka ẹnị ẹ̀ na sị ayị ẹnịnị nẹtẹ agụvị ẹnẹbẹnị ẹnịnị ene sú. 20Ímata mẹ̀ yị wụ́ kẹnẹ ka Ijeesu aa vẹ, dị ọ na gẹrị ọọ nị, di Imeri ọnị yà ini eehi nị. 21Dị Ịmata kà a yị Ijeesu ka, “Ananyị yị wàa yaanị yà ịzẹnị, ẹnẹbẹnị amị ọ yị yaanị sú, ọ! 22Ama mâ yẹ ka booro aanị, ịsị ụ wàa dá ịpẹ ka Ohomorihi ọ̀ mẹ wụ kẹnẹ, ọ raa mẹẹ wụ nị.” 23Dị Ijeesu kà a yọ ka, “Ẹnẹbẹnị awụ vaa haa hụụnị isu.” 24Dị Ịmata ka, “Mâ yẹ de, ka ọ vaa haa hụụnị isu ịnị ẹkụhị ọdịrẹma ana avaba aza vaa haa hụụnị isu.” 25Dị Ijeesu kà a yọ ka, “Ẹmị ọnọnị ọọ̄ ha ọzaa hụụnị isu, dị mị rẹ mẹ ka ọza ọ̀ yàra nị. Ọza ana àa sị ayị tụra mị, ọ̀ọ daka sú, ọ vị vaa yàra pooro zịna-zịna. 26Ọza ana àa vavọọ yàra, o mē vene kuku sú paa, agụvị ka ọ raà sị ayị tụra mị. Wáá dọ ịrẹyị ọnọnị wụ́?” 27Di Ịmata ka, “Hịịn, Ananyị yị, mâ dọ wụ́ ka ẹwa vị Ikirisiti ọnọọ ana vị Ozi Ohomorihi ana a kà a ka ọ vaa vẹ ẹhẹ nị.”

28Ịjị Ịmata vavọọ sị kà, di o si hu aa na nị. Di o were na hị́ Imeri ọhụva anị, dị ọ kà a yọ ka, “Ọga ộ vẹ, aa hị́ wụ.” 29Ímeri mẹ̀ vavọọ yị wụ́ kẹnẹ, dị ọ wụsẹ kwẹẹtẹ, di o ne tù Ijeesu nị. 30Ịjọnọọ Ijeesu ọọ̀ yị va ngụ ịnị ẹkụra; ịzị Ịmata na gẹrị ọọ, ọ yị yà nị. 31Ịjị Aniju nịnị ene hi ini eehi aa sị ayị Imeri nẹtẹ, vavọọ re ka Imeri ọ wụsẹ kwẹẹtẹ jịnẹ nọ ẹhẹ, dị ẹnị raa dụ ọọ na nị. Dị ẹnịnị ka vị aa naa jị òrèrè ini ikuta nị.

32Ịjị Imeri tù ịzị Ijeesu yà, di o re e, dị ọ và ku ẹtẹ ágada anị nị, dị ọ ka, “Ananyị yị, wàa yaanị yà ịzẹnị, ẹnẹbẹnị amị ọ yị yaanị sú, ọ.” 33Ijeesu ô re, Ímeri màa jị òrèrè, dị Aniju ana saasa a vẹ ẹnị raa jị òrèrè bẹẹ. Ịrẹyị ọnọọ ộ kanyị Ijeesu ẹnẹmẹhị, dị ọ zị ọọ ẹngụ ẹtẹẹtẹrẹ nị. 34Ijeesu ộ họ̀ wa ka, “Ịzị u ne e tụ́ nịnị?” Dị ẹ kà a yọ ka, “Ọga, ve re e!” 35Ẹgọ ộ jị Ijeesu ụvọ. 36Dị Aniju nịnị ka, “Wée re, ộ da sì ịrẹyị anị kẹnẹ!” 37Dị aza ẹnyị ẹnịnị ẹnị ka, “Ọnọrụ ọnọnị ana há ogweyi ọnọọ eyi, aanịka ọnị ọ yị daka zụ mẹ ka asị ọnọrụ ọnọọ yaanị sú?”

Ijeesu ô ha Ịrasarụsị hụụnị isu

38Ịrẹyị ọnọnị ọ rẹ kanyị Ijeesu ayị ẹnẹmẹhị, dị ọ nọ ini ikuta ọnọọ nị. Ụsị ana a chị tụ́ ịnị ịrẹta ịzọọ vị nị, dị a sị ịrẹta gu ọọ irenu nị. 39Dị Ijeesu ka, “Sị ịrẹta ọnọọ kwooze nịnị!” Dị Ịmata, ọyịnyara ọza ene sú aanị ka, “Ho! Ananyị yị, aa dà agụ booro aanị, ọ! Ọ sị mẹ ẹkụhị ẹẹna ene e hụrẹ ne e!” 40Dị Ijeesu kà a yọ ka, “Aanịka mẹ yị vịdị sị ọọ kà a wụ ka u vee re igirima Ohomorihi, wàa sị ayị tụra mị?” 41Dị ẹ sị ịrẹta ọnọọ kwooze nị. Dị Ijeesu sị eyi anị tụ́ ẹba, dị ọ ka, “Ọga, mâ kụ́ wụ avọ, agụvị ka wâ sị ụtọ tụ́ ịnị ịrẹyị amị. 42Ma rẹ yẹ ka ụụ̄ sị ụtọọ tụ́ ịnị ịrẹyị amị pooro nị Ọsọnị vị ọnị maa kà, agụvị aza ana jẹẹ ịzẹnị aanị, dị ẹ̀ zụ dọ wụ́ ka ẹwa tụ́ mị vẹ ẹhẹ nị.” 43Ịjị ọ vavọọ sị kà, di o nowu tụ́ ẹba nị, dị ọ ka, “Ịrasarụsị! jịnẹ vẹ!” 44Dị ọza ọnọọ ene vịdị wusu jịnẹ vẹ, a mẹ̀ yị sị ịta sụ́ ọ ahụ ọnịrị ụvọ nị. Eyi anị vị ana a rẹ sị ịta para. Dị Ijeesu ka, “Ngwa a nịnị, dị ọ̀ọ na!”

45Aniju ọrụrụ-ọrụrụ ana vẹ ịdị Imeri, di e re ịsa oni Ijeesu mẹ, ệ sị ayị tụra a.

Â gẹ eyi Ijeesu

(Imt 26.1-5; Ịmk 14.1-2; Irk 22.1-2)

46Dị aza ẹnyị ẹnịnị ẹnị si hu aa nọ ịdị Anihwarisi nịnị, dị ẹ na kà a yị wa ịsa oni Ijeesu mẹ nị. 47Dị ohirẹsụ ẹbanyị irehi Ohomorihi ọnịrị Anihwarisi nịnị kụ́ gụ, dị ẹ ka, “Sị a vọrọ ka ya mẹ? Ọnọrụ ọnọnị aa mẹ̀ ụkọrọ apọtẹrẹwa ọrụrụ-ọrụrụ aanị nị. 48Yàa maanị yị na a vọ, vị avaba aza aa dọ ọ wụ́ nị. Dị Aniroomi nịnị vẹ, dị ẹ va chaka irehi Ohomorihi ayị, dị ẹ wụ̀ avaba ayị và ha.” 49Â nyị ọza ịnya ẹnịnị ana aā hị́ Ikayahwasi, ọnị ọ vị ohirẹsụ ọbanyị irehi Ohomorihi ịrayị ọnọọ nị. Dị ọ kà a yị wa ka, “Ẹ yị nyị ịsị ụ yẹ nịnị vụrụ-vụrụ. 50Wáá yẹ nịnị ka â vọrọ ka ọza ịnyara òsú yị avaba aza. Ọnọọ ọ dahi hu ka à wụ̀ avaba anẹkụra nị.” 51Ẹ yị vị ọnịrị eyi anị ọ kà ịrẹyị ọnọnị. Ọnị ọ vị ohirẹsụ ọbanyị irehi Ohomorihi ịrayị ọnọọ nị; agụvị avọọ aa kà ịsẹ ka Ijeesu vee súu yị avaba anẹkụra nị. 52Ẹ yị rẹ vị ịrẹyị ẹnịnya kẹnẹ, ama ka ọ rẹ vaa kụ́ avaba aza Ohomorihi ana gara hi avaba aha gụ tụ́ aha ọnya.

53Hụrẹ ịhị ọnọọ dị ọdọvịdị Aniju nịnị aa gẹ eyi ka ẹnị ẹ̀ wụ Ijeesu nị. 54Agụvị avọọ Ijeesu ọ yị kụkụ zị ụsẹ chapaa ịnị akakana Aniju nịnị. Dị ọ hụụ ịzọọ, dị ọ nọ ẹkụra ọnya aanị ana gụrị ịnị avị, ana aā hị́ Ehwireemi nị. Dị ọnịrị ezirẹma anị na yà ịzọọ nị.

55Eche Aniju ana aā hị́ Eche Ọyịparahu ee vee tù. Dị aza ọrụrụ-ọrụrụ hụrẹ ẹkụra ẹnịnị, dị ẹ hịrẹ nọ Ijerusarẹmị ka ẹnị ẹ̀ na mẹ̀ ido ọyị mẹ ẹngụ ẹnịnị nị (anka ọda mẹ̀ kà a), di eche ò ve tù. 56Aza ee sì Ijeesu. E mè hi ini irehi Ohomorihi, dị ẹyaa kà a yị ẹngụ ka, “Si u ro nịnị? Wéé ro ka ọ vaa vẹ ini eche nịnị?” 57Ohirẹsụ ẹbanyị irehi Ohomorihi ọnịrị Anihwarisi nịnị ệ vịdị sị ọda mẹ ka àa nyị ọza ana yẹ ịzị Ijeesu yà, ọ̀ va kà a, agụvị dị ẹnị ẹ̀ zụ na za a.

Currently Selected:

Ịjọọnụ 11: EBTP

Highlight

Copy