Ịjọọnụ 13

Ijeesu ộ nyịna ahụ ezirẹma anị

(Irk 22.24-28)

1Ọ sị vọ ka ụhwọọ aa rị Eche Ọyịparahu nị. Ijeesu ộ yẹ ka ụmẹ o si tù ọnị ọnị aa sịị hụụnị ẹhẹ, dị ọnị ọ̀ nọ ịdị Ada anị. Oō sì ịrẹyị aza anị ene hi ịnị ẹhẹ. Booro aanị, o si tù ka ọ̀ sị zụ̀ wa ịzị o sì ịrẹyị ẹnịnị na za.

2Ijeesu ọnịrị ezirẹma anị vị ana aa rị ịsa oruva. Echu ọ raà sị tụ́ ịnị ayị Ijudasi Isikarịyọtị ozi Ịsayịmọnị ka ọ̀ sị Ijeesu chire ọnịvị anị ụvọ. 3Ijeesu ộ yẹ ka Ada anị ọ raà sị avaba ịsa chire ọnị ụvọ; ọ rẹ yẹ ka ịdị Ohomorihi ọ́nị hụrẹ vẹ, dị ọnị raa vàa nọ ịdị Ohomorihi nị. 4Dị Ijeesu kwẹẹtẹ hụrẹ aha ịsọyịrị, dị ọ ngwa awuru anị tịtẹ, dị ọ sị ịtawẹẹrị, dị ọ sị sụ́ ọtẹ nị. 5Ịjị ọ vavọọ sị mẹ, dị ọ ká enyi tụ́ ịnị ịchacha, dị aa sịị nyịna ezirẹma anị ahụ nị. Dị aa sị ịtawẹẹrị ọnọọ sị sụ́ ọtẹ avọọ nyee wa ahụ nị.

6Dị Ijeesu ve si tù ịdị Ịsayịmọnị Ipita nị. Dị Ipita ka: “Ananyị yị ụ wáá vị ana aa vaa nyịna mị ahụ nị?” 7Dị Ijeesu tụ́ ọ ohi, dị ọ ka, “Ịsị maa mẹ̀ aanị, wẹ yị yẹ booro aanị, ama ụ vaa yẹ, òo kù chee.” 8Dị Ipita ka, “Wẹ yị vaa nyịna ahụ amị paa!” Dị Ijeesu ka, “Mẹ̀ yị nyịna ahụ awụ, ẹ yị nyị ịsị ẹmịrị ẹwụ kụkụ vaa nyị ọyịmẹ̀ vabẹ.” 9Dị Ịsayịmọnị Ipita ka, “Ananyị yị, ẹ yị vị ahụ amị kẹnẹ ụ waa nyịna, nyịna ụvọ amị beri ịrẹsụ amị bẹẹ!” 10Dị Ijeesu ka, “Ọza ana àa sị enyi hụ, ọ sị nị; ahụ anị kẹnẹ a vọrọ ka ọ̀ kụkụ nyịna nị. Avaba awụ nịnị ọ sị nị, ẹ̀ yị vị ọza ịnya kẹnẹ.” 11Ijeesu ộ vavọọ kà, agụvị ka ọ sị yẹ ọza ana vaa sị ọnịị chire ọnịvị anị ụvọ. Agụvị avọọ, ọ kà a ka: Ẹ yị vị avaba ẹnịnị ẹ nị nị.

12 # Irk 22.27 Ịjị Ijeesu vavọọ sị ahụ ẹnịnị nyịna, dị ọ rẹ sị awuru anị di o chire e nị. Dị ọ na yaayịtẹ nị, dị ọ ka, “Wáá yẹ ịsị mị mẹ wụ nịnị aanị? 13Ụụ̄ hị́ mị ọga ọnịrị Ananyị yị nịnị; wâ kà a ẹtẹẹrẹ nịnị, agụvị ka ịsị mị vị ọ vị ọnọọ nị. 14Ẹmị, ọga awụ nịnị ọnịrị Ananyị-wụ nịnị, ọ̀ọ nyịna ahụ awụ nịnị, â vọrọ ka ẹwụ nịnị ọ̀ rẹẹ nyịna ẹngụ ahụ. 15Ma raà sị zụ̀ wụ nịnị ka waa mẹ ịsị mị mẹ wụ nịnị aanị. 16#Imt 10.24; Irk 6.40; Ịjọ 15.20Ịzẹyịza m maa kà a wụ nịnị nị, wâ yẹ ka ozida o mē huna ọga anị. Ọza ana a tụ́ ụtụ, o mē re huna ọza ana tụ́ ọọ ụtụ. 17Wa raà yẹ ịrẹyị ẹnẹnị nịnị. Ụ vaa daa jẹ nịnị, wàaa mẹ̀ ẹ nịnị. 18#Ahẹ 41.9Ẹ yị vị avaba awụ nịnị m maa kà, oo! Mâ yẹ aza ọnị mị nyị. Ama ịrẹyị ini Iwe Ohomorihi vaa sẹ, ộ kà a ka: ‘Ọza ẹnẹ ẹmịrịị aa rị ịsa ọnya, ọ kwẹẹtẹ tù mi nị.’ 19Mi jintu aa kà ịrẹyị ẹnẹnịị wụ nịnị dị ẹ̀ va mẹ, agụvị ịhị ẹ̀ẹ sị mẹ, dị ụ wa zụ dọ wụ́ nịnị ka ‘Ẹma vị Ẹmị’ nị. 20#Imt 10.40; Ịmk 9.37; Irk 9.48; 10.16Ịzẹyịza m maa kà a wụ nịnị nị, ọza tụra ọza ana àa dọ ọza ọnị mị tụ́ ụtụ, ẹmị ọ rẹ dọ avọọ nị. Ọza ana àa dọ mị, ọ rẹ dọ Ọza ana tụ́ mị vẹ ẹhẹ.”

Ijeesu ka a vaa sị ọnịị chire ọnịvị anị ụvọ

(Imt 26.20-25; Ịmk 14.17-21; Irk 22.21-23)

21Ịjị Ijeesu vavọọ sị ịrẹyị kà, ayị anị o si du. Dị ọ kụkụ kà a chapaa ka, “Ịzẹyịza m maa kà a wụ nịnị nị, ọza ịnyara awụ nịnị vaa sị mịị chire ọnịvị amị ụvọ.” 22Dị ezirẹma anị kana eyi sì ẹngụ, dị ẹyaa jị ọọ ịrẹka ka ẹnẹ aa kà nị. 23Ọnya ini ezirẹma ẹnẹẹ oni Ijeesu sì ịrẹyị anị vị ana yaayịtẹ gụrị Ijeesu gẹdẹ-gẹdẹ. 24Dị Ịsayịmọnị Ipita mi ọọ ụvọ ka ọ̀ họ̀ Ijeesu ka ẹnẹ aa kà nị. 25Di ozirẹma ọnọọ tere pe Ijeesu hu avọọ, dị ọ ka, “Ananyị yị ẹnẹ ọ vị kẹ?” 26Dị Ijeesu ka, “Ọza ọnị màa dà ịsa vá ẹpẹ, dị mị sị yị nị, ọnịị yọ.” Dị ọ dà ịsa vá ẹpẹ, dị ọ sị yị Ijudasi Isikarịyọtị ozi Ịsayịmọnị nị. 27Íjudasi mẹ̀ yị rị ịsa ọnọọ kẹnẹ, di Echu ngụ ọọ ayị nị. Dị Ijeesu kà a yọ ka, “Ịsị ụ wàaa mẹ, u jintu mẹ̀ ẹ!” 28Ịnị ẹnị ana aa rị ịsa ịzọọ, ẹ yị nyị ana yẹ ịsị ẹ vẹ dị ọ vavọọ kà yị Ijudasi. 29Ijudasi o sị eyi pe ẹkẹhị ẹnịnị nị, agụvị avọọ dị aza ẹnyị ẹnịnị ro ka vị Ijeesu kà a yọ ka ọ̀ na hị́ ịsị ẹnị vaa sị rị eche nị. Ẹ rẹ ka ẹ̀ yị vị avọọ, ahịka vị ọ ka ọ̀ sị ẹkẹhị yị onosiye nịnị nị. 30Íjudasi mẹ̀ sị ịsọyịrị ọnọọ dọ, dị ọ wụsẹ jịnẹ tụ́ ẹhẹ nị. Ịjọnọọ ẹtẹ o si hozi.

Ijeesu ộ mẹ̀ ọda ọwọọwa yị ezirẹma anị

31Ịjị Ijudasi si hu, dị Ijeesu ka, “Booro aanị, aa vaa sị igirimaa yị Ozi ọza onigirima, dị a rẹ sị igirima yị Ohomorihi ini oze anị. 32Àa raà zị oze anị sị igirima yị Ohomorihi, di Ohomorihi ọnị rẹ sị igirima ẹngụ anịị yọ. O yi vee kù dị ọ̀ vavọọ mẹ̀ ẹ. 33#Ịjọ 7.34Ẹwụ nịnị ezi emi, mẹ yị kụkụ vaa yà ịdị awụ nịnịị kù. U vee sì mi nịnị. Maa kà a wụ nịnị anka m mẹ̀ rẹ vịdị kà a yị Aniju nịnị ka, wẹ yị zụ nọ ịzị maa nọ nịnị. 34#Ịjọ 15.12,17; 1 Ịjọ 3.23; 2 Ịjọ 1.5Maa sị ọda ọwọọwaa wụ nịnị: wee sì ịrẹyị ẹngụ nịnị! M mè sì ịrẹyị awụ nịnị gẹdẹ-gẹdẹ, avọọ a mẹ̀ vọrọ ka wee sì ịrẹyị ẹngụ nịnị nị! 35Wèe sì ịrẹyị ẹngụ nịnị, avaba aza vaa yẹ ka ezirẹma amị ụ vị nịnị nị.”

Ijeesu ka Ipita vaa navọ ọnị

(Imt 26.31-35; Ịmk 14.27-31; Irk 22.31-34)

36Di Ịsayịmọnị Ipita họ̀ ọ ka, “Ananyị yị, ịzị ụ waa nọ kẹ?” Dị Ijeesu ka, “Ịzị maa nọ aanị, wẹ yị zụ dụ mị vẹ booro aanị; ama ụ vaa dụ mịị vẹ, òo kù chee.” 37Dị Ipita ka, “Ananyị yị, sị ẹ vẹ dị mẹ̀ yị zụ dụ wụ vẹ booro aanị? Mê tenyi ẹngụ ka me sú agụvị awụ.” 38Dị Ijeesu tụ́ ọ ohi ka, “Wê tenyi ẹngụ ka we sú agụvị amịị? Ịzẹyịza m maa kà a wụ nị, ụkọkọrọ o yi vee nowu, dị ụ wa kà a gụ ụpẹ ẹẹta ka wẹ yị yẹ mị.”

Currently Selected:

Ịjọọnụ 13: EBTP

Highlight

Copy